عازة سرور فى مواقف بصات تورنتو..

بدت لى الصورة المنتشرة فى مواقف البصات، بدت لى لوجه مألوف، يطل بإبتسامة مشرقة وطيبة متناهية، تصابح وتمسى على سكان تورنتو، تلك المدينة التى مازال برد الشتاء يرفض توديعها للربيع المنتظر حانقا
على مماطلة و محرَكة الشتاء!

أول أمس تشرفت بزيارة الأرباب الأخ عبدالعظيم سرور وكان فى معيته نفر كريم من الأصدقاء، وقد جعلوا مقيل يوم الجمعة فى الموردة، إلى أحد.. سمعتو بمقيل الجمعة يوم الأحد؟ أول ما إسترعى إنتباهى صورة بوستر ضخمة لصاحبة الإبتسامة المليحة التى تشرق بها صباحات تورنتو تتصدر مدخل الشقة، فوقفت عندها طويلا حتى عرفنى الصديق الفاضل هاشمى بأن صاحبة الصورة هى الإبنة عازة، إبنة عبدالعظيم سرور.. فعرفت سر الطيبة التى تشع من عيناها.. ربنا يحفضا.




لمزيد من المعلومات أضغط هنا

اخونا العزيز ابن عبد العزيز

تحياتي

تصدق من كترة الزول ما زغلل انا قريت الاسم سارة منصور بدل عازة سرور

حفظ الله ابنتنا عازة و التحايا لوالدها الذي كنا نتابع كتاباته في الصحف السودانية قبل فترة من

الزمن و لا ندري هل انقطع عن الكتابة ام نحن الذين انقطعنا عن القراءة

عزيزى ملاسى..

سأل رجل البوليس أحد المسافرين من الذين يبحثون عن حوائجهم وسط العفش المتناثر بعد انقلاب الحافلة التى كانت تقلهم، سأله.. عفشك شنو يازول؟ فرد المسافر.. كرتة وشنطونتين!

آها دحين ات المشقلبك شنو؟

الموضوع المرتبط بالبوستر يتحدث عن اشراك الشباب فى صنع القرار فى دولة بحجم كندا.. انهم يرون ان لهم دور اهم من مسكهم الابريق حتى نفرغ من غسيل أيادينا!

لك الود..

العزيز عدلان..

شكرا للوصلة المفيدة..

تحياتي لعزة وكل أسرتها..

P.S:
وين صورتك ..؟

عيني بارده بنيتنا الصغمبوته كبرت

العزيزة رجاء.. شكرا على الطلة، الصورة راحت فى حق الله، هو بكرى بريحنا؟ شايل مقشاشتو كل شهرين على الصور.. وبعدين ذاتو شهور الزمن ده بقن قصار خلاس، وأنا فترت من تحميل وعتالة الملفات، فقلت.. ياولد سيبك!

الأخ الفنان موصلى.. الصغمبوتيات والصغمبوتيين كلهم كبرو ونحن ماعملنا ليهم الحبة.. غايتو نسعل الله عامنا ده يبقى عام سلام، أقلاه تقيف الحرابة ونقدر نقالع فى حق كل الصغمبوتيات والصغمبوتيين.

لكم الود..