علاقتك بالعالم هي علاقتك بنفسك ....... شكرا العزيزة تماضر

Quote: انا بهمنى فى الموضوع ده..احباطك ده.. ما تخلى اى فشل يقلل من قيمتك واحترامك لنفسك..خالص.. احباط دى ..كلمه بنقولها فى البدايه لكن بتعيشها..فى النهايه.. ما تعيشى معنى الاحباط.. ختى الايمانات قدامك وامشى.. بتهمنى روحك تستمر معطاءه وجميله.. انا لو منك امشى لغاية البرلمان..ولا القصر الملكى عشان انتزع حقى ..وحق سنوات تعبى وعلمى وجهدى.. احكى ليك قصه.. الناس هنا بدت تفقد اعمالها بسبب الكساد.. فى دكتوره فى الراديو..بتقول كلام..مرات فارغ ومرات كويس.. كنت بسمع فيها.. انا برضو فقدت وظيفه كبيره..وحياتى فيها احباط.. بديت اسمع فى الدكتوره دى.. قالت علاقتك بالعالم هى علاقتك بى نفسك.. يعنى الناس بعاينوا ليك بالطريقه الانت دايرهم يعاينو ليك بيها..وهى نفسها البتشوف بيها نفسك.. ولما تقتنع بانه "حظك منيل" او انت تعيس..او محبط..هم بتعاملوا معاك كده.. يعنى زى ما تقولى: على قدر اقل العزم تؤتى العزائم.. وانا كنت فى الشهور الفاتت دى بسجل فشل ورا فشل..تجربه ورا التانية..وكل يوم..ببعد من نفسى بوصتين..لما مرات بحس انى غريبه على، حتى هنا فى البورد. المهم الكلام بتشاف بسيط وامكن ساذج..لكن لما تحاول تنفذو..بتلقاه شغال.. طردت الزول الفاشل ده من راسى..تماضر الاصليه جاتنا تانى..ام الناس الحلوين المحتاجين ليها تعرفى بعد اليقين ده.. انا لقيت شغل..بعد يومين.. قشرت..وختيت ابتسامه قدر الضربه فى وشى..وشلت ورقى..وغسلت عربيتى...وفوووو..على الدنيا..بروح عاليه.. لقيت شغله..مؤقته للتجريب..وبعدها امكن..تكون دايمه.. لكن شغله على قدر احلامى..فى الشغل..وفى الكساد ده..تعتبر رئيس جمهوريه.. فهمتينى؟؟ يا انسانه؟؟ انا بتكلم عنك انت ما عن المشكله الكبيره..لان المشاكل الكبيره ذاتها بتتحل لما نتصالح مع نفسنا.. ان شا الله ما اكون كتلتك بالوعظ...او سربت ليك الملل.. موفقه..يا زينة بنات الحى..

الموضوع اعلاه مداخلة كتبتها العزيزة تماضر شيخ الدين في مداخلة للاخت انسانة في بوست بعنوان " حاجة تغيظ"
اعدت كتابتها هنا لسببين
الاول : حتي تعم الفائدة ويقراها هنا من لم يقرأها هناك

الثاني: لان الحديث القيم اعلاه من الاخت تماضر كان له اكبر الفضل علي حياتي وحياة واسرتي
بعد الله عز وجل
تعلمون جميعا ان للهجرة اثارها المدمرة علي شخصية المهاجر وخصوصا اذا كانت هذه الهجرة الي بلاد تختلف كليا عن ما الفناه من نمط للحياة في بلادنا الاصلية، لقد مررت بتجارب قاسية وعذاب نفسي حاد وانفعالات علي كل الاصعدة .
ما افادني في الكلام اعلاه هو انني منذ ا قرأته عملت به ونظرت لنفسي نظرة اخري ملؤها التفاؤل والثقة بالنفس ،وكم رايت نفسي جميلا وكم هي الدنيا جميلة ورائعة ، صدقوني لقد تغيرت حياتي هذا التغيير الذي لم يستطيع من مررت بهم من اخصائيين ان يمنحوني ايه ، منحتني له هذه الكلمات البسيطة المعبرة.
اختي المحترمة تماضر
لك لك الود مقرونا مع الشكر والتقدير عرفانا لما تغير بحياتي نتيجة لكلماتك المعبرة، ادامك الله لنا ذخرا ومتعك بالصحة والعافية مع ابناءك ورد الله غربتكم
مع كل الود للجميع

اسعد..



نحن نحتاج الى الكثير من الدعم الروحى والنفسى ..وكثير من الفرح..لنخرج من هذا الحزن اليومى..


اسعدنى انك سعيد..بالنتائج..وقدرت على اختراق الصعاب..

شكرا لاسناد ذلك لكلماتى..


ساستعين بنصائحك حين اضعف..

وما احوج "الاصدقاء" لسواعد بعضهم البعض..يرتكزون عليها

التحيه لك ولعائلتك..ولكم السعد والتماسك ..الدائمين

الأخ العزيز أسعد إبراهيم

كل عام وانت بخير ..
ربنا يجعل أيامك كلها سعادة ..
والمثل بيقول " رب أخ لك لم تلده أمك " ..
فما أحوجنا لبعضنا البعض ..

عزيزي المقدر معتصم
كل عام وانت تمتع بكل الصحة والعافية
اشكرك عزيزي علي كلماتك الصادقة التي تدل علي اريحيتك وطيب نفسك
لك كل الشكر والتقدير والود
ودمت

العزيزة تماضر

اسعدتني واطربتني للنخاع حزمة كلماتك الثانية مثلما كانت الاولي بلسما شافيا

Quote: نحن نحتاج الى الكثير من الدعم الروحى والنفسى ..وكثير من الفرح..لنخرج من هذا الحزن اليومى..

حقيقة ما أحوجنا الي اطنان من الدعم المعنوي والنفسي وحتي المادي لنتغلب علي اوجاع حياتنا

اليومية التي تمددت وتمدد معها احزاننا ........... وأوجاعنا


لك التحية والود

عزيزي أسعد

تحية طيبة

كلما فكرت في المداخلة اري انني مهما فعلت فلن آتي بجديد علي حديث الأستاذة تماضر ...
وليس لي سوي تعليق بسيط في ذات الاتجاه

قرأت ذات مرة:

أنت لا شي سوي ما تفعل

واعجبني كيف يمكننا اختزال العالم في كلمة

مع تحياتي
ولا للاحباط

جعفر بشير
شكرا لمحاربتك للاحباط
مع كل الود

..
.
بصراحة دا كلام بسيط وجميل
وفعلا بدي دفعة معنوية جامدة ..
شكرا ليك يا اسعد
وشكرا لتماضر
وكمان شكرا للدكتورة المرات كلامها فارغ ومرات مليان


كدا انا اخدت جرعتى ..
وسلام عليييييييكم ..

المستضعف تبلدينا
تحيات واشواق
وكل عام وانت بالف خير وعافية
مرورك من هنا شرفنا جدا
مع كل الود

العزيز أسعد..
أتابعك منذ أول كلمة كتبتها.. وأتابع أيضا سعيك للوصول لأفضل حالة ترضيك.. وأتابع اعتذارك في المواضع التي تظن انك أخطات فيها.. وهذا نادر عند البعض..
أتمنى ان يعم السلام نفسك هذه، ويملأ التفاؤل حياتك حتى تغالب الهجرة الخارجية..
وشكرا لتماضر التي وجدت في كلماتها تلك الراحة والاعجاب..

العزيزة رجاء
تعرفي والله موضوع الهجرة دة ما هو الا ورطة كبيرة اتورطنا فيها واصبح صعب جدا الاخروج منها
لو عاد بي الزمن للوراء لفضلت البقاء بالسودان تحت اي وضع ولكنها ارادة الله
شكري وامتناني لك لمرورك من هنا
ما زلت اتابع المباراة وان كنت زعلت لهدف الجزائر لكن فرحت لتعادل المغرب

العزيز اسعد
كيفك ...مشكور على رفع المعنويات
معى واحد من الشباب قاعد عاطل وكمان مريض عاوز يسافر السودان
لكن لاسباب ..تخص اخوته رفضو يسفروه لكنه فى السودان بارى ليه شللية مدمرة ليل نهار سكر وخرب كل اعمالهم ومشارعهم فى السودان فى الناهية جابو ليه اقامة ..والمسكين كل يوم داخل فى مرض وهم وقرف اكثر من سنتين...امس اختو معاى فى سيارتى وقلت ليه انا موديك
الى مكان مهم عشان نفرفش شوية...مشينا احدى المقاهى وشاهدنا مبارة تونس والسنقال ..وضرب ليه شيشة .وشربنابراد شاى
وبعد المبارة الشاب تكيف شديد وانبسط وقام قال لى ياحمد انت مفروض تقرا طب سايكولجى لانك فعلا انقذتنى اليوم من درجة ادنى من الصفر من تراكم الاحباط وانا الان انظر الى الدنيا بوجه جديد

احيانا انا امر بحالات احباط اقوم امشى فى الشارع واحدث نفسى..كتير
وكل من مر بى يحسبنى مجنون...
لكن فى علاج تانى اذا ارت ان تريح عقلا من المشاكل اقراء قران..حاول سمع شعر او غنى براك كدا فى الشارع يعنى اعمل شى بدون تفكير تلقى نفسك طلعت نفسك من الحالة الانت فيها

وشكرا على للاستاذة تماضر على كلماتها المعبرات..
وشكرا اسعد

العزيز اسعد
كيفك ...مشكور على رفع المعنويات
معى واحد من الشباب قاعد عاطل وكمان مريض عاوز يسافر السودان
لكن لاسباب ..تخص اخوته رفضو يسفروه لكنه فى السودان بارى ليه شللية مدمرة ليل نهار سكر وخرب كل اعمالهم ومشارعهم فى السودان فى الناهية جابو ليه اقامة ..والمسكين كل يوم داخل فى مرض وهم وقرف اكثر من سنتين...امس اختو معاى فى سيارتى وقلت ليه انا موديك
الى مكان مهم عشان نفرفش شوية...مشينا احدى المقاهى وشاهدنا مبارة تونس والسنقال ..وضرب ليه شيشة .وشربنابراد شاى
وبعد المبارة الشاب تكيف شديد وانبسط وقام قال لى ياحمد انت مفروض تقرا طب سايكولجى لانك فعلا انقذتنى اليوم من درجة ادنى من الصفر من تراكم الاحباط وانا الان انظر الى الدنيا بوجه جديد

احيانا انا امر بحالات احباط اقوم امشى فى الشارع واحدث نفسى..كتير
وكل من مر بى يحسبنى مجنون...
لكن فى علاج تانى اذا ارت ان تريح عقلا من المشاكل اقراء قران..حاول سمع شعر او غنى براك كدا فى الشارع يعنى اعمل شى بدون تفكير تلقى نفسك طلعت نفسك من الحالة الانت فيها

وشكرا على للاستاذة تماضر على كلماتها المعبرات..
وشكرا اسعد

الحبيب أحمد
اشكرك علي روحك الطيبة
ما احوجنا لبعضنا
وما احوجنا للمساندة والدعم علي كل الصعد
وما اضعفنا

لك حبي وشوقي
وادام الله المعروف والمودة بيننا

بوست جميل اخي اسعد واحييك عليه . تعرف اخوي اسعد انا محبط خالص خالص لان البورد حاله لا يسر وحقيقه حتي قرائته صعبه ومخيفه . خلق الله لا يدعون خلق الله التانيين وارجوا ان تقراء بوستي الجديد عن الشمال الذي ابكاني . انت عارف احيانا بشعر اني ما قادر اكتب …وبجب صادي يا احباب ..لا حول ولا قوه الا بالله ..
تماضر
ماذا اقول ..فقط واصلي فكم مؤلمه هذه الدنيا ..واصلي ارجوكي ..

الحبوب محب

لك حبي وشوقي

هذا حال الدنيا اخي الكريم يوجد بها من كل الاصناف

ابتسم وقول بسم الله وربنا يعدلا معاك

وما تحرمنا منك فانت شخص عزيز وتتمتع بشفافية عالية وصادق مع نفسك

ربنا يوفقك

اسعد
عندنا نحن السودانيين مقدره كبيره علي التناكف واثاره المشاكل لماذا ؟ معليش عارف انوا هذا ليس موضوع البوست ولكن والله برتاح افتح تساؤلاتي هنا في هذا المكان فهو يضم الاخيار ففي الخارج مناكفات ومناوشات وفي الحقيقه لن يظن احد انه هنا في مناوشه او مشكله فتقبل سؤالي .
اخوي اسعد
تعرف انا حاسي اني ارتكبت خطاء وعايز احدثك به
تعرف مفروض انا لا احدثك بان تكتب شئ في بوستي الجديد عن الشمال ففي هذا مجامله لي والله انا اسف شديد . انت عارف انوا مشكلتي يجيني زول ويقول لي انا بحب المجامله ونوا عندي شله ..ياخي انا شلتي أي انسان سوداني ولو علم القوم لتركوني لحالي . اسعد ما تتدوش راسك معاي اصلوا انا بتاع خارم بارم ولي قدام ياحبيب . وسلم علي الاهل وكل عام وانت بخير شوف عليك الله بسبب البورد الواحد نسي تحيه العيد فالعفوا والعافيه ..

الاخ محب

لم تبدأ علاقتنا الاخوية النبيلة بهذا البوست أو ذاك ، هي علاقة نبيلة ابتدأت منذ ان عرفتك

انسانا فاضلا متسامحا وما احوجنا الي امثالك لمعالجة جراح الماضي

واصدقك القول انني لا اجاملك اطلاقا وكنها الحقيقة المجردة

بالنسبة للسودانيين مشكلتنا اننا نتكلم ونتناقش وكل احقاد الماضي ماثلة امامنا

لذلك يتحول الحوار دوما الي مشكلة

ما احوجنا للمجئ بقلوب مفتوحة ورغبة جادة في اصلاح ما بيننا علي الاقل من اجل اطفالنا

اشكرك ودمت عزيزي