****يــــــــوم الــقــراصــة ....الــعــالــمــــي****

اليوم جمعة..ويصادف13 في الشهر..الجماعة ملاوذين و متشائمين من يوم زي دة

ذهبت للبقالة بعد يوم عمل متعب ..منهكة
افتش في مكونات وجبة سريعة
ابحث عن بيض ولبن وعسل

صعقت..يا للهول .... ماذا حدث؟؟ الرفوف شبه خالية منها

ذهبت بصِرّة وجه للمسئول:
في شنو..وين الاساسيات..مافي بيض ولبن

أجاب والسرور يملأه...وبلهجة فيها إعتذار
sorry... it is gone... we will soon have another supply

وليه في شنو..ما شفت الرفوف دي فاضية قبل دة..في مجاعة حتحصل؟؟ ولا ناس السوق السوداء متوقعين ذيادة الاسعار ولموا الموجود؟

رد والابتسامة تذداد
...............................PANCAKE DAY

يوم القراصة العالمي؟؟؟؟؟؟؟!!!

طيب مش كان تئولوا

اتضح ما برانا البنريد القراريص..حتي بروتس يحبها
مع قليل الاختلاف

الجماعة بيحتفلوا كل سنة ببداية الصيام المسيحي عن اكل ما هو من اصل حيواني..55 يوم قبل عيد القيامة

اي بيض...زبدة..لبن...مطلوب التخلص منها
مع انهم لا بيصوموا ولا يحزنون

عمل قراريص او قراصة كبييييرة والتهامها مع الاصحاب و الاهل قبل الصيام بيوم

واهو صادف مع الفالانتاين

وخلوا الفرحة تبقي اتنين

ادام الله افراحكم

وعاشت القراصة للجميع

طبعا يا حنينة الحبيبة انا القراصة نمبر ثرى فى اولوياتى بعد الكسرة و العصيدة
لكن لهذا السبب اعتبر نفسى مهمشة فى البيت لانها تحتل مرتبة دنيا لدى
وبرغم ذلك التحية لها سواء كانت قراصة شوايقة غليدة مرتفعة او دناقلة رهيفة و نازلة على حد الصاج

PANCAKE DAY

you got me laughing all the day ,thank you very much

حنينة الحنينة.......التحيات الطيبات
يا ترى نحن العملنا ليهم غزو قراصي ثقافى و لا العكس؟؟؟

يمني أختي
عارفة..أول حاجة فكرت فيها هي سؤالك دة

لكن طبعآ قلت لازم انو نحنا العولمناها ووصلناها ليهم
يعني ليه هم الدايمآ بدوا
اهو في دي نحنا والعالم يشهد اننا اسياد الصنعة والإسم

والمغالط..يمشي يحفر اكيد حيلقاها في الاثار..قراصة كاربة كدة
وما في حد أحسن من حد

يعني براهم اليعولموا...دة كان زمااااان

manubia
سلامات
والله
PANCKE DAY
تصدق؟؟
انا ذاتي ضحكت..والله القراصة تراها ما هينة

انشاء الله دايمآ مبسوط

العزيزة لنا

والله ماليهم حق ناس بيتكم في تهميشهم لاختياراتك القراصية
لازم تكلميهم بحكاية العولمة الجديدة للقراصة
وانها اكلة عالمية..ومافي فرق بينها وعالمية البيتزا
وتحيا القراصة بكل مقاييسها

بس عشان يااآمنوا
كل الود

حنينة
كيفك
أوعي تقولي لي مشيتي عملتي قراصة وأكلتيها ، تكوني وقعتي مع الجماعة إياهم باعتبارك تشبهتي بالنصارى في يومهم ذاك ،،
شيلي شيلتك ،

ودقاسم
سلامات

والله كنت نااااوية علي البان كيك نية صافية
الا الرفوف فاضية ومعلمة الله كانت من المكونات
السنة الجاية حامشي بدري واعمل قراصتي اول واحدة
اما الجماعة...فما منهم خوف

موعدنا مع البان كيك داي السنة الجاية

وانت معزوم من هسع

كويس؟؟؟

Quote: قراصة شوايقة غليدة مرتفعة او دناقلة رهيفة و نازلة على حد الصاج

Do you know that we ate it just a moment ago
with some friends (Dr. Abdalazeem Alhassan ,Eyes specialist , Bahri, and his wife)in Monterey , Califonia
it was not Shawayga's nor Danagla's, it was new style swims in Umregaygah Alhamra

حنينة كل عام وانت الحب
قراصتك مهضومة ، ومقبولة بلا عسل لانو عسلك اكفي
انت وين يا حنينة انشا الله خير

العزيزة عشة بت فاطنة
والله ليك وحشة..وانشاء الله الحب يحاوطك من كل جهة
قولي آمين

انا والله مشغولة شديد..لكن سائلة منك طوالي
بالله ما تقطعي الجية
اشوفك هناك
وسلامي للكل

Quote: it was not Shawayga's nor Danagla's, it was new style swims in Umregaygah Alhamra

ياسيكو
والله ريقي جري من وصفك للقراصة دي

تحياتي للاخت العملت القراصة العايمة في ام رقيقة الحمرا
اعزمونا المرة الجاية معاكم

شكرآ للمداخلة

حنينة كيف حالك وكل سنة وانتي طيبة

Quote: كانت قراصة شوايقة غليدة مرتفعة او دناقلة رهيفة و نازلة على حد الصاج

البعرفو العكس قراصة الدناقلة 1بوصة والشوايقة 1 سم

حنينة
تحياتي

طالبت قبل هذا بتوحيد إتحاد العواسات بالسودان مع رابطة عواسات الخليج ،، لأن مقادير القراصة بتختلف عند الرابطة و عند الإتحاد ،، و أخشى ما أخشاه أت يقوم تجمع عواسات جديد و يأتينا بمقادير جديدة و خاصة بعد رفع سعر العيش في السودان 100%
ما علينا يا حنينة ،، تعالي نعمل مشروع نسميه ( بانقراصة ) على وزن بانكيك
أرقدي عافية

الأخت العزيزة حنينة
شكرا لك وأنت تنبهيننا إلي أن عصر عولمة القراصة قد أتي !
Cooooooool
إيمان

Quote: صعقت..يا للهول .... ماذا حدث؟؟ الرفوف شبه خالية منها

عولمة أكتر من كده ياإيمان..
بدل (سجمي) بقت تقول يا للهول
والله صحي خواجية..
إزيك ياحنينة

خالد الحاج
وييينك يا زول

نحنا مش اتفقنا؟
انا خواجية بت قبايل لكن

وبعدين ياللهول دي..سجمي بالخواجي

انت ما عندك آخر نسخة من قاموس اكسفورد ولا شنو؟؟

ايمان
ويين.مشتاقين والله
والله القراصة دخلت العولمة..شفتي كيف؟

قراصتنا حديد

Quote: تعالي نعمل مشروع نسميه ( بانقراصة ) على وزن بانكيك أرقدي عافية

ابو جهينة
والله فكرة..انا معاك مادام فيها بيزنس ولقمة حلوة
والمفروض طبعآ الاتحادات تتفق..وناس ضبط الجودة لازم يتدخلوا
وعشان التسيب الحصل في الاول دة..اتدخلوا الخواجات وجونا بالبانكيك بتاعتهم الممصمصة دي

البان قراصة جاياهم..بس كيف نحنا نتفق
باقي ليك روابط العواسات ديل بيتفقوا؟؟

غايتو لينا أجر المحاولة
وارقد بالف عافية

Quote: البعرفو العكس قراصة الدناقلة 1بوصة والشوايقة 1 سم

علي عثمان
وانت طيب ..وانا كويسة
الا ضهبة القراصة مزعلاني لليلة

بخصوص مقاييس القراريص بت القبايل...باتفق معاك

الا قولوا لي..انتوا بتاكلوا القراريص دي ولا بتقيسوها
انا غايتوا النوع البينسف بس..بوصة قدم.. ياردة.. ما فارقة معاي

كلو قراصة في قراصة

so cool

D

ندوية...ليك وحشة
عندي ليك بانكيك امريكي من بنات قوتة

اتفقنا؟؟؟

Quote: في شنو..وين الاساسيات..مافي بيض ولبن

حنينة الخواجية
والله الاساسيات عندكم لكن
يا حليل البوش

Quote: يا حليل البوش

هلولة
يا حليلو ساكت
خليها عندك بس

اما عن قراصتك ..فلازم أشيل حسك هنا دة

واللي يحصل يحصل

قلتي شنو؟؟

الحنونة حنونة..
عاد انا قراصة ما بي دمعة مسبكة ما بتملى عيني إلا كان بالخدرة المفروكة..
من كم اسبوع كده مشيت اعمل شغل مع شخص في منزله، وكانت الساعة 2 ظهر، وأثناء عمل الانترفيو، كانت الريحات الخطيرات بتاعت المطبخ قادة دماغي..
وبعد ما انتهيت من الشغل، وجدت المفاجأة ان زوجة المسئول كانت تعد لي وليمة مدنكلة من القراصة و: دمعة مسبكة وخدرة مفروكة....
ريقي جرا هسع..
المهم بعد ما ضربت القراريص الاترصت قدامنا.. وحبست بي شاي مدنكل كده رجعت المكتب..
لما مشيت البيت بالليل حكيت لأمي وقلت ليها بكرة لازم تعمل لينا قراصة بالدمعة.. وقد كان.. امي قعدت اسبوع تعمل في القراصة بي الدمعة.. واحيانا تخرم للسمن والسكر او السمن والعسل..
هسع الليلة خلاص طريتني القراصة.. فمرحبا بأسبوع القراصة الخطير..
كل عيد حب وأنت بحب وفي حب..

الحبيبة رجوية
آآآآخ..قراصة بالدمعة..متعتي الحقيقية

واخواتها من ذوات الخدرة..والتحلية بالسمن والسكر أو العسل
فخليها سااااي بس

والله أحيي والدتكم اكريمة لاسبوع القراصة
وكان جاني الدرب بعندكم
وصيتي من هسع لوالدتكم يديها العافية..القراريص ثم القراريص

تسلمي

حنينه الحنينه كل عيد حب وانت طيبه



فى موجه العولمه دي نحن القراصه فى بيتنا بتتاكل بى الشوكه والسكين


دي ما انا ولا امى يا ربى منو البياكلها بى الشوكه والسكين

غايتو يا راوية ويا حنينة..
القراصة والعصيدة والكسرة ديل انا بريدهم شديييد لكن ألغوس وألحوس بأيدي "ده اللي مش ممكن" ..
حنونة.. عندي صاحبتي امها خواجية.. حبوبتها الخواجية جابتها سألتها لما مشوا ليها اجازة: صحيح في السودان بتاكلو كلكم وبأيديكم من صحن واحد..؟
ولما كانت الاجابة معروفة لينا طبعا.. الخواجية اغمى عليها ..

Quote: ريقي جرا هسع..

Quote: القراصة والعصيدة والكسرة ديل انا بريدهم شديييد لكن ألغوس وألحوس بأيدي "ده اللي مش ممكن"

ويقولوا الصحفيين في العالم التالت ما بيغطوا مناطق الشدة(حروب مجاعات)
أسه يا رجاء لو ودوكي تغطي الحرب في دارفور والله إلا تشيلي معاكي دربات
جلكوز

وغايتو كان إتزوجتي ليكي شايقي ولا ضنقلاوي
برجعوك لي أمك في تلاتة أيام

خالد..
قايلني ما مشيت مناطق شدة..؟ أسكت ساااكت بس..
غايتو صناديق البسكويت المحشي بالكريمة والشوكولاته بتخاتفها مع الأطفال القايليني جبتها ليهم هدية ..
وما تنسى المربى والطحنية والتانج.. عندي شنطة مخصوص للمعونة..

Quote: وغايتو كان إتزوجتي ليكي شايقي ولا ضنقلاوي برجعوك لي أمك في تلاتة أيام..

بكرة تشوف كما خليتهم ياكلو الباتون ساليه والسيمون فيميه ..

Quote: بكرة تشوف كما خليتهم ياكلو الباتون ساليه والسيمون فليه

أها جابت ليها شتيمة..

لووووول يا خالد..
دي عينة بس ..

راوية الحبيبة

كل الاماني..كيف فالنتاينكم كان
قلتي لي قراصة بالشوكة والسكين

...يا عيب الشوم

يا ربي منو؟؟
غايتو ما أنا

Quote: بتاكلو كلكم وبأيديكم من صحن واحد..؟ ولما كانت الاجابة معروفة لينا طبعا.. الخواجية اغمى عليها

يا رجاء يا أختي
دي خواجية فالصو سااااي

الخواجيات بنات القبايل بيغمسوا ايدهم لضراعهم في الملاحات

قلتي لي قراصة بالشوكة و السكين؟؟!!

محن والله

ذكريني أحكي ليك قراريص لا انساها

حنينة كل سنة وأنتي طيبة وكل سنة كل أيام حب وأعياد وكل سنة وجباتنا ووجباتك كلها قراريص وعصيدة وكسرة وفطيرة
والله بوستك جرا ريقي ومشتهي لي لي قراصة بي دمعة مسبكة على إشتهاء راوية او بي اي ملاح مفروك أبيضا كان أو أحمرا او حتى أخضرا وريق خضرة مفروكة
وبمناسبة عولمة القراصة هي معلومة من بدري خالص وذكرها اليعقوبي في كتابه الشهير
وحتى قراصة المكادة (عيش الريف أو الذرة الشامية) وبي رطانتنا(جقرنكابد) قريبة من (البان كيك) مش كدا يا جماعة وهذه الأخيرة تأكل باللبن الحليب او الرايب او مع العسل و:لة شعبية معروفة ومشهورة جدا في أمريكا وما بيتعزم بيها إلا شخص عزيز جدا
ونخليكم في أمانيكم وحقيقة بوستك زكرنا بي يما وحبوبة وريحة الريف السوداني المميز في أوقات الوجبات حيث تنبعث من كل بيت قصدي من كل صاج أبخرة العواسة والقراصة

حبيب بلدو

Quote: وحتى قراصة المكادة (عيش الريف أو الذرة الشامية) وبي رطانتنا(جقرنكابد) قريبة من (البان كيك) ..وهذه الأخيرة تأكل باللبن الحليب او الرايب او مع العسل

والله انا ريقي جاري اكتر منك.. وكمان جابت ليها قراصة بالرطانة؟؟

أما ذكرك للعواسة والدوكة..فو الله دي جرت دموعي

قاتل الله الغربة..حرمتنا الكتير ولو ما عولمة القراصة ما كان صبرنا

بالله جيب لي وصفات عمل كل القراصات القلتها دي..انا جادة في الموضوع

يديك العافية

يحكى صديق لنا ان قريبهم العايش فى بلاد الخواجات رجع السودان بعد غيبة خمسة وعشرين سنة
الجماعة قاعدين الصباح فى صينية الفطور وملمومين احتفاءا" بعودة الغايب
واحد من وليدات اخته وزيادة فى اكرامه رفع قطعة جبنة من الصحن وختاها للضيف قدامو
فما كان من الضيف الا ان قال ليهو الرفعتها بيدك دى الا تاكلها انت

اها يا رجوية غايتو انا القراصة والكسرة ما بجامل فيهن
وكان جيتينى باشيل بيدى واخت ليك
وياكى القايلة لى الشلتيها بيدك دى الا تاكليها انتى

قلتى لى قراصة بالشوكة والسكين
والبوش كيف يا ربى

هلولة الحبيبة..
ازيك وكل عيد حب وانتي بخير..
اما فيما يتعلق بـ "البوش" - فتة الفول - على ما اعتقد.. فأكيد المعلقة حتكون سيدة الموقف ..
المحيرني يا هالة ما الأكل بي الأيد.. المحيرني لحسها بعد داك..
واااااااااااااااا

هلولة و رجاء

Quote: والبوش كيف يا ربى

انتوا في البوش والا القونقليز بالشطة

رجاء
خلي هالة تجكي ليك فنون وأدبيات اكل القونقليز بالشطة

هاانيينا (بالخواجاتى)
لا دى حاجة ما بتتفوت
اتفقنا و نص
و حمدالله على السلامة
راوية يعنى فى داعى للفضايح؟
ندى

حنينة يا حنينة {التانية بكسر الحاء و فتح النون} راسك سخن؟

Quote: عمل قراريص او قراصة كبييييرة والتهامها مع الاصحاب و الاهل قبل الصيام بيوم

دة نظام خم رماد خواجاتي؟
لما أطلب قراصة و أم بشير تعنقد ما بتقول لي لا, لكن بتقول لي الجو بارد و العجين ما ح يفور! يعني يا حنينة أنا لو إشتهيت القراصة أشوف النشرة الجوية بالأول و لا كيف؟

الطيب بشير

Quote: دة نظام خم رماد خواجاتي؟

والله ..ياهو زاتووو..بس بالانجليزى

اما بخصوص ام بشير
فباين عليها ماكلاك حنك ساكت
والله لو الجليد باني جوة بيتكم ..تدخل العجين الفرن..يخمر زي العجب

تحياتي لام بشير البتعرف تزوغ من شغل المطبخ كويييييس

حنينة انشاء الله يكون عندكم (حريف) مفضل - حريف بكسر الحا
وبرضو انا من انصار الدمعة المسبكة المرشوشة بفوق
وتغيظنى خالص حركة ناس البنادر البيكبو الملاح المفروك برضو بفوق
ونفسى اعرف سر انو الدمع من دون ملاحات الله هى البتبقى بفوق
وعاجبنى حكايةالفالانتاين المقترن بيوم القراصة
ومضحكانى حكاية الشوكة والسكين فى القراصة
يابنوت هووووى وياناس رجوية هوى
ما تهجمن لينا القراصة دى وتخلعوها علينا باقى هى ياها الوحيدة البترقد قلبنا وتخت الرحمن فرقات ضلوعنا
وللمعلومية لو عايزين تحلو فى قراصة متمرة (مخمرة) تحت الطلب
وكدى اتمعنو المخبازة دى

Quote: انشاء الله يكون عندكم (حريف) مفضل - حريف بكسر الحا

الملكي
فسري وإعربي ما تحته خط..غلبتني تب

امانة في ذمتك يا الملكيِ..لما أجي السودان تعملي لي القراصة المتمرة دي..إتفقنا؟؟ ولا ترسليها بالدي اتش إل..قلتي شنو؟؟

اما شوك ناس رجاء دي..فدي تنفع مع بانكيك الخواجات
اما قراصتنا..فلع و ألف لع

مدخل:
صبية ساسق بي كراسة.
وبي قراصة ولي قراصة..
الاخت حنينة:
والله دخلت البوست دا قلت القي لي قراصة مسخنة لقيت الموضوع صيام وعيد قيامة وفالنتاين وخم رماد..
الموضوع ظريف جدا وفي انتظار القراصة...

ايهاب الطيب
الف سلام
والله الموضوع هو بتاع كلو
لكن الالهام...واخد بالك.... جاء من الpancake day
المرتبط بعيد القيامة

أما عن القراصة

معقولة مع كل القراريص القالوها دي..ما لقيت ليك واحدة مسخنة؟؟؟
يازول دي قراريص بكل اللهجات..شايقي دنقلاوي
تحلية ومالح ...وغيره وغيره

لكن لو برضو ما نفعت..أعزمك أنجيرا...إيه رأيك؟؟ وأسال خالد الحاج عنها

في الانتظار

بقرأ في التعليقات يا حنينة و مبتسمة و مستمتعة بلمة القراصة المزبطة دي، ما تدونا معاكم قرمة ياخ؟

ندي أمين
قرمة بس؟...نديك القراصة كلها

والا أقول ليك حاجة أحسن

أيه رأيك نتلم كلنا عند بنات قوتة
ونعمل يوم قراصة خاص؟؟

أنا جادة والله..رغم ما كلمت الشباب ديل

وهالة بتسوي قراصة..حاحكي ليكم عنها هنا دة

بنتقابل

ويا ناس راوية ورجاء
نشوفكم بهناك

لو شفتى ياحنينه البوست دا مهم كيف و انت فى رجيم اتكنس

راوية العزيزة

سلامات..
الوداك عند ناس آتكنس شنو؟؟

اعملي حسابك وما تستمري فيهو اكتر من شهر شهرين...الفاتس بتعمل ارتفاع في الكوليستيرول...بيقولوا

والنتائج مقارنة بالدايتس التانية بعد شهر واحد هي نفسها

فبالله ما تحرمي نفسك من القراريص..الدايت يطير و يقع في البير

قال آتكنس قال
it is not for me....FOR SURE

عارفه خطورتو لكن نتايجه مذهله صراحه وكمان مافيهو جوع البته
بس حكايه القراريص والفاكهه هى القاطعه بي
وانت قايله زولتك حقت رجيم طويل الامد هى بس كلها تلاته اسابيع مااكتر



وعموما عامله معاهو برنامج رياضه مكثفه (سباحه)لمضاعفه النتائج وربك يسهل