رسالة من كرضمة الى كراضم والبورداب

رسالة من كرضمة الى كراضم والبورداب


05-12-2004, 05:24 PM


  » http://sudaneseonline.com/cgi-bin/sdb/2bb.cgi?seq=msg&board=8&msg=1084379089&rn=0


Post: #1
Title: رسالة من كرضمة الى كراضم والبورداب
Author: alfatih
Date: 05-12-2004, 05:24 PM

الموضوع : رسالة منفوخة بالتعب
رسالة من كرضمة الى كراضم والبورداب

اخى العزيز والمعاك... ان شا الله تقوموا قود مورنيج , واذا سألتو عن احوالنا فبغض النظر عن الجدرى والتاتنوس والتيبى وشلل الاطفال وقطن مافى فنحن بخير , شولة , اعرفك بأنو حبوبتك نفسا اتقطع ووقعت كسرت نضارتا باقى الاهل طيبين , جدك الطريفى امام الجامع انحرف بقى يلبس اردية , باقى الاهل طيبين , جدك المُر اشترالو عربية بيجو ليلى علوى سيكو فايف يعنى قالوا سرعتها كان 150 كيلو ولا رطل ما بعرفا , اها يا زول مرّكب فيها خوالك الكراضم ديل فى الكنبة الورا ويوم الخميس جابهم دغرى , غشوا المدارس الثانوية بتاعة البنات وعارف خطر العربية من شاف البنات بقى يولع براهو مركزين على مدرسة البنات عارف العربية تنقشط منهم وين ؟ تحت قندران العمدة اعرفك بأنو الجميع لبسوا عمائمهم , باقى الاهل طيبين.
بقراتنا التلاتة ماتن , كانن ساكات تور حمبير , جنون بقر , تور حمبير قطع السكة حديد وهن الطير مبارياتنو , لحقن امات طه , باقى البقر طيبين , وعلى ذكر بقراتنا التلاتة , اخواتك السبعة البايركس ما عرسن ولا اعتقد انو حيعرسن بعد 13 سنة , الرجال البيجو كلهم قالوا البنات ديل بيشبهن منتخب زامبيا , حبوبتك شغبة بلعت السفة فى عينها حنكها اتعوج , فرحين ود نفيسة جايبنو كشة من السعودية متل الشافع الرايح , والان تركته يبيع بضاعة فى سوق ليبيا وهى ليست قمصان ولا بناطلين , اسكت خليها ساكت , على بالطلاق فارشن فى سوق ليبيا ويبيع فيهن ب 200 يعنى لامن لستكن دة برد , باقى الاهل طيبين .
قريبك الكتل الورل متذكروا , لقيتو ماشى كدارى اغبش زى الفول المدمس يعنى قال اليومين ديل الشدر جفف من حطب الطلح عشان كدى قال يتبع المشروع الحضارى ويبقى زى مساعد رئيس الجمهورية , الا ناس الكشة ما خلوهو فى حالو اربعة وعشرين ساعة الكومر داخل البيت وعلى حسب ما قال رضينا بالهم والهم ابى يقبلنا حتى كان داير ابقى حرامى زاتو , سألتو من الجماعة قال لى الناس ديل اكلو القرض من الجوع لكن اليومين ديل انا داير اركب ليلى علوى اكان ما ركبتها بركب لى رأس زول من ابات دقون ديل , باقى الاهل طيبين .
اخبرك بأن الخور كسر فى الجماعة شال بيوتهم وداها الخور باقى البيوت طيبين ,
اها يا خوى انا هسع ماشى اجيب موية بالكارو والى ان تكتب لينا نقوم نرد ليك الرسالة .

اخوك كرضمة
فى 9/5/004م
شنقلوها الكيزان

Post: #2
Title: Re: رسالة من كرضمة الى كراضم والبورداب
Author: عدلان أحمد عبدالعزيز
Date: 05-12-2004, 09:41 PM
Parent: #1

قلت لى ياكرضمة.. الباقى كلو طيب وطيبين؟ دى بتذكرنى بواحد كان بيتكلم وينتقد فى الكورة.. قال لى صاحبو؛ تعرف ياخدر.. محمد كجول ده زول كويس خلاص.. بس عيبو انو.. مابيعرف يلعب كورة!!!
.

Post: #3
Title: Re: رسالة من كرضمة الى كراضم والبورداب
Author: alfatih
Date: 05-13-2004, 03:54 PM
Parent: #1

الاخ عدلان

قلت لى عيبو ما بيعرف يلعب ودة بيلبع ولا شنو ؟

طبعا طيب وطيبين دى ما الكتلت الورل زاتو

تسلم

Post: #4
Title: Re: رسالة من كرضمة الى كراضم والبورداب
Author: محمد حسن العمدة
Date: 05-21-2004, 01:32 AM
Parent: #3

الحبيب الفاتح
سلام
يا اخي البلد دي جايطة جوطة البليلة في الحلة بس ربك يهون
الغرب والشرق والجنوب الترابي خلا البشير وعدلان ساب الشيوعين والشريف خلا الاتحاديين ومبارك لحقو رياك مشار ولام اكول ماسكين الدرب ساساقا مرة انقاذ ولا لويا ومرة شعبيين طبعا قرنق عندو الحق التاريخي للاسم
ومثقفاتيه دائما شايتين شمين وما عارفين هم دايرين شنو احيانا مصلحتي واحيانا وطني ولا الكلام الني
لكن نقول زي ما بيردد الامير نقد الله دائما
لكها يا كريم واغلب نداها سخانا
واطلع فوق جبلا وطير شرار دخانا
الحكما الصقور وشارع الظلط شفخانا

بالله ما طول الغيبة