Post: #1
Title: كـــــــارثه أخري في الخرطوم!
Author: ابو نور
Date: 04-26-2004, 08:53 AM
زياده جديده متوقعه علي المحروقات
البنزين والجازولين بنسبة 25% في ولاية الخرطوم
قالوا عشان صالح الطرق والجسور..تخيلوا!
ويبقي السؤال التالي..
البندفعو احنا للدوله من غير اي مقابل بيمشي وين؟
ابونور
|
Post: #2
Title: Re: كـــــــارثه أخري في الخرطوم!
Author: nile1
Date: 04-26-2004, 08:59 AM
Parent: #1
بيمشي وين؟؟؟؟؟؟؟
والجضوم الكباااااار العاملات زي لقيمات البكا أيام الرخا جو من وين؟؟؟؟؟؟؟
|
Post: #3
Title: Re: كـــــــارثه أخري في الخرطوم!
Author: faisal44
Date: 04-26-2004, 09:11 AM
Parent: #2
نحن الله يكون فى عونا 0000000
الناس ديل ما بقى ليهم الا يقولوا تعالو اكلونا فى خشمونا الكبار ديل 00000000000
ليهم رب كريم ديل الناس 0000000
|
Post: #4
Title: Re: كـــــــارثه أخري في الخرطوم!
Author: جورج بنيوتي
Date: 04-26-2004, 09:59 AM
Parent: #3
حسبي الله ونعم الوكيل..
|
Post: #5
Title: Re: كـــــــارثه أخري في الخرطوم!
Author: ابو نور
Date: 04-26-2004, 10:12 AM
Parent: #1
شكرا نايل وشكرا فيصل
هي كارثه حقيقيه لانها سيترتب عليها زياده في كل شئ
زياده في تعريفة المواصلات وفي ترحيل البضائع والخضر والفاكهة وينعكس هذا
علي كل مناحي الحياة..
وما ضل غير أبان دقون الفي الضلالي معشعشي
فقرا تغش في الله تخش بيتو وتسرقو وري العشي
الناس تشوف ومدعمشي حاكمانا في شنو وفي شان شنو
حيكومه ما خابرالنا شئ..
ابونور
|
Post: #6
Title: Re: كـــــــارثه أخري في الخرطوم!
Author: tiger18
Date: 04-26-2004, 10:52 AM
Parent: #1
ليس لنا سوي (حسبنا الله ونعم الوكيل)
|
Post: #7
Title: Re: كـــــــارثه أخري في الخرطوم!
Author: ولياب
Date: 04-26-2004, 12:40 PM
Parent: #6
بوسة حانية في الخد الأيمن وصفعة قوية في الأيسر
زيادة في المرتبات تصاحبها دوما زيادة في تكلفة المعيشة
والساقية لسه .......
======================================================
ومن النكد خلونا نفرفش شوية:-
أيام حرب البوسنة ، قال ليك واحد من جماعتنا (حلفاويز) مشى يصرف الراتب ولقى ليك الجماعة خصموا مبلغ وقدروا ،،، سألهم الراتب ده مالو ناقص ،،،، الصراف قال ليهو خصمنا من كل الناس دعماً للبوسنة والهرسك في حربهم ضد الصرب ،،، أخونا إستلم قريشاتو ومشى ... وبعد لحظات رجع للصراف ورجع الراتب ،،، الصراف قال ليهو ده شنو .... فرد عليه صاحبنا:-
وده كمان أديهو لناس الصرب عشان يطلعوا زيتهم.
|
Post: #8
Title: Re: كـــــــارثه أخري في الخرطوم!
Author: فتحي البحيري
Date: 04-26-2004, 02:15 PM
Parent: #7
لاحول ولاقوة الا بالله
اللهم عجل بخلاصنا من هذا الجحيم
يارب
لكم الحب يا بورداب الخرطوم
لكم الحب
وكمايقول اخونا اسامة الخاتم : للحاقدين الرماد
|
Post: #9
Title: Re: كـــــــارثه أخري في الخرطوم!
Author: طه حسن عبدالله
Date: 04-26-2004, 02:23 PM
Parent: #8
العزيز أبو نور
إنت ما شايف الناس ديل بقو مُـكاااان و (مِتعَافنين) كيف ؟
مع خالص ودى
|
Post: #14
Title: Re: كـــــــارثه أخري في الخرطوم!
Author: Al-Shaygi
Date: 04-28-2004, 10:32 AM
Parent: #7
| Quote: وده كمان أديهو لناس الصرب عشان يطلعوا زيتهم. |
الأخ ولياب عليك الله إنت متأكد أنه زيتهم !!! ولا يطلع هاجه تانية !!!
بالمناسبة 80% من أصحابي وأحبابي حلفاويين وكمان جيراني ومن الحلفاويين الأصليين حقين حلفا القديمة الأبو الهجرة وأصروا وصبروا على البحر لغاية ما استقر وقعدوا في حلفا الحالية الدخل منها الإسلام وبرضوا راح يطلع منها زي ما قال الراجل رداً على خطبة الإنقاذي الذي مدحهم في حلفا بأنهم أهل البوابة التي دخل منها الإسلام!!!! ،
لدرجة أنه أولادي قربوا يرطنوا عديل.
بس أهلك أحلى ناس وعشرتهم جميلة بس لي حسي لما يعرفوني على حلفاوي جديد بيقولوا ليهيو فلان جارنا السوداني وإن صلحوها شوية يقولوا الشايقي !!!!
....
|
Post: #10
Title: Re: كـــــــارثه أخري في الخرطوم!
Author: almohndis
Date: 04-26-2004, 02:27 PM
Parent: #1
قالو طرق وجسور
ما كافيه نحن
اصبحنا طرق وجسور
والله قروش العالم
مع النهب دا ماتفع
|
Post: #11
Title: Re: كـــــــارثه أخري في الخرطوم!
Author: ابو نور
Date: 04-27-2004, 09:57 AM
Parent: #1
شكرا لكل المتداخلون....
اصبح المتوقع حقيقه
وبرمجت كل ماكينات الوقود علي التسعيره الجديده
العشره الف كان بتكب بيها 10 لتر الان 8 لتر
يعني جالون البنزين اكثر من 5 الف الان..
وانا لله وانا اليه راجعون
ابونور
|
Post: #12
Title: Re: كـــــــارثه أخري في الخرطوم!
Author: ابو يسرا
Date: 04-27-2004, 10:25 AM
Parent: #1
عزيزي ابو نور سلام
كوارث الخرطوم متواصلة مادمنا ساكنين يجب التحرك من اجل شمس الخلاص لأتن السلام القادم سيكون امتداد للوضع الراهن بتغيير طفيف
اليكم جزء من من مناشدة حميد لجموع شعبنا بالتحرك فى الزمن الماضى ولكني اري ان الحال ياهو نفس الحال
*******************************
عساكر اخر الزمن واطه
تعالى وما على كيفك
تعالى وريحي الواطه
بلدنا أن جيتي دي الكوكب
تعالي من اليسار شمساً
تشرق الغربوا المركب
تغربي يا غرب يا باني الكلب
يا تجار الموت والرعب
لو ريح ليلكم طف الصحوة
نسل الصحوة في جوف الشعب
بق وضو نواحى الدرب التالا الفجر
الوطن القلب
القلب الشايلك وما ختاك
وكان ختاك ابداً ما خطاك
بس يا نوره الصاح و الصبر
لمي معانا قطنة البدري
نغزل منها كفن الليل
ننسج منها توب الفجر
فجر تكسو محنتو الفقرا
من التعب البلا صالح
يجبد الكدح الاجرا
يلا بوليس بلا اجرا
شنو الخايفينلو يا فقرا
بيوتا جنها المطره
دقيقاً ما يفك الريق
سمكة مافي في بحرا
شنو الخايفينلو يا فقرا
شديراتن بقت حطبها
تمرة ما تفك طلبها
شنو الخايفينلو يا فقرا
بهيماتاً تسوى الميع
مغبش كالترب بصرا
شنو الخايفينلو يا فقرا
كلبةً لا قلب لا حيل
وهوت في شبح فوق خيل
كان يتداعر اخر الليل
نجرت والشبح حدرها
صدت للصريف فى ترى
كان صوت الرصاص قفرها
انت والخلق نايمين
صنت والخلق نايمين
عفنت البلد يومين
كلب العمدة جاب خبرا
شنو الخايفينلو يا فقرا
شنو الداخرنو في متره
ابو الاربل لابو الواسوق ابو المحرات
وساقية تسوق لابو بقرا
يا بقر السواقي السايقى للامرا
شنو الخايفينلو يا فقرا
ابو البوليس اذا ما كان
اباتم من طرف فقرا
يحرسوا القصر للتلفان
وللفي الليل زنى ودعره
ويقوموا مع النهار وزراء
ابو اذا ما كان اراضيهم
يبس شدرا
يحرسوا طلمبة الجازولين
يقيفوا على الينوك غفرا
اذا ما الشارع استنفر
غبش عزل بستنكر
على القيصر خساستو
تقول للغيم محل مطر
قراب منك دالفينك
يضم صدر الوطن حاني
يهز للظلم ساساتو
تحن لباكر الاخضر
يعم بخيرو ناساتو
تنادى الفارس الاسمر
تطالب بي قصاصاتو
من الفجار من العسكر
ابو البوليس اذا فكر
يفك فيهم رصاصاتو
ايابوليس يا نازل من المريخ
جباة الدم من التاريخ
أيا واقفهم كالسيخ
تقيفلنا لامتين دغري
حقارتك تبقى فى فقرا
فضيحة فجيعة يا بوليس
وجايين من فرد شدرا
جنانا العاق متين تصحى
تشوف الحاصل المذري
متين تدري
يانو الصوت ده ما مكري
معتق للوطن دغري
و بانو الجاري
ما منك
على صدر الوطن يجري
وخطاهو التيربت
بس قدرها
تلاقى الفجر والفقرا
..........................................................................................
|
Post: #13
Title: Re: كـــــــارثه أخري في الخرطوم!
Author: ابو نور
Date: 04-28-2004, 10:17 AM
Parent: #1
ابو يسرا تشكر علي الهتاف
ولحميد كل التحايا كل الود
ولكن السكوت اصبح سمة اليوم علي هذا المنوال..
شكرا لله لانني
صليت علي قبر النبي محمد
وعند مقادرتي روضة الاتقياء
مديت اصابعي ودشنت بلادتي وبلاهتي..
لانني..
عائد الي مدينتي
كبري اوكار اللصوص وال.....
وانظر الي تأكيد كلامي الذين دخلو كثر والذين هتفو قله
ونهتف..
يا خرطوم ثوري ثوري ضد الحكم الدكتاتوري
ابونور
|
Post: #15
Title: Re: كـــــــارثه أخري في الخرطوم!
Author: aymen
Date: 04-28-2004, 12:01 PM
Parent: #13
الاخ ابو نور
هل يمكن ان تكون هذه محاولة من النظام لاثارة الشارع السوداني حتي يتم لهم الانقلاب علي السلطة (سلطتهم- طبخة يعني) للتملص من مفاوضات السلام؟
الاحتمال الثاني:
هل يمكن ان يكون الامر لجمع اكبر كمية من المال لاي غرض كان قبل تحقيق السلام؟
|
Post: #16
Title: Re: كـــــــارثه أخري في الخرطوم!
Author: garjah
Date: 04-29-2004, 08:24 AM
Parent: #15
الحبيب ابونــــور
حبابك اخوي بعد غيبة
انت عارف اذا الشعب بقت عندو ثقة في ان الاموال البتجبي
من رفع البنزين تذهب فعلا لبناء الجسور لما تردد في المساهمة
ولكن الثقة معدومة اساسا بين الشعب والحيكومة
اذا كان هناك بيان بان سكان السودان بحرقون مليون جالون يوميا وبالتالي الزيادة لمدة شهر ستحقق المبلغ المطلوب لبناء الجسر الفلاني الشارع الفلتكاني ومن ثم تعود الاسعار لسابقتها
لاحس الناس فعلا انهم يسهمون في بناء البلد
وعندما تعبر جسرا تقول
انا عندي ميتين الف في الكبري ده
لكن الحكاية مفكوكة فما يجبى من البنزين يذهب للمسيرات وفرق الطرب
التي يرقص على وقعا ابزرد وجماعتو
|
Post: #17
Title: Re: كـــــــارثه أخري في الخرطوم!
Author: قلقو
Date: 04-29-2004, 11:39 AM
Parent: #16
حبيبنا ابونور..
شكرا على معلوماتك الكارثة..
بعدين ياابونور الجالون بالضبط كده سعره بقى 5625 جنيه بزيادة 1125 جنيه للجالون الواحد ولك ان تتخيل مدى هذه الزيادة الفاحشة على مواطن لا يتعدى دخله اليومى مبلغ الدولارين..
وهل تعلم ان العربات الحكومية وحدها تستهلك اكثر من 50% من الأستهلاك اليومى للمواد البتروليه؟
الغريبة يقال أنه نحن دولة مصدرة للبترول وبنستعد للدخول فى منظمة اوبك..عليك الله هسى الواحد يضحك ولا يبكى ويقطع هدومه ؟
|
Post: #18
Title: Re: كـــــــارثه أخري في الخرطوم!
Author: Shmmasi
Date: 04-29-2004, 10:42 PM
Parent: #1
سلام عليكم....
و الله أنا في رأي انو قبل ما نفكر نزيد المحروقات نسأل الحكومة
و نشوف القروش البدفعوها المغتربين ده بتمشي وين: (الضرائب و الزكاة و ما شابهها
من أموال تدخل في خزينة الدولة.
و الطريف في اجازتي مشيت المغتربين كان في منظر:
هو انو بخنو القروش في أكياس بلاستسك عادية و ده بدل على سوء الادارة و الفساد
بس هم بياخدو قروش و المشكلة لا الشعب ولا المغترب مستفيد أصلا.
كده ممكن نقول انو القروش ده بتمشي عربات للحكومة و بيوت للمسؤولين الحكوميين و هم أصلا
ماكلين حق الشعب.
أما بالنسبة لموضوع رفع أسعار المحروقات لصالح الطرق
أنا أفتكر انو ما أظن للطرق
لأنو الشارع في السودان بقعد سنة واحدة و يصبح غير صالح للاستخدام...
يعني في الدول التانية في شوارع بتقعد أكتر من عشرين سنة...
اذا هل العيب في المستخدم أم في الشركة التي نفذت الشارع أم في المهندس المشرف
أم في الحكومة...؟؟؟؟؟؟؟؟
أخوكم.
شماسي
|
Post: #19
Title: Re: كـــــــارثه أخري في الخرطوم!
Author: عشة بت فاطنة
Date: 04-29-2004, 10:59 PM
Parent: #18
عليهم بالساحق والبلى المتلاحق ، ما ينفعهم ناس ود البشير !!
|
|