Post: #1
Title: لعناية الأستاذ/ مزمل ابوالقاسم من أخوك عثمان كوستي
Author: محمد حيدر
Date: 05-05-2004, 08:37 AM
بعد السهرة الكروية الرائعه يوم الاحد الماضي و بعد دك حصون القلعه الحمراء بالراجمات الزرقاء إستلمت هذه الرساله البريديه من الاخ عثمان ميرغني والذي طلب مني نشرها في البورد بدون اي ضافه او تعليق وهذا ما فعلته وانا شمتان في الصحفي مزمل ابوالقاسم اكثر من حزني يوم فوز الامل عطبره علي السودان -عفواً- الهلال
لعناية الأستاذ/ مزمل ابوالقاسم من أخوك عثمان كوستي
في البداية اسمح لي أن أهديك جالونين بنزين واحد محلي والثاني مستورد من البرازيل. و ممكن تاخدهم من طلمبة العرضة شمال في أي وقت.
أخي
أولا: أنا من المعجبين بك كصحفي مثقف و نشط جداً و لكن ينقصك شئ واحد -الحلو ما يكملش- عارفه ايه هو؟( إنك مريخابي ) رغم انك صحفي حصيف لكنك مكابر و عصبيتك زائدة عن الحد و متطرفة في تمجيدك للمريخ علي حساب نده التقليدي الهلال العظيم.
دائماً في مقالاتك (كبد الحقيقة) تتحدث عن المريخ والهلال فقط. كأن السودان لا يوجد فيه غير هذين الفريقين .
ياخي في ناس لا هلالاب -وهم قله- ولا مريخاب عايزين يستمتعوا بكتاباتك في مجال الرياضة.
عنوان عمودك الصحفي (كبد الحقيقة) و لكن دائماً إنت بعيد عن الحقيقة.
إنت تعلم يا عزيزنا إن المريخ عمره ما كان أفضل من الهلال. وبعدين 80% من الشعب السوداني العظيم هلالاب بالفطرة ولو ما مقتنع بالإحصائية دي أو إنها غير دقيقه أنا اقترح عليك تبدأ من مجتمعك الصغير يعني الأخوان في البيت والأقارب و أولاد الحلة بس تلقي النسبة ياها ذاتها 80%. رغم ذلك بتكتب بالأرقام إن المريخ أفضل من الهلال. وممكن تأخذ إحصائية لقاءات الهلال والمريخ من الأستاذ الناقد المعتدل / عبده قابل وبعد داك تحكم.
حقيقة كنت أتمني انك تكون هلالابي لان كل الصحفيين المميزين هلالاب.
مره أخري اكرر إعجابي بأسلوبك الصحفي المثير. وأتمنى منك الحيدة في طرحك للمواضيع الساخنة.
ورجاءاً أن تنسي موضوع الصلوي وقابيتو لان الناس إبتدت تمل الموضوع ده.
في الختام لا تنسي اخذ الجالونين من طلمبة العرضه شمال. وألف مبروك.
مع خالص التحايا والتقدير
أخوك عثمان ميرغني عثمان(كوستى)
City Of Schenectady, New York State
[email protected]
الرجاء إرسال عنوانك البريدي مع رقم الهاتف
|
Post: #2
Title: Re: لعناية الأستاذ/ مزمل ابوالقاسم من أخوك عثمان كوستي
Author: abuguta
Date: 05-05-2004, 09:11 AM
Parent: #1
محمد حيدر
اولا مبروك للهلال
ثانيا انا حتى اللحظة ما عارف نفسى هلالابى
لكن بفرح لما يفوز الهلال ...ودائما فى اللمة تلقانى بشجع الهلال
عشان ناس المريخ فى اى مجتمع قلة..لو الهلال غلب بشمت مع الكثرة
ولو غلبه ما بتجينى اهانة كتيرة
نحن 5 اخوان فى البيت المريخابى واحد....
بذكر مرة من المرات المريخ دا غلبهوه ...اخوى الصغير زعل وابى العشاء
ابوى قام دقاه وقال ليه اسى العارفك منو...عشان تابا العشاء
ومن يومها الولد كره المريخ وبقى مع اللعبة الحلوة
انا بقول تطور الهلال هو تطور المريخ...وتندنى المريخ هو تدنى الهلال
شنو ليك انا مش محايد
انظر للفرق المصرية كانت فى القمة واللان تدنت لان الكرة فى مصر اصابتها بعض امراضنا فرجاء من مزمل وامثاله ان يبحثو عن الجديد المفيد وينقضو نقض بناءة حتى نجنى ثمار الاستفادة ونرتقى مثل الامم
ولك ودى
|
|