سلام بلدنا وما سلام الأمريكان ..رسالة عاجلة للمتفاوضين في نيفاشا

بخاف ياوطنى مّن الليل وليل حربك على طوّل
مربع للرصاص والدم متين عن عتبو تتحوّل
سلامك جيبو بى ارادتك كفاك ماتمشى تتسوّل
خيار الوحدة بجمعنا وفى الترتيب سلام اوّل
ثروة وسلطة نقسمها بينا بالميزان
عدالة قسمة مابتقبل قوانين مذهب الحيتان
نبنى كنيسة جم جامع وقرع أجراس مع الآذان
بلدنا الزيو مافى مثيل سماتو سماحة الأديان
الحرب القبيل مالقينا فيها هوادة
حقول الغام ونار لابدّ من أخمادها من أجل التحول لازمة لينا أرادة
جنوب وشمال بلدنا ونحنا كلنا سادة
فى حدق العيون ياوطنى أنت مكانك
نعشق لون ترابك وفرحتك وأحزانك
فى كل المحافل نبقى نحنا لسانك
نفخر بيك ديمة ومابنسيب الهانك
يعنى لمتين أنت تبكى وتلبس الأكفان وشاحك ؟
ياوطن فى العتمة نايم يلا قوم شق نور صباحك
أرفع أغصان المحبة ومافى داعى لصوت سلاحك
الوليدات مهما يقسوا مابكسّروا ليك جناحك
السلام كان ديمة مطلب وكلو جارآ ليهو ساعى
بس بخاف المدة تطول ونحنا هدتنا المساعى
الحجج والنقة كترت مابشوف كان ليها داعى
الوطن الجرحو نوسر كان جميل لو ليه نراعى
فى اللقاء ياأهلنا بينكم أبقوا أخوان فى الحقيقة
النوايا الصادقة معبر للسلام أسرع طريقة
الوطن من قلبو بنزف وجه الآوان نطفى الحريقة
نضمن الوحدة وسلامنا ونشكر الدول الصديقة
من مشاكوس لى كارن والفؤاد ياناس حزين
السلام الفتشوهو ضاع وماعارفينو وين
الحروب بوم الخراب راكة فى البلد الحنين
وفى الجنوب اطفال بيسألوا السلام بيكون متين
قدر مانقول نسائم تنقلب كتاحة
متين ببرىء الوطن ويضوق سلام الراحة
عشان شمس السلام تسطع تبق وضاحة
عملية التفاوض لازمة ليها جراحة
حلاّل المشاكل مابتكون معيوب
وسيط خليك محايد بين قلوب وقلوب
سلام بالعدل مرحب وهوّ ده المطلوب
وصبرك يابلادى غلب صبر أيوب
قالوا قول الوسطاء ظالم والوطن مظلوم سنين
قلنا لى سمبيويا حلنا الاّ زاد البلّة طين
الوطن الخيرو ماهل عمرو ماكان يوم ضنين
نحنا نزفناهو دمو والوسيط مابكون حنين
كنا دايرين نحنا خيركم الاّ ماباليد حيلة من مشاكوس لى نيفاشا والوفود حائر دليلها
كلو ماحسمت قضية تظهر الحجج الهزيلة
السلام باركوهو فرحة يبقى فالكم والعديلة
يانيروبى حنى وجيبى خير بركاتك
جيبى سلام بلدنا الخيرو تب مافاتك
ياكينيا الشقيقة عليّة فوق رأياتك
وبيك كيباكى يسلم يالحنان أماتك
من شان السلام جابوا الوسيط جنرال
ايمكن بالنياشين ينصلح ده الحال
ويرجعوا ناس بلدنا الهدّهم ترحال
بين امريكا..كندا وكينيا ست الخال
بندور السلام الجاى حق أمتنا
سلام سودانى جد جايبنو بى ارادتنا
ماهو سلام هجين بى كلمة ماحقتنا
سلام الأمريكان كتبوهو فوق رأيتنا !!!


منقول ... كلمات/ نادية مختار

خاطركم...



سلام بلدنا

وما سلام الامريكان

تسلم أخي نزار
على العصيدة وعايز أكاسرك لكن ما هنا بس طالعني بره
والليلة الخميس.

لأن صراحة ده ما مكان أكل.
وأقل حاجة تحترم الكلام الفوق ده وتحترم صاحبو.

يا كبسيبة...يا اخي معليش...ما تزعل...والله العصيدة دي في الصورة
ما فيك انت...هو انا بقدر اقول فيك حاجة...

وحا نسحبها ونملحها في حتة تانيةاحتراما لشخصك يا صديق ما للصورة...

اما الاستاذة نادية فانا اعتذر لها جدا عن دلق...العصيدة...

مع هذا الشعر الجميل...المهيري...النفس ...والجيد النظم...والصياغة