القرع لما استوى.. قال للخيار يا لوبيا ...!!!!

المجتمع السوداني سابقاً .. يرحمه الله ..
كان ثلاث طبقات ..
طبقة التجار وأصحاب المال ..
وطبقة الافندية .. وخريجي الجامعات والمدارس الوسطي ..
ناس شرطاً يكون لبيس ومن هيئة التدريس ..
والطبقة الكادحة .. او طبقة العامة ..
عند النظر الي هذا النسيج الفريد ..
نجد انه .. نسيج مترابط الي حد المتناقضات ..
الطبقة الكادحة .. أتت لنا بطبقة الافندية ..
والطبقة البرجوازية .. هي التي رعت الاثنين بكل حنان ..
فيما وفرت لها الطبقة الكادحة .. المكانة الاجتماعية .. والتعظيم ..
وهي قامت بدورها كاملاً .. نحو الطبقتين ..
المهم ..
كان الاحترام اساس التعامل ..
الكبير كبير .. والما عندو كبير يشتري ليهو كبير ..
واستمر التعايش السلمي ..
الي عصر النهضة ..
أها لمن الناس نهضوا ..
وقالوا يا كتوف .. خلاص اتلاحقتي ..
واصبح اغلب تجار السودان .. علي الحديدة ..
وانقلب الحال ..
وأتلم الافندية علي البروتاريا ..
غاب الاحترام ..
وبقينا بدون كبير ..
حتي في نطاق الاسرة ..
أصبح العم والخال .. مجرد قرابة ..
اذا ما كانت القرابة دي ذاتها .. مليئة بالمشاحنات ..
وانقسمنا الي طبقتين فقط ..
طبقة البراجوازية .. وديل أغلبهم حرامية ..
وطبقة قريعتي راحت وديل نفسهم يبقوا حرامية ..
الطبقة الاولي ..
بتعاين للطبقة التانية .. بكل حقارة وبتحمر ليها ..
ومادايرين زول معانا ..
وديل شنو الرجرجة ديل ..
والطبقة التانية ..
بتقول ليك .. شوف الحرامية اولاد الكلب ديل ..
سرقوا قوتنا .. وحرقوا دمنا .. ونشفوا ريقنا ..
وبقت الشغلانة ..
حقد في حقد ..
وانت اشتريت لي ولدك عربية ...
انا اشتريت لي بتي ركشة ..
وانتو جبتو دش ..
نحنا حنضفر الحوش .. !!!
وكان جبت لمرتك توب ..
انا مرتي مودرن .. وبتمشي موضة ..
لمن بقينا كلنا ماشين .. أم فكو .. !!!
وعقدة السودانين طبعا في القراية ..
الدكتور داير ولده يطلع دكتور ..
والعربجي .. متين الولد يدخل كلية الطب ..
ويرتاح من الشقا ..
والتاجر المابفك الخط .. داير الدكتور عشان يفك عقدته ..
والبلد كلها بقت كليات طب ..
حتي مدرستنا .. الكنا بنخاف ايام الخريف انها تقع ..
ويأجزوا .. لينا ..
قلبوها .. جامعة .. وقالوا بتخرج دكاترة ..
يا حليل زمان .. زمن لمن ينجح أحد ..
هسع بقا .. البجيب 91 % .. الا يخش الجيش ..
وياريته ينال الشهادة .. يمشي ويجي رجله مقطوعة ..
والحاجة التجنن ..
زمان كان في ... بنات شينات ..
وبنات مبهدلات ..
وبنات ما عندهم اتوكيت ..
تعال شوف هسع ..
البلد التقول دعكوها بليفة ..
جنس نظافة .. وروج .. وكريستيان ديور ..
تشوف الواحدة .. تقول بت النفيدي ..
تزرزرها .. بجاي بجاي .. تطلع بت ابكر حسب الرسول ..
وبيضااااااااااا .. ونضيفة ..
التقول واقعة من مجلة سيدتي ..
ها يا ابكر .. دا جبته من وين ..
ويا حليل ايام القمل ..
وحليلك يا ابكر ..
البعد عمرك دا .. بقيت بابا .. وبقيت دادي ..
الاولاد .. ناس الجنس الخشن ..
ومتين تكبر .. تكون دخري ..
بقوا يغسلوا السفنجات .. !!!
الواحد يومه كله في الحمام ..
يدعك في السفنجة ..
ويدعك رجليهو .. ويتمسح ..
ويسبسب .. ويجلط الشعر بالجلي ..
ويطلع يباري .. ضل الشجر ..
وجيب سفة .. يا فردة ..
البلومة ديك .. ما جات بي هنا ..
لانه بلومة الصباح .. طرشقت ..
النمشي نعمل لي فردتين بالركشة دي ..
داير لي فلنكوت ..
اصلو المسا عندي ... برومس .. !!!
والابو .. عبد الصبور ..
قربت تفك منه ..
الاولاد .. ضاعوا ..
والبنات بقوا استايل ..
ومصاريفهم .. تهد الحيل ..
ولازم الشباب يشيلوا معاه ..
ما الحياة تكافل ..
وأم العيال .. جاها الضغط ..
وعقبال السكري ... والمصران ..
وناس الكهربا .. قطعوا الموية .. !!!
وما في طريقة يبقا حرامي ..
نط الحيط دا .. كبر عليهو ..
ويسرح بعيد ..
يا حليل زمن ..
لمن نمشي لشيخي الكلس ..
يدينا التموين ..
ويتكفل بعرس الولد ..
وولدي الافندي .. يجي من مصر ..
يبني البيت ..
وأقعد في نص رجال الحلة ..
افرجهم .. علي الساعة الجابها لي الدكتور ..
وأتفلسف ..... !!!

طبقة البراجوازية .. وديل أغلبهم حرامية ..
وطبقة قريعتي راحت وديل نفسهم يبقوا حرامية

هذه مساهمة جيدة تحتاج الى نقاش حقيقى

هل من مزيد