ديوان البكاء

المتواجدون الان بالمنبر الحر 189 شخص » (13 )عضو و (176) زائرا

»awadnasa
»Emad Batran
»Hisham Amin
»killer
»Mahadi
»Napta king
»nile1
»tariq
»أمير تاج السر
»ابوحراز
»بدرالدين شنا
»جبران
»عاصم المهدي
هذه الصفحة يعاد تحديثها كل 120 ثانية.

الفاااااااااااااتحة
انشاء الله بس تكونوا رسلتوا لي ناس كاب الجداد
وماتنسوا تمشوا سوق ام دفسو تكلموا حاج قسم السيد

غايتو ماعارف لكن كلما اتاوق للمتواجدين بالمنبر من الصباح
ما القى ولا واحدة حايمة

قال يتم تحديثها قال

أبوحراز
الله يجبـر كسركـم
والبركـة فـي ديـن محمـد

عليك الله يا ابو حراز يا اخوى
مش اخير نلزم الجابرة دى ونقعد
جوه نسوى ليكم الشاى والقهوة
امال
ام وضاح

ملكة سبأ
أم وضاح
شكراً على المواساة
طبعاً هذا البوست حبيت انو يكون صورة كاراكاتورية للتنفيس عن قبيلة البورد في هذا الصباح
الغريبة انو الجماعة المقصودين لابدين سااااااكت
والظاهر انهم مشغولين في العزاء

Quote: كلما اتاوق للمتواجدين بالمنبر من الصباح ما القى ولا واحدة حايمة

أبوحراز إنت ما شايف [a] التأنيث الموجود في إسم Napt[a] king

شناة
كيفك
قال تانيث قال
سألنا ناس البكاء في الأول قالوا لينا راجل
طبعاً ماشاء الله انا مشيت لي أكثر من عشرة مشواير بكيات ساااااكت
المشكلة البتغيظني
كانوا لمن يجوا يعملوا الكشف بيكتبوا اسم أخوي القاعد في السودان
وانا لافي عمتي وكلما اشوف لي بكسي اركب فيه

الأخ العزيز أبو حراز
أول ما تبادر إلى صنقوري حال قراءة عنوان مقالك أن الديون المعنى هو ديوان الزكاة أو الضرائب ، وإنت لسه من زمن الفراش على الميت الكلام ده خلوهو زمان لأنو بقى الموضوع ميته وخراب ديار ، وبقى يكشحوها ليك من المقابر يعني تشارك في مراسم الدفن وتشتت وجزاك الله خير. وشكلك كده يا أب حراز من النوع البتاوق في بيوت البكا لى راكوبة النسوان وعامل فيها جرسون خمسه نجوم نشاط وهمه في الخدمة ولو واحد جا ماشي بالشارع ساكت تنط وتجري عشان تجيب ليهو شاي لكين الغاية والغرض هو الخلط يا مونليكس يا إبن براون ود عم بلاك أند ديكر.

ابو حراز
عليك الله نادي لي ود النور واعمامهم باقي البنيه بنت عمت اولادي بدور تديهم الفاتحه الا قوامك عشان هي محصله ليها جماعه طالعين يقدموها لقدام....
ابوحراز:عوجه تب مافي ياخالتي مو مشكله اكان مشو انا ده بقدمها!!!!!!!!!!!!
قال فراش بكاء..واقفين تحننو وقاعدين تجننو!
غربه

الله يجازيك ياغربة
ونحن واقفين لي حلقنا في العزاء
تاتي غربة لتخفف عنا وتضحكنا
لك التحية
طبعاً اكيد سمعتوا بالمراة القعدت تبكي في عزاء واحدة ولابتعرفها
طبعاً حتى ناس البكاء الأصليين قالوا سكتوا
لكن صاحبتك دي دموعها وحلقها في السماء
بعد صعوبة ومحاولات كثيرة وتدخل اهالي المرحوم عشان الولية تسكت
وأخيرا أخيرا سكتت وجابوا ليها الموية تشرب
تعرفي دي كانت بتبكي ليه
عشان اليوم داك فاتورة الكهرباء والتلفون جاتهم عالية

الملا عمر 00 تحياتي
طبعاً أهل العوض كان الفراش عندهم شهرين ونص
لكن الحمد لله مع بوادر العولمة اصبح يومين بس
والمشكلة شنو
الفاتحة الكنا بنعرفها زمان برضو اتغيرت
طبعاً بعضهم بقى يحسب لحدت عشرة
وبعديها بيغمت ليك يديه
المشكلة مرات قبل ماتصل سبعة
يقوم سيد الفاتحة نفسو يغمت يديه
الله ينعل ابو العولمة ذاتها
بعدين ما أحتار له
أن كل مشاريعنا لاتسبقها دراسات ولاترتقي للمواصفات العالمية
يعني بالعربي مشاريعنا مانجيضة
اللهم الا مشروع واحد مفروض ناخد عليهو شهادة الآيزو
وهو القبر
يعني عندنا في الجزيرة بنجضوا ليك القبر دا بطريقة عجيبة جداً
وياكافي البلاء هناك مما تقول هق لايعرفوا ليك صدمة سكري ولا غيبوبة ضغط
طوالي يشهدوك ويودوك المقابر
وعلي النعمة كان دفنوك وانتهت الغيبوبة محل تمرق ماتعرف

الأخ الكريم أبا حراز
هناك ظواهر غريبة في المجتمع طالت المآتم والتي هي في الأصل تجسيد لمعني التراحم والتكافل والمواساة ، فهناك مآتم خمسة نجوم وهناك مآتم كشه مشه بالرغم من أن الميت في الحالتين بياكلو الدود ، فإذا كنت من الناس التعبانين الغلابانين المسحوقين وجاي تجامل ناس من أصحاب الوزن الثقيل في مأتم من مآتمهم ما في واحد بجيب خبرك ولو وقفت ساعه رافع الفاتحه ما في زول بيقول ليك شكر الله سعيك. المظاهر والبوبار – ومسئولين من الخير البوبار دي دحين أصلها فرنسي ولا إسباني – طالت كل شئ في حياتنا ، وأطرف شئ مرة مشيت بيت بكا فايف ستار بدل الشاي يجيبو ليك كابوتشينو وبدل ملاح اللايوق يدوق مينو تختار الأكله العاوزه تخيل مش زي أعراس ناس قريتنا ملاح لايوق وكسره وبعد كده يغنو ليك في الحفله السوط السوط يا جنا السوط أحر من الموت يا جنا ، وواحد يعاين ليك بي حقاره عشان يستفزك وتملص للجلد والبطان ، أنا كيشه تشعوني لايوق وعازيني أتجلد ليه ده حد ملاح الويكة في عرف القرية ولا شنو؟ طيب لو أكلتوني بيتزا مثلا يكون الحد الرجم ولا كيف؟

Quote: سألنا ناس البكاء في الأول قالوا لينا راجل

أنا دخلت علي بنات الشاي القاريات المتعلمات وقالن لي Napta king معناتها (ملك نبتة) يعني راجل وأنا حسب جهلي قايلها أخت Anwar king
تحياتي لك أخي أبوحراز وتحياتي للأخ نبتة كنق
بس قصدنا المزاح يا ملك

Quote: تعرفي دي كانت بتبكي ليه عشان اليوم داك فاتورة الكهرباء والتلفون جاتهم عالية

ابوحراز
غايتو جنس حركات عليهم الناس امكن المراه موجوعه لكن بيني وبينك مرات في حاجات بتبكي بكاء يستر جنازه علي قول اهلنا!!
فاتوره كهرباء دي كما كانت ام العيال البضرا يعني بالدس كده
رجال يهردوا المصارين..قال بكاء قال
غربه

بدر الدين شناة
شكرا على التصحيح والمشاركة
طبعاً بجد اغتظت كتير في زيارتي الأخيرة حيث اصبح السودانيون يحملون معهم اجهزة الموبايل للمقابر وهناك هناك يا أغاني
المشكلة واحد جاء يشيل الفاتحة
كان طوالي اشتغلت نور العين
بيني وبينك من الأغاني المفضلة عندي تمنيت انها تستمر
لكن الراجل غايتو بسرعة قام لكز الموبايل

غربة
رجال يهردوا المصارين
والله مشكلة كبيرة جداً عندما يبكي الرجل
الدكاترة يقولوا لينا عادي لأن الدموع بتنظف العيون
وعلماء النفس يقولوا ليك ابكي بقدر ماتستطيع لأنك ستذوب أشياء كثيرة مكبوتة في داخلك
لكن المشكلة البيقنع اجدادنا منو


الملا عمر
طبعا نحن ناس كوباتشينو دي مابنعرفها
لا في أفراح ولا في مآتم
ولو قدر لك أن تزور مأتم لأهل العوض
فالقرع يومها يرقد هبطرش
طبعاً حسب الموسم
مرات تلقى البكاء كله بامية
أكره القرع كما أكره شارووووووون
ولا أطيقه نهائياً
سمعت في زيارتي الأخيرة قصة غريبة جداً حكاها دكتور مسئول عن مشرحة مستشفى الخرطوم
كان في واحد من أهل العوض توفى وكان بالمشرحة لحد الساعة 1 صباحاً
والجماعة طبعاً قريتهم بعيدة وكانت الدنيا برد شديد
فطلبوا من الدكتور ترك الجثة حتى صباح اليوم التالي
فوافق الدكتور 00 وبعدها أتو ببطانية لتغطية الجثمان
قام الدكتور قال للغفير عليك بمراقبة الجثة وتسليمها لأهلها عندما ياتوا بالبكسي صباحاً
المهم كان في برد شديد والغفير محتار يسوي شنو
فجأة طرات عليه فكرة بطانية المرحوم
قام مشى للمرحوم وقال ليهو
بالله إنت ميت المتغطي ليها شنو
جيب البطانية دي جاي
أها قام اتغطى بيها
وجو أهل المرحوم الساعة خمسة صباحاً شالوا ليك الغفير في البكسي وهم ماعارفين طبعاً
الغفير بعد البكسي مكشى شوية صحى فجأة والجماعة طبعاً راكبين وبيبكوا
اها سألهم ليك 00 وين ياجماعة الخير
قال ليك أهل العوض ديل كلهم تلبوا ليك من البكسي
والجرى شمال والهرب يمين
مابقى الا السواق المهلوع وقتها
اها الغفير قعد يدق ليهو في الباب وقال ليهو عليك الله نزلني ووروني الحاصل شنو
السواق طبعاً خايف
قال ليهو والله مافي ليك أي طريقة الا أوصلك بيت البكاء 0