Post: #1
Title: جهــولا ام سكاسـك... (الفلقصـة والقلقصـة)
Author: Osman Hamad
Date: 01-15-2004, 03:18 AM
Parent: #0
قررت جهولا ام سكاسك دخول محو الامُية...ليس من اجل محو امُيتها بل حتى تمارس هوايتها المفضلة (وهى الفلقصة والقلقصة) على نديداتها من حريم الحلة بانها متعلمة بتعرف تقراء وتكتب.
فى فصل محو الامُية دخلت المعلمة وعلقت صورة هاتف وبجواره الحرف (هـ) وقالت ليهن اليوم ح ندرس الحرف (هـ) هاتف.....(هـ) شنو؟؟ نطت جهولا ام سكاسك وقالت ليها (هـ) تلفون.
وبعد (اخنق وفطس )اكملت جهولا ام سكاسك محو الامُية بتقدر(مشى امرك ياقدر).
ومنذ ان تعلمت جهولا ام سكاسك رص الحروف ...(بقت تكوجن فى الحروف كوجن العدو)و بقت لحاج عوض راجلها فى رقبتو انو لازم كل يوم الصباح يشيل ورقة الطلبات من السوق معه....وطبعا ورقة الطلبات البتكتبها جهولا ام سكاسك(الله لا وراكم ليها)...يوم دخل حاج عوض وفى يدو كيس السمك الكتبته ليه جهولا ام سكاسك......اها ياحاج جبت الشئ الكتبته ليك...اى هداك ليهو كيس السمك....اووووب على سمك شنو يا الراجل...انا كتبت ليك مسك بدورو ابخر بيهو البيت تجيب لى سمك عشان ازفر بيهو البيت....على بالطلاق تانى ماتبرانى ورقة للسوق...لانى اديتها للجنى المعاى فى الدكان وقال لى بدورى سمك....انا معرسك لى 35 سنة مانى غلطت فى شئ بتدوريهو...دى كتابتك المعاروف ليها راس من قعر دى ....كل يوم نحنا بقينا فى جنس الغُلاط دا.
وبعد ما قرر الطبيب لعلوية بت حاجة اسيا الخروج من المستشفى قررت جهولا ام سكاسك زيارتها فى البيت(وطبعاً فرصة انو جهولا تقشر للجيران بانها خِرجت محو الامُية...وزولة متعلمة)....وقد لاحظت جهولا ام سكاسك ان الهم تمكن من حاجة اسيا لمرض بنتها....وقامت قدام الناس وعدلت توبها...وجدعت شِعراتها...وقالت لى حاجة اسيا(من اجل انها تخفف عليها)....ماتشيل هم ياحاجة اسيا....انتِ ما سمعت بالمثل اللِل الله تعالى بقول شنو...إن ترككم عسى لكم خيراًً لكم.....وطبعاً جهولا ام سكاسك تقصد قول الله تعالى(عسى ان تكرهو شئ فهو خيرٌ لكم).
|
Post: #2
Title: Re: جهــولا ام سكاسـك... (الفلقصـة والقلقصـة)
Author: Osman Hamad
Date: 01-15-2004, 12:44 PM
Parent: #1
*
|
Post: #3
Title: Re: جهــولا ام سكاسـك... (الفلقصـة والقلقصـة)
Author: haneena
Date: 01-15-2004, 03:52 PM
Parent: #2
عثمان حمد
شكرآ لعودة مسلسل جهولة
لكن يا أخوي
الجهولات/الجهاليل
امات /ابات سكاسك
ماليييين الدنيا
كان باريتهم الا تخلي شغلتك في الدنيا دي
الله معاك
|
Post: #4
Title: Re: جهــولا ام سكاسـك... (الفلقصـة والقلقصـة)
Author: bayan
Date: 01-15-2004, 05:15 PM
لووووووووووووووووووووووووووووول
تانى جيت نحنا المرة الفاتت ما شاكلناك مرقنك كرعينك
الجهولات كتار لكن خلن السكسك اسع بقن يستخدمن الجوالات
اسمع
عشان يطلق على الواحدة جهولة
لازم يكون عمرها كم يعنى سقفها العمرى كم
30 ولا اكبر
40 ولا اكبر و 50 ولا اكبر
بعدين بتكون عاملة نفسها عمرها كم 12 ولا 18 و19
دى كلها اسئلة عشان يكون طرحك مركز وممنهج لدراسة سوسيونفسية(ماخد بالك من السقافة دى)
لظاهرة ما يطلق عليهن المجتمع جهولة ام سكاسك
لانى ارى يا صديقى انك قد غيرت مجرها ومعناها
لانه جهولة هى المرأة العجوز المتصابية
وانت حورتها بانها المرأة الجاهلة العاملة مسقفاتية
يعنى برضو لازم تحدد معنى المصطلح وحدوده
عشان نفهم قصدك وما تكون فى ضبابية ابستمولوجية(تانى ماخد بالك؟!)
يلا بالله قصص تانى عنها
|
Post: #6
Title: Re: جهــولا ام سكاسـك... (الفلقصـة والقلقصـة)
Author: Osman Hamad
Date: 01-17-2004, 04:44 PM
Parent: #4
بيان ست الحريم(شفتى البكش دا)
لكن لقيتك بتكتبى كلنات كبار كبار (مفلفساتية كبيرة)
المرة الجاية ح اكتب جهولا ام موبايل
جهولا لم اتعمد تحويل شخصيتها...ولكن هى عشان مسكسكة بتلتق فى اى مكان
بعدين المرة الفاتت مانى جريت منكن...بس اديتها جكة خفيفة كدا
|
Post: #7
Title: Re: جهــولا ام سكاسـك... (الفلقصـة والقلقصـة)
Author: bayan
Date: 01-17-2004, 05:07 PM
Parent: #6
كيف يا عثمان الكلمات الكبار ديل عشان الناس تقول مسقفة
باقى طلعونى امية ... عشان كدا الايام دى عاملة كاموفلاج بتاع سقافة..
وشكرا لهذا البكش الذى احتاجه كثيرا
لكن مش قلتا ليك حروم دى تسيبها
ام سكاسك دى اصلى ما قدرتا اعرف نفرها شنو
الا ارجع لكتاب عون الشريف قاسم بجعم الجهوات السودانية
ارقد عافية
|
Post: #5
Title: Re: جهــولا ام سكاسـك... (الفلقصـة والقلقصـة)
Author: Osman Hamad
Date: 01-16-2004, 01:20 PM
ليك حق يالحنينة
نسوى شنو عاد...بس قولى لى!!
|
|