يا جماعة أدونا معاكم وجهة نظر

قالوا (واعوذ بالله من قلنا وقالوا)
قالوا ،، كان في احتشاد حاشد أعني يعني احتشاد كبير مظاهرة يعني،، تشجيعاً لاتحاد المرأة العاملة،، والهتافات تتعالى،، (عاش اتحاد المرأة العاملة) (عاش اتحاد المرأة العاملة)
صاحبنا واقف بعيد مر بجنبه عسكري فسأله ( يا ابن الئم.. انت مرة هامل ده مالو؟؟)

الآن يا جماعة أحس بنفس الإحساس،، لست بفاهمة شي والله
هذه الناس قايمة قاعدة بوست الموناليزا بوست الموناليزا
والأسبوع الماضي،، سارة منصور،، سارة منصور
والشهر القبله،، تماضر تماضر
ثم قبلها رودا رودا
والمكان كلو محاصر
الله!!!انتوا حتحاربوا خلاص؟؟؟!!

وبما اني أكيدة أن ناس كتيرة ليست بفاهمة مثلي الحاصل،، والأغلبية فاهمة ومطنشة،، ثم هناك من هو فاهم ومفقوع من فهمه ونفسه لو ما فهم،، قررت أن افتح هذا البوست للضهب،، وليسقط الباندوث طالما هو مستغل فيما لا يقدم ولا يؤخر،، وانا بجي بعد شوية املاه نقة فاضية ومواضيع ما ليها أي علاقة بالمواضيع،، تماما كنشرة الأخبار السودانية الماليها أي علاقة بأخبار الكوكب الأرض،، وبالله عليكم الله ادونا معاكم وجهة نظر.

مع تحيات
جمعية شماسة بلا حدود

مره هامل دا انينا مادايرين
لازم نكنس بيت نخلى نديييف

قضاضيمو يا محن


لو لا الملامه لتسألت عن عدم ايراد اسم بت قضيم
في قايمه الاسماء المصاحه


ياربي تكوني تبعنا ونحن ما عارفين والا شنو؟

والله يا بت قضيم ياختي شكلها الحرب العالمية الطظعطاشر عايزة تقوم وتكون عجايب الدنيا الخموسطاشر اتحققن...

بت قضيم ازيك
عايز اسألك انتى قاصدة بوستات النسوان الكتيرة الايام دى ولا قاصدة النقة بصورة عامه ؟
طيب لو اعتبرنا انك قاصدة الشق الاول من السؤال فاليك رد:

اولا -بدون شك-المرأة كائن لطيف وفى الكلام لذيذة وفى كمان مد كاسح لحركة المرأة ونقتهاالايام دى فى بوردنا الفسيح مسنودة -لا اراديا طبعا- بجمع الرجال الذى هو على مشارف السقوط فى شرك لا فكاك منه ويظهر ان هنالك اتفاق غير معلن كمان ماتنسى يوم المرأة (دا اليوم الدايرنو ليك)
الشق الثانى: النقة طبعافى الاطار العام ظاهرة سودانية بحتة..
لا غنى عنها وتعتبر جزء من تراث حبوباتنا ...و(الحنك) هو ضرب من ضروب النقة المقرونة بالاقناع...وهو حق مكفول لكل من يرى انو (حنكو سنين)
اها يا بت قضيم بعد ده سننى حنكك بس..والكلام ما بقروش
بمناسبة القروش دى اها المنبر لو بقى بقروش تفتكرو الغالبية حتكون نسوان ولا رجال؟

جاوبو سؤالى وما تنسو سؤال بت قضيم

تحياتى

اها جاك الضهب ضقلو يكركب...

وصاحبك من الما فاهمين ولا عايز يقرررررررب علي الموضوعات
امّات سلوكا عريانة...دي...براي محمول وحفيان...يقوم يطقني صقط يجيب اجلي...مالي ومال الشرابك

Quote: وبما اني أكيدة أن ناس كتيرة ليست بفاهمة مثلي الحاصل،، والأغلبية فاهمة ومطنشة،، ثم هناك من هو فاهم ومفقوع من فهمه ونفسه لو ما فهم،، قررت أن افتح هذا البوست للضهب

بت قضيم يا رايعــة

أنا مش فاهم مثلك الخالق الناطق .. لكننى مفقوع لدرجة الطرشقة من عدم فهمى و تقل مخى .. و نفسى لو أفهم الناس دى بتتكاتل فى شـان شـو ؟؟ أكيد بتكاتلو فى ما شـان شـى .. و كمان نفسى أعرف الباندودث دا شنو ؟؟ .. أصلى كنتا أبى لكن لمن جيت هنا إكتشفتا إنو أنا أمى .. دعك من كل هذا و أرجعى بنا للغنم التى مازالت تأكل الجرايد

بت قضيم ...سلاااام وشوق

بتعرفي كلام الطير في الباقير

بت قضيم

لا صوت يعلو فوق صوت المعركة

الأخـت بـت قـضـيـم ســـلام و مشتاقين


يا ختي إنتي فتحتي ليك بوست و مشيتي وين ؟؟؟؟


عــايـــزة تـفـهـمـي شـــنو ؟؟؟ هـــم الأذكياء فهموا بعد يوم كامل

يعني نحن علشان نفهمك عايزين لينا شـهـر

صباح الخير يا وطن

ازيكم كلكم الناس المضهبة
يا هوبفل
قايمة الاسماء المصاحة دي شنو؟؟؟
والله يا ما فهمتها يا ما عرفت أقراها،، عارف انت الثقافة الفرنسي
بعدين انا تبعك كيف داير تجيب لي الكلام وانت مهدد بالطرد شر طرده
والله عارف يا هوبفل
انت واساسي وتماضر واسامه الخواض وودقاسم وناس تانية بتذكرها ليك بعد شوية،، المفروض يطردوكم نسبة لما سببتموه من وجع راس كبير خصوصا للناس الما بتعرف تفهم كويس ذي ناس ابوحسين ديل
بجيك صادة يا ظلامي

ميادة
ويا ريتها لو الحرب ناجحة وفالحة،، يعني حتى إدارة الحروب ما قادرين نجيدها كشعب،، غايتو حالتنا تحزن الكافر،، اووووه،، استغفر الله قلت كافر

ضهب جديدلنج يامنقه .. في ميزان حسناتك

بت قضيم يا وهم
اولا أهلا وسهلا بالطلوة الحلوة
إنتي جاية خاشة توش لا إحم لا دستور وعايزة تفهمي كل حاجة
إنتي ألا نجيب ليكي فهامة زي زميل واحد سوداني صاحبنا (دي نكتة طبعامن نكات أخوانا أبناء الخليج دون ذكر الجنسية)
صاحبنا جابوا ليه واحد يدربه في الشغل في بنك وأخونا فهمه تقيل وشهرين تدريب وما فاهم حاجة قام الزول زهج منه قال ليه إنت محتاج فهامة قاله (ويش الفهامة) قاله امشي اليورمارشية (محل تجاري كبير) وأسأل هناك حتحصله إنشاء الله راح صاحبنا الخليجي لف محلات المدينة والمكتبات الفيها مكتبة مكتبة ورجع تاني يوم قال ليه والله ما حصلت الفهامة قال ليه خلاص أمشي بره أقطع ليك عصاية من الشجرة ديك وتعال
حلوة مش كدا؟
تقعدوا عافية

صباح الخير يا وطني

وليد طه
قاصداهم الاثنين،، نقة النسوان والنقة عن النسوان
ثم اني اختلف معاك في أن المرأة كائن لطيف،، وقد قال عنها الله أن كيدها فاق كيد الشيطان،، وفي رأي أن المرأة قد تكون أشرس من الرجل في مواقف عديدة إلا إذا كنت تقصد باللطف لطف الشكل والرقة والعذوبة،، وهذه ليست قاعدة بالطبع،، والدليل آآآآلوووولووو،، هسه انا لطيفة؟؟؟!!!
ثانياً (ده اليوم الدايرنو ليك) تقولها النساء للرجال المقبلين على الزواج،، وهو ليس نوع من الانبساطة كما يتراءى للبعض،، لكنها شماتة خفية (بركة،، أها،، ده اليوم الدايرنو ليك من زمان،، شيلة ومهر ونقطة بضم النون ونقطة بفتحها،، ومصاريف وعيال وحق الحنة وحق قطع الرحط وحق الجرتق وبركة،،،، صحي ده اليوم الدايرنو ليك شان تقعد تتفلسف وتاكل حقنا تاني) والكلام ده هزار ما يجي زول ينط لي في حلقي إذ نحن قوم خوافووون جداً وكبابين للجرس شديد.
ثالثاً،، الشعب السوداني حقيقي حناك (انظر الصورة) أعني شوف نقتي دي،، اليست بالله عليك هي اكبر مثال لذلك؟؟؟
أما بالنسبة لسؤال القروش فانا الدكتور مانعني من تلاتة،،، الصلصة ،والسمنة،، وكلام القروش،، شان (الدغت) يا ده.
وفي النهاية اهدي سلامي لعبد العال ومحمد أحمد وعمر قاوش،،، واقول ليهم القروش الربطوها لي في كيس المخدة ناس الجمارك ولااااااا شافوها.

نزار حسين الكلام ده بدينك
أفووووو والعكاز الكبير الشايلو ده منظره ووجاهة واللا كيف؟؟!!
بعدين يكركب دي ادتني إحساس انك عجوز جدا وانا عندي انطباع انك شاب جدا
وبالمناسبة،، في ناس في البورد لما تنزل صورها بلقى أن خيالي كان جامح جدا ولاااااا حصان مشى ورا غنماية مشك.
تلقى الليل والنيل والقمر والشمس والنبل والحياة الازدبرجية،، ورد الجوري وحاجات كده تحس معاها انك طالع في السحابة،،، ثم إذ فجأة يقرر الزميل نشر صورته في البورد،، وررررردلب انزل من السحابة لسوق الملجات في امدرمان،، وما تسألني ليه سوق الملجات بالذات والله ما آآآرف. وأكيدة انا ان الكلام ده حيجيب لي الكلام،،، ووقتها جرررري،، بمشى ادساااا.
كدي نزل صورتك نشوف الكركبة دي كيف.
بعدين تفهم ليه؟؟؟ داير يجيك ضغط؟؟!! خليك كده حلو جدا

علي الحلاوي
الله يخليك ياخي،، اؤكد لك انك ستسحب كلمة رايعة هذه عندما تكتشف كم انا سليطة اللسان وقطيمة كما يجمع الجميع،، وحتى ذلك الحين خلينا نستمتع بهذا اللفظ الجميل،، ولو انه بذكرني الشواكيش دائما مش عارفة ليه.
الباندوث هذا هو هذا الشئ الذي لا يحتمل مثل نقتي الكتيرة دي،، وكنت قد قررت يوما ان لا اكتب إلا ما يفيد أهل البودر وقارئيه،، ثم اكتشفت أن ثلاثة أرباع ما يكتب بصيغ جميلة مضيئة ملونة جذابة هو في الأصل كلام فارغ،، فقلت علي ايه امنع نفسي من النقنقة التي ورثتها عن حبوباتي كلهن،، فسحبت قراري وقلت حاقول اي حاجة،، لن اكون أكثر هدرا من ناس المشاكل والكتاحات والمبروكات والنفاسات والشعر الحر والشكلات ثم بنفس المستوى الاعتذارات وناس باركوها وناس المديدة حرقتني وناس نحن الما فاهمين.
هذا هو الباندوث
بالنسبة للغنم،، فاعدك اني حارجع ليها وبمزاج كمان بس خلي مشروع الوليد بن طلال يفشل شان يرجعوا لينا غنماتنا
أما الفاكس المرسل من رابطة محبي نادي ام صفق في الرياض،، فنعدكم أننا حننقل ليكم مباراة أم صلص قريباً.
بالله ما ذكرتك بكمال حامد؟؟!!

كبسيبة سلامات والشوق بحر الغزال
ما بعرف كلام الطير في الباقير،، انت لو شاطر صحي ورينا ماذا يعني هذا المثل وما هي قصته،، واتحداك لو عرفت.
يا مسيخ ساوي صورتك الحلوة دي،،، بالجد ابتسامة نابعة من القلب رغم كسير السنون.

أسد إبراهيم
انت من الناس المفروض يطردوها مع اللستة الواردة أعلاه،، لانك برضو بتسوي المشاكل،، وانا حذرتك،، ما تجي المدرسة تاني لو جبت معاك ولي أمرك،،، و
أماما أماما جنود الفداء،،، قلوبنا معكم واجسادنا في الكرنتينة

أبو حسين
ما هو انا وانت نكون اذكياء بعدين بسحرونا فاحسن انت ابقى ذكي انا بكف ليكم العين
بعدين أخير ليك،،، والله والله والله،،، اذرف الدميعات الحزينات،، ثم ارسم تلك الرسمة التي تجيدها النساء والتمساح،،، وافتح بوست اقول ابوحسين شتمني في سيسفاء كرامتي،،، واتمسكن واوطي صوتي،،، واكسر عيوني (شان ما يشوفوا الحوص) ،،، فيهب لنجدتي الرجال الأشاوس،، ناس جعل وناس ما جعل،،، فنحن يا سيدي قوم إذا بكت فيه النساء،، قام الرجال طوالي كوركوا فيهم،،، اقصد يعني كوركو عشانم.
فارعى بي قيدك يا زول
وتاني بجيك اوريك الفهم

تمبس لو سمحت ممكن تحدد نوع المنقة؟؟؟
لانها لو كانت المفعصة ديك بطير ليك حاجب صدقني جد.
طوالي منبشك وخاتي زولك البضحك ده هسه البضحك شنو؟؟؟!!!

حبيب بلدو
تحياتي الكثيرات
داخلة توووشك طوالي دي ذكرتني الغنم في السودان (وتاني قام جاب سيرة القطر اقصد الغنم)،،، يكون باب الشارع مفتوح والناس قاعدين في الحوش،، ومع ذلك الغنماية تووووشك تدخل البيت وتمشي للفازة الوحيدة المزروعة صبار وتاكلوا برضو،،، قدر ما تحاول تقنعنها ان ده صبار با بت الناس اقصد يا بت الغنم،،، برضو تاكلوا،،، ذي كديسنا في السودان جنو ياكل اكياس نايلون،، يبدو ان طبع ناس بيتنا ومزرعة الحيوانات الأليفة التي نملك غريب شوية.
ثم ناس النواحي دي ما بتفهم فعلا حتى لو بالفهامة،،، يعني لما تقول ليك نكتة لي زول لازم تشتري ليها كتالوج تقول النكتة وتديه الكتالوج ومواعيد بعد تلاتة ايام عشان يضحك.
وقالوا الخليجي (ما حاقول ياتو خليج بجوا يقولوا عليا اسئتهم شر ما اساءة)
قالوا الخليجي في المطار معاه بغبغاء ،،َ الضابط سأل (الحيوان ده مطعم؟؟) البغبغاء رد (أكيد جنابو)

مكرر بسبب الخرف

..
.
سلام يا بت قطيم

والله قلت اجى لكشاشتك دى اخد راحتى شوية واتقهوج
على بال ما متحف اللوفر دا يفتح ويزلوا الستار
من لوحة دافنشي دى ؟؟

عندكم بن حبشي ؟؟

طبعا عندنا بنة كما يقول الحبش
أها تشرب قهوة واللا مش كييف؟؟؟!!
زاتو الوقت راح والغدا قرب

الأخت العزيزة/ بت قضيم .. لك التحية
لي زمن من مشاركتك (بوستاتك) لا لشيء سواء إني لقيت نفسي واقف في مكاني (محلك سرك) وأنت وشيري وكل القابضين على الجمر يتحركون سريعاً نحو آفاق أجمل من الرحابة ..
في البدء كنت مفكراً في إفراد بوست لمناقشة الكثير من القضايا التي تطرقت إليها لكني قدرت بأن أول المخالفين الرأي سوف يأتي ويتهمني بالإهدار والآخر بالظلامية والثالث بالحجر على الحريات .. الخ رغماً عن أنني والله أعلم، ممن يسمعون القول ويتبعون أحسنه، أوعى تكون دي برضو داخلة في إطار التصنيف الحصيف ؟؟ .. عموماً أعتقدها سنة حسنة جداً ، فكرة الأسابيع التي لا زالت مستمرة بحمد الله، وأشد من أزر من ابتدعها وكل من حزو حزوه/ها/هم/هن لمزايا عديدة أهمها تذكير الآخرين بقضاياهم التي ربما شغلهم عنها شاغل الحياة أو العمل، ومن ثم إثراء الحوار في هذه القضية أو تلك وإضاءة مساحات مفقودة تصغر أو تتسع عند البعض كذلك .. ولكن التوقف عند الأسئلة التي تطرح ذاتها هنا جدير بالإعتبار: لماذا نجح أسبوع دون غيره؟؟ لماذا تكالب البعض ضد هذا الأسبوع ولم يتكالبوا ضد الآخر؟؟ لماذا دُعم هذا من قبل أولاة الأمر ولم يُدعم ذاك؟؟ لماذا ولماذا؟؟ أسئلة كثيرة حائرة .. التوقف عندها كما أسلفت جدير بالإهتمام رغماً عن أنه انتباه في حد ذاته .. انتباه من يملك البصر والبصيرة لا أقول الحس الناقد والبصيرة النافذة كذلك .. ولكنها وقفة والسلام ..
الأخت بت قضيم .. الحديث يطول هنا ولم أمسك بعد بأبعاده لكن الظاهر مديرك حولوا لينا بي جاي .. بجيك صادي ..

تحياتي للجميع
ونخص الأخ صلاح ضرار
أولاً بطل بكش ويا ريت تشارك في كل بوست أحنا نطول واللا لاقين حد يعبرنا؟؟!!
يخليك للمشاركة

ثانياً،،، قل كل ما تريد واجعلهم يصفونك بما يحبون وادرج وصفهم تحت بند حرية الرأي،،، حتى ولو كان تجريح فلا بأس،،حيث هناك مفهوم خاطئ بأن من ضمن حقوق الإدلاء بالرأي، التجريح الشخصي والهجوم على الناس حتى في عقر دارهم،،بشربوا ماذا وبياكلوا ماذا بلبسوا ماذا،، وصفهم بالأنانية واللئم وأحياناً الغيرة والحسد و و و و الخ.
وإن أنت تحدثت،، فانت ضد الحرية،، ديكتاتور،، رجعي ،، ويمكن تكون كوز مأجور كمان ومرات مرات بتكون سفسطائي.
الشعب السوداني في العموم لا يستطيع التمييز بين أواسط الأمور،، إما ناخد الأمور على الدوام أبيض ،، وإما اسود،، وقد تكون هذه ميزة إن لم تزد عن الحد،، فالله خلق الألوان لننظرها ونتمتع بها ونتعايش معها،، وإلا أصبحت الدنيا ذي حالات البورد اليومين ديل،، كئيبة ملغومة ،،مخيفة،، الواحد ماشي ومنتظر العكاز.
بالنسبة لنجاح فكرة الأسابيع،، فيبدو أن الخرف دخل لأني لم الاحظ هذه الأسابيع،إلا إذا كنت تقصد اسبوع سارة منصور واسبوع الموناليزا واسبوع عبد الفتاح المستنير،،، وأسبوع الحردي،، واسبوع التحنيس،، واسبوع الرجوع إلى البورد،، في هذه الحالة،، اكون فهمت واعذرني فنحن متفقين سلفاً أن الفهم قسم.
أما نجاح بعض البوستات وإقبال الناس عليها فهناك مقولة بأن (المحبة من الله)،، استغرب أن يقول أحدهم أن فلانة يرد عليها كل الناس ونفس الموضوع الذي كتبته فلانة كتبه فلان ولا حدش عبره،،
من الله ،، المحبة من الله ذي برامج التلفزيون،، مثلاً يعني.
شكرا للمشاركة واتمنى اشوفك في كل البوستات وتعيش يا رب.

بت قضيم
سلامات..
مرة تمبس الجميل قال لي وهو يعرفني بشخصيات المنبر وخالك في الوكت داك برلوم
تصدقي برلوم عمره 40 سنة (هالة سأبة) قال لي : يا خال قريت بوست بت قضيم؟؟
وقريت ليكي وكنت حينها بخاف الطناش (ما قلنا برلوم) ولمن يجي من الجكس بيبقي حار
وفضلت عدم المشاركة قلت يا ود أبعد والحقيقة تقال ندمان..المشكلة لما بقيت (تاني طيش)
وجات المرحلة (الكردية) أختفيتي من البورد وبقت طلاتك نادرة..
عموما إعتبريها مشاركة بأثر رجعي من خالك..
وعودة لموضوع البوست أنا زاتي والله ما فاهم حاجة ولو فهمتوا مسؤليين من الخير
أدوا خالكم خبر.

تحياتي ليكي ألف

مرحبابك أخي خالد الحاج
اسمي بت قضيم
لست جلفكار
ولا ماهيتاب،،، فكيف يجتمع أن أكون (جكس) وكمان (يطنش)
!!!
الا تكفيكم هذه الخفة واللفة في الرد السريع بالله عليك لتنتفي صفة الجكسية من دارنا وتنقطع قطعة الخميرة من بيت المصريين،، وعلى فكرة،، ماذا يمكن أن يحدث لو انقطعت يوم الخميرة من البيت كما يقول المثل المصري (يقطع الخميرة من البيت)؟؟؟!!
مشكلة يعني كان ما عاسوا اليوم داك؟؟؟
الخال خالد (عظيم أن اكون حبوبة واقدر اقول خال دون أن اتهم بالصبينة)
أنا مش مش فاهمة بس،،، أنا دايخة (أديييل كده)،، كل ما امسك طرف موضوع،، يلتف هذا الطرف كأذرع اخطبوط يوصلني لطريق آخر لا علاقة له بطرف الموضوع الذي مسكته من الأساس،، حتى أتوه وتعتدل عيناي من حوصتها،، وعلك لا تدرك أن الأحوص لو انعدل عيونه بشوف ما كويس،، عارف المعلومة دي؟؟؟!!!
المهم
اشكر تفضلك وقبولك دعوة تمبس مع أنهم قالوا في الأمثال (البباري الجداد بخش .....)

يخليك يا رب واوعك تفهم خصوصاً لو عندكم حالات ضغط في الأسرة الكريمة.
سلمت