اعد الجواد يا غلام ... "غزوة القمر"

-عصام اديني قميصك الكاروهات بالله
+هو انت متين رجعتو عشان تجي تستلفو تاني؟
-يا اخي انت مالك زول معفن كدا ؟ انا عندي مواعيد
+مواعييييد ؟؟!! مع منو كمان الليله؟
-مع قمر جديد
+الله يستر من الغيوم والخسوفات الطارئه
-فال الله ولا فالك يا وجه النحس .. جيب القميص وعليك الله اديهو بخه معاك من ريحه ابوك الداسيها في الشنطه الفوق الدولاب
+لالالا دي ميته وخراب ديار انتى داير تورثنا بالحيا ؟؟ يازول بعد دا ما تجيب هدومك وتسكن معانا عديل .. وهي زاته هدومك وينها ؟ انت عندك هدوم من اساسو تعال ببطنك يا رمه


حاجه فيك تقطع نخرة السفنجه

*معليش إتأخرت عليك
-عادي يا قمر
* هاهاها قمر دي منو انا اسمي ليلي
- ليلي مقمره يا قمر
* الله كلامك حلو
-انتي الاحلى يا عسل
* اها ما قلت لي اتعرفت علي واحده قبل كدا ولا لا؟
- انا ؟؟ .. صدقيني يا غاليه انتي اول زوله في حياتي
* بالله؟
- تخيلي؟
* وليه ؟؟ مع انك شاب وسيم وكل البنات يتمنوك
- دا من زوقك ياقمر . الله يخليك
*انا تعبت من الكلام والمشي تعال نركب
- طيب انتي اشري وانا بخفي نفي لحدي ما توقفي واحد فضل ضهر
*اوكي
---------
ليلييييييييييييييييييييي ليلييييييييييييييييييييييي
وذهبت ليلي مع اول صاحب فضل ظهر ... وتناست ان فارسها يختفي منتظراً اشارتها ايذاناً بالشعبطه
وجريت وراءها حتى انخلعت نخرة سفنجتي
ولكن الفضل اسرع
وانحنى ظهري من شده التعب
واتكيت علي شجره النيم العريضه حتى غفيت

وسارعت احلامي تطببني
فملكتني فضلها
وجعلت لي ظهر استند عليه في مقابلاتي القادمه
وانا بكامل هندامي الأنيق
وجزمتى الإيطاليه زات الرباطات الطويله
واتت أقمار الكون تسامرني في ليالي متواصله دون رقيب
حتى لكزني عسكري الشوم منتهراً
يا زول يا زول
انت سكران ولا شنو؟؟؟؟؟

----------
- هاك يا شوم قميصك
وعليك الله تاني كان شحدتك ليهو ما تديني ليهو
+هاهاهاها ... كالعاده

Quote: انت سكران ولا شنو؟؟؟؟؟

في انتظار الاجابه ؟؟؟؟؟؟؟؟؟؟

منو معاى ؟

ليلي .. القمر ..العسكري
ام جوادي البنفسج

لا وانت الصادق

سيد القميـــــــــــــــــــــص...........