يا اخونا حمدلوا لي السلامة لانه نجيت من احداث جدة بشق الانفس

جدة ليها يومين زي شيكاغو كابويات في الشوارع مع الجوكية وشغالين طقطقة
لو ما الله لطف كان اخوكم اتلحس فيها
الاحداث الحصلت دي كلها في حلتنا
بس الحمد لله رحلت قبل سنة من الحي الدارت فيهو الاحداث
ونجيت من حرب الشوارع دي

أساسي
حمدلة على السلامة
أعمل ليك أصحاب
أفضّل أن يكون عزاباَ
لأنو في الحالة دي بتكون في أمان
ما لم تكن مسنفك في نهاية الأسبوع

الأخ أساسي:
حمد لله على السلامة و ما تشوف شر

الف حمدالله على السلامة

أخوي اساسي
رحلت ليه
كنت حسع دخلت التاريخ
بس كنا حنفقد مشاكساتك
على العموم
الف حمد الله على السلامة باثر رجعي

ليه يكتلوك هن ما عارفين إنك أساسي في حياتنا
حمداً لله على سلامتك ياخي والبركة الرحلت وربنا يحفظك من كل سوء يا أساسي

الحمد لله على السلامة أخي أساسي .. ودائماً من الناجين إن شاء الله ..

تحياتي،،

جاد

الأخ أساسي
حمدلله على السلامة، وبيني وبينك البوست دا ما فيهو تورية، وخاصة أنا مصنفك في كوم الجماعة إياهم "على رأي بيان"، وأعمل حسابك بيوت أشباح الجماعة ديلك "غير".

اساسي حمد لله على نجاتك من الاحداث
ربنا يكضب الشينا.......... خلاص الروح بقت في الرقبة

لا لا والله يا أســــاسي واجـب نحمدل السلامة "اســـاســي" ويقتلوا ومال ناس الاحتياطي حا يودوهم

وين، حمد لله الف على سلامة وانشاء الله يا اساسي ما نعدمك لانك فينا اساسي، بس لو تعرف نحن ساكنيين

وين في الرياض كان طوالي حضرتو العزاء والفراش من غير ما تتأكدوا لانو ميتين ميتين لانو نحن

والموت متواعدين


وليد احمد

سلامةيا اساسي ، ونقول معاك لا لقتل الابرياء ولا للموت العشوائي ، واعملو حسابكم منهم اصلهم الجماعة ديل عينهم في الفيل بطعنو ضلو وملوكهم ورؤساهم اقدلو مجدمين ومملسين . تسلم

حمد لله علي السلامة يا اساسي وما تشوف شر

يا أخي بعد الشر عليك وعمر الشقى بقي ومن لم يمت بالسيف مات بغيره

الاخ اساسي
سلام مربع


الف حمد الله على السلامه ..

اساسى

تعملوها وتجوا تقولوا اتحمدلوا لينا ؟؟

تلقاها عند الغافل

عموما يا سيدى حمدله على السلامة يا الذ ارهابى من الدنيا

حمدا لله على السلامة

الف حمدا لله علي سلامتك يا مان

ربنا ما يوريك شر تب

أساسي

الحمد لله على سلامتك.....أسمع...وأخونا فلان داك كان وين؟؟؟تلقاه دخل تحت قشرتها....أكيد لي هسع مدسي...وقال عوج درب قال

سلامات اساسي الأساسي
والف حمد لله على السلامة
وعمر الشقي

حمد الله على السلامة وربنا يحفظك لنفسك ولاهل بيتك

اتخيل انت بتشبه ليك واحد من المطلوب وحقو الواحد يبلغ عنك ويمشى يصرف المليون ريال ويرتاح منك

محمد

ألف ألف حمدلله على السلامة يا أساسي...


ياخ ديل ببالغوا.. مفروض يتضاربوا بعيد بعيد.. موش في الحي بتاعك الكنت ساكن فيهو قبل تلاتة سنوات..


الله يحفظكم ياخ.. السعودية دي بقت صعبة شديد


بنت الحسين

قال حلتنا قال ؟؟


خلاص سويتا حلتكم ؟؟


انتا خسارة فيك فيك جبخانة الجماعة ديل ...



ان كتلك شي بكتلك ضميرك ..
ضميرك النايم المسحور

اساسي
لكن مابالغت ياجحا
كنت ساكن السنة الفاتت يعن يتحمدلوا ليك بأثر رجعي
يا قبضاي عشان يتقوا شرك!
قال حلتنا قال!!
أنا ساكن في حي الصفا الشاكرين تمانية سنة ما شفتك
وانت الصادق تلقاك ساكن في حي قويزة الصابرين لووول
جني

ألف حمدلله على السلامة يا أساسي...

الف حمدالله على سلامتك وانشاء طويل العمر
تحياتى

اساسي حمد الله على السلامة

برضو حسي ارحل من حيك دا

اساسى ..... عمر الشقى بقى


المهم حمد الله على السلامه





لكن نوع المشاكل والضرب لى سببه شنو

سلامات يا أساسي
والله فعلا الله يستر علي الجميع البلد بقت ذي قناة الأم بي سي التانية
كلها كاسوري

بس عارف
أول مرة أعرف الموضوع وصل الكرنتينة
واللا كيف؟؟؟!!!

حمدلله على السلامة

كولكوم بدون فرز تسلموا وان شاء الله لا عدمناكم

وانا الان بفكر ارحل من الحي الانا فيه

لكن في واحد صحبي قال لي انت كل ما ترحل بتخلف وراك

كارثة ..! قلت ليهو احسن تخلفها وراك الكارثة ولا تقعد تنتظرها ؟

أساسي يا أخوي إن شاء الله قشه ما تعتر ليك وأقول ليك حاجه بلاد حلوه أرجع ليها

إزيك يا اساس

لا، دى يعنى هسه خوفة بى اثر رجعى ولا شنو

أعمل حسابك، أنا قلت ليك تعال جنبنا فى الكرور داك، شفت الجخانين بتاعتنا ديك إلا ب "الكروز" أو "توما هوك" بس

لكين إنتو طبعا عاملين فيها أولاد مرتاحين وكده، لمن تجيكم داهية تلحقكم أمات طه

هن أمات طه ديل الحصل عليهن شنو يا اساس

Quote: وشغالين طقطقة

يعني كيف ؟؟!!

Quote: الاحداث الحصلت دي كلها في حلتنا بس الحمد لله رحلت قبل سنة من الحي الدارت فيهو الاحداث

هو انت ماعارف انك انت المستهدف يااساسي لكن الجماعه ماسمعوا بي خبر الرحول ..........

Quote: ونجيت من حرب الشوارع دي

مامعروف


نوف

أساسي
حمدلة على السلامة

حمد لله علي سلامتك وسلامة كافة الجالية السودانية هناك
كمال

ونحن بدورنا ندين ونشجب ونعض كل المحاولات الجارية والواقفة التى تستهدف أعضاء وأطراف مثل أساسى قبل عام من رحيله وتدمر أطلاله الجميلة
ونؤكد لك يا أساسى باننا نقف معاك صفا واحد اتنين تلاتة قبل عام من رحيلك

حمد لله على السلامة ياأخى

اساسي
سلمتك
لو عاوز لك حتا تتدسي فيها وتكون في امان..قول لي عوك عشان اوصي لك اهلي في الكرنتينا

والتانين برضو كولكم تسلموا من كل شر

بس ما وريتونا ارحل ولا ما ارحل ؟

نانو الملا عمر هو الفهمني يا الملة حلوة في الغناء لكن

في القروش ما حلوة كلو كلو

أساسي العزيز..
حمد لله على السلامة..

لكن باقي لي جماعتكم لو شافو كتابتك الظلامية دي حيكونو وراك وراك ..

ارحل بس والنبي ماتكلمش حـــــــــــــــــد



نوف

الف حمدا لله على السلامه اخ اساسى
ونسال الله ان يرد غربتكم بعد تحقيق
ما تودون انجازه

السلامة لانك نجيت من احداث جدة

تسلموا يا حلويييين
وربنا ما وراكم كابويات جدة المطاوعة ولا الجوكية الهراشين

الأخ اساسي

حمد لله علي السلامه



ضيعت علينا كباية الشاى المجانيه

-------
أهل العوض

اساسي بيلعب براهو بيتسنفك تخيل؟

الحبيب أساسى

دخلته البوست دا و أنا قلبى مقطوع عليك ، ألآقيك رحلت قـُبـّال سنة؟

لكن برضو بنحمد الله على سلامتك و ربنا يوقف جُبارتك كمان و كمان

اساسى العزيز
الف الف حمدالله على السلامه والشغلانه دايره ليها كرامه..

الف حمدالله على السلامة.... وندين العنف والإرهاب أينما كان
وما هكذا تكون الثورة ضد الظلم
لا لقتل الابرياء

بركة المرقت بالسلامة
الحمد لله اليوم داك ما
مشيت سوق الوطنية دة
تجيب ليك منو حاجة

الف حمدالله على السلامة

وعسي ما تشوف شر

والله كان نظبط ليك في البورد عرس شهيد ما حصل



انت ما تمشي تسكن في الحمرة .. جمب ناس قزاز .. وصالح كامل البسكنك مع طبقة العمال شنو ..وانت زول اقطاعي ؟؟

العزيز اساسي
لك تحيات الورد
سلامات وما تشوف شر يا غالي
خالد

اساسى

Quote: لكن في واحد صحبي قال لي انت كل ما ترحل بتخلف وراك كارثة .

اوعى تفكر تسييب البورد

تسلموا يا باقي الحلوين ايضا
وربنا يقدرنا علي شكركم جميعا
والرحول عز العرب
وانا قررت الرحيل الي سمرقند

الف حمد لله على السلامه يا اساسي

تسلم ايهاب

سلامتك
طبعادي عاوزة ليها خرووووووووف كبير ومندي ولمة في جدة
أها متين العيزومة
قال الشعلة قال
تعرف أنا أكثر شغلي في المنطقة دي
الجفالي والجميح والجريسي

عزيزي اساسي

حمدالله على سلامتك باثر رجعي

في قصة التفجيرات التي تحدث في السعودية ما زال نصف الحقيقة هو الذي يذكر ما زالت الحكومة السعودية و الإعلام السعودي يتعاملان مع المشكلة من طرف واحد , تماماً كما تنظر الإدارة الأمريكية إلى الصراع الإسرائيلي العربي من طرف واحد , وهو طرف " من حق إسرائيل حماية نفسها " دون النظر بعين الإعتبار إلى الطرف الآخر , دونما التطرق للسؤال ما الذي يدفعه ليهدد أمن إسرائيل ؟

وكذلك الحال في السعودية لا بد من الخوض في مسألة ما الذي يدفع هؤلاء الجماعات للإقدام على هذه التفجيرات بإفتراض أنهم وراءها ؟

ولن يفيد أن تاتي الحكومة السعودية بألف شيخ و داعية ليبينوا لهؤلاء الجماعات الجرم فيما إرتكبوه وأنه إفساد في الأرض وترويع للأبرياء

ما لم يتم التطرق إلى الجانب الآخر من القضية وهو جانب الحكومة السعودية وما تفعله من أخطاء .
وما لم تتم محاولة إيجاد نوع من الحوار مع هؤلاء الجماعات والإعتراف بوجودهم وأن لهم صوت بل إن لهم مؤيدون من داخل المجتمع السعودي نفسه .

سياسة التجاهل التي تتبعها العئلة المالكة لا تفيد أحد وستزيد المشكلة تفاقماً وهذا هو دور العلماء في محاولة إيجاد نوع من الحوار

بالأمس رأيت على شاشة التلفزيون أحد الدعاة السعوديين وهو يكيل الإتهامات لهؤلاء الشباب ويصب جام غضبه على ما فعلوه .. ولكنه لم يتحدث عن جرم آل سعود في حق الشعب السعودي وعن موالاتهم للغرب وعن إنطلاق الطائرات التي تحمل الصواريخ لضرب العراق من الأراضي السعودية .

فأي مصداقية يحملها عالم كهذا ؟ كيف يتوقع من الجماعات أن يسمعوا له وينصتوا ويعتبروه ناصحاً أميناً لهم ؟ وهو يذكر نصف الحقيقة لا بد أنهم سيسفهوا كلامه وسيعتبروه بوق للسلطان وسيأتي كلامه بنتيجة عكسية ومزيد من العناد .. لا بد من أيجاد حلول جذرية لطرفي المشكلة ..لكنه لا يستطيع أن يقول ذلك .. فهو يعلم أين سيكون مصيره إن هو تكلم في أمر كهذا .

يا أخي كان تكون هناك كنا ارتحنا من واحد صهيوني وبتاع مشاكل .. كان علي الاقل المنبر دا كلو إقول عليك انك راجل طيب وما بتاع مشاكل وانك ماشي في ضل الحيط ولا قاعد تمشي البوادي ولا حاجة

سلامتك الف سلامة

العزيز اساسى

تعرفو الجماعة ديل لو ضربوك كان ارتحنا منك ومن نقتك الكتيرة دى ومشاكلك الما بتنتهى مع اعضاء البورد وكان بكرى زاتو ارتاح بدل ما يفصلك


بس نحنا كنا ما حنقصر فى حقك ونعمل اسبوع فى المنبر زى اسبوع " محمو..."
وكمان نسميك الشهيد اساسى


يازول دى هضربة ساكت حمدا الله على السلامة

العزيز أساسي

حمد الله ألف على السلامة .. والله لا يوقعك لا عند إرهابيين ولا مرهبين ( رجال الأمن ) .. أصلوا ديل بيرهبوا وديل بيرهبوا

أنت ما وريتنا أنت ساكن وين ، فكنصيحة لوجه الله .. لا تسكن في الأحياء التالية ذكرها :

حي الصفا
حي المروة
حي العزيزية
حي الفيصلية
حي الطيارين
حي الشرفية
حي الربوة
حي المصفاة ( الكرنتينة )
حي الجامعة
حي الحمراء
حي الأندلس
حي بني مالك
حي الثغر
حي الكندرة
حي الرويس
حي البوادي
حي غليل
حي اليمانية

ولا تقم بالتسوق من المراكز / الاسواق التالية :
حراج الصواريخ
سوق الحلقة
سوق البنقلة
سوق السوررين
سوق محمود سعيد
سوق البدو
سوق النجار
سوق طيبة
سوق البوادي
سوق الكندرة
سوق جدة الدولي
سوق باب شريف
سوق باب مكة
مركز السليمانية
مركز شبرا
مركز الهرم
مركز الشرق الاوسط
محمود سعيد بلازا
مركز الكورنيش
مركز المحمل

ولا تذهب لقضاء الويك إند في المناطق التالية :
المطار القديم
استراحات أبحر ( الشمالية والجنوبية )
حديقة الأمير ماجد
ملاهي جنغل لاند
الكورنيش

هذا وكفى بالله وكيلا