اللللللللللللليلة لاقيتو!!!! يا اخوانا حمدلوا لي السلامة

لو تذكرو كان ظهروا جماعة كده في السودان بيسحبوا حاجات تانية حامياني،
اها عندنا هنا ظهروا جماعة تانين بسلموا عليك في ايدك بيسحبوا قروشك كلها الفي جيبك والفي البنك وانا والحمدلله الاتنين زيرو لكن الليلة لاقاني واحد منهم مرقني منه كرعي بس لكن الله انا لي هسع مخلوع وكل مره امرق جزلاني احسب القروش مع انه ما فيه شئ

اها بس اشم نفسي واروق شوية وبجي اكمل القصة

اخونا ياسر
حمد لله علي السلامة
ومنتظرينك يا حبيب

الحبيب اسعد

كتر الف خيرك

تعرف كان في كلام داير عندنا هنا انه في شخص شكله متدين وشايل سبحه ولابس هدوم نضيفة وكده، بيقوم يجي يسلم عليك ويقول اعطيني من مال الله تقوم انت بكل حسن نية تتطلع الفيه النصيب وتديه ليه، يقوم يقعد يتدعى ليك ويقول ليك انت راجل مبروك، والوقت ده كلو بيكون ماسك يدك، وانت ما عارف ايه، ويقوم يرجع ليك القروش ويوقول ليك ياخ دي كتيره شكرا ليك، ويقول جيب ايدك ويختها ليك القروش في ايدك ويقعد يدعوا ليك تاني ويقول يالله اقرا الفاتحة، المهم بعد داك يقول ليك اديني السبحة المعلقة في العربية،(يمكن عشان كده متلح السودانين لأن اغلبهم او كلهم معلقين سبح في عرباتهم هنا) او اي حاجة عنك قلم ساعة اي مصيبة زمان،المهم تديها ليه يقعد يمفركها ليك بايده ويوقم ويرجعها ليك، اها هنا الفلم، بعد ما تستلم السبحة دي انت بتصبح مسلوب الارادة تماما، يقوم يقول في جيبك في كم، تقول كده، يقول جيبو، في البنك في كم، تقول ليه كده يقول ليك يلا دور ارح نمشي البنك، تمشي معاه البنك بكل طيب خاطر وتسحب قروشك كلها وتديها ليه، وبعد ده يقول بالله وصلني معاك الحتة الفلانية، تقوم توصلوا هناك وتشكروا وتتدعى ليه انت كمان وتدور تمش، بعد فترة تصحى من الغيبوبة وتذكر العملتو تقعد تجري للحتة النزلته فيها تلقاهو فص ملح وداب، والقصة دي حصلت لأتنين من السوداني هنا وبعرفهم وسحب قرشوهم كلها عدمهم نفاخ النار، وفتحوا بلاغات في الشرطة

دي القصة

اما قصتي انا، الليلة اتاخرت من دوام المساء والمغرب اذن علي في السكة لي شلاقتي قلت انزل اصلي في مسجد قريب كده واواصل، اها بعد الصلاة جيت اركب العربية القى زول في الباب بيدعوا ويطلب مساعدة، قمت طلعت الفيها النصيب واديتها ليه اها قعد ايدعى لي قلت ما بطال وانا أأمن وقرينا الفاتحة، اها قام قال لي ياخ القروش دي كتيرة ورجع ليه، وهي نص دولار ما تامة، اها هنا اخوكم جقلب، ياربي ده هو ولا ما هو، بعد شوية قال اديني السبحة دي، طبعا عملت لي فيها مجنون رسمي وسحبت باب العربية وقلت ليه عن اذنك انا اتاخرت لو سمحت وقفلت الباب، وطبعا الوقت داك عرقت عديل كده والحمدو والاخلاص ديل قدر ما كستهم ما لقيتهم نهائي، غايتو بعد تعب اذكرت الاخلاص وبقيت اقرا فيها اقول بسم الله يا الله، اها لما اظنو لقى القصة بايظة قال لي خلاص اديني حاجة كده تعشيني انا والعيال، قلت والله ما عندي اي شئ، قال خلاص اديني قروش اقدر اشتري بيها لبس لي، قلت شوفت اغير الاديتك ليه ما عندي اي حاجة تانية ولو سمحت انا مستعجل، لم قنع خلاص وانا بديت اتحرك، قال لي خلاص جيبهم، اديتهم ليه وجري

جيت المكتب هنا برجف زي القصبة، ولي هسع ما مصدق اني اتخارجت منه

ويا ناس مسقط هي والله اعمله حسابكم

اخونا
والله تاني حمد لله علي سلامتك الموضوع حقيقي، ومصداقا لكلامك انا عندي قريبي في مكة
لاحظ في مكة ، المهم تحت العمارة الساكنين فيها في بقالة نزلت زوجتو يوم للبقالة لاقها واحد من مواطني غرب افريقيا وقعد يدعي ليها ونفس القصة الي ان امرها تطلع تجيب ليهو كل الدهب حقها وفعلا دة الحصل واخد الدهب وطار ، نتيجة هذا الحادث ان تم طلاق هذه المراة وارسالها الي اهلها ، حكاية محزنة جدا والواحد بس بيقول الله يحفظنا ويحفظكم.

اقول ليك شي يا اسعد رغم اني سمعت القصة دي كتير وحصلت لي ناس بعرفهم شخصيا وما من طبعهم الكذب او المبالغات لكن بيني وبيننفسي كنت متردد لغاية ما حصل لي نفس الموقف وبنفس الطريقة البيحكوها بيها وامكن لو ماكان عندي خلفية عن الموضوع كان سرحت معاه اصلوا بيني وبينك بيدعو ليك دعى سمح خلاص

بس ربنا يحفظنا جميعا

اللهم آمين

وشكرا ليك مرة أخرى عزيزي

أين هذا الرجل الأصيل