مليون أحبك يا بلد _ القصيدة الحميمة ـ لكل الشرفاء وعشان ما أدمع براى

أحبـك يـا بـلـد
ـــــــــــــــ

شعر : صديق ضرار


مليون أحبك يا بلد . . وأقيف عشانك متحد
* *
مين عنده زى وآطاتْ حقولنا المشمسة
مين عنده زى نيلنا وعيونه الناعسة
ممدود على الغابات حنان ومؤانسة
مين عنده مليون مربع ميل ، وقادر يحرسها
مين أرسى للحريات أصول ، ومؤسسة
سودانا من قبل الخلق
ديمقراطيته كانت مدرسة
وكان فى التفرد بتحسد

* *

وعشان عيونك يابلد
بكت المدامع وصبَّبت
لامن رأت حالة بنيك المضهبين
ما اتحملت
الغربة ، و السفر الطويل . .
والرجعة ليك اتأخرت
لاكين عزاها بأنه إسمك
كان فى الشمس ،
حين دورت
حطت رحالها على مدارك
وفوق ترابك ارتمت
والدنيا من حولك
ضياءً نورت
كل المدن فى مجد عرسكْ
بالحلىِّ اتجملت
والكون وقف ،
موكب مهيب ،
متله العيون قط ما رأت .
زهرة بنفسج فى عيون العاشقينك
قد نمت
ونما الحنين الِّليك
وفطفط فى الكبد
وهتفت بى صوت مواصل ، ومضطرد
مليون أحبك يا بلد * * مليون أحبك يا بلد
وأقيف عشانك متحد

* *

ورجعت بى أدب المنافى
وبى أهازيج السجون البائسةْ
كل المرافى اتغيرتْ
والكان زمان بتقيف معاىْ ، . . اتبدلت .
قالوا المراكب شرقتْ
واضحت حكاوى الحب ، أغانى مسيسة
وبصقت فى وجه النوافذْ
والأزّقة العابسة
قالوا المراكب شرقت
الدنيا عدّتْ من مدارها
وعن مدارك حَوّرت
ولأنى أصلاً فى جذورك منتمى
أقفز فى حضنك وارتمى
أعتز بيكى ، وبين ضلوعك أحتمى
وتجينى من جوّايَا
أصوات صفوف اتلازمتْ
مليون أحبك يا بلد
وأقيف عشانك متحد

* *

يانـى البحبـك يا بـلد . . وكونى منك مفخرة
يا ذات الشمائل قد سمت . . ذات الصفات النادرة
يا أحنى أم ضمت بنيها . . وظلت عليهم ساهرة
ترباية بالكلمة الحنونة . . وبالعيون الزاجرة
إن بزُّوا إنتى هى السند . . وإن غلطوا كان بتمدى يد
(فى الدنيا لو يظهر بطل . . بيقولوا سودانى اتولد)
ما ضعنا أبداً ، ما اتونينا. . ولا اتكلنا على أحد
سودانا كان فى عيونا جد . . ونخيلو ظل الهاجرة
وصحارى تضهب سائرا . . وسماه دايما ماطرة
فى نيلو ابترد الجسدْ . . طاهرين ليوم الآخرة
يكفينا إنك طاهرة . . . وإنك مقدسة للأبد
وعيونا منك لا عمتْ . . لا الثورة فينا بتتخمد
فى ريفنا أو فى الحاضرة . . تستنى أول بادرة
من حلفا حتى الناصرة . . تشعل لهيبها المتقد
مليــون أحبك يا بلد .. وأقيف عشانك متحد
سأظل عشانك متحد

Quote: والكان زمان بتقيف معاىْ ، . . اتبدلت . قالوا المراكب شرقتْ واضحت حكاوى الحب ، أغانى مسيسة وبصقت فى وجه النوافذْ والأزّقة العابسة قالوا المراكب شرقت الدنيا عدّتْ من مدارها وعن مدارك حَوّرت ولأنى أصلاً فى جذورك منتمى أقفز فى حضنك وارتمى أعتز بيكى ، وبين ضلوعك أحتمى وتجينى من جوّايَا أصوات صفوف اتلازمتْ مليون أحبك يا بلد وأقيف عشانك متحد

اقيف عشانك .. محبه واعجاب بهذا الأبداع

تسلم وربنا يحفظ البلد .. من شر

أخى الحبيب جمال
لك حبى وإعزازى
وشكرا لك على الكلمات الطيبات وهذا شعورنا جميعا
دمت لأخيك صديق

أيها المبدع صديق
شكرا لهذا الإبداع
شكرا للحب..وماك براك
معاك دموعنا بتجري يا صديق..ماك براك..

العم الفاضل صديق ضرار دبايوا

قطعة ابداعية وشعرية معبرة وقوية
لك الود والاحترام

ali

دقنة

عثمان من فى الله حلَ بسيفه ـ عقد الضلال وأوهن الكفارا

ونقيف صفوف
نحني الرؤوس ليك يا بلد
ونغني تسلم عازة الما سهت
يوم نتذكرك دمعتنا في الخد اترعت
تسلم يا ملك

سيدي الفاضل الأخ صديق ضرار/ المحترم
لك التحايا الطيبات وكل سنه وانت طيب
ولك سيدي كل التقدير واهنئك وأنفسنا على كل هذا الحب المتدفق
للوطن الغالي .. ونحمد الله كثيرا..فانه برغم هجرتنا وتشتتنا في ارض الله الواسعة..اننا لم نزل نحب (ديار عزة) ونكن لها كل هذا الكم الهائل من العشق ..وفي رائعتك ( مليون احبك يابلد ) ما يكفي دليلا لهذا الحب.
فلك مني ونيابة عن كل عاشق لوطنه لك أصدق الدعوات
أم مجاهد / السعودية

المناضل الجسور أخى الفارس خالد الحاج
الابن والتلميذ الوفى دقنة ( يها لو تنينا، كتيب وا ، أكراب وا ، ناتكا خير )
أشكركما على كلماتكم الرقيقة ومشاركتكما فى تخفيف اللوعة عنى
الفضلى أختى أم سها والفضلى أختى أم مجاهد
سلمتما وقد زادت العبرات منى انحدارا ( وكنت بكتب ودمعى شارِِّّى وبالِّّلى ِ سدرى)
لكم جميعاً أصدق الحب والود حتى نلتقى هنالك ويجتمع شملنا وأهلينا
ولكم الشكر ، لكم الشكر
صديق ضرار

العزيز صديق ضرار،،
عندما نتشارك الفرح نحس بالحب، وعندما نتقاسم الهم نحس حبا أكبر.. شكرا لاشراكنا معك..

ياللجمال

الخال العـزيـز صـديق،
أراك كنارا ما زال يتغنى فى القفـار..
مثلما قال أسـتاذ الجيل ضـرار صالح ضـرار:
كل جيل سـوف يروى ويغنى ويعيـد
يوم حاربناك يا جهل بعزم من حـديد

هـذه الأسـرة التى أنجبت العباقـرة.. مؤسسهــا الأستاذ محمــد صـالح ضـرار، المؤرخ المشهــور، الذى أورث روح المؤرخين لإبنـه رجل التربيـة والكاتب المؤرخ والشــاعـر ضـرار صالح ضـرار الذى كتب القصيـدة أعلاه وحفظهـا كل تلامذة الإبتـدائيـة فى زمان كانت لبخت الرضـا فيـه قدسيــة وإستقلاليــة منقطعـة النظيـر.. وكان أستاذ (العربى)
وإسمـه شيخ إدريس (تعرفـه يا صـديق)، يقول لى ونحن فى سنـة تالتـة أوليـة، "قصيـدة خالك دى لو ما سمعتهـا بكره عندك عشـرة جلدات!!.

وما زلنا نحارب الجهل بعزم من حـديـد.

الأخت العزيزة رجاء
مقدر لمشاعرك النبيلة أيتها الأخت الخلوقة الهميمة
وشكرا لك على الطلة
ـــــــــــــــــــــــــــ
صديق

الأستاذ العزيز أبن أختى أبو الريش
سلامات وأنت على البعد ، فى آخر الكوكب
وهو يا ريس لو ما جدك وخالك ديل نحن كنا تعبنا التعب ده كله
ما كنا مرتاحين مالنا ومال الشعر وشياطينهالبقلبه المواجع
شكرا ليك أب ريش على الزيارة الحلوة
صديق

فوووووووووووووووووووق

العزيز الموصلى
وصلتنى الرسالة وأثلجت صدورنا . لكن ما أوصيك يجب العمل على إنجاز المشروع
وأنا واثق من أنك بإذنه تعالى ستصل وستكون خطوة تليها خطوات صعودا
ثم لا أظن أننا سنقبل بفكرة أنك لا تستمتع بحياتك وبما تريده ( تحبه )
فالعمر لا يعاد . ويازول إن شاء الله كله بيجى
شكرا ليك
أخوك صديق

العزيز صديق
لااجد سوى الرائع دوما الممتلىء بحب هذا الوطن فى كلماتك المعبرة،واخجل من صفة الشاعر التى يطلقونها على عندما اغوص فى عمق حروفك الزاهيه
لك الحب والمودة

أخى العزيز بشرى سليمان
كل عام وأنتم بخير وجميع اهل المنبر
أعرف كم جميل هو شعرك منذ أن كنت فى الجامعة وكنا نتداوله وهو شىء جميل وطبعا من تلك الفترة لم نلتق ولم أقرأ . لأنه بعد تلك الفترة كان السودان ممنوعا علينا أو ممنوعون عن اللقاء به وقد تشتت بنا السبل والآن هأنا أراك فأرجو أن تكثف من شعرك ذلك الجميل لنسعد به ولا أقول نستمتع
شكرا بشرى . ولك كل الحب
صديق ضرار

شكرا ليك يارائع على هذا الاطراء واتمنى ان نلتقى فى ساحة من ساحات جامعتنا العريقة وقد اطل عليها الصباح واستردت مع الوطن عافيتها

بشرى الحبيب
كل عام وأنت بخير وجميع الأخوان فى البورد وزواره
متوقع منك حاجة يللا ابدأ ونحن معك

فووووووووووق

عشان يمون فى شوية أدب فى البورد

ألاستاذ الشاعر صديق

شكرا على هذا النص الشفيف و الذى يتقطّر حباً و شوقاً

و إعتزازاً بهذا الوطن الحبيب

لك شوقى و تقديرى


أخوك/ طه حسن عبدالله

أخى الرائع

الشاعر طه

شكرا على كلماتك الجميلة

وقد اطلعت على قصائدك الجميلة

فمزيد منها ولك شكرى

صديق ضرار