المدرسة الماجادة في الشعر _نقد وتفنيط وفرتيق كلام

كتب حبيب الكل في بوست قديم( من سنة اسكت) يقول عن المدرسة الماجادة في الشعر ما يأتي وباذن الله سنقوم بتفنيط ونقد لهذه المدرسة واشعارها.
حيث قال:
تاسست هذه المدرسة في عهد الفرنجه بتاعين كوستي في القرون الجوارسيه ومن اهم ما اهتم به من الشعر شعر الشعيريه باللبن ومن ابرز شعراها محمد بن عز الدين الهلالي المشهور(بكتاحه) وطارق شا ومحمد نت واهتمت المدرسه بعدم وجود القافيه والاوازان الثقيله والخفيفه والمتوسطه وجسدت حاله الخوف الشديد من دفاري الكشه والحياة اليوميه المليئه بالمطبات واعتمدت علي خطه4-4-2
ومن اهم قصائد هذه المدرسه والتي تدرس للمبتدين في المدرسه لاعتباره اساس في المدرس قصائد
غشاني عباس بالمساء للشاعر الجهبص محمد عزالدين
وقصيده الشوق زبادي
وقصيده كتاحه من زمن الرومان للعلامه طارق بشي
وقصيده رطل ايسكريم كيلو زيت للنابغه محمد علي بتاع نسرينسميت هذه المدرسة بالمدرسة الما جادة لان لك قصيدة فيها يجب ان تنتهي
بعبارة والله بالجد يقول الدكتور كارلوس زعبوله وهو احد المتخصصين في
نقد هذه المدرسة ان ذلك بسبب ان معظم شعراء هذه المدرسة بتاعين مكن
كما نقدها الشاعر الكبير سيد فله بقوله انها افضل المدارس المتخصصة في
منح شهادة لندن ودبلوم المكنيكا في الشعر المفكك
والعهده علي الراوي
لو ما فهمتو حا نتظرق لبعض النمازج الشعريه لهذا المدرسه الحديثه

ودي قصيده رطل ايسكريم بالزيت والبقول العلامه محمد علي بتاع نسرين في مطلعها

في مرافي سكون حمير اللبن

اشتقت ليك يا حمام الدار

في زمن الودار

واكتشفتك ضهب نار الزمن

يا عرس المصايب للمحن

ونتشيت بخفة الجكس البوار

كل الكلا رقص في سلك الكهربا العريان

وينهم ناس زمان؟

يا دقسة الريد العوير

في زقاقات حلتنا والخور الكبير

كل المشاعر جرت مننا في فزع

يا حلة ملاح القرع

بقينا زي قرد ساكيه شافع بنبلتو

ينطط من فرع لي فرع

خايف حجر الهوى الشرفان يغدرو

انخفض صوت الغنا

والفنان ختم حفلتو

وما لحقناك يا زمن الضهب

وما لحقنا حتى العشا

يا زمن الخفوت والوشوشا

وين القبيل خطفوا القليب

وينهم ناس رشا؟

اختلط الامر علي بالمسا

في زمن الشواطين والوسوسا

كل الكوابيس شاركت

وفي الحفلة جات باركت

لابسه جرايد مهلهلة من زمن اخبارها انتهت

ونا في الطريق انتهيت

اشتريت رطل اسكريم

من ناس نعيم

وتلاته صابونتين

وكيلو زيت ومشيت البيت

نمت وبعدين اتعشيت

ويا ريتني ما كنت جيت

دا شنو

والله بالجد

في ظل تخاريف الحقائق والوطاويط السواد

انبطح شوق الغنا الهابط على عناجريب الغسيل

وكتبت عنك سكة الوهم الرحيل

يا لوري هوستن جر فينا نور طويل

وين ناس خليل؟

واستهبل الاحساس علي

والليل لبس لون السواد لي جزمتو

واتخذنا الشوق زبادي

وبدينا نبحث عن شوايب في كشاتين النوادي

وبي هناك لقيت جدي عرس ليك هنادي

قمت انتعلت الريد رغيف

وجاتني نسرين شايلة في شنط الحديد الذكريات

جاتني زي ديك عدة الحافلة المطارد بالعكاكيز والهواجس

وجوني بيتين من شعر

واحد اجار والتاني فسحة فيها نيمة

نيمة من زمن الاذاعة على الهوى

وياهوى سرحت ليك شعري اتكوى

وكواني ليك شوق البنفسج للزبرجد

وعتبرتك مستحيل

ورحلت ام بده السبيل

وسمعتي مني شعر جميل

يا علة الزول العليل

يا قصيرة يا طول الفتيل

وجوني منك شبشبين عبر الهوى

ضربوا بغداد ياعرب

وشباشبك الشول البيض

جوني عابرين الحدود

يا خروف جلد القدود

اتمكيج الضب بالدلال

حتى الضبابين في غناك اتحنكشت

كل البنات اتشلخت

غشاني عباس بالعشا

وجيت لقيت كل الدكاكين قفلت

الاخ منتصر شكرا لك وانت تجيب نموزج اخر من اضانه لكي نستعرض بعض الرؤي ونقوم بقد قد يكون استحساني او لازع لتك القصيدة والتي ابدع فيها الشاعر الكبير والذي كان كما اسلفنا واقع تحت تاثير البرنجية التي ابدع فيها عباس

وقع كاتب الموضوع في خطأ تاريخي كبير حين اعتمد ان عصر الجورسي بدا في كوستي حيث المعروف في تاريخ عصور الشعر ان مدرسة الجورسية بدأت في حلة حمد ببحري وامتدت شمالا ولم تتاثر بها اي مدينة جنوب الخرطوم سوي بعد الذين رحلوا من الخرطوم الي مدني وبعض الاقباط الذين يتنقلون بين الخرطوم مدني ويعملون في مصنع حجار للسجائر فرع مدني حيث كان اختلاطهم بالمدنينة محدود نسبة لانشغالهم باكل الفسيخ والجبنة المضفرة خلال فترة استراحتهم والمعروف تاريخيا ان مدرسة البوبلين والترفيرة هي التي كانت مشهورة في الاقليم الاوسط ذلك الذمان حيث مشروع الجزيرة والقطن فتلك المناطق حارة نوعا ما ولا ينفع فيها الجورسيه شعرا هذا في ما كان من تحديد الحقبة التاريخية
اما توزيعه لانواع الشعر فقد وقع في خطأ اخر حيث صنف الشاعر القدير المفلهم طارق شا مع محمد عز الدين في اهتمامهم بشعر الشعيرية باللبن وهو خطأ فاضح جدا فطارق شا مشهور بانه رائد شعر الرز باللبن وسلطة الدكوة اما محمد عز الدين فالمعلوم عنه انه شاعر الشعيرية باللبن المجود والفرق سيان بين الصحنين او الفرعين من الشعر فالمعلوم ان شعر الرز باللبن اعتمد علي مدرجات هلال مريخ واستنباط الشعر من خلالها مع تفوق المهذوم في قول ابيات رثاء اللاعين واعتمدت خطة 3-3-4 بعكس مدرسة الشعيرية باللبن والتي اعتمدت خطة اوربية خاصة مع تخوفها من دفارات الكشة وتزوير بطاقات الطلبة
لم يبين لنا الكاتب عند عرضه بعض نمازج القصائد واولها قصيدة محمد عز الدين _ غشاني عباس بالمساء قصة هذه القصيدة العصماء والتي من الجيد دوما رواية سبب قطع القصيدة من الراس لكي ترسخ المععاني ويعم الرخاء ولكن عطفا علي هذا الموضوع فقد قال قائل ان عباس ركس كان مشهور بركوب الماسورة وحين قام محمد عز الدين بقول القصيدة كان تحت تاثير الغشة الكبيرة من عباس فقد كان يجلس عباس وبقية العواطلية في راس الشارع علي لستك مدفون وراي محمد عز الدين اتيا من بعيد فناداه بصوت عالي اسمع يا فردة جيب معاك سجارة من دكان الفوراوي وهاك قروشك فقام محمد عز الدين بكل طيبة خاطر بشراء سجارة البرنجية وجابها مولعة واعطاها لعباس ركس والذي بعد ان جر نفسا عميقا منها قال لمحمد عز الدين معليش طوطحتك في الماسورة اي يعني دقست مع سق الاصرار والترصد
ونواصل

حبيبنا اساسى
ياراجل يابتاع الدرر.
عجبتنى قصيدة رطل ايسكريم بالزيت وياحبذا لو اضاف ليها الشاعر الفطحل محمد على بتاع نسرين شوية صلصة وان شاءالله تكون من ضمن مقررات امتحانات الشهادة السودانية.

كما اسلفت اخ قلقو في ان القصيدة رطل اسكريم بالزيت تعد من امهات القصائد في تلك المدرسة والتي لو اضاف لها الصلصة والدكوة لما كانت من مقررات الشهادة فقط بل كنت اظن ان ينظر في ان تكون نشيد العلم

اساسى والله جيت مبدع عديل
كدا

سمعت المدرسةالهنفولية
لهنفول بن احمد الهنفولى

ودى الشطرة بتتكون من كلمة واحدة

وكان لها رواج فى اقليم المهراجا فى الهند
مثلا
اساسى ياراسى
من راسى وكراسى
وحسين ملاسى
ومهاجر فداسى
وبنات العباسى
وكلكم ناسى
وكاتمين انفاسى
وقاعدين على راسى

وعلى كدا ممكن تقيس
شعر المدرسة وتكون شاعر
بس اسى بتجيك الدكتورة
وبطلع مدرستك دى زى اكل فول الحاجات

الاخ ابو قوتة
شكرا لتطرقك للمدرسة الهنفولية والتي كنت سالجا الي استعراض بعض النمازج الشرقية من شعر الطلبة المغتربين والتي اشهرها مدرسة شيكي ما وصل بلقي عندك خمسمية روبية وكما تري فان الاسم طويل نوعا ما لتاثره بالفن القومي الهندي وشعر الهوستيلات

ونعود الي كاتب الموضوع حبيب الكل والذي قدم المدرسة الماجادة باستعجال كبير ولم يبين لنا بعض النقاط المهمة ولكن هذا لا يعيب الموضوع بل هذه ملاحظة لا بد منها
اما النموزج الذي تم استعراضه وهو قصيدة رطل اسكريم بالزيت فهو من اكبر نقاط القوة لكاتب الموضوع حيث وفق في اختيار قصيدة جميلة جدا
اما بالنسبة للقصيدة فهناك ملحوظتان لا بد منهما وهي ان الشاعر اكتفي بالاسكريم والزيت والصابون فكما قال الاخ قلقو لو اضاف لها الصلصة او الدكوة او الاثنان معا لكانت نشيد العلم للسودان بعد السلام فالتباين الكبير الذي يجمع السودان تحت وعاء واحد لا شبيه له الا ذلك الاسكريم والذيت والصابون والصلصة والدكوة في صحن واحد عندها لما سمعنا بثوار دارفور او الجانجويد حتي او حتي نيفاشا فالسودان صينية ضلع كبيرة تتمركز الخرطوم في وسطها ممثلة الضلع وقربها تماما ام رقيقة بالكسرة والتي تمثل الاقليم الاوسط والمحشي الذي يمثل هضاب الشرق والكمونية التي يمثلها معظم الشمال وايضا البطاطس باللحمة المفرومة ممثلة الغرب اما طبق البامية فيمثل الجنوب وقربه الصحن الصغير للشطة ممثلا في حركة التمرد وينتظر بعد هذا كورية كبيرة من الحلو تمثل البترول والسلام القادم اذن لو لم يقع شاعرنا في ذلك القصور من التشبيه والجلدنة المشهور بها في استخدام فضاءات المعاني لكانت القيدة الان تعزف وتغني في افتتاح مباريات سيكافا القادمة في السودان ونواصل

[Inqigo]

بين اساسي ورمانسي ساحت حته ودك
فاقت كريمات الجلبطه
ومن ديك ديك الجن شرد
وبامسيكا قالوا اغترب ساب البلد
عاش في حلم بين طيات قوش قزح
كان زول محترم فات الحرم
اكل جرجير وربط حزيمات الندم
وبين اساسي ورمانسي ساحت حتة ودك
صحت فيني الشجن الاليم
طريت لبني وسعاد وام الحسن
منعول ابوك صنف الحريم
يا سبب الشتات يا سبب العدم
حس الشواكيش فاق المطر
كع ** كرع**كع** كرع
لمن رأسي صابه الورم
ولقيتك يا بت الحلال بعد قلبي اتحرم
وندوز اكس بي راقي ومحترم
بعرف براااااااه وما بقول ايرور
يا رسيفر بشتقل من دون طبق
وبين اساسي ورمانسي ساحت حبة ودك
مسحت كل بيوت الفريق
حتي الكيس اتشرط
ما شال مساحات الريد والحنان
وقعد تاني اضرب في المثل
محل الرهيفه التنقد واتقديت انا
كمية من الوهم عاشت بين السطور
اني شاعر كبير ما ليه حد
وشعري زي مصارين في حلة كوارع من دون بصل
لكن في الاخر بصل ** لكن في الاخر بصل
والله جد

من ديك وعيك
والوش ورم
كيف أنسي بس
لامن يجوط فيني الشعور
وتبكي الأضان ضحك العيون
ويتقرقد الشعر السبيب
والغافية تضهب
في ليلة حالمة
والقمر..
يتواري خجلان من عيون
أبو الدرداق..
وأبكي بس

هذه يا عزيزي أساسي الطريقة الأباوية نسبة إلي (أبا) وربنا يجعل كلامنا خفيف عليكم

اساسي
سلام مربع


يااااااااع على (ملاح الباميه) ..

القديم شديد