الفيك بدربو والعيب اقدلبو .......

Post: #1
Title: الفيك بدربو والعيب اقدلبو .......
Author: Hussein Mallasi
Date: 03-30-2004, 08:30 PM

حيث اننا فشلنا في شراء بوست خدر – الاحراج - كما فشلنا في اجبار محب على التنازل عن بوسته – الفصل و الطرد - لذا فقد اضطررنا – اسفين - لانزال هذا البوست حتى نتفسح فيهو براحتنا و نرحب بكل المشاركين و المشاركات على ان لا يمتنع احد.

كثيرا ما امعن التفكير في الامثلة السودانية ذات المغزى و ابحث عن نظيرها من الامثلة العربية او امثلة الشعوب و الثقافات الاخرى ...

و نبدأ بهذا المثل العجيب الغريب:

الفيك بدربو والعيب اقدلبو

فهل ياترى يماثل نظيره العربي:

رمتني بدائها و انسلت

و قد يغنيك مثل واحد عن كتابة مقال .....

و بالمناسبة البوست دا ممكن ينحرف في أي اتجاة لذا لا تثريب عليكم ان حدث ذلك و العندو أي حاجة بس يجي يكتبها و بنلقى ليهو تخريج ...... يعني حكاية الامثال دي لو ما جابت دخل حنغير النشاط لموضوع تاني و ذلك حفاظا على البتاع من الهدر ....

.

Post: #2
Title: Re: الفيك بدربو والعيب اقدلبو .......
Author: doma
Date: 03-30-2004, 08:41 PM
Parent: #1

ملاسي سلام انا غايتو مثلك دا ما فهمتو لكين في مثل كتبه عادل امين وعاجبني جدا ممكن تطلقه علي زول متلي كدي " غارزه ونطاحه"

Post: #3
Title: Re: الفيك بدربو والعيب اقدلبو .......
Author: khider
Date: 03-30-2004, 10:09 PM
Parent: #2

لازم تأجل عمل اليوم الي الغد

دة مثل انا بحبو جدا ..
بالمناسبة .. جيت لقيتك مشيت

Post: #4
Title: Re: الفيك بدربو والعيب اقدلبو .......
Author: khider
Date: 03-30-2004, 11:01 PM
Parent: #3

لازم نأجل عمل اليوم الي الغد

Post: #5
Title: Re: الفيك بدربو والعيب اقدلبو .......
Author: ASAAD IBRAHIM
Date: 03-30-2004, 11:34 PM
Parent: #4

أخونا زمان حسين ملاسي

المثل العاجبني هو:

المحرش ما بيكاتل

اها عجبك يا حبيب

لي قدام

Post: #6
Title: Re: الفيك بدربو والعيب اقدلبو .......
Author: Hussein Mallasi
Date: 03-30-2004, 11:49 PM
Parent: #5

اخونا زمان و اسه و بعدين اسعد ابراهيم ...

مثلك دا بيعجب جدا بس مثلي انا

Quote: الفيك بدربو والعيب اقدلبو

عاجبني اكتر ...

.

Post: #7
Title: Re: الفيك بدربو والعيب اقدلبو .......
Author: ASAAD IBRAHIM
Date: 03-31-2004, 00:03 AM
Parent: #6

Quote: اخونا زمان و اسه و بعدين اسعد ابراهيم ...

شكرا حسين ، في دي انت احسن مني

وبالنسبة للامثال كل فتاة بابيها معجبة

ولي قدام

سؤال اخير : شنو الشفقة في الرد علي وحتي تجاوز المتداخلين قبلي انشاء الله خير ؟؟؟؟؟؟؟

Post: #8
Title: Re: الفيك بدربو والعيب اقدلبو .......
Author: Muhib
Date: 03-31-2004, 01:14 AM
Parent: #7

معليش ياملاسي ...انا متابع من بعيد في الشعب"السوداني المعقد" ..اه اقول ايه ..علي العموم سوف اشارك لاحقا ...بالمناسبه لا افهم كثير في الامثال ..لكن بعرف واحد .."اخوك كان عسل "ماتلحسوه كلوه .." ..وياملاسي ..عندي سؤال خبيث كدا ..ليه كل الامثال "مذكره"
واطالبك بالجواب ..ومن غير الباب البجيب الريح سده واستريح ..

Post: #22
Title: Re: الفيك بدربو والعيب اقدلبو .......
Author: Hussein Mallasi
Date: 03-31-2004, 04:23 PM
Parent: #7

صديقي و شريكي المهيب محب

Quote: "اخوك كان عسل ماتلحسوه كلوه .."

يا خي المثل دا قالوا اتغير و بقى:

اخوك كان عسل ما تلحسو ..... أكلو ....

Quote: عندي سؤال خبيث كدا ..ليه كل الامثال "مذكره"

و الامثال مذكرة ببساطة لانو زي المثل دا لو اتأنث حيحصل سوء فهم بيّن

Post: #29
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 01:38 PM
Parent: #7

Quote: سؤال اخير : شنو الشفقة في الرد علي وحتي تجاوز المتداخلين قبلي انشاء الله خير ؟؟؟؟؟؟؟

اخونا في الماضي و الحاضر و المستقبل اسعد

اجابة ما اخيرة:

خير .... مافي شفقة و لا حاجة ... دا بس اسمو الترحيب الزايد ....

لكين مافي مشكلة المرة الجاية ما بتجاوز ليك بقية المتداخلين ...

يا رديت عليك في دورك يا اخرتك شوية, بس انت Take it easy

بس يا اخي عندى سؤال افتراضي كدا ... لو زول كتب قبلك و انا ما

داير ارد عليهو .... اعمل شنو ؟

Post: #25
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 06:23 AM
Parent: #3

Quote: لازم تأجل عمل اليوم الي الغد

تعرف يا خدر قالوا عمنا سليمان نصر - الله يرحمو - كان معلق في "الحمام" الحكمة الخالدة

Do it now

و انتا تجي تقول لي لازم تأجل و مش عارف ايه .... بعدين حتتجهجه و تكوس في البيخارجك .....

امشي يا زول الله "يسهل"عليك ......

Post: #20
Title: Re: الفيك بدربو والعيب اقدلبو .......
Author: Hussein Mallasi
Date: 03-31-2004, 04:17 PM
Parent: #2

خالتنا الكبيرة مقاما و احتراما دومه

تحية و احترام

Quote: ملاسي سلام انا غايتو مثلك دا ما فهمتو

انا يا دومه مثلي دا برضو ما فاهمو .... بس اكيد بيكون في الفهمو ... اها و عليه فاننا و من هذا المنبر نوجه نداءنا لكل من فهم هذا المثل ان يتكرم و يتنازل و يقوم بافهامنا اياه ....

Post: #9
Title: Re: الفيك بدربو والعيب اقدلبو .......
Author: مراويد
Date: 03-31-2004, 01:24 AM
Parent: #1

الاستاذ السيد حسين ملاسي
عندى كم مثل من النوع ابو كديس لكن ما بتكتبوا هنا اسوى شنو؟؟؟ ارسلن ليك وانت تتولى النشر... انا عضويتى دى ما لميت فيهابالساهل و ما بهظر فيها
اها رأيك شنو...تشترى

نموذج:
سيد المركب....ي(.....) فى الشرق

بالمناسبه الالقاب الفوق دى لانى اتأكدت انو جابوهو ليك

Post: #10
Title: Re: الفيك بدربو والعيب اقدلبو .......
Author: bayan
Date: 03-31-2004, 02:40 AM
Parent: #9

ود الخالة
كيفك ؟
انت خليت الكيمياء
وشغال فلكلور الايام دى
من رقيص عروس
للرجال الدلاليك
اسع الامثال

Post: #21
Title: Re: الفيك بدربو والعيب اقدلبو .......
Author: Hussein Mallasi
Date: 03-31-2004, 04:19 PM
Parent: #9

اخونا الحبيب مراويد

كيف يا دفعة

Quote: بالمناسبه الالقاب الفوق دى لانى اتأكدت انو جابوهو ليك

تصدق يا مراويد للان مافي زول جابو لي ....
و ما دام السيرة جات خلينا نطلب هنا برضو, احتمال زول يجيبو:

يا اخوانا العارف تلفون التيجاني المشرف " يجيبو لي" بالله

و بعدين يا مراويد الامثال الما بتتكتب هنا دي طوالي رسلها لي بالماسنجر و خلي الباقي علي ....

ما تخاف يا مراويد دا ما استدراج .... عضويتك ما بتجيها عوجة

Post: #30
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 01:43 PM
Parent: #9

Quote: شغال فلكلور الايام دى
من رقيص عروس للرجال الدلاليك اسع الامثال

بت العم بيان

نعمل شنو يا بيان, الغربة الطويلة خلت اهتمامنا يتعاظم بالفلكلور
و الموروثات الشعبية (شمال و جنوب ) و الاساطير و الخيال الاغرب
من الحقيقة ....

Post: #11
Title: Re: الفيك بدربو والعيب اقدلبو .......
Author: Walid Safwat
Date: 03-31-2004, 04:16 AM
Parent: #1

ملاسي .. العندو حنة يحنن اباطو ..(بعد التعديل)

Post: #26
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 01:24 PM
Parent: #11

وليد صفوت

كيف حالك يا كريمينال

Quote: العندو حنة يحنن اباطو ..(بعد التعديل)

العندو حنة دا يا وليد كويس .... يحنن الدايرو ...

بس المشكلة في الماعندو حنة و داير يتحنن .... ياهو دا البيحنن

و زي ما قال ابراهيم عوض: حبيبي "حنني" و غير حالي حير فكري دا

الشغل بالي ....

Post: #12
Title: Re: الفيك بدربو والعيب اقدلبو .......
Author: بدرالدين شنا
Date: 03-31-2004, 07:19 AM
Parent: #1

العفش داخل البص على مسئولية صاحبه

Post: #13
Title: Re: الفيك بدربو والعيب اقدلبو .......
Author: ترهاقا
Date: 03-31-2004, 10:07 AM
Parent: #12

هاك دى يا ملاسى

فى بلد العمايا الاحوص غالى (مثل نوبى)

بيقولوه دايما لمن تكون فى حفلة والفنان يقوم ما يجى
ويمشوا لى فنان الحلة ويقوم يتعزز.

Post: #14
Title: Re: الفيك بدربو والعيب اقدلبو .......
Author: Alia awadelkareem
Date: 03-31-2004, 10:21 AM
Parent: #13

العزيز حسين ملاسي
صباحك فل وندي وبلور
واللة العظيم فكرة احد المتداخلين عن ذكورية الامثال لفتت انتباهي واضحكتني...
ومساهمة مني اليك بعض الامثال
الخيل تجقلب زي الشرا في القندول{تخريجة محمد نعيم سعد}
من زرع شجرة لابية وقع فية{اجتهاد شخصي}
الراجل شن بفيد كان مااديتة بالشلاليت{اجتهاد شخصي}...والخ

Post: #16
Title: Re: الفيك بدربو والعيب اقدلبو .......
Author: نزار محمد عثمان
Date: 03-31-2004, 11:50 AM
Parent: #14

العزيز ملاسي
رمتني بدأئها وانسلت، يصلح تلخيصاً لبوستات كثيرة في هذا البورد.
لعل أصحابها لم يقتنعوا بالمثل الذي يقول:
إذا كان بيتك من زجاج، فستتعب من تنظيفه!!
وفي روايةأهل إصحاح البيئة:
إذا كان بيتك من زجاج فستعاني من الانحباس الحراري.

Post: #27
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 01:26 PM
Parent: #16

جارنا نزار

تحياتي

Quote: إذا كان بيتك من زجاج، فستتعب من تنظيفه!!

اصبت كبد الحقيقة ....

لكن السؤال الموضوعي .... منو القال انو صاحب البيت الزجاجي تهمه نظافته ....

Quote: إذا كان بيتك من زجاج فستعاني من الانحباس الحراري
.

لذا يكون هروب المنحبسين حراريا للامام دائما يا دكتور ....

و تقبل تقديري

Post: #31
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 02:01 PM
Parent: #13

سلام يا ترهاقا

المثل بيقول " زامر الحي لا يطرب"

Post: #32
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 02:04 PM
Parent: #13

اختنا العزيزة غالية

حمد الله على السلامة

Quote: الراجل شن بفيد كان مااديتة بالشلاليت

و برضو :

الراجل شن بفيد كان اديتوهو بالشلاليت

يعني باختصار يا غالية مافيش فايدة في جميع الحالات

Post: #28
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 01:29 PM
Parent: #12

حاج البدري الحبيب

Quote: العفش داخل البص على مسئولية صاحبه

و صاحبو على مسؤلية السواق .....

.

Post: #34
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 02:09 PM
Parent: #28

اختنا ام وضاح

تحياتي و تقديري

Quote: يشبه امه مش كده ؟

لا طبعا مش كدا.... " عينك في الفيل و تطعني في ضلو "

و لو ما مصدقة اسألي حسن و جيهان .......

امنياتي لابنتنا بالتوفيق و السداد

.

Post: #15
Title: Re: الفيك بدربو والعيب اقدلبو .......
Author: essam&amal
Date: 03-31-2004, 11:41 AM
Parent: #1

اول حاجة يا حسين ملاسى ولدك حلو شديد عسل بس
عندى صديقة بنتها الصغيرة كلما تكون موجودة وافتح
البوست بتاعك تبكى وتقول لامها انا عاوزة عشرة اخوان
زى ده ...
ما شاء الله وصلات النبى وعينى باردة
يشبه امه مش كده ؟

الامثلة :-
الجمل ما بشوف عوجة رقبته
امشى عدل يحتار عدوك فيك
الاحوص طبزوا فى عينه قال اصلها بايظة بايظة
ولى عودة ..
امال
ام وضاح

Post: #17
Title: Re: الفيك بدربو والعيب اقدلبو .......
Author: bayan
Date: 03-31-2004, 12:17 PM
Parent: #15

برضو بلدا مافيها تمساح يقدل فيها الورل
البيتو قزاز ما يفلق الناس
المشتهى حن الطير اليطير
والفائق الهم بيذمو
ولنا عودة

Post: #18
Title: Re: الفيك بدربو والعيب اقدلبو .......
Author: abuguta
Date: 03-31-2004, 12:19 PM
Parent: #15

.الاخ ملاسى
تحياتى
زمان ما شايفنك..

الامثال كتيرة خلاص..لكن بتجى بالمناسبات

مثل الخالة دومة...

رازة ونطاحة:- والرازة البقرة الضعيفة او التعبانة
دا بضربوه للزول الما مقدم حاجة ومناكف

ركاب سرجين وقاع ومساك درين ضهاب

الخيل تجقلب والشكر لحماد

البلد المحن لابد يلولى صغارن

امثال جديدة
الماجك فى كسرة رجلك ما تديه فكرك
والما دخل بوستك خليه فى حوصتك
الما لامى فى كومك وقع فى لومك
ولقدام

Post: #19
Title: Re: الفيك بدربو والعيب اقدلبو .......
Author: bayan
Date: 03-31-2004, 03:34 PM
Parent: #18

مثلى المفضل هو

الاختشوا ماتوا

Post: #23
Title: Re: الفيك بدربو والعيب اقدلبو .......
Author: ASAAD IBRAHIM
Date: 03-31-2004, 07:28 PM
Parent: #19

Post: #24
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 06:19 AM
Parent: #23

و في الليلة الظلماء يفتقد البدر

نسأل بشدة عن سعادة البروفيسور مكي الاحمدي ....

عسى ان يحضر فينفحنا من فيض علمه و عميق احاطته بالامثال السودانية ما يقلب البورد رأسا على

عقب .... ليخرج من رتابة هذه الايام ....

.

Post: #33
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 02:07 PM
Parent: #24

حرام على "بلابله" الدوح حلال على الطير من كل "جنس"

.

Post: #35
Title: Re: الفيك بدربو والعيب اقدلبو .......
Author: Hussein Mallasi
Date: 04-01-2004, 11:47 PM
Parent: #33

اذا كترت الهموم ادمدم و نوم ...

"اهداء خاص لهوبفول"

Post: #37
Title: Re: الفيك بدربو والعيب اقدلبو .......
Author: WAD ELGAALI#4
Date: 04-02-2004, 00:08 AM
Parent: #35

من الامثال العاجبانى
عدالة القصص ام قصة عوجا
وشكارتا دلااكتا
بالله يا ملاسى لو تشرح لى الاخير دا بكون شاكر
بعدين ياخى ما تحرجنا دايما مقصر رقبتنا
عشان الدكتوره دى ما بت عمك ودا ماقطعتو من راسى
لكن من كلاما حيث قالت لك ود الخاله ومن هنا اما ان
تقولها بت الخال او بت الخاله يعنى مافى احتمال ابدا
تكون بت العم شوفتا كيف بالله مات تتاخر عشان بكره
الجمعه وانا عارف ناس الخليج بخمسو كويييييس وصلاة
الجمعه سكو وبالمناسبه سكو دى اصلها من وين

Post: #38
Title: Re: الفيك بدربو والعيب اقدلبو .......
Author: Hussein Mallasi
Date: 04-02-2004, 08:23 AM
Parent: #37

يا اخونا زول بس يورينا الحاصل شنو ....

امس قبل مشاركة اخونا ود الجعلي و بعد مثل اذا كترت الهموم ادمدم نوم المهدى للاخ هوبفول

شاركت الاخت رجاء العباسي بمثل بصراحة انا ما فهمتو بس فيهو سيد الدكان و كدا ... المهم

الليلة لا لقينا المثل لا لقينا حتي اثر اختنا رجاء .... يعني مش بس تم التحرير و مسح

المطلوب .... بل تمت ازالة مشاركة رجاء كاملة و كأن لم تدخل او تتداخل .... ما يذكرني

بازالة مشاركة الموناليزا الشهيرة تلك " اقصد مشاركة الذي كتب باسمها "

المهم هل المثل المكتوب بتاع سيد الدكان دا فيهو حاجة .... و لو كان فيهو حاجة لم لم يتم

الاكتفاء يتحريره تعديلا او شطبا كما هو الحال في الحالات المشابهة دون الحاجة للاستعانة بقوى

خارقة لسحب اثر المشاركة من الاصل كأن لم تحدث .....

و هل الداعي لذلك المثل المكتوب ام ان مجرد المشاركة في بوستي هذا هو ما يستوجب اخفاء الاثر ..

تساؤلات نرجو ان نجد الاجابة عنها .... و ان لم يكن على الملأ فلا بأس من استعمال الماسنجر او اي

وسيلة اخرى ....

و ان راي ذو الشأن ان ليس لي حق ابدأ هذه التساؤلات فانني اسحبها - التساؤلات - او يمكنهم

سحبها ايضا

مع خالص تقديري و احترامي للاخت الفاضلة رجاء و لمن قام بسحب المشاركة كائنا من كان ....

حسين ابراهيم ملاسى

Post: #39
Title: Re: الفيك بدربو والعيب اقدلبو .......
Author: Hussein Mallasi
Date: 04-02-2004, 12:48 PM
Parent: #38

اها نخرم شوية على الامثال المصرية:

"اارا" كلامك "اسدأك" .... اشوف افعالك استعقب

الترجمة:

اارا = اقرأ

اسدأك = اصدقك

استعقب = استعجب

Post: #40
Title: Re: الفيك بدربو والعيب اقدلبو .......
Author: khider
Date: 04-02-2004, 01:00 PM
Parent: #39

ال الكلاكلة ال

Post: #42
Title: Re: الفيك بدربو والعيب اقدلبو .......
Author: Hussein Mallasi
Date: 04-03-2004, 09:09 PM
Parent: #37

Quote: عشان الدكتوره دى ما بت عمك ودا ماقطعتو من راسى لكن من كلاما حيث قالت لك ود الخاله ومن هنا اما ان تقولها بت الخال او بت الخاله يعنى مافى احتمال ابدا تكون بت العم

كدي نديك سؤال كدا في حساب المثلثات يا جعلتي:

لو عمك اتزوج خالتك ..... اولادهم - لو ربنا رزقهم بابناء صالحين - حيكونوا بيبقوا

ليك شنوووووو

كدي فكر في دي لحدي الويك اند بتاعكم و ما تستعجل في الاجابة ....

اها نجي لسكو ..... سكو دي بت جيران فكو و ما بتبقى ليها ....

اما شكارتا و ام قصة عوجا بقولها ليك لمن تجاوب لي سؤال حساب المثلثات

Post: #47
Title: Re: الفيك بدربو والعيب اقدلبو .......
Author: Hussein Mallasi
Date: 04-04-2004, 06:41 PM
Parent: #18

Quote: الماجك فى كسرة رجلك ما تديه فكرك

الماجك فى كسرة رجلك اكسرلو كبايتك

متلومين معااك يا ابو قوتة ياخي .... و الايام ديك كان عندنا توجيهات كدا انو ما

نكتب بوستات اجتماعية من تهنئة و تعزية و كدا .... عشان كدا ما نزلنا ليك بوست

امنيات عاجلة بالشفاء .... بس اسه خلاص ما اظن في مشكلة .... بس انت شد حيلك

معانا و نحنا ما بنقصر تاني

Post: #41
Title: Re: الفيك بدربو والعيب اقدلبو .......
Author: Abd-Elrhman sorkati
Date: 04-02-2004, 01:28 PM
Parent: #1

ملاسي وحاة كتاب الدين انا امبارح كتبت ليك امثال والليلة الصباح
ما لقيتها0000 يعني زي موضوع رجاء00000

لكن هاك ديل

بصلة المحب خروف

جيتك يا عبد المعين تعيني

المال تلتوا ولا كتلتوا

القرد في عين أمه غزال

الجاتك في مالك سامحتك

وفي نوع أمثلة كدة الواحد ما بيقدر يكتبها عشان التعليق وكدة000

ناس البتدوروا تسموا بخيت والبتابوا تسموا000000000
وناس الاسد لما يعجزالغنماية00000000000000000

يلا يا ملاسي قصرت معاك

يديك العافية

Post: #58
Title: Re: الفيك بدربو والعيب اقدلبو .......
Author: Hussein Mallasi
Date: 04-05-2004, 06:15 AM
Parent: #41

استاذ سوركتي

تحياتي

Quote: كتبت ليك امثال والليلة الصباح ما لقيتها0000 يعني زي موضوع رجاء00

انا غايتو قررتا ما انوم عشان لو في رد – او بوست - نزل اقدر اشوفو قبال ما يتسحب

Quote: بصلة المحب خروف

و خروف المهيب بصلة

و تقبل تقديري

Post: #43
Title: Re: الفيك بدربو والعيب اقدلبو .......
Author: bushra suleiman
Date: 04-03-2004, 11:30 PM
Parent: #1

اخونا ملاسى
انا ترانى يادوب دخلت على بيتك ده،لانى كنت قايل فيهو شكله لمان شفت العنوان قلت كدى النشوف الشكله دى كيفنها ومع منو..
اها ما اطول عليك،انا فى مثلاية كده عاجبانى،مازينه وعاجبانى بتاعة الكابلى
بقولو؛ سهر الجداد ولا نومو

تصبح على خير ونوم العوافى

Post: #66
Title: Re: الفيك بدربو والعيب اقدلبو .......
Author: Hussein Mallasi
Date: 04-06-2004, 05:47 AM
Parent: #43

شكلة شنو ياخي .... ما سمعتا يا بشرى المثل البيقول اضرب المربوط يخاف السايب

و براك شفتا المربوط حصل عليهو شنو

..... اها السايب الخوفة ماسكاهو لي بكرا

Quote: سهر الجداد ولا نومو

و الجداد شداد يا بشرى

Post: #44
Title: Re: الفيك بدربو والعيب اقدلبو .......
Author: توما
Date: 04-04-2004, 03:24 AM
Parent: #1

اب سنينه يضحك علي اب سنينتين

Post: #67
Title: Re: الفيك بدربو والعيب اقدلبو .......
Author: Hussein Mallasi
Date: 04-06-2004, 05:53 AM
Parent: #44

اب سنينه يضحك علي اب سنينتين

يا توما قالوا بقت :

اب سنينة يضحك علينا

Post: #45
Title: Re: الفيك بدربو والعيب اقدلبو .......
Author: adil amin
Date: 04-04-2004, 02:03 PM
Parent: #1

العزيز ملاسى والخالة دوما
اها عايزين امثال حبوبتى الحرم الله يرحما
العندو حنة يحنن(..)حمارو
المرفعين لو ما عارف (..)..(..) ما ببلع اللالوب

غلفا وشايلة موسا تتطهر
بحر ما فيه تمساح يقدل فيه الورل
..
اما فى اليمن فى مثل كده يشبه الخيل تجقلب والشكر لحماد
يقولو القبقبة للولى والفايدة للقيم
وفى مصر
ادى الخنفساية كحلة تلقى الخنفساية تحلى
يشبه مثل الشين شين ولو غسل وشو مرتين
وفى العراق
تباهي المعزو بلية النعجة
والتحية لكما مجددا

وعموما كثرة الامثال دلالة علىذكاء الشعوب وكل ما كان المثل بذىء كان اكثر فعالية فى لجم الخصوم

Post: #46
Title: Re: الفيك بدربو والعيب اقدلبو .......
Author: HOPEFUL
Date: 04-04-2004, 03:12 PM
Parent: #45

الحبيب ملاسي سلامات

احشفاء وسؤ كيله

كلما قرأت " لأحدهم" .. استحضرني هذا المثل

دا من شنو يا الله؟

وافق شنن طبقه

اما هذا فلا يقفذ الي ذهني الا اذا رأيت القوم يتناصرون دون معرفه بالأمر او تروى فاردفه بالمثل العامي "يبكي وما عارف الميت"

ويكون هذا علي نقيض المثل "شكارته دلاكته" وانا انظر من المسطبه التانيه ..

بعدها ادلف لعمود النور الناصيه لاري احباب "النور" وهم يتمسكون بمقوله "الكلب ينبح والجمل ماشي" وهم يحتسبون ازعاج الحشرات حول الضؤ وتعكيرها لهم وازعاجها المتواصل ..

بعد كل هذه المأسى لا مناص من اكل بوش من دكان البرناوي مع بقية الشلة عملاً بمقولة "لقمه هنيئه تكفي ميه" مما يثقل الرأس ويشعرك برغبه عارمه في النوم عملاً بمقولة "إن كترت عليك الهموم اتدمدم ونووووم"

Post: #48
Title: Re: الفيك بدربو والعيب اقدلبو .......
Author: Muhib
Date: 04-04-2004, 06:52 PM
Parent: #46

ياملاسي ...اسمع البوست تبعي وين ..اي ..بتاع الفصل والطرد ..بفتش ومش لاقيه ..والله العظيم انا ازعل اكسر الدنيا هنا ...

Post: #51
Title: Re: الفيك بدربو والعيب اقدلبو .......
Author: Hussein Mallasi
Date: 04-04-2004, 07:32 PM
Parent: #48

Quote: ياملاسي ...اسمع البوست
Quote: تبعي
وين ..اي ..بتاع الفصل والطرد

ايوا كدا اظهر على حقيقتك يا مهيب .....

مش كنا شركا ياخي ....

تبعي دي علاقتها شنو بتبيعات اخونا مراويد .... اوعك تكون انت المقصود

صاحبنا مراويد دا فاتح نار عديل .... احسن ليك تغير تبعي دي عشان ما يكسرك مع الدنيا

بتاعتك على راسنا كلنا

Post: #49
Title: Re: الفيك بدربو والعيب اقدلبو .......
Author: مراويد
Date: 04-04-2004, 07:02 PM
Parent: #1

دفنوا الزول و خلوا التبيعه

التركى و لا المتورك

اب سلمبويتى ولا كدكاى زول

الفيك بدربو

العربى لما يشم الهوا...بسوي لى جيب فى طاقيتو
مستجد النعمه ضايق او مخلوع

الما شفتو فى بيت اهلك بخلعك
الما اتربى فى بيتو..ما بربى الشارع

القلم ما بزيل بلم

وكل الامثله تذكر بتبيعات حايمه هنا

Post: #50
Title: Re: الفيك بدربو والعيب اقدلبو .......
Author: Hussein Mallasi
Date: 04-04-2004, 07:26 PM
Parent: #49

Quote: وكل الامثله تذكر بتبيعات حايمه هنا

و بهناك .....

Post: #52
Title: Re: الفيك بدربو والعيب اقدلبو .......
Author: Muhib
Date: 04-04-2004, 07:38 PM
Parent: #50

تتطورت واصبحت تتجاهلني ياملاسي ...في المدرسه كنا بنقول ..البعول بتربي و بتعمل قرون ..ملاسي ..ا سمع ..دا مش مثل ..

Post: #53
Title: Re: الفيك بدربو والعيب اقدلبو .......
Author: Hussein Mallasi
Date: 04-04-2004, 07:47 PM
Parent: #52

ايوا مثل بس محرج جدا ياخي ......

انتا ما تجيني في بوستي التاني بتاع الاحراج داك شكلك كدا زول محرج جدا ....

لاحظ يا خدر بوستييييييييييييي دي

Post: #54
Title: Re: الفيك بدربو والعيب اقدلبو .......
Author: مراويد
Date: 04-04-2004, 07:48 PM
Parent: #50

و فى كل مكان

انت زعلت يا دكتور....
ما قاصدك انت يا خاين
والخاين الله يخونو

والمحرش ما بكاتل

و ...

Post: #55
Title: Re: الفيك بدربو والعيب اقدلبو .......
Author: Hussein Mallasi
Date: 04-04-2004, 08:01 PM
Parent: #54

ابدا يا بروف ما زعلتا ... هو انت قلتا حاجة بتزعل ...و بعدين ياخي الزعل هنا مرفوع

بس منو القال ليك المحرش ما بكاتل .... و الانتا بتعمل فيهو دا شنو صفرجت ... ما ياهو كتال

ما تزعل يا خواجة البيناتنا عامرة

Post: #56
Title: Re: الفيك بدربو والعيب اقدلبو .......
Author: bayan
Date: 04-05-2004, 00:35 AM
Parent: #55

الجمل ما بيعرف عوجة رقبتو
البيضة الخايصة ما بتقى سوسيو
من كترة عقولنا ما اتعرفت اصولنا
السفيه النبذ الباشا
المابتلحقو جدعو
العايز تهرى اسكت خلى
لمة المتعوس وخائب الرجا
جوقة السلطان البتشتم بلا مغصة
الرجل الفرطوق الصفيح
الرجل الدلاليك
الرجل البو
الرجل خيال المآتى
الرجل الذى تتمنى امه لو كان حيضة
خلاص يا ود عمى ولا نزيد؟

Post: #57
Title: Re: الفيك بدربو والعيب اقدلبو .......
Author: مراويد
Date: 04-05-2004, 00:43 AM
Parent: #1

الفى بطنا حرقص
براها بترقص

الببارى الجداد
بوديهو الكوشه

ملاسي اخوى

انا راجل بو سااااكت

فتك عافيه واتمنى ليك رفقه طيبه

و اذا حضرت الملائكه
ذهبت الشياطين

Post: #59
Title: Re: الفيك بدربو والعيب اقدلبو .......
Author: wd al geran
Date: 04-05-2004, 08:17 AM
Parent: #57

التخسة يا ملاسي ... التخسة تباعة الفواتي .. هن يصفقن وهي تزغرد.

سمعتا المثل دا قبل كدة؟

Post: #60
Title: Re: الفيك بدربو والعيب اقدلبو .......
Author: Hussein Mallasi
Date: 04-05-2004, 06:20 PM
Parent: #59

Quote: التخسة يا ملاسي ... التخسة تباعة الفواتي .. هن يصفقن وهي تزغرد.

Quote: سمعتا المثل دا قبل كدة؟

ايوا سمعتا بيهو يا مراويد ......

اديني شوية كدا عليك الله اتأكد لي من حاجة و بجيك راجع ......

قلت لي التخسة مش كدا

Post: #61
Title: Re: الفيك بدربو والعيب اقدلبو .......
Author: HOPEFUL
Date: 04-05-2004, 07:26 PM
Parent: #60

الفوله انقسمت نصين

وبجيك بالخبر اليقين

ارقد مخزن

Post: #62
Title: Re: الفيك بدربو والعيب اقدلبو .......
Author: Hussein Mallasi
Date: 04-05-2004, 08:54 PM
Parent: #61

رزقا تكوس ليهو و رزقا يكوس ليك ......

Post: #63
Title: Re: الفيك بدربو والعيب اقدلبو .......
Author: Hussein Mallasi
Date: 04-05-2004, 10:40 PM
Parent: #62

يمكنك ان تخدع بعض الناس بعض الوقت
او كل الناس بعض الوقت
او بعض الناس كل الوقت

و لكن لا يمكنك ان تخدع كل الناس كل الوقت

مش كدا يا بروف......

Post: #64
Title: Re: الفيك بدربو والعيب اقدلبو .......
Author: مراويد
Date: 04-05-2004, 10:53 PM
Parent: #1

يا حسين ملاسي يا اخوى شايلا معاى كده بدون سبب

و الكلام ده ما قلتو قالو الاخ "ود الجيران"

Quote: wd al geran

تاريخ التسجيل: 08-09-2003
مجموع المشاركات: 167
Re: الفيك بدربو والعيب اقدلبو ....... (Re: مراويد)

التخسة يا ملاسي ... التخسة تباعة الفواتي .. هن يصفقن وهي تزغرد.

سمعتا المثل دا قبل كدة؟

Quote: ايوا سمعتا بيهو يا مراويد ......

اديني شوية كدا عليك الله اتأكد لي من حاجة و بجيك راجع ......

Quote: يمكنك ان تخدع بعض الناس بعض الوقت
او كل الناس بعض الوقت
او بعض الناس كل الوقت

و لكن لا يمكنك ان تخدع كل الناس كل الوقت

مش كدا يا بروف......

فعلا لا يمكن ان تخدع بعض الناس و لا كل الناس

و من غشنا ليس منا

و لا شنو يا حسين

كتر خيرك على كل حال

Post: #65
Title: Re: الفيك بدربو والعيب اقدلبو .......
Author: bayan
Date: 04-06-2004, 05:15 AM
Parent: #64

ود العم ولدى هوب
كيف الكلام دا؟
خبرة فى تصحيح كراسات الانشاء
بمعدل 100 كراس فى الاسبوع
فى 7 سنة..
كتلتو ولا لع

المثل بتاع اليوم

ياهو ذاتو بذاتو وصفاتو

وافق شن طبقة

Post: #68
Title: Re: الفيك بدربو والعيب اقدلبو .......
Author: DKEEN
Date: 04-06-2004, 07:10 PM
Parent: #1

كولدتيا اًنرمنل ِ تنّستي كًودِِّكِر
مثل نوبي

الترجمة

كولد : حفرة الدخان
اًنر منل : لايعرف
نستي : مؤخرة
كودكر : يحرق

يعني بالعربي كده
( الذي لايعرف حفرة الدخان .. مؤخرة يحرق )

واي حاجة ما ظهرت في الترجمة تعتبر في عداد الضمائر النوبية ..

طبعامع فارق التركيب اللغوي
و فارق القياس بين مؤخرات العرب والاعاجم ..

Post: #69
Title: Re: الفيك بدربو والعيب اقدلبو .......
Author: wadaldeem
Date: 04-07-2004, 03:07 AM
Parent: #1

الفاتك فوووووووتو

Post: #79
Title: Re: الفيك بدربو والعيب اقدلبو .......
Author: Hussein Mallasi
Date: 04-10-2004, 05:30 PM
Parent: #69

اخونا ود الديم

Quote: الفاتك فوووووووتو

فوتووووووووووووووو

Post: #70
Title: Re: الفيك بدربو والعيب اقدلبو .......
Author: WaD OmI
Date: 04-07-2004, 04:07 AM
Parent: #1

مثل لاخونا ادروب ........

الغايب عذرو على جنى وعذر جنى على الغــــــــايب حجر .....

Post: #94
Title: Re: الفيك بدربو والعيب اقدلبو .......
Author: Hussein Mallasi
Date: 04-13-2004, 08:12 PM
Parent: #70

Quote: الغايب عذرو على جنى وعذر جنى على الغــــــــايب حجر .....

اختنا العزيزة نوف

عذر جني على السفير

و ان شاء الله تكوني جاوبتي على سؤال اخونا دينق داك لاننا منتظرين الاجابة برضو

و تحياتي لادروب بلدياتنا ....

Post: #101
Title: Re: الفيك بدربو والعيب اقدلبو .......
Author: AttaAli
Date: 04-14-2004, 01:22 AM
Parent: #70

العزيز ملاسى
عارف لمن كنت صغير كنت بسمع الوالد بيسخدم المثل
لحق امات طه
لفترة طويلة كنت قايلوا المقصود طه جدى لكن لقيت ليك الدنيا كله تستخدموا هسة العارف قصتوا يفيدنا

Post: #106
Title: Re: الفيك بدربو والعيب اقدلبو .......
Author: Hussein Mallasi
Date: 04-14-2004, 04:54 PM
Parent: #101

اخونا الحبيب عطا علي

انا غايتو عارف الحصل شنو لطه شخصيا و بالتفصيل .... اما اماتو و الله ما عارف حصل

عليهم شنو و دي ممكن نسأل منها خالتنا دومه فهى ادرى بما حصل لامات طه نسبة لتقارب السن

Post: #116
Title: Re: الفيك بدربو والعيب اقدلبو .......
Author: أبوالريش
Date: 04-16-2004, 02:41 PM
Parent: #70

ســـلام يا قـريبـى،

إذا كان الكلام من فضــة فالسـكوت من ذهب.

لو سيــد المويـة قال ليك لينـة، شــرهـا ليـه.

Post: #71
Title: Re: الفيك بدربو والعيب اقدلبو .......
Author: DKEEN
Date: 04-07-2004, 08:43 AM
Parent: #1

الباب البجيب الريح ولا الرفيق الفســـــــــــــــل

Post: #91
Title: Re: الفيك بدربو والعيب اقدلبو .......
Author: adil amin
Date: 04-13-2004, 01:06 PM
Parent: #71

البكا والزغاريت والجنازة كلب
العضا الدبيب يخاف من مجرالحبل
زرة كلب ابيض فى سوق فلاتة
كان لاقاك حسين ملاسى الصباح..ارقد نوم ارتاح
الما يعرف البورد يقول عدس
البتقع من السما تحملا الواطة
مش كل المدردم ليمون
عايرة وادوها سوط
لو ما عين ملاسى نامت القيامة قامت
نوم الظالم عبادة
البكرهك يحدر ليك فى الضلمة
جزم ناس العمارات باسطة فى ام بدة

Post: #111
Title: Re: الفيك بدربو والعيب اقدلبو .......
Author: Hussein Mallasi
Date: 04-15-2004, 03:36 PM
Parent: #91

اخونا الاخضر عادل امين
Quote: العندو حنة يحنن(..)حمار

Quote: والمرفعين لو ما عارف (..)..(..) ما ببلع اللالوب

Quote: غلفا وشايلة موسا تتطهر

يا خي الامثال الذكرتها دي بتوديك في حديد و بعد شوية حيجي الحيقول ليك امثالك دي زي الزفت تشيلها و لا ..... و عندها سوف لن تنفعك شفاعة .... بس ما تخاف برضو حندخل ليك اجاويد و حركات بالشكل دا لتخرج بأقل الاضرار

Post: #110
Title: Re: الفيك بدربو والعيب اقدلبو .......
Author: Hussein Mallasi
Date: 04-15-2004, 03:31 PM
Parent: #71

اخونا دكين

Quote: الذي لايعرف حفرة الدخان .. مؤخرة يحرق

و الذي يعرف حفرة صدام .. مقدمة يحرق

Quote: طبعا مع فارق التركيب اللغوي و فارق القياس بين مؤخرات العرب والاعاجم

مع الاحتفاظ بنفس فارق القياس ...

Post: #72
Title: Re: الفيك بدربو والعيب اقدلبو .......
Author: الجندرية
Date: 04-07-2004, 09:11 AM
Parent: #1

يافرحة ما تمت خطفها الغراب وطار

دا مثل ؟

المهم الكلام دا بجيني كل 6 ابريل

Post: #76
Title: Re: الفيك بدربو والعيب اقدلبو .......
Author: Hussein Mallasi
Date: 04-10-2004, 05:22 PM
Parent: #72

Quote: المهم الكلام دا بجيني كل 6 ابريل

و انا يا جندرية بيجيني كل يوم سبت الصباح ....

Post: #73
Title: Re: الفيك بدربو والعيب اقدلبو .......
Author: Nagat Mohamed Ali
Date: 04-08-2004, 12:01 PM
Parent: #1

الأخ حسين ملاسي
وهذه أمثال فرنسية
(أو كما تقول، من بلاد زين الدين زيدان)

الصبح المضيء في الربيع يأتي بالتين الناضج
يحمل نفس المعنى مثلنا السوداني: النيّة للنار

مداعبة القطط تنقل إليك القمل
يشابه المثل السوداني: البلعب مع الجريوات بخربشنه

قطرة الماء التي دلقت ماء الكأس
القندول الشنقل الريكة

أيُّ جديدٍ جميل
الجديد شديد

من شهر السيف قتله
يشابه المثل السوداني: يا حافر حفرة السوء وسَّع مراقدك فيها. ومثلنا أكثر بلاغةً من المثل العربي "من حفر حفرة لأخيه وقع فيها". أليس كذلك؟

إن طرق الحديد هو الذي يصنع منك حداداً
لا أتذكر له مقابل سوداني

في وقت الحاجة يظهر الأصدقاء الحقيقيون
الصديق وقت الضيق

القط الذي عرف قشعريرة البرد يخاف الماء البارد
يقابله المثل السوداني: الضايق قرصة الدابي يخاف من مجر الحبل

لا تضع يدك بين الشجرة ولحاها
الشجرة ولحاها أخف وطأةً من البصلة وقشرتها. مش؟

زيادة المال لا تضر
البحر ما بيابى الزيادة

الكلب النبّاح لا يعض
يقابله مثلنا: السوَّاي ما حدَّاث

يبيع فراء الدب قبل قتله
يقابله: حشاش بدقينتو

تُرمى الأخطاء في الغائب
مثلٌ يقال في حالة التملص من الأخطاء ورميها في غائب
ونحن أكثر تسامحا: الغائب عذره معاه

Post: #77
Title: Re: الفيك بدربو والعيب اقدلبو .......
Author: Hussein Mallasi
Date: 04-10-2004, 05:25 PM
Parent: #73

اختنا الفاضلة نجاة محمد علي

تحياتي

تشريفك لبوستتنا هذا بهذه الكوكبة من الامثال الفرنسية و مقابلها من الامثال
السودانية بعث فينا الفخر و اثبت ان التراث الانساني لا يتجزأ و اننا لسنا
باقل من الفرنسيين شأنا

و على ذكر فرنسا و الفرنساوي اذكر اننا درسنا في اولى و تانية ثانوي لغة فرنسية
و كان ان انقطعنا بعد ذلك عنها تماما ... بعد حوالي 10 سنوات ذهب احد
الزملاء للمركز الثقافي الفرنسي لدراسة اللغة الفرنسية......

فسأله المسؤول: ان كان قد درسها قبل ذلك
فاجاب : بنعم
فسألة المسؤول : ما الذي تذكره منها
فاجاب : عبدو و أمينة .........

و شكرا على هذه المشاركة القيمة

Post: #74
Title: Re: الفيك بدربو والعيب اقدلبو .......
Author: mekki
Date: 04-08-2004, 12:39 PM
Parent: #1

دايما يا ملاسى بوستاتك خفيفة الدم....

لكن شايفك سألت من واحد بروفيسر....

غايتو أكان بتقصد البروفيسر بتاع رودة اها هاك المثل دة:

الما عندو شغلة...بى حنّن (شى يتبول بة ذكور الأطفال)!!!!

Post: #75
Title: Re: الفيك بدربو والعيب اقدلبو .......
Author: bayan
Date: 04-08-2004, 11:55 PM
Parent: #74

ابعد عن الشر وغنى له
الحسنة معطت شنب الاسد
فخار يكسر بعضو

Post: #78
Title: Re: الفيك بدربو والعيب اقدلبو .......
Author: Hussein Mallasi
Date: 04-10-2004, 05:27 PM
Parent: #74

ها قد حضر البروفيسور .... مرحبا بك يا رجل

انفحنا بالمزيد يا بروف و دع عنك البخل ... بس الزول لو ما لقى حنة الصبغة تنفع ؟؟

اصلو عدم الشغلة محننا الايام دي ...

Post: #80
Title: Re: الفيك بدربو والعيب اقدلبو .......
Author: Hussein Mallasi
Date: 04-10-2004, 10:59 PM
Parent: #78

ليسمح لنا عادل عبد العاطي ان نثري بوستنا هذا بامثاله هذه ....

يقول الصينيون:

Quote: من الصعب ان تقبض علي قطة سوداء؛ في غرفة مظلمة؛
خصوصا اذا كانت هذه الغرفة خالية من القطط!!

ويقول البولنديون:

Quote: ليس في امكاني ان اقنعك؛ انني لست بعيرا!

_________

و اقول انا

ليس في امكاني ان اقنعك؛ انني لست عويرا !!

Post: #81
Title: Re: الفيك بدربو والعيب اقدلبو .......
Author: Hussein Mallasi
Date: 04-11-2004, 06:15 AM
Parent: #80

و هذه حفنة جديدة من الامثال المتنوعة :

الجزاء من جنس العمل ....

كما تدين تدان ....

يمهل و لا يهمل

و التسوي كريت في القرض تلقا في جلدا

كاتل روحو مين ببكيهو

ما قولتو نوبة

و ......... الفيك اتعرفت

Post: #82
Title: Re: الفيك بدربو والعيب اقدلبو .......
Author: Mohamed Adam
Date: 04-11-2004, 07:04 AM
Parent: #1

اخي ملاس
اخرجت هذا المقال من صفحه الاراء الحره بيد انه يتماشي تماما مع عنوان البوست بتاعك (الفيك بدر بيه).
من هو العنصري يا حكومة السودان؟

31-3-2004 بسم الرحمن الرحيم
مقال بعنوان: من هو العنصري يا حكومة السودان؟

بالأمس طالعتنا الأنباء بان حكومة الخرطوم قد أفشلت محاولة انقلابية وصفتها بالعنصرية, وأنها قد اعتقلت الذين خططوا لها وهم عشرة ضباط جميعهم من غرب السودان, إضافة إلي أعضاء من حزب المؤتمر الشعبي غالبيتهم أيضا من غرب السودان ( إقليمي دارفور و كردفان).و مهما تكن دوافع الحكومة لما أقدمت عليه, فان إجرائها هذا في حد ذاته ذا طابع عنصري لأنها استهد فت فئة معينة من جهة معينة ومن (عنصر!) معين,وهي بهذا إنما زادت الأمر سوءا إذا كانت روايتها أصلا صحيحة, رغم أن كل الدلائل تشير إلي عكس ذلك, واهم دليل علي أن الأمر لا يعدو إلا أن يكون إخراج سيئ لمسرحية أكثر سوءا انه لم تذع بيانا بالأمر كما هو مألوف في تاريخ إحباط الانقلابات والمؤامرات في السودان وهي غنية بذلك,ودونكم التاريخ.
وكما يقول المثل( رمتني بدائها وانسلت), فان القائمين بأمر البلاد في السودان ألان مارسوا وما يزالون يمارسون العنصرية في جميع نواحي الحياة في السودان, سياسياو اجتماعيا واقتصاديا وتنمويا وهام جرا. وعلي المرء أن يتصفح( الكتاب الأسود)1 ليري تفاصيل ذلك . واليم نري التطهير العرقي الوظيفي علي أشده في هذا البلد المنكوب, إذ أن الحكومة ظلت تلاحق أبناء دارفور وكردفان في مرافق الدولة المختلفة وتقصيهم من مواقعهم , و خاصة في قطاع الأمن والقوات النظامية, وصلت ذروتها في فرية المحاولة الانقلابية هذه.
ليس هذا فحسب , بل إنها ألت علي نفسها أن تحرم أبناء هذين الإقليمين من التوظيف في الوظائف الحكومية وبعض القطاع الخاص وحصرت ذلك لأبناء قبيلتي الرئيس ونائبه , وما رفض وزير الطاقة للمثول أمام احدي لجان البرلمان السوداني للإجابة علي استفسارات النواب بخصوص حصرية التوظيف في وزارته علي أفراد قبيلته إلا ادمغ وابلغ دليل علي عنصرية هذا النظام الذي يدعي انه إسلامي وهو ابعد ما يكون من تعاليم الإسلام الذي ينبذ العنصرية والجهوية وتعيين الرجل في موقع مع وجود من هو أكثر أهلية منه.
والناظر إلي تركيبة الحكومة نفسها والي استحواذ معظم الحقائب الوزارية وإدارات المؤسسات الحكومية وغير الحكومية وإدارات البنوك, يدرك تماما ولوغ هؤلاء القوم في مستنقع العنصرية التي يوصمون الآخرين بها.
وما أكثر الأدلة علي عنصرية هذا النظام, والجميع في السودان الآن, وخاصة خريجي الجامعات, يعلمون جيدا أن استمارات التقديم للوظائف بها خانة لتحديد قبيلة المتقد م للوظيفة المعنية! , لا يخفي الغرض منها إلا علي من يريد دس رأسه في الرمال. وليعلم الجميع أن خريجي جهاز الأمن لعام 2003 م , وعددهم 500 خريج, كلهم من الإقليم الشمالي و35 منهم من قرية واحدة شمال الخرطوم بحري!. الا يكفي كل هذا وغيره كثير بمؤسسية الممارسات العنصرية لهذه الحكومة ؟ وهذا ليس بمستغرب علي حكومة يتحكم فيها قلة مطلوبون دوليا لمحاولات اغتيال شخصيات دولية, ومحليا لممارسات التطهير العرقي جسديا ووظيفيا لأبناء الغرب والشرق ومن قبلهم أبناء الجنوب. وكل الذي نخشاه أن يجر حرص هؤلاء علي الاستمرار في الجلوس علي مقاعد السلطة, آن يجروا السودان إلي حرب أهلية لا تبقي ولا تذر . واني لأري الوميض الذي كان تحت الرماد وقد صار لها ضرام, فليت شعري اايقاظ أهل السودان أم نيام؟

هامش:
1. الكتاب الاسود:الجزء الاول والثاني, www.sudanjem.com

د. محمد احمد موتسو.سوداني بالمهجر
جدة, ص .ب876 , السعودية e-mail: [email protected]

Post: #95
Title: Re: الفيك بدربو والعيب اقدلبو .......
Author: Hussein Mallasi
Date: 04-13-2004, 08:14 PM
Parent: #82

اخونا الحبيب محمد ادم

تعرف يا محمد في الاول ياخي افتكرتك بتلمح لاني عنصري بغيض ,,,,

المهم بعدين لمن روقتا المنقا شوية كدا, عرفتا انك قاصد تطابق المثل مع وصف الحكومة

للمحاولة الانقلابية – التخريبة – بانها عنصرية .... حينها تنفست الصعداء ....

و رميت دائي و انسللت .....

شكرا يا محمد على المشاركة و اتمنى ان نتقاطع كثيرا في المستقبل

Post: #83
Title: Re: الفيك بدربو والعيب اقدلبو .......
Author: sentimental
Date: 04-11-2004, 07:50 AM
Parent: #1

الاخ حسين
بما نو البوست ده ممكن ينحرف لاى مسار احتياطى وبما انو انا ما قدرت اقراء كل المداخلات فانا حاشوت بس

رايك شنو فى المثل الحبوباتى ده
البتريدو تاكلو ليه الظلط
والبتكجنو تفتشو ليه الغلط

لكن كلمة الظلط دى حبوباتنا لقنها وين??!!

Post: #98
Title: Re: الفيك بدربو والعيب اقدلبو .......
Author: Hussein Mallasi
Date: 04-13-2004, 08:43 PM
Parent: #83

في جاه الملوك تلوكوا ....

و الاهداء لكل المريخاب المقيمين في مصر

Post: #84
Title: Re: الفيك بدربو والعيب اقدلبو .......
Author: sentimental
Date: 04-11-2004, 07:53 AM
Parent: #1

Quote:
: يمكنك ان تخدع بعض الناس بعض الوقت
او كل الناس بعض الوقت
او بعض الناس كل الوقت

و لكن لا يمكنك ان تخدع كل الناس كل الوقت

مش كدا يا بروف......

يا شباب المثل اعلاه ده لكن مثل بوب مارلاوى مى سودانى

.

Post: #85
Title: Re: الفيك بدربو والعيب اقدلبو .......
Author: Hussein Mallasi
Date: 04-12-2004, 04:49 PM
Parent: #84

من أمثال استاذنا المرحوم مصطفى بوستي الاثيرة:

انت عارف و انا عارف و الخواجة عارف

و الاهداء للاخوان حليم و ياسر حنا و كل من تتلمذ على يدي المرحوم

في مدرسة الخرطوم الثانوية - القديمة - بنين

Post: #86
Title: Re: الفيك بدربو والعيب اقدلبو .......
Author: عشة بت فاطنة
Date: 04-12-2004, 09:01 PM
Parent: #85

يا ربي دي ما راحت علينا ، انا بحب الامثال وفايتاني اللمة ، وصراحة ما قدرت اقرا كل الامثال ولو كررت ماعلي عليك يا ملاسي :
شملت ودكين التلاتية وقدها رباعي -يقال لمن المسالة تبقى بايظة مرة.

البوست البجيب الريح سدو واستريح -معروفة

ايه رايكم نقلب المسالة في الامثال المعمولة ضد النسوان والمعمولة ضد الرجال وانا حابدا ، بسم الله
النعال ام قديد ولا المرة ام وليد
ام الاربعة في البقر باعوها
عزبة بهية ولا جيزة مخفية
الرجال جزم لا نستطيع ان نمشي حفاة بدونها -اوربي
يطلع مركوب ويجي برطوش ( الطلاق والزواج سوداني
المرا كان فاس ما بتقطع الراس

راجعة اها الخط كدا كيف

Post: #87
Title: Re: الفيك بدربو والعيب اقدلبو .......
Author: عشة بت فاطنة
Date: 04-12-2004, 10:19 PM
Parent: #86

فراغ ام متلة الباعت امها وكست راجلها

بلدا مو بلدك امشي فيه عريان- عكس اتغرب خيارنا واستر حالنا

راجعة

Post: #96
Title: Re: الفيك بدربو والعيب اقدلبو .......
Author: Hussein Mallasi
Date: 04-13-2004, 08:18 PM
Parent: #86

شكرا يا عشة على الامثال الرهيبة دي ...
Quote: وصراحة ما قدرت اقرا كل الامثال و لو كررت ماعلي عليك يا ملاسي

و بعدين يا عشة معقول زي امثالك دي تتكرر او زول يقدر يجيب زيها – باستثناء عالية الغالية –

و بالذات:

Quote: الرجال جزم لا نستطيع ان نمشي حفاة بدونها

Quote: يطلع مركوب ويجي برطوش

اما

Quote: المرا كان فاس ما بتقطع الراس

فالأصوب:

المرا كان ما فاس بتقطع الراس

اما الخط فكدا تمام و عليه مافي داعي استعمل نضارة بعد كدا

Post: #88
Title: Re: الفيك بدربو والعيب اقدلبو .......
Author: mekki
Date: 04-13-2004, 07:15 AM
Parent: #1

اها هاكم:

بليلة مباشر...ولا وليمة مكاشر

الظيط لى طوبة...والفعل لأمشير (مهداة للاخوة الاقباط)

Post: #89
Title: Re: الفيك بدربو والعيب اقدلبو .......
Author: عشة بت فاطنة
Date: 04-13-2004, 08:32 AM
Parent: #88

الخيل تجقلب والشكرة لحماد

امراة غرقت وانقذها ود ولدها فقالت:
مرقني ودالعدوة وكسر فيني ترقوة ، ودالحبيبة ما عندو في البحر صسبة.

ورنجع للنسوان والرجال -

يا ضامن الموية في الغربال لاتضمن الرجال

الرجال ضل ضحى

ضل حيطة ولا ضل راجل

ساواه باب للكلاب

الراجل كلب

الهجين بصلح العجين -من عندي

Post: #92
Title: Re: الفيك بدربو والعيب اقدلبو .......
Author: عشة بت فاطنة
Date: 04-13-2004, 05:27 PM
Parent: #88

الخيل تجقلب والشكرة لملاسي

Post: #93
Title: Re: الفيك بدربو والعيب اقدلبو .......
Author: عشة بت فاطنة
Date: 04-13-2004, 05:27 PM
Parent: #88

الخيل تجقلب والشكرة لملاسي

Post: #97
Title: Re: الفيك بدربو والعيب اقدلبو .......
Author: Hussein Mallasi
Date: 04-13-2004, 08:25 PM
Parent: #93

Quote: الخيل تجقلب والشكرة لملاسي

اختنا العزيزة عشة

انا بالمناسبة من اوائل الموقعين على اتفاقية حماية الملكية الفكرية في البورد

و يمكن التأكد من ذلك بسؤال اخونا العزيز الشاعر أسامة الخواض .... و عليه

جقلبوا ساااااكت و سيرجع لكم الشكر و الفضل دون شك

Post: #90
Title: Re: الفيك بدربو والعيب اقدلبو .......
Author: Nagat Mohamed Ali
Date: 04-13-2004, 08:46 AM
Parent: #1

هاك يا عشة مثلٌ هام في الاستصغار من شأن النساء

"المرة كان فاس ما بتشق الراس"

وياما شقينا روسين
والقنعان من روحه يمد راسه

نجاة

معليش، راجعت الأمثال الفوق مرة ثانية ووجدت "المرة كان فاس... إلخ

Post: #99
Title: Re: الفيك بدربو والعيب اقدلبو .......
Author: عشة بت فاطنة
Date: 04-13-2004, 11:52 PM
Parent: #90

نجاة تعالي نتامر على هذا البوست ونخلي عن الامثال التصغيرية للمراة والرجل طبعا الراجل النايباتنو شوية والعارف فيكن كلام الشيخ فرح عن المرأ ة والراجل ما يقصر انا نسيتهم. سرعة قبال يجيكم فرار طاير ، طبعا انا عايزة لي امثال يعني في النهاية يا ملاسي سارقنهن وطابعنهن ،
وهاك يا نجاة
كتب القتل والقتال علينا
وعلى الغانيات جر الذيول

وهاك يا ملاسي/ كل شي مهمة ما خلا النساء وذكرهن

البت ام رجلها واما قبرها

وحباب النافع

..من عشها زوزاية

والصباح رباح

Post: #102
Title: Re: الفيك بدربو والعيب اقدلبو .......
Author: Nagat Mohamed Ali
Date: 04-14-2004, 10:03 AM
Parent: #99

أها يا ملاسي أنا راقت لي فكرة الإنقلاب العسكري الجات بيها عشة بنت فاطنة دي.
خلاص يا عشوش موافقة على التآمر.
وإذا لم نجد أمثال اخترعناها. هو حسن موسى أرجل مني أومنك؟ أهو أخترع ليهو أمثال من عنده، وكمان طابعها في كتاب، آخر جمال وأناقة، والواحد يفتكره الشيخ فرح ود تكتوك.
تعالي ننجر كل يوم مثلين ثلاتة، وأختتم كلامي بمثل يا ملاسي: "الحشاش يملأ شبكته".

نجاة

Post: #100
Title: Re: الفيك بدربو والعيب اقدلبو .......
Author: سارة منصور
Date: 04-14-2004, 00:01 AM
Parent: #1

حسين ملاسي يابهجة البورد ازيك وكيف حالك
الحقيقة عندي مثل واحد ( الحسنة في المايسواها كية علي السواها)
ولك كل المودة والحب ياملاسي ..

Post: #103
Title: Re: الفيك بدربو والعيب اقدلبو .......
Author: bayan
Date: 04-14-2004, 03:22 PM
Parent: #100

نجاة وعشة
معاكم غلبا وغالبا(قلبا وقالبا)
مثل انهزامى
ضل راجل ولا ضل حيطة
مرة الجيران جرها بالشوك(منجور بتصرف)
و
الما عندو كبير يكوسلو واحد
الفلهمة العورة شيل البطارية فى القمرة
الكيشة قدمو والحقو
و
ود عمك كان بقى مشهور حتفدع انت ثمن الظهور(منجور لملاسى)

ود العم
تانى بقيت من الكبارات بتفتح لينا عاد

Post: #104
Title: Re: الفيك بدربو والعيب اقدلبو .......
Author: Ali Alhalawi
Date: 04-14-2004, 03:56 PM
Parent: #103

واحـد مصـرى تانى ...

أمشـى عـدل يحتار عدوك فيك

توجد بالرابط أدناه أمثال عربية

http://www.tihamah.net/proverbs/index.php?hh=17

Post: #115
Title: Re: الفيك بدربو والعيب اقدلبو .......
Author: Hussein Mallasi
Date: 04-16-2004, 02:04 PM
Parent: #104

Quote: أمشـى عـدل يحتار عدوك فيك

يا حلاوي حيمشي عدل كيف ياخي مع زولك القاعد يتكلوج دا

Post: #105
Title: Re: الفيك بدربو والعيب اقدلبو .......
Author: Hussein Mallasi
Date: 04-14-2004, 04:46 PM
Parent: #103

مثل اليوم :

الرجال دناقر ما كبر عناقر ,,,,,,,

و الاهداء للاخوات العزيزات:

عشة بت فاطنة
عالية الغالية
نجاة محمد على
سارة منصور
و بيان

Post: #107
Title: Re: الفيك بدربو والعيب اقدلبو .......
Author: عشة بت فاطنة
Date: 04-14-2004, 06:01 PM
Parent: #105

مثلك عينة يا ملاسي
عناقر ودناقر

اها هاكن يا ناس نجاة وملاسي :

الله يكفينا شر الجدادة العوعاية والفتي (الفتاة) الصلاية -يقال لتكسير البنت الطموحة
والغشيم دقو واعتزر لي -يشب

Post: #108
Title: Re: الفيك بدربو والعيب اقدلبو .......
Author: Hussein Mallasi
Date: 04-14-2004, 10:12 PM
Parent: #103

و هل يصلح العطار ما افسده الدهر

الى جازلوت.......شمعة لحين عودتكم المنتظرة

.

Post: #109
Title: Re: الفيك بدربو والعيب اقدلبو .......
Author: عشة بت فاطنة
Date: 04-14-2004, 10:34 PM
Parent: #108

اها يا نجاة قولي

علق عصاك حيث يراها اهل الدار

ملاسي ما تدينا امثل رجالية

Post: #112
Title: Re: الفيك بدربو والعيب اقدلبو .......
Author: Hussein Mallasi
Date: 04-16-2004, 00:21 AM
Parent: #109

اها يا عشة هاكي المثل متعدد المواهب دا- ملتي سيستم - :

رحل الحمار بام عمرو فلا رجعت و لا رجع الحمار
او
رحل الحمار بام عمرو فرجعت و لا رجع الحمار
او
رحل الحمار بام عمرو فرجعت و رجع الحمار
او
رحل الحمار بعمرو فلا رجع و لا رجع الحمار
او
رحل الحمار بعمرو فرجع و لا رجع الحمار
او
رحل الحمار بعمرو فرجع و رجع الحمار .........

.

Post: #113
Title: Re: الفيك بدربو والعيب اقدلبو .......
Author: عشة بت فاطنة
Date: 04-16-2004, 12:20 PM
Parent: #112

انتى قاصدني عديل مع اني بطلت ركوب الحمير من السنوي العام ، حتى عمرو ولدي ما بركبن حسي

واديك مثل حماري

الركوب عري وكان ركبوك فنجطي

وقبال النفاس والريحة نحاس

Post: #114
Title: Re: الفيك بدربو والعيب اقدلبو .......
Author: Elwaid Osman
Date: 04-16-2004, 12:40 PM
Parent: #1

المحترم......حسين ملاسي
غايتو مثلك ده بتاع ناس عنجهيين ساكت.كون الزول يقدل بي عيبوأ كمان ينسبو للآخرين.
لكن كدي هاك المثلين ديل علهم يضيفوا
المثل الاول(العندو سروال بينوم مفنقل)
المثل الثاني( البيباري الجداد بيوديهو الكوشه)
وكمان واحد زياده(واقع البير بيمسك في كمفوسو)وبالمناسبه الامثال التلاته دي ا طبعه غرباويه.يعني ممكن يكون عندها صيغ أخري تناسب طبيعة الامكنه الجايه منها.
وليد يوسف

Post: #117
Title: Re: الفيك بدربو والعيب اقدلبو .......
Author: عشة بت فاطنة
Date: 04-16-2004, 03:33 PM
Parent: #114

ودي امثال لمحمد ادم

املكه انا واشطنه االاخر

وعشنا في مواطننا عبيدا

نؤوب اذا ابو ونغزوا اذا غزوا فانى لهم وفر، وليس لنا وفر؟

لاثريا الحكومة

Post: #118
Title: Re: الفيك بدربو والعيب اقدلبو .......
Author: Hussein Mallasi
Date: 04-16-2004, 10:13 PM
Parent: #117

قدم الكيشا و الحقو ...... ( الزوجة لزوجها في السوق ) مثل نسائي

القرش الابيض ينفع لليوم الاسود ..... ( الزوج لزوجته في السوق برضو ) مثل رجالي

تاكلوا ساااااااكت و ناسين السفر
( و يضرب للذين يأكلون ساااااااااااااكت و ينسون السفر ! ) مثل رجالي ونسائي

Post: #119
Title: Re: الفيك بدربو والعيب اقدلبو .......
Author: ASAAD IBRAHIM
Date: 04-16-2004, 10:22 PM
Parent: #118

حسين ملاسي اخبارك عساك بخير والاسرة الكريمة

مثل بالانجليزي

Don't argue with a fool, Some people may not notice the difference.

مع خالص مودتي واحتراماتي

Post: #120
Title: Re: الفيك بدربو والعيب اقدلبو .......
Author: عشة بت فاطنة
Date: 04-17-2004, 11:18 AM
Parent: #119

اريتو يشبه ابو-لمعظم الامور-

الفيك بدربو وودالعرب احقربو- عنصري

حوا تسال من ادم وادم يسال من حوا

Post: #121
Title: Re: الفيك بدربو والعيب اقدلبو .......
Author: Hussein Mallasi
Date: 04-18-2004, 05:40 PM
Parent: #120

مثل اليوم:

كترة الريد دعى وقميد

Post: #122
Title: Re: الفيك بدربو والعيب اقدلبو .......
Author: Ahmed Alrayah
Date: 04-18-2004, 05:57 PM
Parent: #121

هاك المثل ده يا ملاسي...
صَدركَ أَوْسَع لِسِرك.‏
مثل يضرب في الحث على كتمان السر‏...
أحمد الريّـح‏

Post: #123
Title: Re: الفيك بدربو والعيب اقدلبو .......
Author: Hussein Mallasi
Date: 04-21-2004, 09:42 PM
Parent: #122

اها هاكم دا الليلة:

ضربني و بكى و سبقني و اشتكى .....

Post: #124
Title: Re: الفيك بدربو والعيب اقدلبو .......
Author: Hussein Mallasi
Date: 05-24-2004, 00:54 AM
Parent: #123

اها نرجع تاني لمرجوعنا ....
و كم مثل كدا على الماشي

التسوي كريت في القرض تلقاهو في جلدا

علمنهاهم الشحدة سبقونا على الابواب

كما تدين تدان ..... و دا اظننا قلناهو زمان .... بس ما مشكلة ففي الاعادة افادة

Post: #125
Title: Re: الفيك بدربو والعيب اقدلبو .......
Author: سارة منصور
Date: 05-24-2004, 08:30 AM
Parent: #1

الاخ الحبيب دوما / حسين ملاسي تحياتي والاشواق مطر والله
اتمني ان تكون بخير وليك مدة ماظاهر ، ارجو ان تكون بخير
وفي احسن حال انشاءالله ..

Post: #126
Title: Re: الفيك بدربو والعيب اقدلبو .......
Author: بلدى يا حبوب
Date: 05-24-2004, 03:16 PM
Parent: #1

يلام يا ملاسى
فى مثل جاء على لسان الاخت رجاء العباسى فى احد البوستات

صاحب القشطه لو قالوا يشوها يشوها

اما عن مشاركتى
(تورين فى زريبة وحده ما بيقعدوا)
معنى المثل لو فى شخصين وكل واحد عجباه نفسه وداير يمسك الجو فى اى مناسبة اجتماعية اكيد فى النهاية بخسروا بعض ولازم يفضل واحد
لك تحياتى