احب الجكس وايامو

احب الجكس وايامو
فى اسبوع الشوق والحب نقول
على طول نقول انو القلب مفتوح على كل احتمال
بهبشة بس يتداعى ينده كل اهاتو ويجن
يتقسم اجزاء فى الليالى المهلكة
مالجكس ميعاد الحنين
مالجكس لمايجيك تجيك الرقة من كل اتجاه
واحد حتل فى مكانو حالف مايزح
الاالشمس تشرق عليهو وهو فى لقياالحبيب
والا النسيم يرسل مواكبو يتفتح فى كل بيت
ازهار والحان اسرة
واحد رسم فى قلبو خرطة وكت يضيع
يلقوهو بيها
تلقاهو لصق حسن الجبيب
واحد نده اشعارو قالن مابكفن
مالبحر اعمق من المجرى العميق
الجكس فى السودان صلة
حاجات جميلة و مذهلة
تلقاكا بكل انتباه
تملالك الشارع رحيق
تبحر مع انك زول غريق
تتوصي بيك كل السعادة
الممكنة
الجكس احساس والتماس
الجكس قام نقوم قوام
نوصلو الحافلة ونجى
ندفعلو حق التذكرة
نديهو بسمة مذكرة
الجكس فى المنبر وجع
بين الصحافة والثقافة والقيافة
والرهافة
احساس صعب مابتلحق
مليان حصافة ومقدرة
وكت الغلط
تلقاهو مليان جندرة
الجكس لامن تنسي اسمك
وتنتبه لى كل زول قال اسمها
وتنتبه لى كل ملمح من ملامحها
لون العيون سحر الجفون
ورد الخدود شعر الطوال
ريقا الزلال قرب الكمال
كتبت حروف اسمها ومشت
وبين كل بوست عن السياسة وحزنها
عن القصائد ووزنها
عن المشاكل وسيرتها
يجيك بوست حريف رهيف
طرن شبابيك الهوى الانسانى
ياعاصم ياحزين
وانفتح القلب على كل احتمال