رسالة لوم وإستفسار من الأخت سارة منصور

اخي الحبيب ترهاقا اتمني من الله العلي القدير ان تكون انت والاسرة في احسن حال والحمدلله ، اما نحن فنحمدالله كثيرا علي الصحة والعافية والنفس الطالع ونازل ده ،، طبعا اخي الكريم ترهاقا انت كنت متابع الاحداث الاخيرة واساءة رجاء العباسي لشخصي ولوالدتي والتي هي في مقام امها وهذا بالضافة لجوء القلق والهلع الذي يقومون به من خلال تلفونات غاية في الاستفزازية ، الاخ بكري لم يوجه للاخت رجاء آي قرار منبري بالتوقيف بالرغم من انها اساءة زميلة لها اساءة بالغة وجارحة وشهرت بي واتهمتني بالكثير من الاتهامات ولم ارد عليها لاني كنت اثق في انصاف وعدالة الناس وامين الموقع ولكن حدث العكس لقد تم توقيفي انا و كنت انا كبش الفداء بالرغم من انني مظلومة تماما الا انني لم اري احدا منكم جميعا يحدث بكري عن ظلمه لي وعدم عدالته واسمح لي ان اخاطبك بهذه الهجة فلااني اعرفك انسان محترم ولاتخاف في قول الحق لومة لائم واتعشم فيك خيرا وجاء السيد خالد الحاج والذي ابدع في الضلال وكتب ماكتب وتهجم ونال مني وزوجي وفي النهاية تم توقيف زوجي لان الاستاذ خالد الحاج امر بذلك والنتيجة مجتمع يعتمد علي نظام الشلليات و الاتفاقيات التي تتم بين الاعضاء في الماسنجرات وضاعت الحقيقة ونحن تم فصلنا وحتي لانعرف لماذا؟؟ وماذا فعلنا؟؟
احترمك كثيرا يااخ ترهاقا لذا حاولت ان افضفض معك بما ازعجني من الظلم الذي لاقيته والحقد الذي تعاملت به من قبل
اخوة واخوات سودانيين ..
ارجو ان لا اكون قد اثقلت عليك ولك مني كل الحب والاحترام وتحياتي وحبي للمدام والاولاد..


وهنا يكون السؤال للأخ بكرى هل سارة موقوفة وهل عاصم أيضا
لانه بيقول انه لم يستطيع الدخول للرد على المتداخلين فى بوسته
ولو موقوفة ممكن تتكرم توضح الاسياب للزملاء فى البورد ،
فى اللحظة إنو البوست المعنى لسع موجود كما قال الاخ ابوالريش
وتسلم

الاخ بكرى
تحية عامرة بالود

ما زلت فى إنتظار اجوبتك للأسئلة التى طرحتها لك
حتى لو كانت سارة دى مجرمة حرب ما هى البنود التى
إعتمدت عليها لفصلها ؟ تفصلها ما ما مهم بس انا أاكد
ليك عدد لا يستهان به من البورداب ما عارفين سبب فصلها
والتوضيح يكون كلآتى لانها إخترقت قوانين البورد الآتية
كيت كيت كيت وإلا شنو يا أخ بكرى؟

الاخ ترهاقا تحياتي

مشكلة بكري انه ظل يتدخل في المشاكل سواء باختياره أو غصبآ عنه ـ داير يرضي الجميع في الفصل المهرجل دا ـ هذا المنبر خطر جدآ ـ والغالبية هنا نازلة بأسمائها الحقيقية ، ودي صفة أظنها اصبحت نغمة بدلآ عن ان تكون مدعاة احترام بين الاعضاء ، لذلك المشاكل تأخذ ابعادها الحقيقية و ربما تؤدي الي خراب بيوت!! ـ والمصيبة والمشكلة الاساسية أن هذه الانترنت، وهي محصلة تكنلوجيا اتصالات القرن، وقعت في يد اقوام من احمق وأجهل خلق الله ـ ـ الناس المتحضرة تستفيد منها ايما استفادة لرفعة انفسهم واوطانهم ونحن نستعملها في النميمة والشتائم و دا نبزني ودا طعني ودا سب لي الدين !! ـ للاسف الشغلانة خلاص ، بقت اكبر من بكري وطلعت من يده ـ والمنبر بقي خارج السيطرة ـ هو اساسآ حيتحكم فيه كيف ؟ ـ يعني حيقعد يحرس الشاشة ويقرأ كل كلمة تتكتب ويقارنها بكتابات تانية عشان يشوف المكتوب دا معناه شنو وقاصدين بيهو منو؟ ـ
عمومآ من الشفته في اليومين ديل اظن أن كلمة (عنوسة) دي ممكن تثير حرب أهلية عديل ـ وهو ما يؤكد عظم المشكلة !!! ـ
ذنب سارة منصورة انها حكتها لمن جابت الدم ــــــــــ

العزيز ترهاقا

دعني اسجل احترامي وتقديري لك ولوقفتك الجميلة دي
تسلم

الحبيب تهراقا
سلام

شئ مؤسف ومؤلم مايحدث في البورد هذه الايام ....
ونحن مثلكم نتساءل أين الحقيقة

وكان الله في العون

Quote: الا انني لم اري احدا منكم جميعا يحدث بكري عن ظلمه لي وعدم عدالته

و دا بالضبط يا ترهاقا المخليني محتقر نفسي لي 3 يوم

شكرا تهراقا

وللادارة نقول الرجاء توضيح الاسباب؟؟؟؟؟؟؟؟؟؟؟؟؟؟؟؟

لا لسياسة الكيل بمكيالين.

الاعزاء والحبان

الاستاذ منير
الاخت مايا
الفنان رضا
صاحب اللمسات الفنية ملاسى
والاخ العزيز أسعد

يبدو لى نحن ضايعين فى الزفة والحقيقة ما مملوكة
بس ياريت نكون فى الصورة ونعرف سبب البلاوى دى كلها
زى ما شايفين بنتعامل بسجيتنا لكن والله الواحد مرات
بقى ما عارف الحاصل شنو ، وشكرا على مروركم الكريم

وأحبكم للطيش

و نحنا اطيش من الطيش يا ترهاقا

بس بالله شوف المزيكا بتاعت منير دا كيف .... لومها لي بالله

Quote: وقعت في يد اقوام من احمق وأجهل خلق الله

Quote: عمومآ من الشفته في اليومين ديل اظن أن كلمة (عنوسة) دي ممكن تثير حرب أهلية عديل ـ وهو ما يؤكد عظم المشكلة !!!

الاخوة المتداخلون احتراماتى وتقدير صدقونى احترم جدا وجهات نظركم واقدر انها آتيه من اناس كلهم وعى وحب للخير لكن بس فى حاجه واحده دايركم تكونوا متأكدين
منها الا وهى عدم مصلحة بكرى ابو بكر فى ايقاف اى
عضو مهما كانت حقارته وقلة شأنه الا ان يبدى هذا
العضو ما يزيد على حده وهذه الزياده مرات كثيره لايمكن
نشرها على الملأ حتى انها ستصبح عارا فى جبين ناقلها دعك
من كاتبها انتو ما سمعتو بى القاضى الجاهو احدهم
شاكيا بان فلانا فقع عينو فلم يحكم القاضى له باى شىء
فلما ساله الحضور لماذا قال لايحكم حتى يرى الآخر فربما
يكون مفقوع العينين
من ما ذكرت اعلاه وان كنتم متابعين للاحداث الاخيره
اعتقد انكم بتكونو ختيتو صوره معينه لكن صدقونى ما
خفى اعظم واجل والمصيبه انو كما اطر بكرى
لتعليق حسابات البعض انا احسبه غير عادل من الاخ بكرى
على الاطلاق اتدرون لماذا

لانه كان من الافضل ان يشطبهما نهايئا من المنبر والاسباب
كتيره ولعلمكم موضوع رجاء دا ما اظنو زاتو يكون احد
اهم الاسباب
صدقونى يا شباب اللعب بالعقول واستخفاف الافكار دوما
يمكن معالجته لكن ما يثير الاستفذاذ ويكره الزول فى زول
حتى ما لاقاهو فى حياتو انتو عارفين احسن الواحد
يسكت بس بالله عليكم الله يا شباب زول ما ملم بحيثيات
المواضيع كامله ما ياكل راسنا بالتنظير فى الدمقراطيه
والفلسفات الفارغه المابتحمل اى معنى ليه هو نفسو لما
يرجع ويفهم الحاصل
بعدين ياخى بكرى دى جننتوهو والله العظيم تلاته الزول
ما بستاهل يستمع الاهانات والتعريض الجايهو بسبب هذه
المدعوه وزوجها العزيز وارجو ان لا اكون ابتعد عن
لب الموضوع وكن ذلك ما لزم توضيحه والله من وراء
القصد وهو يهدى السبيل

الاخ ملاسي سلامات ـ
ياخي انا والله شايف ان المنبر دا (ما دا بالذات يعني) تقنية جد جد خطرة ـ والاخطر منه المسنجر والايميل ـ زي السلاح في يد القبائل في دارفور مثلآ ـ يعني زمان لما الشكل كان بالعكاكيز والسفروق هل كان يخلف ضحايا؟؟ طبعآ لا ـ وطيب !! ـ شوف اسه لمن جابت ليها كلاشنكوف الكلاشات بقت كيف والموت بقي كيف ــ نفس الفلم حاصل هنا ـ عالم فجأة لقت نفسها بضغطة زر ممكن تغلغل ليها ناس في الواغ واغ ـ ما صدقت شغلت امكانات الانترنت بأسوأ ما يمكن ـ قذف اعراض ومطاعنات ونميمة و..و.. افلاس شديد ـ وانا شايف ان الاخ بكري في مأزق لأنه فتح طاقة ما حيقدر يسدها ـ لأنه ما حيقدر برضي لحم الرأس دا ويرضي نفسه، بافتراض انه قاعد يصنقر يوميآ هنا (24 ساعة) يقرأ البورد حرف حرف ويحلل كل كلمة وكل جملة ويعربها ويستخرج المجاز المرسل والعقلي والتورية وكل انواع البيان والبلاغة الغامضة، ليستنتج ان فلان قاصد علان في السطر القبل الاخير .... ـ دي دوامة لانهائية ــ واذا حاول الاخ بكري ان يترك المنبر يفلتر نفسه بنفسه تبقي كارثة لأن أخلاقنا لم ترق لمستوي شرف الخصومة ـ وزي ما شايف الواحد يشمر للتاني، التاني يجيه عريان ـ والشئ الذي يجعل الخلاف مدمرآ هو أن الاعضاء نازلين بأسمائهم الحقيقية ـ وهو ما يجعل أي واحد منهم معرض للتشهير سواءآ بالحقيقة ام التلفيق ـ من عدو كان ام صديق ـ وربما بسبب ثأر بايت له عشرين سنة ـ والشئ الذي يكتب يخرج تأثيره عن السيطرة حتي لو تم حذفه بعد ثوان ـ لأن متصيدي الشمار ما بينوموا ـ ودي خطورة المنابر المكشوفة زي البورد دا ــ يعني لو قارنت المنبر دا ببورد معاذ تلقي ان سودان نت قابل للـ (self-control) لأن غالبية الاعضاء جايين باسماء مستعارة و اذا قامت شكلة تفوت ولا حد يموت ـ واخونا الراسخ معاذ سادي دي بطينة ودي بعجينة ونادرآ ما يتدخل ـ رغم الاسراف المبالغ فيه للباندودث من قبل الاعضاء ـ وكل عضو مريح بالو انه لو شتم واحد تاني مهما شتم بيكون مقتنع انه بيشتم والهبوب تشيل ــ
يعني يا ملاسي اخوي تفتكر طريق البورد دا نهايته حتكون كيف اذا واصلنا في الزي دا ؟؟ ــ انا شايف انه اذا استمر كده حينتهي الي (عرضة واتفرتقت) ـ والله يسوي الفيها الخير ــ

اخي ترهاقا نساندك لا للفصل الجائر الغير متوازن



*******************

محن والله محن !! عجائب وغرائب وحاجه تقرف الليمون

الرجاء توضيح لا اكثر