Post: #1
Title: لجنة برلمانية مصرية تقترح تحفيز من يتزوج سودانية
Author: AttaAli
Date: 05-20-2004, 00:24 AM
Parent: #0
نقل عن البيان الامارتية
طالبت لجنة الشئون العربية بالبرلمان المصري بصرف حوافز ومكافآت للمواطنين المصريين الذين يتزوجون من سودانيات، لتشجيع وحدة وادي النيل وتقوية أواصر الأخوة من البلدين كما كانت في السابق.ووافقت اللجنة على اتفاقية حرية التنقل والاقامة والعمل والتملك بين مصر والسودان. ووصف أحمد أبوزيد رئيس اللجنة الاتفاقية بأنها بمثابة فتح الأبواب والشبابيك في عمارة التعاون بين الدولتين الشقيقتين انتظارا لخطوات أخرى تحول البلدين الى أمة واحدة
فمارائ الاخوة فى هذه الخطوة من الجانب المصري ,هل هي خطوة تصب في مصلحة الطرفين ام لها ابعاد اخرى ؟ والسؤال الاهم هل سوف تجد الترحيب من الشارع السودانى؟
|
Post: #2
Title: Re: لجنة برلمانية مصرية تقترح تحفيز من يتزوج سودانية
Author: Bashasha
Date: 05-20-2004, 03:36 AM
Parent: #1
الاخ عطا سلام
قلت لي مصلحة الطرفين؟
ممكن طيور الرهو بتاعننا فعلا يفكروا ويعملوا باتجاه "مصلحة الشعبين"، لاننا طيبين، لكن المصريين، او ذي كل شعوب الدنيا، مابفكروا الا في مصلحتهم.
طبعا الصاح والطبيعي كده، لكن من وين لينا نفكر كده!
فخطوة شريرة كهذه، واضح من حيث التوقيت الفي راس المصريين شنو!
لكن تقول كلام ذي ده لي منو، اذا احزابنا كلها سرتها مدفوفة في مصر!
اذا الي هذا التاريخ اكبر احزابنا لازال بذات التركيبة والبرنامج وحتي الاسم الصاغوه المصريين!
بل بعد خمسين سنة من رحيل الاحتلال المصري ناس "الاتحادي" بيعقدوا مؤتمرهم في القاهرة، ياللعار!
بالله لو المصري بيفتكر السوداني، بهيمة تاكل برسيم، مش معاه حق؟
بالذات ذي جمل الطين داك، يكون رئيس مجلس سيادة!
لاحول ولاقوة الا بالمصريين في السودان!
|
Post: #3
Title: Re: لجنة برلمانية مصرية تقترح تحفيز من يتزوج سودانية
Author: هاشم نوريت
Date: 05-20-2004, 04:44 AM
Parent: #2
الاستاذ عطا
مشكور على نقل الخبر
بالله كم عدد السودانيين فى مصر الان؟
والى اى بلد يلجا السودانى عندما
يضيق الخناق عليه العسكر؟
و هل مسالة الزواج بالتراضى ام بالقانون؟
و بعدين فيها شنو لو عملنا خلطة فرعونية
افريكانية..
عشان الناس التهاجم العرب العرب يمكن يرتاحو
شوية.
|
Post: #5
Title: Re: لجنة برلمانية مصرية تقترح تحفيز من يتزوج سودانية
Author: AttaAli
Date: 05-20-2004, 05:43 AM
Parent: #2
الاستاذ
بشاشا
شكرا على المداخلة
اولا اتفق معك بان اى دولة فى العالم تفكر اولا واخير بمصالحها الخاصة ومصر ليست استثنا
والحقيقة كنت احب ان تكون المناقشة فى الدوافع السياسية والاقتصادية والجوانب الاجتماعية التى سوف تترتب على المقترح فى حال تنفيذه و حظوظه من النجاح والقبول الشعبي وليس الرسمى وهل لنا كسودنيين اى فائدة ترجىمن ذلك؟
من ناحية ثانية عرجت علي الاتحاديين وعرضت بهم فالحزب الاتحادى عقد مؤتمره المرجعي بالقاهرة لاسباب موضوعية فى نظرنا وليس فيه ما يعيب ويمارس كثير من قادة الاحزاب السودانية نشاطهم من قاهرة المعز بكل وطنية وتجرد وبدون عمالة او (عار)
عزيزى بشا شا
كلامك عن برنامج وتركيبة واسم حزب الحركة الوطنية غير صحيح وفيه كثير من التجنى ارجوا ان تراجع معلوماتك عنه
و دمت
|
Post: #4
Title: Re: لجنة برلمانية مصرية تقترح تحفيز من يتزوج سودانية
Author: Bashasha
Date: 05-20-2004, 05:29 AM
Parent: #1
سلام ياهاشم
قلت لي:
Quote: بالله كم عدد السودانيين فى مصر الان؟
والى اى بلد يلجا السودانى عندما
يضيق الخناق عليه العسكر؟ |
امانا ماك طيب او سوداني صميم، ياهاشم!
انت متخيل دي خدمة ولا معروف من المصريين، يعني؟
يا حليلك!
ياعزيزي دي واحدة من الطرق المتعددة، اهلك المصريين، بيخدموا بيها مصالحهم!
الامريكان مثلا بقولوا Immigration is our secret weapon فهمت معني الكلام ده؟
المصريين ناقشين الفلم، لانو كل من قام في مصر ولا تخرج من مؤسساتها التعليمية، حيجي راجع وفيه بذرة تمصير!
انا عندي كوم من اهلي العاشو هناك، لمان يعوجو خشمهم ويتكلموا مصري، تدي ربك العجب!
بعضا منهم بيمرض عديل كده وبمشو الدكتور، لو الظروف جبرتو يطول في السودان!
العالم الممصرة دي عندها ولاء غريب جدا، لي مصر او ده طبيعي، او ده الغرض الحكومة المصرية، العايشة علي "الولي" بتدفع دم قلبها عشان تعلم السودانيين!
اكثر من نصف شبابنا الفي سن الجامعة، تعلم في مؤسسات مصرية، وهذه كارثة ما اظن في مثيل ليها في اي حتة في العالم!
طبعا لمان نقول كده نطلع نحن الجانين، والعاقلين اصحاب الولاء امثالكم!
يا حليل السودان الماعندو وجيع!
قلت لي العسكر بضيق الخناق؟
طيب ، ماحصل انقلاب في السودان، والا كان للمصريين ايد فيه!
بعدين ليه مصر بالتحديد، ناس التجمع ساكنين في سكنة، لوما شغل خادم الفكي!
|
Post: #6
Title: Re: لجنة برلمانية مصرية تقترح تحفيز من يتزوج سودانية
Author: كبسيبة
Date: 05-20-2004, 09:49 AM
Parent: #1
مافي لجنة برلمانية سودانية تحفز من يتزوج مصرية
|
Post: #7
Title: Re: لجنة برلمانية مصرية تقترح تحفيز من يتزوج سودانية
Author: AttaAli
Date: 05-20-2004, 07:22 PM
Parent: #6
الاخ هاشم
شكر لك
كبسيبة
والله على قولك
ولسه فى انتظار مشاركات الاخوان
|
Post: #8
Title: Re: لجنة برلمانية مصرية تقترح تحفيز من يتزوج سودانية
Author: شمهروش
Date: 05-20-2004, 09:20 PM
Parent: #7
الاخوة الاحباب البورداب سبب العذاب
انا لوعندي اخت كان اشرك بيها بدل الصارقيل للحوت مابديها لي مصري
ديل لسا بيعتبرو السودان كلوا حديق خلفية وعمق استراتيجي يعني نحنا زحمة ناس ساي
وجني وجن الحمرة ام نحاس
|
Post: #9
Title: Re: لجنة برلمانية مصرية تقترح تحفيز من يتزوج سودانية
Author: Bashasha
Date: 05-20-2004, 10:36 PM
Parent: #1
الاخ العزيز عطا
قلت لي:
| Quote: كلامك عن برنامج وتركيبة واسم حزب الحركة الوطنية غير صحيح وفيه كثير من التجنى ارجوا ان تراجع معلوماتك عنه. |
والله ياخي مصيبتي في المنبر ده مصيبة كبيرة خلاص!
من جانبي انا واعي شديد للحتة دي.
معظم الناس هنا، من الباخد او بدي معاهم، في حقيقة اساسية غايبة او معيبة عنهم.
دي فرصة نسلط الضوء من جديد علي حقيقة اختلافي الجذري مع الخط العام لذهنية السودان المصري الانجليزي، القديم.
فيا عزيزي عطا، ولغياب اي ارضية مشتركة بيننا، كلامي يبدو لك كنوع من التجني علي ما يسمي "بحزب الحركة الوطنية".
بالنسبة لي، الفرد السوداني الحالي، نمط تفكيروا وكل اشكال منظماتو المدنية، دولتو، برلمانو، علمو، جيشو..الخ، صناعة مصرية انجليزية!
فمعروف الاتحادي، حتي من اسمو الماعندو معني، عملوه المصريين، والامة جمعوه الانجليز.
بالنسبة لي يمين الاسلام السياسي، فهو تركية سابقة عديل!
المصريين هم الدشنو الاسلام السياسي في 1821، علي انقاض دولة الصوفية في سنار.
عشان كده ماصدفة انو حركة الاخوان المصرية هي القابضة علي السلطة، بالاضافة لي وهابية السعودية.
فاذا يمين السودان القديم، مصري او عروبي، فاليسار مزيج مصري انجليزي! حيث دور الانجليز والمصريين واضح في نشاءة الحزب الشيوعي، ابو اليسار القديم.
لذلك ماصدفة كيف احزاب البعث والناصري، كانت مجرد فروع لي احزاب اجنبية عربية، سوي مصرية او عراقية او سورية او حتي ليبية!
بزمتك ده يطلع شنو؟
لمان نقول السودان الحالي، هو وديعة الاحتلال الثنائي، فهذا ما نقصد.
عشان كده انا بضحك لمان اقع من طولي، لمان اسمع الاكليشي بتاع "حزب الحركة الوطنية"، ولا التنبل ازهري رفع العلم كيف!
فالاتحادي انشئ اساسا كاداة وعين ساهرة علي المصالح المصرية بالسودان تحديدا!
وهكذا نجد كل اشكال التنظيم في السودان غرضها الاساسي الحفاظ علي Anglo Egyptian Sudan لاطول فترة ممكنة!
الان وبفضل المقاومة العنيفة لقوي السودان الجديد، البناء القديم بدأ يترنح، كمقدمة للانهيار التام، القادم لامحالة- حربا كان ، سلما كان!
علي كده ولانو المصريين "صاحين للون"، تبنو التجمع وصبروا علي اذي شبلهم الاخواني.
مصر وبالذات مع موت القومية العربية، ونهاية مولد القضية الفلسطينية، او شيك "الولي" الحيقيف قريب، ماعندها اي مخرج بالمرة، غير التوجه جنوبا، ذي ماعمل محمد علي!
في 1821المصريين كحل لي مشاكلهم في الزمن داك، كانو بي بساطة بقبضونا ذي الجراد، وببيعونو في سوق الله اكبر!
البنفد من القبض بي بساطة كانو بملصوا العندو قلع عديل، ضحي او نصة نهار!
الان مافي طلب علي العبيد امثالنا، مع الانتاجية العالية لي للتقنية الحالية، مقارنة بالخمسمية سنة الماضية، لمان اطفالنا، كانو بتباعو بالرطل في الغرب، ذي كرشة الخنزيز في بورصة شيكاغو! ليستخدموا لاحقا، كاداة انتاج اساسيا، في حقول القطن بالمسسبي، او السكر بفلوريدا، مثلا.
لذلك الان للمرة الاولي نسمع بي تشريع برلماني لدعم زواج المصريين بالسودانيات، وانت بكل حسن نية، بتسأل لو الخطوة دي فيها فايدة للشعبين!
نعم الشعبين، مش الشعب السوداني!
بقول كده، لانو اصلا موضوع مصلحة اي شعب اخر، مامفروض يكون موضوع اهتمامنا كشعب سوداني!
ومن دون شعوب الارض مفروض نكون سلفا عارفين، كيف لايمكن مصلحتنا باي حال من الاحوال، ممكن تلتقي مع مصلحة المصرييين، اعداء السودان من زمن حفروا البحر!
عارف يا اخ عطا، البحرده حفرو متين؟
ولا حفرو ليه؟
والحفرو منو؟
لو عرفت تجاوب علي الاسئلة دي، حتعرف معني كلامي، كيف المصريين هم عدونا الاوحد عبر التاريخ!
اذا وقع ليك ده، حتقع ليك عبارتي "ياللعار"، وخطورة وجود التجمع، حصان طروادة المصالح المصرية، في "قاهرة المعز"!
في انتظار اجاباتك، قبل ما نواصل، وشكرا للمتابعة.
|
Post: #10
Title: Re: لجنة برلمانية مصرية تقترح تحفيز من يتزوج سودانية
Author: Kostawi
Date: 05-21-2004, 01:06 AM
Parent: #9
I think this is part of their Arabization Policy toward the south, meaning southern Sudan, and Darfur. Wait for the fine prints to come out.
Requirements: The Bride should by from southern Sudan--Tribes = Dinka, Nuir, Shu..... and Darfur region= Zaghawa, Fur, Masaleet......... Generally we mean the area from so and so to so and so. Gangaweed women who live in the referenced region are not qualified. And if you decided to have 2 wives we double the award and so on and we encourage you to have as much wives as you can AFFORD and we will help you by any means necessary.
|
Post: #11
Title: Re: لجنة برلمانية مصرية تقترح تحفيز من يتزوج سودانية
Author: AttaAli
Date: 05-22-2004, 04:43 PM
Parent: #10
شمهروش
عارف اوعك من السد العالى
كوستاوى
خلينا ننتظر ونشوف وذى مابقول المصريين ياخبر بفلوس بكرة يبقي ببلاش
الغالى بشاشا
اسف على التاخير لااختلف معك كثيرا فى مدى تاثر العمل السياسي والفكرى في السودان بعوامل وتيارات ثقافية وسياسية خارجية وذلك لاسباب كثير منها الموضوعى ومنها غير ذلك وهذه موجودة فى العمل السياسي فى اى دولة فى العالم وهى انفتاح على الافكار والثقافات الاخرى وقبل ان نخوض فى تفصيل العلاقة مع مصر وكيف كانت رؤى الاتحاديين لذلك واسباب ذلك احب ان اوضح بعض الحقائق التى اظنها غائبة عن الكثير بخصوص حزب الحركة الوطنية او مايعرف بالحزب الاتحادى الديمقراطى
فتاريخ الحركةالاتحادية لم يبدء بتكوين الحزب الوطنى الاتحادى فى نوفمبر 1952 انما هو امتدد طويل لصراع مع قوى الاستعمار الانجليزى كانت بدائيتها بثورة 1924 التى كان لها تاثير وجدانى وشعبى على جماهير الحركة الاتحادية والتى رات ومنذ وقت مبكر ضرورة التحرر الوطنى وكذلك اقامة علاقة ذات خصوصية مع الجانب المصرى فمؤتمر الخرجيين وبرعاية مولانا السيد علي الميرغنى هم الذين قادوا الصراع ضد الحكم الانجليزى للتحرر الوطنى وقاطعوا كل مؤسسات المستعمر الصورية فقاطعوا المجلس الاستشارى لشمال السودان والجمعية التشريعية اللذين كان مقعد مولانا السيد على الميرغنى خاليا فيهما او كما قال فيهم الزعيم الازهري لن نشارك فييها ولو جات مبرء من كل عيب بحسبان انهم مؤسسات استعمارية صورية وقد ارتبط الصراع مع المستعمر في تلك الفترة بضرورة جلاء المستعمر من وادى النيل وضرورة اقامة علاقة خاصة مع شعب شمال الوادى وقد ارتبط ذلك بجمعية الاتحاد السودانى مرورا بجمعية اللوء الابيض وحتى مؤتمر الخريجين لذلك كنت الحركة الاتحادية امتداد طبيعى للحركة الوطنية وحامله راية النضال ضد المستعمر وضد كل الدكتاتوريات ومازالت تحمل الراية
تكون الوطنى الاتحادى من عدة احزاب اتحادية وهم حزب الاشقاء – حزب الاتحاديين – الاحرار الاتحادييين – وحدة وادى النيل – الجبهة الوطنية
واللذين كانت رؤاهم للعلاقةة مع مصرمختلفة البعض راى وحدة الاندماجية كحزب وحدة وادى النيل اما حزب الاتحاديين فكانوا يؤمنون بالوحدة مع مصر على اساس نظام الدومنيون لانه يعطى السودانيين الحق فىالانفصال اذا ارادوا ذلك اما حزب الاشقاء فكان يدعوا الى اتحاد فدرالى مع مصر لايصل مرحلى الاندماج الكامل اما حزب الجبهة الوطنية فنادى باقامة علاقة بين السودان ومصرتتمثل فى وحدة راس الدولة وتطور المفهوم ليصبح مفهوم الوحدة مع مصرضمن الحكم الذاتى
هذه خلفية سريعة جدا للحركة الاتحادية ويجب ان تفهم وتقيم ضمن شروطها وظروفها التاريخية ولاسوف تصبح نوع من الابتسار المخل
يتبع
|
Post: #12
Title: Re: لجنة برلمانية مصرية تقترح تحفيز من يتزوج سودانية
Author: AttaAli
Date: 05-25-2004, 09:22 AM
Parent: #11
حزب الاشقاء نشاء فى عام 1944 وان كانت جذوره ممتدة منذ بداية الثلاثينات كجماعة عائلية ومن ابرز قادته السيد اسماعيل الازهرى ويحى الفضلي و على عبد الرحمن وكثير غيرهم من الرجال الوطنيين
حزب الاتحاديين
نشاء كذلك في عام 1944 على اساس مدرسة ابوروف الفكرية الداعية الى تحرير انسان وادى النيل من الاستعمار الانجليزى ووحدته ومن ابرز قادته حماد توفيق وخضر حمد وغيرهم
حزب الاحرار الاتحاديين
نشاء عام 1944 وانشق لاحقا الي احرار اتحادييين واحرار انفصاليين والذيين انضموا لحزب الامة ومن ابرز قادته الطيب محمد خير ومحى الدين البرير
حزب وحدة وادى
نشاء عام 1946هو الحزب الوحيد الذى كان يدعوا الي قيام دولة واحدة هى دولة وادى النيل وبمو جب ذلك يتنازل المصرى عن جنسيته وان تكون هنالك جنسيه جديدة ومن ابرز قادته الدرديرى احمد اسماعيل ودكتور احمد السيد حمد متعه الله بالصحة
حزب الجبهة الوطنية
نشاء عام 1951 ومن ابرز مؤسسيه ميرغنى حمزة وخلف اللة خالد والدرديرى محمد عثمان والذى اصبح لاحقا عضوا فىاول مجلس سيادة
اوردت هذه التواريخ وهذه الخلفية لايضاح ان هذه الاحزاب ننشاءت لاسباب موضوعية ولعومل ذاتية فى فترات مختلفة ورؤى فكرية مختلفة لكيفية التحرر الوطنى من المستعمر الانجليزى لذلك حينما قامت ثورة 23 يوليو فى مصر 1952 اتصل بعض قادة الثورة بالاحزاب الاتحادية لاخذ رايهم قبل المفاوضات مع الانجليز بشان الجلاء من مصر والسودان وتحقيق مطالب الشعبين فى الحرية والاستقلال واستطاع المصريون اقناع الاتحاديين بان مسالة توحد الاحزاب الاتحادية فى حزب واحد تمليه المصلحة الوطنية وتسهل عملية التفاوض والاستقلال وفكرة الوحدة اصلا لم تكن بعيدة عن الاذهان ولكن قيام الثورة فى مصر ودعوة قيادتها عجل بذلك اذن فلم يكن بالمسالة تكوين خارجى او رعاية لمصالح اى دولة وهولاء هم القادة الذين قاوموا موسسات الاستعمار وامتازوا بالتضحيةوالامانة
فازعيم الازهرى لم ياتى من منزله ليرفع علم الاستقلال! وانما قاوموا المستعمر بشراسة ولم يقبلوا المشاركة فى مؤسساته ولم يرضوا لنا بحرية ناقصة او مجزاء لذلك قال الازهرى اتينا لكم باستقلال لافيه شق لاطق وكانوا مبدئيين فى نضالهم ضد المستعمر وكل الدكتاتوريات فزج بهم فى السجون فلم تسنهم او تلين عزيمتهم وقد توفىالزعيم الازهرى رحمه الله فىسجون النظام المايوى ورغم تبؤه رئاسة الدولة والوزراء مرات عديدة فلنزاهته واستقامته توفى رحمه الله وهو مديون وهذا كان ديدنه هو وكل القيادات الاتحادية والحديث فى هذا يطول لذلك اري كلامك عن الزعيم الازهرى لم يكن موفق
مع خالص الود
|
Post: #13
Title: Re: لجنة برلمانية مصرية تقترح تحفيز من يتزوج سودانية
Author: مارد
Date: 05-25-2004, 10:29 AM
الأخ الودود عطا
لك التحايا وكل الود
ويبقى السؤال ! كم من الأسر السودانية ستتقبل هذا الأمر !؟
الإقتراب من المصريين فى كثير من الأحيان ليس فى المصلحة .. وخاصة فى المسألة المذكورة .. الزواج رباط مقدس والتزام ومحكوم بقيم وعواطف طبيعية وصادقة ولا تسنده أو تبقيه الحوافز .. صدقنى " القماعة دول " بتكون عيونهم على الحوافز أكتر من أى وجدان أو عاطفةإنسانية نبيلة وخالصة ..
ملاحظة وسؤال : عدد السودانيات المقترنات بمصريين ضئيل جداً بالمناسبة .. طيب لماذا لم تتسع دائرة هذا الزواج !؟ هل هو إحجام سودانى ؟ مصرى !/ مشترك !؟ وليه !؟
سأعود كان الله هون .
|
Post: #14
Title: Re: لجنة برلمانية مصرية تقترح تحفيز من يتزوج سودانية
Author: AttaAli
Date: 05-26-2004, 00:13 AM
Parent: #13
عزيزى مارد
اولا حمد لله على السلامة
حقيقة اوكد على كلامك ان هذا الاقتراح ان كان القصد منه توطيد وتطوير العلاقات بين البلدين فهو مدخل خاطئ على الاقل فى الوقت الحالى افتكر ان العلاقات تريد كثير من المراجعة وفيها كثيرمن الضبابية وليس فيها استقرار فالعلاقات تعتمد على من فى الحكم !
افتكر ان المدخل الحقيقى يجب ان يكون اقتصادى وثقافى بحيث يبدا على المستوى الشعبى خاصة بزيادة الوعى والمعرفة بالسودان وتشجيع الاستثمار فى البلدين وتطوير المواصلات بين البلدين وتبادل المنح الدراسية من الجانبين وليس جانب واحد وان لاتتاثر بالعلاقات الحكومية ويمكن الذين عاشوا فى مصر عندما تتدهور العلاقات يعلمون ذلك واولا واخيرا البعد عن دعم الدكتاتوريات فهذه بعض المداخل التى ارى انها انجع من وسائل التكلف الاجتماعى فالعلاقات الاجتماعية لا تاتى بالقرارات
مع خالص ودى
|
Post: #15
Title: Re: لجنة برلمانية مصرية تقترح تحفيز من يتزوج سودانية
Author: AttaAli
Date: 05-27-2004, 03:10 AM
Parent: #14
ياجماعة الحاصل شنوا كثير من المواضيع تذهب بدون ان تاخذ حقها من النقاش خاصة مع التدفق الهائل للمواضيع تكتب موضوع تمشى تنوم تصبح الا تجيبوا من الصفحة التالتة!فىانتظار مساهماتكم
|
|