يا بكرى أفصل دا ويا عمده جمد داك

يا بكرى أفصل دا ويا عمده جمد داك
يا أخونا عندى طلب ممكن تنفذو لى
افصل سجيمان كل ما أخش البورد القاهو بحدر لى
ويا بكرى عندى طلب ممكن تقول حاضر
ياخى لو ممكن جمد أختنا تماضر
كل اخش البورد القاها كارده الطيش
بالزيزى والبرطوش ومرات بكم شلوت
وفى دوله الرايخ هدن وأمش بشويش
حبوبه دومه كمان هردتنا بالقريص
ولو غشيت كوالا وجارتها لامبور
ما تنسى خاله بيان أديها كرت أصفر
لأنه خصومتها واضحه كحراشف السمكه
يابكرى ما تنطش وتعمل كمان ناسى
ما تنسى ملاسى وفردتو أساسى
أعزل كمان واحده من آل عباسى
ديل هم سبب زعلى وقومه أنفاسى
ويا قايد المركب القتلها سيرى
أنا برضو متحسس من هترشه شيرى
ليه بس هى كتابه وأنا ما بعرف التكتح
يا بكرى أرفدآ لى شان ما أقوم أردح
وما تنسى خالد الحاج وعمنا تنقو أديهم بس إنذار
لأنو بهدو الناس كل يوم غنا وأشعار
بس ما حصل فى يوم أهدونى لو رميه
وما تنسى لى بشاشه ومعاهو برضو طناش
لأنهم قالوا السودان يكون أفريقى
يعنى أقبل وين أنا الجدى فينيقى
وحبوبتى شيرهان النصها فايكنغ والباقى إغريقى
وفى حمله التطهير ما تنسى ناس/ ت الجندر
لأنهم/ن قالو/ن أصلهم فينوسى وانحنا مريخاب
عشان سكتنالهم من طرده الجنه
لكنى بينى وبينك نحن بنشيل اللوم
أيه لازمه التفاح وقدومنا قدوم دوم
وناس المشاكل ديك عندى ليهم دبره
ياخ ما تأجرلم اوضه من اب20
شان ما يهدرو الباندوث أديهم الباسورد
الداير يكسر أخو يقولو طالعنى لأوضه الكسير
البنيه بى كوارتر ورسم الدخول دولار
وخمسه لى ناس الشمار والبعشقو الشوبار




الدين ممنوع والزعل مرفوع كل الشخصيات والاسامى الوارده فى هذه القصيده العشوائيه خياليه وأى تشابه فى الواقع أو البورد هو محض صدفه

منتصر .... والله ابداع

ربنا يفرحك قدر ماضحتكني ...

Quote: وفى حمله التطهير ما تنسى ناس/ ت الجندر لأنهم/ن قالو/ن أصلهم فينوسى وانحنا مريخاب

طبعا دي مبالغة

العزيز عمنا تنقو
إنشالله دايما ضاحك وفرحان وقد صار البورد عكازنا فى زمن اللاعكازبس أبعد ما تحاول تحجز عشان الجماعه ديل بطريقتهم دى بعوقو ليهم زول
ودى ما عجبتك
وما تنسى خالد الحاج وعمنا تنقو أديهم بس إنذار
لأنو بهدو الناس كل يوم غنا وأشعار
بس ما حصل فى يوم أهدونى لو رميه
ولك ودى