الشافع نجيض ولسانه فلقة

هذه القصيدة قالها الشاعر حين قالها وهو ابن ثمانية اعوام من اجمل قصائد الحقيبة .. غنتها عقد الجلاد
اذا حين نري ابنائنا الذين يكتبون الشعر في هذا المنبر لا يجب ان ندهش وهم بضعف عمر شاعرنا الكبير ود الرضي حين قال هذا
معظم شعرائنا الكبار في السودان كانوا صغارا وهم يكتبون الشعر
التجاني يوسف بشير مات وهو ابن العشرينيات ومحمد محمد علي ايضا
لذا اعتقد ان الابداع في اطفالنا وشبابنا ليس جديدا وانما هو ديدن منذ قديم تعجبني هذه القصيدة كثيرا جدا لما فيها من معاني جميلة وكلمات سودانية اصيلة
اضغط للاستماع علي (بلي )

بسم الله ابتديت متل البرق لاحت

فى الشين والفسل بقينا نتباحت

طال الكان قصير والعالى اتاحت

والصولات حليلن ملكتن راحت

مالك يا زمان شبعتنا هولا

لبست الناس تيابا حاشا مى هولا

يات من كان يجي دماعو مبهوله

ولله راحت بقت البواجهولا

مالك يا زمان شبعتنا وح ووحيح

صح الدون كضب

كضب العوالى صحيح

يات من كان انا جعلتو لى صليح

عقرب حزّه لى ويا نفسي زين ومليح

فى احوال الزمن صار الفكر حاير

والياباك خلو عندو شن داير

فوق اهل الفكر كاس الوحيح داير

نفد سوق النفاق سوق السمح باير

تب الشباب ان بقا كواس

تب الصبى ان قطع المروة خلاص

تب الشايب ان بقى وسواس

تب الاقربين الاتفاتتو الامغاص

الاخ الحاج اساسى (وان كان المفروض نقواهت ليك بالاسم الحقيقى)
انتهز هذه الفرصة واقول ليك
حجامبرورا وكل سنة وانت طيب
تحياتى
بكرى

وانت طيب اخ بكري وربنا يتقبل مننا ومنكم صالح الاعمال
وكل السودان طيب وفي سلام

حاج اساسي
حج مبرور وذنب مغفور باذن الله

انا برضو بتعجبنى القصيدة دى شديد ... امس كنت بسمع فيها فى لقاء عقد الجلاد واندهشت لما قيل انه كتبها شاعرها وهو ابن 8 سنوات
وفعلا الفصاحة والابداع هو ديدن السودانين ومنذ وقت مبكر جدا
شكرا ليك

الاخت ملكة سبأ
كل عام وانت بخير وربنا يسلمك ان شاء الله

فكرة هذا البوست اتتني حينما كنت اشاهد نفس اللقاء
بحثت عن الشاعر ود الرضي وقرأت عنه كلاما جميلا
هذه القصيدة وايضا من الاسكلا وحلا وغيرها
كان مبدعا حقيقيا
ما جعلني اهتم بهذه الشاعر اني احببت هذه القصيدة
قبل ان اعرف ان شاعرها ود الرضي وبعدها عرفت فقرات له وتابعت
قصائده في الحقيبة وحين لقاء الامس لما قيل انه كتبها وهو ابن الثمانية طربت اكثر لها غير ان حماميزو براي جدا بالرغم من اني كنت احبه ولكن امس خزلني حين اثبت حديث الناس في انه يحب الكلام وفقط فاتي بصديقيه وصار يسالهم ويجاوب هو فشوه الحوار

أساسي...
حجيت...................؟؟؟؟؟!؟!؟!؟!؟!؟ و انا أقول طشيت وين؟؟!؟!

حجا مبرورا و ذنبا مغفورا..

و الله حماميزو ده مش براي....ده نحات!!

نحات دي جديده طبعا...بس أوعى زول يقول جيبو لينا حماميزو هنا...و الله الباندويدث يروح في داهية...و بكري يفرتقا لينا..

العزيز مانديلا
كل سنة وانت طيب وان شاء الله السنة الجاية في عرفة
طبعا انا القال للجماعة ديل مشيت الحج منو ما عارف
لانه بصراحة مباركة الحج بتدخل في موضوع رياء وشوفوني ويمة خنقتني الداردمة ويابة جرحتني الفلسكابة
حماميزو جعل اعجابي به ينهار يومئذ حين ما اتي باثنين من فرده
وجعل يتغالط معاهم ودخل مع احدهم في محاولات افحام للاخر وفشل الحوار
بالرغم من استضافته لفرقة عقد الجلاد والتي اي واحد من افرادها كان جدير بان يكون الضيف واي واحد منهم يملك اماكنية التقديم الجيد
ولكن الرجل جعل يظهر ( فردنته )لهم ومعرفته بهم معرفة شخصية مما يجعلك تحس بان اللقاء كان عبارة عن رهان بين حماميزو وصديقه وفردته الاخر (ود الراحات ) النديان ليظهر كل واحد فيهم براعته في اظهار انه مثقفاتي من طراز فريد ومنظر لا تشق له كتاحة علي ان عقد الجلاد هم من صبرنا علي اللقاء بادائهم الجميل واغنيتهم الجديدة للشاعر سعد الدين ابراهيم والتي احد ابياتها توقيعي الذي التقط منهم

ياحاج اساسى الرومانسى حجا مبرورا وذنبا مغفورا باذن الله
تقبل منكم ووعدنا وأياكم فى العام القادم

والله عجبتنى الصاق صفة ياحاج دى عليك
وبعد كده كان سخنت مع أى واحد حا يقول ياحاج هدى اللعب وخلى باصاتك ارضية
وفى واحدين حا يقولوا الحاج كبر بشويش عليه
وناس حبايبنا الفرصة جاتهم لعندهم عشان يتفسحوا فيك ويقولوا الحاج معذور

أخى الحبيب تقبل الله طاعتك وعبادتك وكل عام وانت بخير وربنا يتمم المشروع الوجدانى يارب

حقيقة كانت من الخيارات الموفقة جدا هذه القصيدة لما فيها من معانى معاصرة لهذا الزمان

لك الحب عمنا حاج أساسى

كل سنه وانت طيب حبيبنا أساسي
لا أقول كمايقول الآخرون
السنة الجاية انت ...
بل الأسابيع الجاية معها مفاجأءت حلوة
عزيزي نسأل الله أن يتحقق الهم المشترك
ويوعدني بزيارة لجدة قريباً
لنلتقي بالحبايب

العزيز ايمو
كل عام وانت بالف خير وربنا يحقق الاحلام
وان شاء الله يتم الفي مرادي ومرادك مقبل الايام وليس الشهور
ونترع شرفنا بزيارتك لنا حبيبا وغالي ونتمني ان نجتمع قريبا
واترك الكسل وهيا زورنا في جدة

العزيز عزيز يا عزيزنا
كل سنة وانت طيب وربنا يتقبل من الجميع
ونتمني من المولي ان نراك بيننا زائرا وحاجا ومعتمرا
وقلوبنا تظل مشرعة لاستقبالك الي حين زيارتك
وتحياتي للاسرة الكريمة وكل سنة وهم بالف خير
وربنا يوعدنا ونتقابل جميعا في ارض النيلين

اساسى
تعرف انا بوستاتك دى بقيت ادخلها براحة عشان ما يجينى عكاز طاير ومن قبيل اعاين فى البوست دا وازوق منو . لما هسى ختيت الرحمن فى قلبى وقلت ادخل احجز . القاك خاتى الغنية العجيبة دى
بالله يا مرض انت دا عنوان تخطوا للبوست دا . يعنى روح الشكل جواك
حتى مع الغنا اللذيذ دا . والكلام المكتوب من موية الدهب دا

على كل تشكر يا حاج . وانشا الله تسبعها وتبطل شكل يا غياااااااااظ

امشى ياخى والله مرض بشكل


من غير لووول طبعا

ود العجمي يا غتيت
طبعا يا ود العجمي مناي في الدنيا قبل الرحيل اري شخصك لكن (اظن) مستحيل
جيت السودان وجلست اربعونا عشمي ان القاك حين لقاء بورداب الخرطوم (الناشف) سوي من لين ورطابة قلب اعضائها كنت اود ان اري من قالوا ان ود العجمي اساسي هاهاهههها وانت تطول حينما كان اساسي جميل وظلم هذه الشهادة التي كلما (قرفت )من البورد وسنينه واعضائه وسيده زاتو ذهبت وقرات البوست فينزل علي بردا وسلاما ان احدهم يراني جميلا ولكن .. لم يكن لك في الطيب نصيب
وبالرغم من انه ليس لديك اي زوق فني الا انك تنزل اجمل الاغاني في هذا المنبر مما يجعل بوستك مقدما لدي حين الولوج لهذه الدار العامرة بي ...مما يجعلني اقول ان كل هذه البوستات محض صدفة
روح الشكل ليست جواي بل انا جواها فليست روح الشكل باقوي عيننا مني لتدخل جواي لذا دخلت جواها وكما يقولون افظع الشكلات لم تدور بعد وحتما يوما مدورها
ما يغيظني جدا انه كان اسمي يوما في هذا المنبر يوما ما رومانسي احيانا تتملكني روحه الشقية لتزوغ مثل هذا الغناء المكتوب بماء الورد فاغالبها بروح الشكل ولكني لا انجح احيانا وهذا يحدث هنا او كما اراه وتراه او تعتقده
سالتك بالله غياظ انا ولا انت الحنفولي الماوريتني الهنتر ؟؟
طبعا امشي يا مرض دي زي الماسمعتها لاني كان مشيت من هنا حادخل البوست الانت مساهر فيه وتلعن في البكور وحاهدي ليك فيه اغنية
بدري صحيت من نومي شلت فطوري وما اتاخرت
احسن حاجة تعملها في السودان انك تتعشي وتنوم بدري خاصة مع السلام الجاي دا لانه الخرطوم تاني حتقلب بالليل وتبقي زي سوق اخوان
وبرضو نقول مشيت لامي وابوي صبحت وجريت المدرسة ما اتاخرت وبين اخواتي كنت نجحت وبدري صحيت من نومي

ودالرضي ده زول غريب

يعني تمنيه او عشره سنين وقدر يحكي تجربه احباط بالنستولوجيا والحنين ده كلو,,يعني هو شاف شنو اليا حيليو ؟؟

مسأله مجافيه لمنطق الاشياء الجامد,,مسأله الانسان وعمق وقدرات العقل

واللغه والخلوه ياخ ده زول عجيب

وح وحيح

الاف التحايه ليك ولاماني الطيبه

الجريفاوي يا خفيف
هاهاهاههههها ما تسالني ليه لانه كان سالتني حاقول ليك رد الزيارة ما عندك وكدا
ود الرضي سالوه عن اغنية من الاسكلا وحلا فقالوا له انه كتبها للسواقين والكماسرة ووصلها حتي جوبا فقال لهم انا اوصلتها جوبا ان استطعتم ارجعوها ولم يفعل احد
مبدعينا مثله يولدون وعلي اياديهم يراع مداده من فيض ابداع وحكمة
ولنا فيهم اسوة حسنة في الابداع
وليتنا نتلمس خطاهم وترك التنظير ولعن الدهر والبكاء علي الاطلال او كما نفعل الان
اعتقد ان اجمل عيون الحقيبة قالها هو
اتابع مجادعتك مع تمبس واستمتع بكما
تعجبني لغتك وافكارك واحيانا ابتسامتك في الصورة ولست من اياهم
علي ان ابتسامتك تدل علي هدؤ البال والمزاج العالي وعدم الديون لانه اذا كان هناك من يريد من دينا لن تضحك هكذا شفت الحسادة وصلت وين

يا اساااسي ازيك وكل سنه وانت طيب وحجه مبروكه وربنا يقبل معاك توما من بوست الكتاكت فريق وراء نعلك طيب والغنيه جميله ومدهش يكون كاتبها ود تمانيه والله يا ربي نحنا وقت كنا تمانيه كنابنسوي شنو
لكن ده كوم وحماميزو نحاااات دي مبالغه..هو اصلا ما بديك فرصه تقول حاجه في الاصل هو بستعرض ثقافتو نوعو ده في اللقاءات ما بنفع المفروض يعل برامج تعليميه ولا حاجه اسا بلاي قوم لي نفسي الجاب سيرتو ده منو احييي ..مانديلا اقيف علي حيلك

الاخت توما من الفريق القدامي المليان وساكت
طبعا لمن لقيتك شاعرة وعندك كلام بتغني جاني احساس بالاحباط والفخر حتساليني ليه ؟؟ وحاقول ليك احباط بانه انا الشليق دا بتفاصح من الناس المبدعة وما عندي التكتح .. اما الفخر انه كنت بتحاور في البوست بتاع حلة ورا مع شاعرة رقيقة ومبدعة الند للند شفتي الثقة العمياء في النفس .. حقيقة اوحشتنا مثل تلك البوستات الدسمة والتي تجعلنا نتكلم براحتنا ناسفين كل حصون القيود الابداعية والادبية والنثرية محلقين بافكارنا المجنونة دون الاهتمام باي قاري اصلو البلد دي حقت منو وايضا غيابك الذي طال منذ ان تم تغير صورتك بتلك الصورة الجماعية ولم نراك بعدها وكانك حردت امعانا في اغاظة اصحاب الصورة
حماميزو خزل رهاني عليه بانه متحدث لبق بذلك الحوار الفضيحة مما جعل يقيني بالمبدعين السودانين والمنظرين ينسف
قال لي احدهم انه كان يدرس في جامعة الاسكندرية كلية الطب كان مهوس بالمايك حينها ما قام احتفال الا وكان المايك علي يده كالطفل في مهد امه (يحب البرطقة والهطرقة )زي عيونه الهم شنف اذانا بغير حديثه واجعل مزيعينا لا يتبعون خطاه لان الفضائية هي الخيط الوحيد بيننا والوطن
ولك التحية ولكل من باع القضية

العزيز اساسي
كل عام وانت بالف الف خير وصحة وعافية
وحقق الله امنياتك ووهبك كل السعادة
مع كل الود

العزيز وغالي اسعد
كل سنة وانت طيب وبالف خير وربنا يجعل ايامك كلها فرحا
واتمني من المولي ان يزيدك من فيض حكمته يا حكيم المنبر

الاخ اساسي
كل سنة وانت طيب
وربنا يتقبل الحجة
شكرا علي رعة الاختيار


عبدالله جعفر

اساسى

من الحج تاااااخ على الغنا

ما سبقك عليها زول طبعا

كل سنة وانت طيب

ربنا يديك الفى مرادك

مبروك الحج

لانك كده اتورطت لانه فطيت واحدة فى الصف

وبعد الحج ما فضل الا حاجة وااااااحدة

تسلم

الاستاذ العزيز عبد الله جعفر
لو كنت اعرف ان مثل هذا الاختيار سيعود علي في النهاية برؤية الاستاذ عبد الله جعفر في هذا البوست لاخترته من زمن طويل
مما يذيد يقيني اني وفقت هذه المرة في اختيار الاغنية والشاعر
هو دخولك المشرف لهذا البوست فانت مع قلائل في هذا المنبر
تمثلون عندي اصحاب الكلمة والابداع الحقيقي
ونتمني الا ينقطع التواصل

العزيزة دريم
كل سنة وانت طيبة وان شاء الله كل ايامك افراح وسعادة
بمثل هذا التسلسل الذي سقتيه في ترتيب الحاجات
يفترض بي ان اكون مقبورا عدة مرات
فالحج هو احسن خاتمة لعمر الانسان هاهاهاهههها game over
اما الحاجة الفطيتها فاعتقد انها فطتني منذ زمن
لذا اصبحت اتعمد اغاظة الزواج مثل ما يغيظني بتجاهله
احيانا وفطه احيانا لووول
ل سنة وانت طيبة وكل الحلوين بورداب الخرطوم

حاج اساسي
قصة القصيدة دي إنه كان شغال مع مجموعة فيهم الأكبر منو وكانو بيشيلو قدح المونة ناقص وهو بيملاهو فشافتو عمته فنهرته وقالت ليه اعمل زي الباقيين مابيعملو فأتت هذه القصيدة الرائعة

الاخ عادل عثمان
كل سنة وانت طيب
تعرف باضافتك لقصة هذه القصيدة جعلت المعني مكتمل في نظري
انظر اليه بمقياس اليوم هو (طفل وعامل يومية ) ويقوول مثل هذا الكلام وليس انقاصا من وزن عمال اليومية ولكن التعب والجهد الذي يجدوه يجعلهم يبحثون عن الراحة بكافة اشكالها وهو لا يرضي ان يطفف في ميزان عمله فيقول لنا دررا انظروا كم من اخلاقنا الجميلة نثرها ابن الثمانية في هذا القصيدة الجميلة وفعلا الاهلية كملت يا حبيب راحت ولكم جميعا الود

مرخب تاني
لم يكن ود الرضي في تلك اللحظات عامل يومية بل كان يساعد في بناء بالمسيد بقريتهم أم ضوا بان بشرق النيل .

اذا انا الذي طلعت (طُلبة)

اساسى ... سلامات


اول مره اشوف لى حاج صلعتو لسه ماقامت ينقذ فى نص الحفله

الاغنيه جميله لاشك .. وعقد الجمال اجلد لا شك

لكن حماميزووو .... اه ثم اه من حماميزو

والله انا مافضل لى الا اقوم واعضيهو فى نص راسو

يا خى ده بوظ جمال اللقاء كلو

والمصيبه انو بيسال الواحد وقبل مايجاوب بتلقاهو جاوب براهو

بيزكرنى باسكتش حق ناس الاصدقاء اعتقد بيجيبو فيهو مزيع

عامل لقاء من واحد والراجل لمن البرنامج انتهى ماقال بقم

لانو المزيع كان حماميزو بيسال ويجاوب براهو

والله حمزه ده كان بيعرف يغنى كان خته ليك ناس عقد الجلاد ديل ديكور بس ..

ده كلو كوم ... وقناة سعد الدين ديك كوم براها



ديكو

العزيز ديكو
تعرف حماميزو ايام الهجمة العليهو في الجرايد ديك انا كنت واقف في صفه وشايف انه السودانين ديل ما بيعجبهم العجب ولا الصيام في رجب
لكن بعد حضرت حلقة عقد الجلاد معاهو
عرفت انه السودانين ديل ما بيجتمعوا علي زول الا في حق
وانه مناصرتي ليهو ديك كان خطا تاريخي مني
لانه حماميزو ضباح كتال هدام
مفروض يسموهو هادم اللذات
لانه يعرف من يستضيف وكيف يحطم ويهدم مستضافيه
تقريبا انا كان لاقيته بعد اللقاء داك مباشرة
كان الرجل صاحب عاهة مستديمة الان
وتسلم يا صديقي

اساسي حجامبرورا و سعيا مشكورا وان شاء الله ربنا يقبل وما تكون نسيت تدعي لينا
تصدق في نفس اللقاء استوقفني توقيعك حتى في الاعاده و تخيلته كتوقيع سبحان الله
وكل سنه وانت طيب

العزيز هوبا
منا ومنكم صالح الاعمال
حقيقة الان انا ابحث عن النص كاملا اذا كان بطرفك ارجو ان تتحفنا به
وانا سابحث عنه وان وفقت سارسله ايضا
حقيقة فكرة التوارد تدل علي ان النص جميل
ليفكرا فيه شخصان في نفس الوقت
لن اتنازل لك عنه طبعا شفت اللائامة
بس شوف ليك بيت تاني من القصيدة وامهر بيهو توقيعك
بس نلم في النص

قناة سعد الدين...
لاااااا حولة...انا مرات بجيني احساس انو القناه دي حقتو و ملكه ...عشان كده يعمل حوار و يقوم جاري يغير القميص و يذيع النشرة و يركب عربية سرعة سرعة يمشي يذيع تكريم...معقولة لكن...

و الله و الله لو ما الشيطان الراكب موتر القاعد جنبة داك ( ابو توب ليموني و أول حرفه نسرين) كان فلقت التلفزبون ده باقرب حاجة..

قناة سعد الدين الأزرق

النص موجود ... بس .. بدك تدفع بياض

اهل العوض كل سنه وانت طيب يا زول جيب النص والحساب عند اساسي

والله يا مانديلا قناة سعد الدين الازرق جد جد


تعرف قبل ايام كنت بشاهد فى مباراة الهلال والزمالك

فى دورة سعد الدين اقصد دورة وادى النيل

والمعلق بومدين اثناء المباراة قال

واشاهد الزميل سعد الدين الذى حضر "" خصيصا " لمتابعة المباراة

والله الضحك كتلنى ... حتى فى الاستاد لاحق المايكرفون ده

قال خصيصا قال .. ده سعد الدين ولا سجائر بينسون ؟



ديكو