الجالوص -عاطف خيرى– مصطفى سيد احمد-اهداء خاص الى العزيز اشرف محمود

الجالوص -عاطف خيرى– مصطفى سيد احمد-اهداء خاص الى العزيز اشرف محمود

القصيدة ملئية بالصور الجمالية المعبرة الرمزية ظاهرة ولكنها واضحة ومفهومة نوعا ما
والتعابير مدهشة ككل نصوص عاطف خيرى ولنرى مثلا هذه المقاطع

والشمس فوق حبل الغيوم
شرت جلاليب النعاس
....
والمطرة زى شفع العيد
تدخل غرف كل البيوت
.....
أمرق على مهلك ..
مروق الحنة من ضفر العروس
واصعد على مهلك ..
صعود البذرة والروح والشموس
.......
واجعنى فى البحر السكات
سكتنى فى الوجع البحر






وما تنسوا لنك الحفظ

... .. اضغط هنا زر الماوس الايمن واختار حفظ…Save target as……



الشاعر عاطف خيرى


الجالوص
عاطف خيرى
*********
معتوقة ومعتقة ومنعتقة
نوافير إنتشاء وحشمة
وحَـمار العين ..
تضحك كلما وقعت مصيبة
تمشى على العجين وتلخبطو
وترطن إذا جاها الحنين
************
يا بت بيوت الهجعة كيف ؟
غبار شوارعك ماشى وين
زقاق يفتش فى زقاق
كتمة وضلمة وإنعتاق
أنا فيك لامونى المساجين
سكاتك منازل حلال الحرام
سكاتك على حين أهش الحمام
سكاتك عليك لما تصحى المسام
سكاتك عليهم سكوت و السلام
***************
صوتك وكت قطع البحر
قبال مراكب العمدة
ضهر النيل عرق ..
والشمس فوق حبل الغيوم
شرت جلاليب النعاس
ناشف غرب مبلول شرق
والمطرة زى شفع العيد
تدخل غرف كل البيوت
حكمة الجوع الشرح للأرضة
كيف تقرأ المرق قبال يقع
فوقـك سقف
إتنحنح الجالوص
أمرق على مهلك ..
مروق الحنة من ضفر العروس
واصعد على مهلك ..
صعود البذرة والروح والشموس
**********
مبنية مدن الخوف
من طينة آخر الليل
وانا فى سقالة الشوق
قدح البصيرة تقيل
فاتح زريبة الجوف
تمرق تخش الخيل
على كيفة كيف معلوف
ضهر المظنة يشيل
وانا ظنى ظنيـتـو ..
فى النيل غريق فى النيل
و الليل ولافى بالو ليل
ساكت يغنوا على القمر
واجعنى فى البحر السكات
سكتنى فى الوجع البحر
يا بت صباح الطير
وين البلد ركت ؟
ما عاد هواك يفتح فى الكتمة
شباك النزيف
وين تكيتك فى الغيمة شطيف النجوم
ريف الجسد صدرك سبلوقة اللبن الحريف
داسينى فيكى نضر
والأنبياء فاتوا
والأنبياء بين بين
قاعدين فى ضل النار
داسينى فيك نضر
فى غفلة جو الكفار
وطارت حمامة الغار
لاقونى ناشف ومر
ما ذنب جلد الطار
لو غنو بيهو شتر
ما تخافى الله معاك
وكل الملائكة سمر

خالص التحاياالعزيز الصديق شيبا
كيفينك يازول لعلك بخير وصحه ..تسلم ياحبيى على هذه الابداعات واجمل مافى ذلك اللنك للحفظ شكرا لك ..
انت عارف انا الاغنيه والملحمه دى كل مقطع من القصيده بنافس نفسوا وماتعرف ياتو مقطع تختار
يبدو انو الانسان عاطف خيرى وكتب هذه القصيده لم يكن لوحد قط ..والانسان مصطفى سيدا بالتاكيد كان اهلا لها وماقصر فى اللحن الروعه المبالغه ..

الاخ الرائع شيبة ..شكرا لا تكفيك حقك باى حال من الحال ..وانت تعبقنا يوما باريج مصطفى ...القصيدةطبعا لا تحتاج لراى او اللحن او الاداء مجموعة من الروائع مزجت لتخرج لنا هذه الحلة الابداعية شكرا مرة اخرى يا شفيف وكن دوما لنا.....