للمغتربين فى الأرض: الصورة دى بتذكركم شنو؟

سلام

الناس البره البلد، شنو الذكريات البتحركها الصورة دي:

وصورة زى دى:

سلامات يا خالد؛

بصفتي برا بلد سابق؛

فان هذه الصورة ما زالت تثير في اطفالي ذكريات
ماكدونالد و بالذات عندما انخفضت اسعاره نتيجة
لدعوات المقاطعة.

كنا كلما نمر بشارع واحد؛ تتعالى صيحاتهم؛
حتى كان ان انزلتهم مرة؛ و منها لم اعد
اسمع لهم صوتاً كلما مررنا من هنالك.

سلام يا ملاسى



قلت لى أولادك غشتهم الM الفى Lucky Meal دى؟

لكن عارف الغريبة Lucky Meal عندى أحسن من مكدونالدز

ياخى دا غشة، والساندويتش بتاعم زى العينة الطبية

الصورة دي حقتي
أنا مصوراها لمن كنت في السودان ومتذكراها كوييييييييس
ومتذكرة الكوشة الجنب الركشة الغلبني أشيلها من الكادر

بلا لكي ميل بلا ان لكي ميل
ما تشيل صور الناس تاني من غير ما تذكر المصدر, كويس؟

هوى يا دكتورة سيبي السلبطة

قال غلبنى أشيل الكوشة من الكادر

عارفة الصورة دى لقيتها بى Google فى موقع ما متذكروا لمن كنت بفتش لى صور من الخرطوم أعملها wallpaper عشان تلفت نظر ناس المكتب وأقشر عليهم

(لكن بالجد الصورة حقتك ولا طالعة بينا العالى ساى؟)

خالد جعفر
والله الصورة دي بتاعتي أديني عنوان الموقع أمشي أشاكلهم
الا الواحد يمضي في الصور عشان ما يلطشوها يعني؟
أنا نزلتها في بوست أول واحد اسمه: 22 يوم في الخرطوم
والبوست التاني ما متذكراه لاحد الزملاء هنا كان عن الركشات وعملت فيه مداخله
عارف لو كنت شلتها ما كنت زعلت لاكن حسي زعلانة انهم خاتينها في موقع تاني
انشا الله ما تنفعهم

سلام يا دكتورة،

لو الصورة حقتك ورينى سواق الركشة كان اسمو منو؟

لكن بالجد حقك على، وحقوق الطبع محفوظة طبعا

الغريبة قدر ما فتشت ليك الموقع الجبتها منو ما لقيتو

لكن لو الاسم الرفعتيها بيهو فيهو كلمة khartoum أو sudan يبقى فى احتمال أكون جبتها منك وما أخدت بالى

فى كل الأحوال حقك محفوظ وأنا آسف

أها.. Lucky Meal دا ما بيذكرك شى؟

أها دى كيف يا جماعة؟



(from www.worldcityphotos.org)

Quote: أها دى كيف يا جماعة؟

Two cranes, two high-rise buildings, part of a bridge
including asphalt pavement, some light poles, a median,
sidewalk and a parapet wall with a guardrail on it
No pavement markings on the bridge deck and
no speed limit sign

وبهذا فإن الصورة تذكرني يا خالد بدكتور زروق ودكتور عمر عبد النبي... وطبعا لم أنسى دكتور عبد الله إبراهيم حتى أتذكره

أحمد الريح

Khalid Osman Jaafar
ازيك ؟
صوره لكى ميل زكرتنى كميه من القصص و الناس.
وبالمناسبه كيف صحبك (الضب الطويل) اشرف ؟, و صل ليه سلاماااتى

Ahmed Alrayah
مبااالغه . ضحكت لمن ناس البيت استغربوا
و بينى و بينك د. عبد الله ابراهيم دائما فى البال و الخاطر

الاخ خالد / لك الود والتقدير
والله هيجت افينا كل المشاعر والواحد زي ما بقولوا جسموا لمن كش عديل كده من روعة كل شئ هناك واتذكرت ايام لا تنسى في تلك البقعة العزيزة جدا علينا .... وعلى العموم انا سيفت الصور ده عندي واتوفع منك تسمح لينا اذا اتطررنا لاستخدامها او نشرها في اي مكان او موقع .
مرة تانية احييك للصور الرايعة جدا واتوقع اشوف المذيد منها في البوست ده منك ومن العابرين وياريت لو يكون مخصص لاي صورة من السودان بمختلف روعة اقاليمو
وده دعوة مني عبرك اتمنى تجد القبول عندك وتسعى لينا فيها .

ناصر موسى

يا ناس هووووووووووووووووووووووي صورة الكوبري دي حفتي انا اتسلبطوا فيها وين!@!!
بكرة نفتح فيكم قية حقوق ملكية فكرية
اعملوا حسابكم

سلام يا أبوحميد،

وينك يا راجل ليك وحشة. هو البعرس تانى الناس ما بتسمع عنو ولا شنو؟

معليش، بكرة ان شاء الله نتزوج، وأبقو لمو فينا تانى..

الا تاخد مواعيد من السكرتيرة

قلت لى كوبرى الانقاذ وعمارة بنك السودان ذكروك بدكتور زروق ودكتور عمر عبد النبى

وطبعا د. عبد الله ابراهيم

لكن غريبة انو ما يذكرك د.عبد الله خوجلى، أوبروف أبوبكر عبدالوهاب، أو استاذ عاصم..

عارف يا أبوحميد ديك كانت أيام جميلة جدا؛ والناس دى بالجد نحن مديونين ليهم لأنهم هم الختو الساس...

ما تعمل لينا (مدنية هذا الصباح) هنا..

سلام يا سمارت انتى

كنت عارف انو صورة Lucky Meal حتذكر الناس بحاجات كتيييرة

أشرف بخير والحمد لله. مسكين معاكم لسه شابكين فيهو

غايتو قررربت أعرفك، لكن ما قدرت

عشان أوصل السلام لازم أعرف انتى مين فى دفعتنا

مافى hint

الأخ ناصر،

السلام عليكم

سعيد جدا بمشاركتك الرقيقة

كنت متأكد أنو فى أماكن فى الخرطوم ناس كتيرة ليها ذكريات فيها. عشان كده عملت البوست ده

عموما يا سيدى الصور دى ما عندى فيها أى حق. وكلها لقيتها على الانترنت. وكلما ألقى صورة حلوة وحجمها مناسب برفعها

لكن اؤيد دعوتك لتخصيص البوست ده للصور الجميلة من السودان. عشان كل البره يكونو دايما حانين للبلد وقلبهم عليها.

أها..

أى زول يلقى صورة حلوة من السودان يرفعها. ويا ريت الناس الجوه يرفعو صور حديثة عشان الناس تواكب.

على فكرة، مافى زول يصور لينا برج الفاتح عشان نعرف وصل وين؟

From This web site

للمغتربين فى الأرض: الصورة دى بتذكركم شنو؟

تذكرني الصورة بماكدونالدز
المحل الذي لا اطيقه
واعتبره
واحد من أسوا أمكنة بيع "الطعام السريع" بالولايات المتحدة
ولازلت افضل عليه ملاح ويكة مكرب
بالشطة والليمون مع بصلة مقطعة كبار كبار


لا يذكرني موضوع الصورة الرئيسي بالسودان، الا بسبب اللوري بجوار المحل وشجرة النيم الظليلة

فعندما غادرنا السودان لم يكن به ماكدونالدز

فلم يكن قد "توجه حضاريا" تماما حينذاك

يا حبة والله Lucky Meal أحبوا 1000
كان عندهم قرد ظريف...كلو اجازة لازم امشي اعضي هناك عشان اتفرج علي القرد
(على ما اعتقد ناس السودان بيسموا الحركة دي عوارة اولاد المغتربين )
وبعدين قبل كدة حصل لي موقف ظريف في المكان دة ,,,مشيت لي عرس بتاع جماعة كدة في دار البياطرة ودة لصق المحل دة وكان صحن العشا نظام عينات طبية وكان عاضي للدين ,,,طوالي صاحبكم جليت المنظر
وانبرمت لي جوا المحل واخدت لي 2 بيرجر من النوع البيعجبكم داك ومنها
اتخذت نظرية اسمها( تامين الموقف)
وهي انك تأمن الموقف قبل كل عرس تحسبا للاوضاوع المأساوية

المرضى سلام،

شكلك طولت من البلد. يا سيدى السودان لسه ما فيهو مكدونالدز رسمى. دا تقليد محلى وكده

طبعا شجر النيم زى ما هو، لكن البلد اتملت عربات كورية، لدرجة انى اتوقعت الأتوس البيضاء الواقفة دى تذكر ناس بالسودان أكتر من اللورى

شكرا على صورة السوق العربى ويا ريت تواصل

يا سارى الليل، قرد Lucky Meal ده ما سمعنا بيهو

شكلك انت الكنت جايب لى ناس الشهادة العربية الهوا

لكن أحيى نظرية تأمين الموقف بتاعتك

غايتو كويس انو المحل لصق دار البياطرة، كان فى جوعتك ديك الا تمشى سوق نمرة اتنين للبوادى وكده

(للما بعرفوها؛ البوادى دى KFC السودان )

يا مان القرد كان قاعد في اجازتي سنة 1998 وبعد داك أختفى فسالتهم قالوا لي مات

لكن انا شايف انو نظريتي أخطر من نظريات هنري كسنجر و ماكنمارا

والله انت ذكرتني بي ايام لها ايقاع
البوادي يا سلام على الدجاج والشطة والجرجير

سلام يا ساري الليل

طبعا نظريتك أحسن منهم

شكلك اجازاتك كلها بتقضيها فى البوادى

فوق للبوست والصور
ناصر موسى

ياحبة كيف,,,
والله سمك السوكي دة احلى من السمك بتاع تايلاند
انا قبل كدة ماشي مع والدي في احدى الاجازات وهو بيمارس هواية التصوير الرقمي في امدرمان
فقام جات الفكرة بتاعت الفطور وكانت الاقتراحات كالاتي
-بيرجر
-سمك
فصوتت الاغلبية على السمك ويامان مشينا السوكي وضربنا السمك بالشطة وبيني وبينك كدة صحبك بحب
ٍٍSea Foods
وبمناسبة الباسطة انا شايف مافي احلى من باسطة لولي والطيب سيد مكي

يللا وين الصور يا جماعة

والله يا حبة ما عندي صور
لكن رايك شنو في سوق الناقة ؟؟؟

فوق للبوست والصور

والله يامان صحبك في الاجازة ما عندو موضوع غير الصياعة في شوارع الخرطوم وزيارة اهلنا (بني دنقل)
أنت عارف انا اتعلمت السواقة في الخرطوم خلال احدى اجازاتي وفي عربية هنتر موديل 67
وبعدين أنا بامارس هوايتي المفضلة وهي التصوير
وبالمناسبة ما بحب امشي الحفلات البيكون فيها
موسيقى القرد(ودي اتمنى تكون سمعت بيها )
ومافي احلى من اللف بي العربية اللي دايما بتكون مدججة بي اشرطة الاستاذ وردي فناني المفضل

لتعديل الصفحة الاولى

سلام للجميع

شنو يا ناصر وسارى الليل قلبتو البوست كلو أكل لمن بقت ريحتو كلها شية جمر

أستاذ هشام نورتنا

يا ناس سيبو النضم، وييين الصور؟

UP

شوفو الخضار واللحمة دي طاعمات كيف

التحية ليك يا ودشاموق ويا ساري الليل
وفوق

تــــــــوتــــــــــي في الخريف
مواجهة امدرمان

قهوة بعد القطينة في الطريق للدويم..وانا مستني اللبن الحار..
الصورة قبل الغروب

التحية ليك يا مامون احمد
وواصل سعيك واصل واصل

جـــــرجير في تـــــــوتــــي

زولا
123سحبنا ليك الكوشة من الصورة..



مش دي صورتك الاولي

ود شاموق، سارى الليل، نصار ومأمون ..

سلام للجميع ويللا نواصل

مأمون هوى، أسحب ضل الكوشة ده

فوووووووووووق

نـاصر مـوسى

شكرا يا مأمون
لاكن الضل ؟؟؟؟؟
ذكرتني حكايات العفاريت

up

يا خالد والله بمناسبة الشية دي
قبل يومين اتصلت بجماعة إخواننا (مدرسة ماليزية)(لقب يطلق على كل من درس في ماليزيا)
فاتصلت بيهم ولمن سالتهم انتو وين؟؟
قالو لي نحنا في سوق الناقة في حرب حامية الوطيس تدور بين الشية المحمرة والام فتفت
وكبدة الابل

وسلام مربع

سلام يا سارى الليل،

صاحبك أكل فى سوق الناقة مرة واحدة، وكانوا عازمننا ناس الموقع..

كانت عملية مؤلمة لأنى ما بحب اللحم كتير، وطبعا ختو قدامنا (طشتين) شية

UP

الرائع خالد عثمان

شكرا لادرة شريط الذكريات, بوستك جدير بالتقدير يفوح منه عبق الذكريات الجميلة, فاحزان عيون الناس في أحلامنا ويقظتنا, لقد غيرت رتابة الحياة اليومية التي تفرض ايقاعها علينا طبعا هنا الكل في عمله او الكل في دراسته.


أنور أحمد

العزيز أنور،

السلام عليكم

أرجو أن تغفر لى تأخرى فى الرد؛ ولكن كما تعلم فان المشاغل والمشاكل لا تنتهى، والحمد لله على كل حال.

عارف، السودان ده عالم تانى. تكون فيهو زهجان وقرفان وتفتش للسفر؛ لكن يومك التسافر تلقى نفسك بتحن ليهو. تصدق مرات هنا أسمع أغنية معينة أو أشوف حاجة وألقى شريط طويييل من الذكريات قدامى. وكل واحدة بتجر أختها.

بعدين اليوم هناك ماااهل. ترجع من الشغل ولا الجامعة، تتغدى وتنووم وتتفرج على التلفزيون أو تلاقى شباب الحى، ده كلو قبل الشمس تغيب. أما هنا، فى الشتاء تجيك نفسيات. من الساعة 4 تلاقيها ضلمت.

غايتو الواحد لو لقى وضع مريح فى السودان السفر ده الا فى الاجازات

up

up

شفتو الكتاحة النحن مصدرنها للسعودية عبر البحر الأحمر:

up

سلام يا خالد,بوست حنين والله

احلي ما في الصور دي صورة محل الخضار دا, تعرف لي زمن ما شفت ولا أكلت لي عجور

أحد اصدقائي قال لي العجور دا ما بقوم الا في السودان و مصر و كمان الجرجير

الكلام دا صحي

تحياتي للعجور والجميع

ايران تعتبر من اكبر منتجي الجرجير في العالم

وهو مادة اساسية في سلطات المطبخ الايطالي