Post: #1
Title: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس20/5
Author: sheba
Date: 05-23-2004, 03:46 PM
Parent: #0
على لسان صحيفة الراى العام عدد الجمعة 21/5
بلغت درجة الحرارة اعلى معدل لها يوم امس الخميس 20/5 حيث بلغت فى مدينتى دنقلا وكريمة حوالى 49 درجة مئوية (48.
وهذا المعدل لم يتحقق قريبا الا فى العام 1991
وها الامر يذكرنى بنكتة قديمة
قالو يوم القيامة ناس جهنم بيضربو تلفونات كل زول لى اهلو
امريكى ضرب لى اهلو فى امريكا حسابو طلع 5 دولارات مكالمة عالمية
السعودى ضرب 5 دقايق حاسبوهو بى مكالمة عالمية الى السعودية 40 ريال
السودانى ضرب 20دقيقة حاسبوهو بى 1000 جنيه فقط
الامريكى والسعودى احتجو
بتاع الاتصالات قاليهم مكالمة السودانى دى محادثة محلية
|
Post: #2
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: Raja
Date: 05-23-2004, 03:54 PM
Parent: #1
قلبي معهم يا شيبة..
غايتو نحنا اليومين ديل آخر ربيع.. وبالليل كمان برد عدييل كده..
ربنا يستر..
|
Post: #3
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: sheba
Date: 05-23-2004, 04:35 PM
Parent: #1
شكرا العزيزة رجاء
وانت تقفون معنا ونحن نعانى الحر وراء البحث عن مقعد خالى فى مواصلات بحرى فى موقف ابوجنزيز فى عز هجير الساعة الثالثة .. والكل يبحث عن ماوى يحميه من الشمس فى انتظار حافلة تنجيه من هذا الحر
شكرا لكم ونحن نسمع عن انعدام مصل السحائى الذى بدا يظهر فى بعض الاماكن ووزارة الصحة لا حياة لمن تنادى
سندعو لكم بالصحة مع كل كوز موية بارد نتناوله مع بائعى المياه المتجولون الذين انتعش سوقهم هذه الايام .. ورب ضارة نافعة
وندعو لكم ونحن نقف فى الصف فى انتظار شراء الكهرباء لمنازلنا علها تقينا شر الحر الذلاى لا فكاك منه
وكان الله فى عون الجميع
|
Post: #4
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: sheba
Date: 05-23-2004, 04:35 PM
Parent: #1
الخبر بالتفصيل كما ورد
درجة الحرارة تصل لاعلي معدلاتها في السودان
سجلت الهيئة العامة للارصاد الجوية في السودان ارتفاعا ملحوظا فى درجات الحرارة هذه الايام بسبب تأثير الرياح الشمالية الشرقية الحارة نسبيابالاضافة الى ارتفاع درجات الرطوبة.
وقال مصدر مسئول بالهيئة ان الفترة الاخيرة شهدت انقطاع التيارات الاتية من الشمال مما اوقع البلاد تحت تأثير الرياح الشمالية الشرقية كماان الشمس عمودية حاليا وهذا يؤدي الى ارتفاع درجات الحرارة.
واضاف ان الفاصل المداري يمر شمال الخرطوم / بين الخرطوم وعطبرة / وهذا يؤدي الى ارتفاع درجات الرطوبة وبالتالى ارتفاع درجات الحرارة مشيرا الىان هذا الوضع سيستمر لبعض الوقت الى حين هطول الأمطار في وسط السودان.
واوضح ان اعلى درجة حرارة سجلت في مدينة كريمة 8ر48 درجة وفي دنقلا 7 ر48 درجة مشيرا الى ان هذه الدرجات تم تسجيلها من قبل في عام 1991 وان اعلى درجةحرارة سجلت في الخرطوم كانت 45 درجة واقلها 31 درجة سجلت يوم الاربعاء الماضى.
|
Post: #6
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: Ahmed Khalil
Date: 05-23-2004, 04:48 PM
Parent: #4
قال قائل
"ان السوداني سيدخل الجنة بإذن الله، "لأن الله لا يعذب عبده مرتين"!
|
Post: #5
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: Raja
Date: 05-23-2004, 04:43 PM
Parent: #1
العزيز شيبا..
بالله انتا في البلد.. وأنا أقول بوستاتك لييه ريحتها ونسمتها ساحرة كده..؟
عرفت ان الكورسات الصيفية تم الغائها في كتير من المدارس بسبب الحر..
ما تشرب موية من الشارع.. لأنو احتمال الاصابة بأمراض تانية وارد..
والله ما حنكشة.. لكن أسعى ليك كان زمزمية كان تشيل ليك زجاجة موية..
|
Post: #8
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: ملكة سبأ
Date: 05-23-2004, 05:06 PM
Parent: #5
برد يارجوية ؟ برد؟؟؟
البرد دا كيف هو؟؟
نحن عندنا الثلج زاتو سخن
شفت ياشيبة مشكلة المواصلات فى ابو جنزير شكلها بقي كيف .. اى مركبة مابتملي فيها غير المقاعد عكس الشمس .. والحجة ضاربة ..
ننوي غدا باذن الله مجاملة اهلنا ناس الـ 49 درجة
غايتو ياجماعة ادونا يومين تلاتة وافقدونا
هبوبك يااارب
ونعوذ بكم من حر جهنــم
|
Post: #7
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: sheba
Date: 05-23-2004, 05:00 PM
Parent: #1
العزيزة رجاء
شكرا لكلماتك الرقيقة
بعدين انت عايزة تحرمينا من كوز موية بارد نبل بيهو ريقنا من العطش
خلاص يعنى هى بقت على موية الباعة المتجولين ؟؟؟؟ يعنى شوية لو بقت ملوثة شوية ؟؟
قبل ايام اعلنت وزارة الصحة ان 95% من المخابز فى ولاية الخرطوم تستخدم بروميد البوتاسيوم لتحسين الخبز ..
والمصيبة انها -الوزارة - ما قادرة تعمل اى حاجة لايقاف هذا العبث
وتزامن ذلك مع ظهور السرطانات " حمانا الله واياكم " بكثرة فى السنين الاخيرة والغريبة انو المصدر معروف والوزارة ما قادرة تعما حاجة ؟؟
دة غير نكتة البيض الفاسد الذى تم استيراده من الهند " خلاص يعنى الجداد بتاعنا ما بيبيض "
وبعد ما الناس اكلت البيض الهندى لشهور لا نو سعروا كان رخيص .. بعد شهور ناس الجمارك قالو البيض ده فاسد وغير صالح للاكل
طيب والشعب السودانى الاكل البيض دة مصيرو شنو .. والموضوع مات ولا حس ولا خبر
وامبارح تم ضبط اطنان من الدجاج الفاسد ووووووووووو والحكاية ماشة
شى البيتعرف وشى البدسوهو وكل يوم بتظهر بلاوى
ونحن اهو عايشين وبناكل اى حاجة يعنى حا يحصل شنو يعنى اكتر
والله لو ساقو سودانى وودوهو امريكا وعملو ليهو تحاليل كاملة شاملة..الاطباء زاتهم حا يامنوا
الزول دة عايش كيف لحدى هسى ..
كل الود
شوفى الاجيال الجديدة القامت والاتغذت على بروميد البوتاسيوم وحا ياكلو عيش وبرضو بى بروميد
لمن يكبرا ديل حا يحصل ليهم شنو .؟؟
الحمد لله نحنا فينا باقى قوة واكلنا القراصة بالسمن البلدى يمكن شوية نقدر نقاوم
|
Post: #9
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: sheba
Date: 05-23-2004, 06:48 PM
Parent: #1
العزيزة ملكة سبأ
انا غايتو نشات واتربيت فى كريمة وبالطريقة دى ومع ال49 درجة ..حالتها دى الملعنة فى الصحف والدرجة الحقيقية اظنها 55 درجة ..غايتو انا ما اظن ارجع تانى البلد ولا حتى مجاملة الا فى الشتا والمشكلة انو الشتا زاتو درجة الحرارة بتصل 3 درجات
يعنى نعمل شنو ؟؟؟
كل الود
|
Post: #10
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: sheba
Date: 05-25-2004, 07:17 AM
Parent: #1
واليوم الشمس عمودية
كم ستصبح درجة الحرارة يا ترى ؟؟
|
Post: #11
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: Raja
Date: 05-25-2004, 03:12 PM
Parent: #1
العزيزان شيبا والملكة..
انا يومداااك قلت شنو.. الله يستر..
لأننا هنا في مصر أول ما الحر يجي في السودان طواااالي يجينا... وأول ما ناس أوروبا يموتو من البرد تلاقينا نحنا كمان نشفنا..
والعجب المنخفض الجوي المتلًحنا بتاع لسعودية وكتاحة شمال السودان..
أها الليلة حر عدييييييييييييل..
|
Post: #12
Title: Re: درجةالحرارة فىالسودان بلغت 49 درجة مئويةفىمدينتىكريمة ودنقلا يوم الخميس
Author: AnwarKing
Date: 05-25-2004, 04:15 PM
Parent: #1
الله يستر عليكم يا شيبا وعلى جميع الاهل فى السودان شمال,غرب,جنوب,شرق...
فى نكته تانية كانت فى كاركتير :
واحد بقول للتانى سمعتا بالبيض الجابو من الهند...قالوا بسمم وبكتل
التانى :احنا علينا نموت بس, ما علينا نسمع...
اه يا بلادى...لا شئ بالمجان الا الموت...
ولكن...
لا مفر من الكفن
----
Quote: وقال مصدر مسئول بالهيئة ان الفترة الاخيرة شهدت انقطاع التيارات الاتية من الشمال مما اوقع البلاد تحت تأثير الرياح الشمالية الشرقية كماان الشمس عمودية حاليا وهذا يؤدي الى ارتفاع درجات الحرارة.
|
سؤال: ماذا عن التيار الكهربي?
AnwarKing
|
|