أبنائي فى المنتدي أرجوكم أقبلوا هديتي

السلام المرتقب

فتحت الجريده
وبي نظره أضناها الحذر
أطلت النظر
((اكوس )) ملهوفه
لي ذاك الخبر
الليهو كل زول
تلقاهو ((واقف منتظر))
يا ربي هل حل السلام؟
واتنشر الخبر؟
وبي فرحه لا توصف
قريتو مضمون الخبر
وهتفت من جواي
ربي عوضّنا الصبر
*****************
ومن بلاد الغربه
في البدو والحضر
من الدمام العريقه
من الراس والخُبر
بقيت اردد كل حين
صحيح والله (قد صح الخبر)
بقيت اردد من جواي
اسمعوا يا أعادي ويا أحبة
يا اماركا و ياغجر
بكل جِد من غير هذر
شوفوا كيف عم السلام
في ربوع بلدي الحبيب
وفرّح ملايين البشر
وقالوا سودانا الحبيب
الليله بالخير ازدهر
وقالوا هجرتنا الطويله
قد وصلت مداها المستتر
وبكره .. ناوين السفر
****************
يا ربي يتحقق مرادنا
ويبقى (حقيقه).. مضمون الخبر
وما يبقى الكلام
عاري من ( صدق الخبر)
وما يبقى تنفيذ السلام
ضرب من أوهام فِكر
ومايبقي سودانّا الحبيب
حق لي جماعة ومحتكر
ارباب المصالح
الما بيعجبم سمح الخبر

***************
لكنو مولانا الكريم
الأقوى من كل الخلوق
كل البشر
لن يرد.. دعوة مهاجر مُنْكَسِر
والسلام سيزف عروس
لكل واقف منتظر
السلام سيزف عروس
لكل واقف منتظر
وحلم الملايين يصبح حقيقة
زي شمس الضُهُرْ
وكل مظلوم ينتصر
وتغرد حمامات السلام
في ربوع وطني الحبيب المنتصر
وتكمل معاناتنا الطويله
بي أسعد خبر
وتبقى غربتنا الطويله
ذكرى ساواها الدهَرْ

*******************


ام مجاهد/ السعودية
7/1/2004

جميل ياام مجاهد ...عمل جميل ...
shereef

العزيز ام مجاهد
نشكرك كثير علي هديتك واتمني ان يكون سلاما حقيقي يحقق تتطلعات هذا الشعب الصابر علي ويلات الحروب
وحاجه اخيرة
ضحكت لمن قريت كلمه ابنائي في المنتدي ما تخافي يا ام مجاهد والله في ناس هنا اكبر من بعانخي
ولك ودي

الأخت / أم مجاهد

بإذن الله ثم بعزيمة الرجال وصادق النوايا، السلام آت آت ولو كره الحاقدون ولو كره المستفيدون من حالة الحرب

تحياتي،،،

العزيزه ام مجاهد

قبلنا هديتك لجمالها...
مع دعواتنا الصادقه أن يعم السلام أرض السودان الحبيب


احترامي

تسلمي يا ام مجاهد
نتمنى ان يعم السلام ارجاء البلاد
ليعم الخير ويعمل الجميع لرفعة هذا الوطن الغالي

والى الامام دائما

سلام أم مجاهـد،
قصيــدتك تمام! إلا الأماركـة ديل مالم؟ دحين موش هم الأماركـة اللى مسكــو النفـرين دول وقعـدوهـم فى الواطا وخلوهـم يمضـو على شيتـا ما مقتنعين بيـه؟
إذا فرحانين بخبـر السـلام دا جـد، حقو نشكــر الناس الجابـوه، وهم الأماركـة.. البشيــر زاتو ماشى واشنطون عشـان يشكـرم هناك فى بلدم.. ما تسمعى الكلام، هم غلطـو فى تهجى الإســم سـاكت.. مرة يقولو مشاكوس ومرة نفاشــا وهم عايزين واشنطون!

الأعزاء الكرام في منتدانا الرائع
Omdurmani..vhabib alkul..hamam..HOPEFUL..motaz..Abureesh

لكم مني أطيب المنى ..ؤلكم شكري الجزيل على ردودكم الرائعة وتشجيعاتكم الجميلة ..والتي نمضي بها ولها..
بعدين يا 7habib alkul والله انا حاسة أني فعلا امكم لو ما كلكم فعدد
كبير منكم في سن إبني مجاهد والله يحفظكم..
الأخ Abureesh
عارف الجماعة ديل فعلا دورهم كبير في الشغلة دي .. وأنا
عاااااارفة لو ماهم ضغطوا الجوز ديل ما كان الحكاية تمت .. وطبعا هم أصلهم محل ما يختو رجلهم في أي حته (بجييهوها)!!!!!
لكن والله عندهم عمايل تغطي على لفتاتهم الجميلة دي ..والخوف ما ينطبق عليهم المثل البقول (ما بجري فالح بلا مصالح ) وخوفي كلو نطلع من المولد بدون حمص..ربنا يستر ويجيب العواقب سليمة
ولكم من الود أعذبه
أم مجاهد / السعودية

الخالة ام مجاهد
نرجو ان تكتمل الفرحة
وندفن جثث الأفكار والأحزان القديمة
والهجرة والإغتراب والمعانات الأليمة
وبتوقيع اتفاق السلام
نكون ادينا ميقات الإعتراب الذي فرض علينا

وآخر دعوانا نسأل الله
ان نهنئ بالسلام ونعيش في أمان
ولابد من شكر أمريكا لأنها هي التي تحمل
السلام القادم

الإبن العزيز إيمو وكل الأبناء
لكم تحياتي
والله يا أبنائي ..أنا معكم قلبا وقالبا في ذات الرأي إنو الجماعة دييل ( الله يهديهم ) هم العجلوا بعملية السلام والتي لولا تدخلهم ما أظن كان تتم ..لكن نحن خايفين بس بعد السلام ما يبقى علينا البقى على اخوانا العرايقين وينطبق علينا كلام الشاعر:
المستجير بعمرٍ عند كربته***كالمستجير من الرمضاء بالنار.
لكن في في كل الأحوال السلام مكسب ما ساهل ونحن فرحانيت بيهو بأي صورة وبأي شكل وربنا (يتم لينا على خير) .. انا ما قلت ليكم هو عرس ؟؟.. ولكم تحياتي
أم مجاهد

ام مجاهد

لك التحية


نتمنى - مثلك - و نفرح كما تفرحين ان يعم السلام ربوع بلادنا
و ان يجنى اهلنا الطيبين ثمار صبرهم الذى طال

و ان نعود نحن المكتوون بنار الغربة و - رماد الرجاء - الى ديار الاحبة .... حيث لا كفيل
لا ضريبة
و لا غنيمة - الا كوامن الحب -

حيث الحضن الدفيئ

الخاله الغاليه ام مجاهد
لك التحيه والتقدير

لا تحلمى بعالم سعيد
فالقادم اخطر وابشع بل وافظع اذا لم!!!!!!

متعك الله بالصحه والعافيه وجعل ايامك كلها امن وسلام

لست متشائما ولكنها الحقيقه اذا!!!!!

ولك مودتى

ام مجاهد:
قصيده جميله ومعبره ونتمنى ان يكون سلاما حقيقيا يعم كل ارجاء الوطن.
ورد الله غربة الجميع سالمين غانمين لحظيرة الوطن...

ام مجاهد
نخن معارف ولا انا ضهبانة
انت ام مجاهد رائعة مشاعل؟

ام مجاهد يامبدعة
قصيدتك زى الشمس مشرقة
تحدثين عن السلام
عم البلاد..وخيوله
جاءت مسرعة
وبكرة كل مهاجر
يرجع للبلد ويحزم
الامتعة
دى قسمة بين اتنين
يامبدعة
والاحزاب الباقية
ستظل مهلعة
فى الشرق وفى دار فور
النار مولعة
مرحب بكل حل
يوقف الحرب المهلكة
بس خليهم ينصبوا
الاشرعة
ونحن كمان نحزم
الامتعة

لا فض فوهك يا أم مجاهد. حق لنا جميعا أن نحلم بالسلام والعودة الى أحضان الوطن فقد أضنانا البعد من تراب الوطن والإغتراب. وبعدين يا أحوانا عليكم الله ما تطفوا البسمة وخليكم متفائلين وما تستكترو علنا الحلم.
الله يديك العافية يا أم مجاهد وكلنا ندعوا الله معاك أن تتحقق كل الأحلام ونرجع نعيش في وطنا وبكرامتنا زي خلق الله.
أكرر شكري واعجابي بهذه القصيدة الرائعة.وهديتك مقبولة. والله يجحفظ الجميع

أختنا الفضلى أم مجاهد
هكذا يكون التمنى والوقوف عند البوابة بالبشارة
يسمع منك رب العباد ونرفع معك الدعاء
عشت يا أخت الكل
صديق