ونسه في ضل الموسيقي .. يا ابو شعور رقيقه هاك الغنوه دي

ببساطه طاعمه ..
و رغم نهارات الخرطوم الحارّه جداً ..
و الحرب الفي البورد ..
و قلبي الهنا يتسلّي بتقليم اصابع اشواقه ..
و الحبيبه الهناك قاب غياب او حنين ..
و الطنطنه في وريد الوطن ..
و
عندي سؤال اريد ان نتحاور حوله :
انعتب علي شرحبيل في عدم استصحابه الوازا في موسيقاه ، ام نحاكم الوازا في عدم قدرتها علي الحضور ، ام نستمتع بالموسيقي ؟

وما داير زول يشرد ، سواء كان موسيقي ، او مستمع ، او بينزّل اغاني في البورد .

وهاكم الغنوه المجنونة دي .

عاصم كدي اول طمنا علي صحتك
ثانيا
انا مغرم الي حد الجنون بصوت شرحبيل الدافئ
وشرحبيل بدأ مغنيا بمصاحبة الاوركسترا التقليدية الوترية
ثم تحول الي الغناء بمصاحبةالالكترونيات والنفخ النحاسي
وقد سحرتني ياما بكره تندم عندما غناها
في الستينيات بجامعة القاهره فرع الخرطوم
وكنت حينها طالبا بالخرطوم غرب الابتدائية
واسكن بقشلاق البوليس الغربي
اقفز من حائط تلك الجامعة مع ابناء الحي
واتسلل بلصوصيه للاستمتاع بالحفلات التي يقيمونها
وذكرتني هذه الاغنيه الحلوه الان بتلك الرائعه
اعتقد جازما ان الميلودي المصاحب للغناء في المقدمه
هو اكثر انتماء للوتريات من الات النفخ
لسلاسته
وبرغم ذلك انا منتشي ومبسوط
وبشكرك لانزالها
وبما انك في السودان
ارجوك وصل هذا الرأي لشرحبيل
مع سلامي ومحبتي له

دي حتة لذيذة البد فيها

خدوري ازيك والعروس
اها مابقيتو تلاته

خدر زح لي جنبك
بالله يعني شرحبيل شبع
هسي في بوست لسنجاوي

يلا اللنك اللنك يا اهل الخير

بعدين يا عاصم نعتب علي شرحبيل كيف
دا لو جاب الوازا كان قرضنا عديل كدا
هسي انا قربت افطس
الشهادة والعمل الطيب
جبو لي اللنك قبل ما اشهق ليكم هنا دا

نستمتع بالموسيقى و.... نتذكر

إزيك يا عاصم الطاعم

خلينا نأوى الى حضن يعصمنا من الهجير

مع انه الأغنية ما ظهرت عندى، بس ما دام الموصلى والجندرية وخدر لابدين بى جاى، معناه سرادق الطرب منصوب، واها هاك يا قعدة لامن يجينا اللنك

بمناسبة الوازا يا عاصم، ياخى دى حاجة عبقرية بشكل اصله ما معقول، الموسيقى الوحيدة يمكن فى الكون كله، البشترك فى عزف النغمة الواحدة أو الجملة الواحدة، مجموعة من العازفين، ولا مش كده يا موصلى، ده الشى الأنا سمعته والله، يعنى مافى آلة واحدة بتطلع نغمة كاملة، لكن كل آلة تؤدى جزء وتناول البعدها

وعلى سيرة الوازا والبرتا برضه

مرت قدام شبابيك الروح، ابتسامة عاصم "الآخر" عاصم الطيب، الزول العجيب الفنان، وهبت برضه جوه ساحة القلب، نسمة من صوت "الجمرى" الزول الشجى والوحيد البتحس وانت بتسمعه انه رمضان حسن قاعد يغنى، والدنيا بداية خريف، والواطا خرطوم

وين تمبس يا جماعة

الحقنا يا شيخ الألق

احييييييييييييييييييييييييييى ياعاصم مسكتنى من الايد البتوجعنى
الموسيقى دى حاجة بحسها بتجرى مع دمى وبتعمل فيهو التهاب
استاذنا العظيم شرحبيل عنده جمالات فى صوته
عذوبة وهدوء وسلاسة ورقة
حتى كلامه البيغنيهو فيهو حاجتين عظمة وبساطه
شرحبيل لو غنى كلام الجريدة برضو يطربك
باحب ليهو جدا قلبى دق ومنايا اشوفك تانى
الله يجازيك ياعاصم فتحت علينا الجروح
انا من الاول عارفاك قاصدنى انا
تحية للراقى الانيق شرحبيل
وبالمناسبة ياعاصم
الاغنية ابت تفتح معاى
اتصرف ..وانا فى الا نتظار

اقول ليكم كلام؟

سر لكن

اقول؟

Quote: انعتب علي شرحبيل في عدم استصحابه الوازا في موسيقاه ، ام نحاكم الوازا في عدم قدرتها علي الحضور ، ام نستمتع بالموسيقي ؟

شرحبيل يزين جبين ايام عشقي الأول و الهسة برضو

يحصل شنو لو تحدث كل فناني بلادي كمايتحدث شرحبيل ... ؟؟؟؟

عاااارف. تحصل كارثة.


عليكم الله....

شفتو زول مهذب زي شرحبيل احمد؟

يوما ما من ايام كا يغني فيها الموصلي و السمندل وعقد الجلاد و شرحبيل في شارع

الجامعة تحديدا في قاعة الشارقة.

كنت صبيا جدا بمفهوم النشؤ والتطور .. ساعدني ذلك اليوم في ان اقفز مساااافة

و

احب ..

غني الرجل و عطب جيتاره .. غني بدونه .. فأحببت اكثر ..

....................................
....................................

اكثر من حول ... ما زلت أحب


الحل شنو؟؟

عاصم:

قووووول قووووول

الموصلي
كيفك يا صاحب البال المهندم الموسيقي وتقاطعاتها مع اليومي الانساني
اها
سلامك و رؤاك فيما يخص مشروع الاستاذ شرحبيل الابداعي ستصل له .
اها
برضو ما جاوبتني حول شرحبيل والوازا ،والوازا براها، والاستمتاع ؟؟

خدر
ياخ يدّي وجعتني .. متزكّر بوست ( العم ماركس ) كفّت ليك ناس كتار خلاص .
و مبروك وبيت غنا وحواوت ما تنتهي تزيدك انت وهي حنيناً
برضو داير اعرف رأيك كموسيقي و مغنّي للسؤال الفوق ؟؟

الجندريه
اهلاااااااان
و اعضّك في انف قلب عثمان تراث الطاعم حتّي يجئ .
شفتي تقعدي تقولي لي اللنك و ما ادراك ما اللنك تاني ما بنزّل ليكم اغاني ، هسي مش ما قصّرت وكت قدرت انزلها .
ولك العافيه ولابنائك التحايا الناصعه .

جورج بنيوتي
وانا استمتع بكفّك حين تكتب و كم كل الدسامة كل الوسامه في سؤال المطر التحريضي لك و لنا لمساءلة الكلمة فينا لننداح شعراً .

المطر
خطر رائع ان اباريك و انضامك بكلمات هيّنات مليئات بالشاعريه .
يا ريت لو تكتب اكتر و بصيغة منتهي رؤياك الابداعيه فيما يخص تقاطعات الوازا مع موسيقي شرحبيل و ذلك الطيّب عاصم ود الطيّب الشقّ السكك لموسيقي البرتا لنعرفها ونحاورها و نستمتع بها .

سنكو
وينك ؟؟؟؟؟؟؟؟؟
لك الشوق و كل المباح من تحايا وريفه .
و
يا ريت ننستر بي لمّه طاعمه هنا .

عمر ابرهيم
التحيّات الانيقات و كفي بيدك علي الكتابة المناسبة رحيقاً
و
ذدنا من هذا الالق والعرفه وفتح الدروب و السكك لحوار اكثر عمقاً

النسر
ما تلك بيمينك يا عبدالله يا نسر ؟
حسناً
انها اشواقي لك و لشوارع القاهره حين التسكّع مع الاصدقاء في تمام العافية .
حسناً
هش بها علي صبرك حتي نلتقي .

و
سلام حتي مطلع الامر

عاصم الطاعم
اهلا بيك وازيك وجد مشتاق اعرف حالك
حلوة وجميلة ( قول الحقيقة) وسوال الوازا لابد ان يجاوب علية من كل الموسقين داخل البوست قبل ان نفقد جنوب النيل الازرق زى ما بنفقد كل يوم جزء عزيز من ارض الوطن ؟؟؟؟؟؟؟؟؟؟؟؟؟؟؟؟؟؟؟؟؟؟

سمو ازيك وين لا خبر ولا اتر

/>Save @ PC

مسـاء الخيـرات ياعاصـم
اهـا وبعد ناس الموسيقـى.. قاصـد منـو ؟ والبقـول الحقيقـة منـو ؟
لقيتنـي (ختريـة) مـش
غايتـو انا لقيتك (ختـري) مـرة واحـدة فـي شرحبيـل دا وطاعـم فـي كلـو ..
لك التحايـا

** خـاص للمهندس : انت زااتك بقيـت (ختـري)
وشوفوا لينـا ياجماعـة الكورسـات دي بلدهـا وين**

ya 3asim salamat

bemonasabat 3asim altayeb di.. any way you could post his works on this board? simi3to ayam sudanese sound , wotani simi3to laman khalahoum w3amal al group bita3o baraho. very original work

طبعا يا عاصم.. نسبة لعطل في الجهاز ما سمعت الأغنية ..

شكرا لأسلوبك في ترطيب حر المنبر..

ولك العتبى..

مبروك التخرج
واول انتاجك اكتر من جميل واكتر من رائع

يسلم شرحبيل
وتسلم انت دا
وشكرا

شكرا عاصم.. شكرا شرحبيل


بالمحبة الفى فؤادي..

سيرتك دايما عندى اغلى سيرة...





اليك..