كلام ناس الحيكومة كلو بقى رندوق ساااااااااي والله صحي
انا غايتو القدرت عليه وصورته ليكم ياني الكتبته ليكم ده دحين العندو كلمة سمعها بي جاي ولا جاي النبي فيكم اليجي يختها لينا هنا بندور نوثق ليهم ملافظهم دي والرهيــــتفة التنقد كع كو كرو
طبعاالإنقاذ في أي شيء مشاترة ، وإتجلت وفاتت الكبار والقدرها ،خاصة في الملافظ السوقية المحتكرة خصيصا لهم . غايتو وبصراحة تستحق بجدارة جوائز اللفظ العاجز ،وتستاهل نديها الكأس في كلام الرندوق في المصطلحات السوقية المنحدرة من القاع والبتشبه الإنقاذ وناسها بس . حقتهم براااهم يحمدوا سيدهم ,,, طبعا عبارات كتيــــرة ومشتتة في السهلة لو بديت اعددها ليكم هنا، سهلة بكري المااااهلة دي بتضيق بيها , والله صحي والغريبة حتى لغة الشارع الحالية في البلد بقت على شاكلة ما يأتيهم من كبار رجالة الدولة طويلي اللسان وقليلي الإحسان . يعني لو طولت من البلد وجيت إجازة وبديت تسمع في لغة البلد ومصطلحاتها في البيت والمدرسة والشارع والجامعة للأسف والمكاتب الحكومية وبيوتات الأعراس والبكيات كلووووو بقى رندوق منحدر من ناس الإنقاذ وشبهم !! تصدقوا لو جمعناها تعمل مجلد كبير عريض , منها على سبيل المثال لآ الحصر الآتي : الزراعنا غير الله يجي يقلعنا ، الحس كوعك ، الجغمسة ، يعفصها تحت مركوبو ، وكترتوا المحلبية ، وفي خطاب رسمي لي رئيسهم قال (الحشرة )الشعبية !! للحركة الشعبية!! وامس ختمها ليهم والي جنوب كردفان المطلوب دولياللعدالة وللأسف بقولوا عليهو مولانا !!!! معقولة بس مولانا بقت هاملة ساااااااي؟ يوزعوها لي كل من هب ودب ؟ ياتو مولانا البقول جنس كلامو الرصاهو امس في خطاب برضو وبي عنصرية عجيبة وملافظ ما تسمعها من شماشي ما شاف المدرسة في حياتو . عباراته الرددها ولقطتها قناة الجزيرة وفضحته بيها، وشالتها كل الأسافير صورة وصوت ،حرقتو طبعا وقام ينكر فيها من دغش اليوم برا خجلة، فاكر روحو الناس عبط وهبل فعلا وممكن يقدر ينكرها زي ما قالها ببساطة ! ومفرداته العجيبة هي : أمسح ، اكسح ، ادرش ، قشوا ، اكلوا ني وما تجيبوا حي،ما عندنا مكان ليهم !!!! ده والي في حكومة البلد وبنادوه مولانا !!!! حكمتو باااالغة!!! أكلوا ني دي يا جماعةمعناهايعضعضو عديــــل ويقرش عضاموا , عالم سعرانة مافي إتنين تلاتة! باقي لي غايتو إن شعبنا لسه فضل منبطح كدي ومنبرش والموت والقتل والتهديد والوعيد مصبحوا وممسيهو , تاني بقبلوا علينا كلنا من طرف. وتبقى خطاباتهم فيما بينهم ، وطبعا بقصدونا نحن الزهجناهم وبقينا ليهم زي الشرا في الجلد نقرص فيهم وقدرما نفضونا ما مشينا منهم . بالجد أتوقع يقولوا لي ناسهم " يلا ابدوا من طرف ، لموا الكرور ودوه الخور ,. اجمع ، ابطح اطلع ، أعفص ، ابدأ بالفقرة والعنقرة وافجخ جوة وبرة ، أكفت الجضوم وابعج البطون .وفقعوا العيون ،تفوا اللحم الحي شلوت في الضهر ، وأم دلدوم في القدوم ،لامن قيامتهم تقوم !!!
عليكم الله يا جماعة ديل بشر يتحكروا في سدة الحكم وفي بلد زي السودان لمدة 22 سنة ؟؟؟ الشعب اتحملهم كيف دي المحيرة العالم كلو!!!والمصيبة كلـــــهم صنف واحد وطبعهم غالب التطبع . الشكية لى الله والرسول الناس ديل من يومهم ما فيهم زولا نصيح ، ولا كلاموا مرتب كلام ناس يفترض إنهم يحترموا الشعب القاعدين يتكلموا بي إسمه في كل المحافل !!! اتهرينا من الدراب الرامننا بيهو الجماعة البقولوا عليهم قيادات البلد كل يوم وساعة ، (والنصيبة) كمان قالوا شايلين شهادات جامعية !!! ياربى الشهادات دى حقت شنو؟ فى ابداعات فن العوارة !!! والا الهرطقة السوقية !!! والا البجاحة الفى الفاضى !!! والا ياربى علية قومنا ديل فاكرين انه الانسان السودانى ما بفهم الا اللغة البلدية دى!!! وكان دي ولا دي .. ولا التانية تبقى الطامة الكبرى،الاولى عرفناها لكن التانية بتندرع ليهم فى رقبتهم ، لانهم هم الحولوا معظم الشعب السودانى خاصة الجيل العاش وترعرع في زمنهم حولوه لى انسان جاهل أُمى ساذج سطحي ما بفهم اللغة العربية ، وإن كتبها يكتبها بأخطاء إملائية فادحة ومخجلة لا يكتبها طفل في المدارس الأولية أيام ابواتنا الله يرحمهم (الإبتدائي حالياً) يعنى زى ما دخل الجامعة خرج منها .. وكمان زى ما بقولوا إخوانا المصريين في مناسبات لا داعي لذكرها .. (يدوك الواد جحش ... طلعوا حمار) وإلا امكن ياربى الناس ديل تكوينهم النفسي المليء بالحقد والعقد الاتراكمت سنين طويلة وهم يعافروا دايرين يصلوا لى كرسى الحكم دا وما قادرين لحدى ما اتشبعوا كراهيه ضد الشعب المسكين لأنو حرمهم من الوصول للكرسى عبر الانتخابات الحرة النزيهة لعقود طويلة ، ولما وصلوه بالقوة والتزوير والخج بقوا دايرين يتفشوا فيهو... بادروا أولا باذلالو ، وحرمانو من التعليم ، وإهانة كرامتو وإستباحة حرمة بيتو وشرف عائلتو ، وإنتهاءاً بتشنيف آذانو بلغة سوقية ضحلة لأنو عارفين أن مفردات اللغة العربية مافيها تعابير تفش الغبينة وتوصل احساسهم باحتقار الغير زى الالفاظ الشماشية ،، وعشان الشعب دا يفهم اللغة دى لازم (يجوهلوهو) إن صح التعبير بمعنى يعجنوهو مرة تانية ويطلعوهو جاهل وغبيان وعلى عمى عينو عشان يقدر يفهم لغة التخاطب السمجة البطلقوا فيها شمال يمين . طيب ... لو كان الناس ديل قاصدين الشعب السودانى دا عديييل كدا .. الناس البتابعو الفضائيات السودانية من كل دول العالم واجناسها ذنبهم شنو !!! ولو جات إهانة بتجي للشعب بي سببهم هم، الشعب ذنبوا شنو ؟ .. تعرفوا ... جيرانا العرب الحوالينا أكيد داخلهم شك انو ناس السودان بدلوا لغتهم العربية بي لغة تانية مبهمة وغير مفهومة بدليل ان قياداتهم بقوا يخطبوا فى المنابر بى نفس اللغة الما مفهومة ليهم ، لاهى عربية ولا غير عربية . يعنى حيرتوهم ،، يصنفونا في ياتو خانة !!! ارحمونا ياعالم ، كفانا فضائح على الملأ ، بقينا نمشى ورأسنا فى الواطا ، ما قادرين نتحمل عبارات السخرية من كل صوب والنظرات التهكمية الكلها استخفاف بى سودانيتنا الكانت تساوى دهب على مدى سنين ولسان حالهم يقول (إذا كان رب الدار للدُف ضاربا ... فشيمةُ اهل البيت كلهم الرقص)
متاوقة ــــــــــــ نطالب بمترجم فورى يرافق مسئولينا في خطاباتهم الإرتجالية،،، كما نرجو من الإخوة والأخوات قفي حوش بكري إضافة ما لديهم من ما سمعوافي ارض الواقع أو عبر الفضائيات من لغة رندوق الإنقاذ المرتجلة لكي نوثقها لهم .. والرهيفة التنقد ولا في منبرنا الجايب الرايحة كلها ,, والله صحي ..... ودعتكم الله
Post: #5 Title: Re: *** الرندوق الإنقاذي *** Author: مها عبد الله Date: 04-04-2012, 04:00 PM Parent: #1
Quote: طبعاالإنقاذ في أي شيء مشاترة ، وإتجلت وفاتت الكبار والقدرها ،خاصة في الملافظ السوقية المحتكرة خصيصا لهم . غايتو وبصراحة تستحق بجدارة جوائز اللفظ العاجز
العزيزة سوما تحية ومحبة الملاحظ للغة عصابة الفساد يجدها قد تدرجت لمراحل عديدة منذ إنقلابهم المشؤوم : لقد إبتدأوها ب ( جزاك الله خيرا ) و ( بوركت ) وأدب شديد ونفاق حتي على رب العباد وبعد أن ( تمكنوا ) من رقاب الشعب بدأ الخنق بنوعية ( العفص ) و ( اللحس ) و( تحت الجزمة ) و ( القش ) و ( الكنس ) ومن ثم ( ما تجيبوا حي ) غايتو أكتر حاجه عاوزة ( إفتوني ) فيها لما المشير العوير يحلف بالطلاق يا ربي الطلقة بتقع علي ياتو واحدة من الثلاثة
كل ما بين قوسين إضافة برضو لراندوك الإنقاذيين ، بالإضافة للتحديث الذي أضافة سيبوية ود الباوقة للكلمات ( ككع كرع وصويحيباتها ) و ( زمزغة وأخواتها )و ( هييييييع وبنات عمها )
لووووووووووووووولز يا معاذ ,, لا دي قلبت الهوبه فيها اولا مرحب بيك وحبابك اخي معاذ السر والله ضحكتني وأنا متأكده ضحكت كل من زار البوست ده مصطلحاتك الجبتها دي برااااااااااها بوست لووووووووووولز مبالغة ياخ
السجارة الخدرا غايتو بكون لفاها الكتب جنس النضمي الفوق ده .. لووولز والبد برضو ب محتاجها على قولك
تسلم ياخ وشكرا للمداخلة الظريفة
Post: #8 Title: Re: *** الرندوق الإنقاذي *** Author: أحمد ابن عوف Date: 04-06-2012, 10:15 PM Parent: #7
سلام استاذة اسماء
نديك واحدة برضو، فكوها في السوق او بالاصح فكاها كبيرهم
الله ليكم من جوافة المناصير
حقيقة كان قاصد يقول شنو ما عرفت، الا نديها سجارة غايتو الناس ديل معرفتهم مكلفة كيف
Quote: العزيزة سوما تحية ومحبة الملاحظ للغة عصابة الفساد يجدها قد تدرجت لمراحل عديدة منذ إنقلابهم المشؤوم : لقد إبتدأوها ب ( جزاك الله خيرا ) و ( بوركت ) وأدب شديد ونفاق حتي على رب العباد وبعد أن ( تمكنوا ) من رقاب الشعب بدأ الخنق بنوعية ( العفص ) و ( اللحس ) و( تحت الجزمة ) و ( القش ) و ( الكنس ) ومن ثم ( ما تجيبوا حي ) غايتو أكتر حاجه عاوزة ( إفتوني ) فيها لما المشير العوير يحلف بالطلاق يا ربي الطلقة بتقع علي ياتو واحدة من الثلاثة
كل ما بين قوسين إضافة برضو لراندوك الإنقاذيين ، بالإضافة للتحديث الذي أضافة سيبوية ود الباوقة للكلمات ( ككع كرع وصويحيباتها ) و ( زمزغة وأخواتها )و ( هييييييع وبنات عمها )
اووووووووه حبيبتنا مهوية ، كسرة بي موية طبعا انا اطعم شيء عندي كسرة بي موية ,, والله صحي ياخ مشتاقيــــــــن وحاتك وسآئلين منك يا بنية من طين البحر وين الحي بيك , فقدتك يعلم الله , خليتيني براي اتضهب قفا حوش بكري لي ناس (قشو أكرشو وأكلو ني ) لوووولز باقي عندهم ضنب بي جاي السعرانين ديل ، فشان كدي ما تغيبي خلينا النتبارا يا يمة في البكان ده , لامن الله يفرجا , والله يا مهوية صدقتي , الجماعة ديل فعى بدوا بالكلام الكبار وغشوا أهلنا الغبش، فعلا لحسوا مخهم بي يا رعاك الله وبوركت واغيرها من العبارات البتوحي إنه الناس دي ناس آخرة ساااااااي ، وفجعتن كشروا عن انيابهم السوداء, ربنا يحلنا منهم بركة جاه النبي لكن حكاية حليفة الطلاق دي خلي اليفتيك فيها شيخ باوقة قدس الله سره ، هو البعرفا . والله صحي تسلمي يا مها ياخ وبركة القريناك يا حبيبة
يعني ما تديهم راندوك جديد بكرة دي تلقيهو حايم في البلد بعد ما يجيروهو ليهم
والله غُلب غُلب شديد
حبااااااابك آآآ بلة اريتك طيب آآ ود أعمي , وكل العقاب بي طرفكم إن شاء الله ما يكون في زول فيكم ابى الكسرة !!
طبعا يا بلة اهلنا الكبار عندهم إن الزول ابى الكسرة معناتا مو شديد تــــب دحين إنتو إن شاء الله كلكم مافي زولا فيكم اباها
اها ناس الحيكومة يا خوي لا بدورهم زولا يوريهم نضمي جديد ولا هم زاتهم فاضين من الورجغة الفاضية ولا في زولا بلحقهم في الجغمسة اللتهم ، والله صحي وانا ابرااا منهم واستبراااا نوع نضميهم ده بجيب الكوفارة , والله صحي مالك على آى يابا شكرا للطلة الحنينة وابقى سلملي على العقاب كلـــــهم
Post: #11 Title: Re: *** الرندوق الإنقاذي *** Author: أمير فتحي Date: 04-08-2012, 08:14 AM Parent: #10
عاشت ثورة الإنقاذ الوطني ...ثورة المهمشين التي ترندق كما يرندقون ...طيب الحجي والتمرد في شنو ؟؟؟
Post: #12 Title: Re: *** الرندوق الإنقاذي *** Author: أحمد الشايقي Date: 04-08-2012, 08:26 AM Parent: #11
إن شاء الله بإذن الله,
Post: #13 Title: Re: *** الرندوق الإنقاذي *** Author: محمد أبوالعزائم أبوالريش Date: 04-08-2012, 08:39 AM Parent: #12
Quote: كل ما بين قوسين إضافة برضو لراندوك الإنقاذيين ، بالإضافة للتحديث الذي أضافة سيبوية ود الباوقة للكلمات ( ككع كرع وصويحيباتها ) و ( زمزغة وأخواتها )و ( هييييييع وبنات عمها )
انتى ما عارفه ساى يا بت اختى دى فلسفة ضمن اجندة المشروع الحضارى دايرين يعلموا الشعب الضكرنة والمرجلة وكيفية التعامل بالعين الحمرا وشرارة وأكل الظلط تقولى لى بلاى استيشن وآى فون !!!!!
Post: #16 Title: Re: *** الرندوق الإنقاذي *** Author: مها عبد الله Date: 04-08-2012, 11:15 AM
ما لقيت فيديو ( يبعبر ) عن ( الجوطة ) و ( الفرفرة ) و ( المغصة ) الجواى إلا هذا الفيديو ... إهداء للعزيزة سوما مع فائق الحب والتقدير
Post: #17 Title: Re: *** الرندوق الإنقاذي *** Author: مها عبد الله Date: 04-08-2012, 11:49 AM
ود الباوقة بطَل ( بطبطة ) و ( زمزغة ) و ( أركز )
عزيزي القارئ الكريم : حسب ما ورد في كتاب ( سير أعلام الجُـــبناء ) وُمنشئ نظرية ( الحت والرقص ) لمؤلفة عمر بن حسن بن أحمد بن البشير المولود بحوش بانقا فى العام الهجري 1363 ، فإن ( البطبطة ) مرادف ( للتزمزغ ) أما ( التركيز ) فهو ( من الركزة ) عند العرب وهى ( الثبات ) . حدثنا بن الباوقة حدثنا عصام بن ( دقداق ) أن صاحب الكتاب كان مُولعاً بالإيقاعِ والنغمْ
العزيزة أسماء كيف تجرأين يا أخت العرب على احتقار كلمتي المفضلة (الجغمسة) واسقاطها في درك لغة بني سلطان..؟؟؟ كده ما ظريف منك والله..! ياخ دي ألذ وأعبر (من معبرة) كلمة سودانية على الاطلاق .. تستعمل في كل أصناف الافعال والكلام .. فياما جغمسنا امتحان وجغمست طبيخ ولبست توب مجغمس وكتبت جواب/ايميل مجغمس وشفت زول مجغمس وسي السيد جاب لي هدية مجغمسة بمناسبة عيد زواجنا وجاتني زيادة مجغمسة في الراتب...إلخ. ومن محاسن الصدف أو مبالغ الجهل (الله أعلم) أنه سيدنا الرئيس ما استعمل الكلمة المنغمة الجميلة دي واستعمل بدلها كلمة دغمسة فدغمها ودمغها ودمسها لمَا عبرت عن مقدار عدم تقديره للنغم والجمال.. رغم أنه صحيفة الراكوبة الالكترونية ما شايفة حتة عدم تقديره للجمال دي بدليل انها مشروقة بزوجته وداد لدرجة حشر صورتها في أي موضوع قريب أو بعيد الصلة بيه أو بيها. يعني لو كان البشير قال جغمسة كان حردتها ليوم الدين. غايتو يا سوما أنا قدر ما ركزت عشان أسمع أحمد هارون قال شنو ما قدرت أفرز كلامه .. يادوب وقع لي بعد ما كتبتيه وبعدين في حاجة كدة كيف تفوتك وانت الأديبة الأريبة.. العبارة دي (أمسح ، اكسح ، ادرش ، قشوا ، اكلوا ني وما تجيبوا حي، ما عندنا مكان ليهم ) عبارة معطونة بالصور البلاغية الجميلة.. أنسي انه الموضوع عن القتل ياخ.. (الانصرافية دي ميزة خيرة في سنوات الجدب الانقاذي.. ممكن تحلي ليك كل المر).. يعني تأملي الاستعارات البتتساقط زي حبات الرمان دي والسجع في غير اسراف في.."اكلوا ني ما تجيبوا حي" .. يا ستنا الراجل شكلوا أديب لا تغمطوا حقه – وأخيرا أوصيك بضرب الطناش والاكثار من قولة يحلنا الحلة بلة بعد أذكار الصباح والمساء .. عسى أن يحلنا الله (شفتي دي بالذات حقتنا نحن بس – ما حيقدروا يستولوا عليها أبدا :))
إجراءات قانونية ضد وزير بالقضارف أساء لمواطن القضارف: السوداني شرع المواطن عبدالمعين محمد عبدالقادر في اتخاذ إجراءات قانونية في مواجهة وزير التخطيط العمراني بولاية القضارف عبدالعظيم مصطفى البدوي على خليفة ما قال إنها إساءات لفظية تعرض لها من قبل الوزير. وقال المواطن عبدالمعين وهو محامي بالقضارف لـ(السوداني) إن الوزير ألغى تصديق قطعة أرض تخصه بعد أن تم ذلك في العام 2010م بأمر منه، مشيرا الى أنه وعند ذهابه له أمس بمكتبه تعرض لإساءات لفظية بالغة من قبل الوزير وأنه وصفه بعبارات نابية إضافة الى أن الوزير قال له (لولا أنني كنت وزيرا لطلعتك بي نعلاتي)، مشيرا الى أنه اتخذ إجراءات في مواجهة الوزير تحت رقم البلاغ (547) بموجب المادة 47 من قانون الإجراءات الجنائية، وقال إن إساءات الوزير كانت أمام عدد من المواطنين .
صلاح قوش يصف معارضيه بانهم عواليق مصطفى عثمان يصف الشعب السوداني بأنهم شحاديين كرتي يصف الصادق المهدي والميرغني بالسجمانين اما نافع عاوز بوست كامل فتأملي
اليومين دي بتكون مولعة ناااار فيما بينهم .. والله صحي لا حولااااااااا إنتو كلكم كنتوا بي جاي وانا ما عارفة؟ وانا اقول بوستيني كراه ود الباوقة اثناء ما بصوقر عشان يخفي معالم رفاقته وكدة !!! بعدين يا مهوية ياخ كان تكوركي لي بالحيطة سااااي عشان اجي اشوف الضيوف
نديك واحدة برضو، فكوها في السوق او بالاصح فكاها كبيرهم
الله ليكم من جوافة المناصير
حقيقة كان قاصد يقول شنو ما عرفت، الا نديها سجارة غايتو الناس ديل معرفتهم مكلفة كيف
أحمد ود عمي ابنعوف حبابك يا الدخري إنت عارف آآ أحمد آخوي الناس ديل ماهم بطينين ، جنهم لهطي يكون الوكت داك اشتهالو عصير جوافة ، والله صحي وبما إنه ثقافتهم بطونهم ومخهم المجوف ده , البتجي حايمة كلها برموها بردلب ,, والله صحي
تسلم يابا وشر البلية ما يضحك
Post: #23 Title: Re: *** الرندوق الإنقاذي *** Author: مها عبد الله Date: 04-17-2012, 06:10 PM Parent: #21
Quote: بعدين يا مهوية ياخ كان تكوركي لي بالحيطة سااااي عشان اجي اشوف الضيوف
يا سوما ياخ أنا فاضيه ما شايفاني شغالة ( مجاهدات ) بسبب ( الإبتلاءات ) التى أصابت الوطن
ود الباوقة ( نحتسبه ) شهيدا عند الله
كل ما بين قوسين إضافات للراندوك الإنقاذي
سوما عليك الله أضيفي ( نفرة ) الأيام دي زاد إستعمال هذه المفردة
Quote: عاشت ثورة الإنقاذ الوطني ...ثورة المهمشين التي ترندق كما يرندقون ...طيب الحجي والتمرد في شنو ؟؟؟
حبابك يا أمير والله لكن ما تبالغ إنت كمان !! الحجى والتمرد ده جابوه بي الهينة يعني ولا لقوه في طرف راكوبة ؟؟ ما كلو بي لحس الكوع وعفص المراكيب !! افو افو ,,, دي بتدورلها درس عصر ياخ ؟؟
محمد أبو العزائم حباب ابوي ود ابوي والله صدقت ماسورة مصدية كمان لكن لقيت ذاكرتك ما شاء الله وتبارك الله حدييد اقوى من مواسيرهم الطرور والله صحي هي داب ماسورة بس ؟ مها أم محن جابتلها فيديو برااااااااه فيه عشرومية كلمة معتبرة ، والله صحي وكمان بحكي في قصص ومحن قاطعة من نافوخو المصوفن , وحكمتو باااالغة قايل روحو متجلي !
هسي يا ابو حميد ياخ هذي دي مش مفروض نضمها لسجل الرنوك الراقي شوية , وده ياهو جيلهم المتحضر ؟ ما قصرت نكتها لي من وين هسي يا هذا يا إنت ؟؟؟؟
سلام يا ود الباوقة المتزمزغ والله يا ود الباوقة إت براااااااك بتدورلك قاموس ليك شخشيا والله صحي دحين اسامي بوستاتك القاطعة من شدركم اللبخ دي مي براها بتدورلها قاموس؟؟
Quote: انتى ما عارفه ساى يا بت اختى دى فلسفة ضمن اجندة المشروع الحضارى دايرين يعلموا الشعب الضكرنة والمرجلة وكيفية التعامل بالعين الحمرا وشرارة وأكل الظلط تقولى لى بلاى استيشن وآى فون !!!!!
هلا ود الجنيد , قلت لي دايرين يعلموا الشعب الضكرنة والمرجلة ؟؟؟ واولادهم ناس حلاتو على قول ود جبرا يعلموهم شنو ؟ ديل مايهم زاتهم ناس الآي فون و آي يا ماما ,, والله صحي تشكرات يا خال ,, هسي في داعي تقول لي الناس ديل إنك خالي ؟ هسي يمسكوها لي ,, قاعدين بالمرصاد , والله صحي
Quote: العزيزة أسماء كيف تجرأين يا أخت العرب على احتقار كلمتي المفضلة (الجغمسة) واسقاطها في درك لغة بني سلطان..؟؟؟ كده ما ظريف منك والله..! ياخ دي ألذ وأعبر (من معبرة) كلمة سودانية على الاطلاق .. تستعمل في كل أصناف الافعال والكلام .. فياما جغمسنا امتحان وجغمست طبيخ ولبست توب مجغمس وكتبت جواب/ايميل مجغمس وشفت زول مجغمس وسي السيد جاب لي هدية مجغمسة بمناسبة عيد زواجنا وجاتني زيادة مجغمسة في الراتب...إلخ. ومن محاسن الصدف أو مبالغ الجهل (الله أعلم) أنه سيدنا الرئيس ما استعمل الكلمة المنغمة الجميلة دي واستعمل بدلها كلمة دغمسة فدغمها ودمغها ودمسها لمَا عبرت عن مقدار عدم تقديره للنغم والجمال.. رغم أنه صحيفة الراكوبة الالكترونية ما شايفة حتة عدم تقديره للجمال دي بدليل انها مشروقة بزوجته وداد لدرجة حشر صورتها في أي موضوع قريب أو بعيد الصلة بيه أو بيها. يعني لو كان البشير قال جغمسة كان حردتها ليوم الدين. غايتو يا سوما أنا قدر ما ركزت عشان أسمع أحمد هارون قال شنو ما قدرت أفرز كلامه .. يادوب وقع لي بعد ما كتبتيه وبعدين في حاجة كدة كيف تفوتك وانت الأديبة الأريبة.. العبارة دي (أمسح ، اكسح ، ادرش ، قشوا ، اكلوا ني وما تجيبوا حي، ما عندنا مكان ليهم ) عبارة معطونة بالصور البلاغية الجميلة.. أنسي انه الموضوع عن القتل ياخ.. (الانصرافية دي ميزة خيرة في سنوات الجدب الانقاذي.. ممكن تحلي ليك كل المر).. يعني تأملي الاستعارات البتتساقط زي حبات الرمان دي والسجع في غير اسراف في.."اكلوا ني ما تجيبوا حي" .. يا ستنا الراجل شكلوا أديب لا تغمطوا حقه – وأخيرا أوصيك بضرب الطناش والاكثار من قولة يحلنا الحلة بلة بعد أذكار الصباح والمساء .. عسى أن يحلنا الله (شفتي دي بالذات حقتنا نحن بس – ما حيقدروا يستولوا عليها أبدا :))
رمانا بتنا الحنينة العا########ا ’’ مشتاقين يعلم الله يا دفعتنا في الحلة ,, حلة بكري طبعا قبال ما يجور على ابكرونا الهكرونا ويشيلوا إسمي وإشتراكي يا بت امي في صمة خشمي ,, دغمسة ساااااي والله صحي اها يا اخت العرب قلت لي ويحي لي ولا ويحك إنتي يا رمونة ’ عارفة نحن السودانيين بالذات في الحلة والفريق والحي وغيرها من امكنتنا المحببة عندنا لغة كدة فريدة في نوعها ، شفتي فريدة دي كيف .؟ يعني تجيك واحدة تقول ليك والله يا رمانة احكي ليك نكتة إلا( تتشنقلي وتتفنقلي) من الضحك نوع من المبالغة وكدة ولا يجوا يقولوا ليك الليلة المطرة جات بي شعفوفتها , اها نوع ده كتيييييير وعلى قولك الجغمسة زاتها لكن نوهاااائي ما بخطر على بالنا اللغة البيتية لغة ناس الحلة والفريق والصاحبات وصبية الكورة ممكن يتناولوها في يوم من الأيام اولى الأمر ويخاطبونا بيها على الملأ !!! زمان في حصة العربي لو إتكلمتي مع الأستاذ بي إسلوب دارجي ولا قدرتي غلطتي في غلطة صغيرة إنشائية ، الله قال بي قولك لكن الزمن ده شفعنا الله يكون في عونهم بتجيهم مقصطرة ومعلبة في علب من فوق , والله صحي تسلمي يا رمانتنا الحنينة وحقك علينا ,, والله صحي
Quote: إجراءات قانونية ضد وزير بالقضارف أساء لمواطن القضارف: السوداني شرع المواطن عبدالمعين محمد عبدالقادر في اتخاذ إجراءات قانونية في مواجهة وزير التخطيط العمراني بولاية القضارف عبدالعظيم مصطفى البدوي على خليفة ما قال إنها إساءات لفظية تعرض لها من قبل الوزير. وقال المواطن عبدالمعين وهو محامي بالقضارف لـ(السوداني) إن الوزير ألغى تصديق قطعة أرض تخصه بعد أن تم ذلك في العام 2010م بأمر منه، مشيرا الى أنه وعند ذهابه له أمس بمكتبه تعرض لإساءات لفظية بالغة من قبل الوزير وأنه وصفه بعبارات نابية إضافة الى أن الوزير قال له (لولا أنني كنت وزيرا لطلعتك بي نعلاتي)، مشيرا الى أنه اتخذ إجراءات في مواجهة الوزير تحت رقم البلاغ (547) بموجب المادة 47 من قانون الإجراءات الجنائية، وقال إن إساءات الوزير كانت أمام عدد من المواطنين .
والله محن ياسوما
اووووووووه اهلنا المنهم طولنا ، سلفر مووون شخصياااااا والله الشوق حنين للناس المن الزمن الجميل البوست ده جاب لي اهلي الحنان كلهم ,, اهلا حبابك والله والله صدقت فعلا محن ومحن تحير كل العالم العربي والأعجمي , تصرفات الناس دي كلها من طرف بهلوانية حد التأمل ده غير لغتهم الرندوكية دي ,, فعلا محن والله لكن غايتو نعلات الوزير ضحكتني حتى قهقت وازعجت الجيران , والله صحي سمح الوزير ده الله لا غز فيه بركة , وقت اصلا بدور يجيب سيرة البراطيش الله يكرمك ، ما كان يثقف روحو شوية إن شاء الله يقول مركوبي ! شويــــة مبلوعة ، والله صحي اضحك الله سنك يا سلفر مووون وشكرا أردب محنة على المرور الأسعدني ايما سعادة
و فخر منطقتنا - وليس قبيلتنا - كلامك دايمن سمح بس و الله زوجك و أخوك أحسن منك . بس الناس سكتو على البشير يغلبهم يسكتو منك .
سلامى لأطفالك الأخيار .
ود ستنا
Post: #36 Title: Re: *** الرندوق الإنقاذي *** Author: مها عبد الله Date: 04-18-2012, 03:30 PM Parent: #35
سوما جابت ليها ( ووب وأحي كمان ) والله صحي
إضيفى للراندوك هذه الكلمات من خطاب المعتوه نافع ( الإنتفاشة الكاذبة ) هل لها علاقة ( بنيفاشا ) أقول ليك حاجة ( أعفصي ) الرابط التحت دا و ( لُخي ) أى حاجة من أي سطر يعجبك
( لُخي ) دى من عندى بس مسموح للكيزان يستعملوها حلاااااال عليهم
Quote: صلاح قوش يصف معارضيه بانهم عواليق مصطفى عثمان يصف الشعب السوداني بأنهم شحاديين كرتي يصف الصادق المهدي والميرغني بالسجمانين اما نافع عاوز بوست كامل فتأملي
سلام وجمعة مباركة يا أهلنا الواحد ما يمشي يأكل ليه لقمة يجي يلقى البوست ختر الجنيد كدراي ,, والله صحي
اها يا سلفر قلت لي الجماعة قوش مسميهم عواليق ؟؟؟ عليك الله العولاق منو هسه ؟ استغفر الله وةالنهار جمعة , كل إناء بما فيه ينضح اما الطفلة المعجزة القال علينا شحاتين ده هو وابو العفين نافع وكرتي سيد القرعة اديتهم زماااااااااان كل واحد بوست منفرد لي حاله ، والله صحي ما قصرت معاهم كلو كلو ، النبي فيك امشي تلاوق في الراكوبة بتلقاني بي هبابي تحت النيمة فى الراكوبة وكل زول في الذكرتهم فوق اخدلوا هبتة مااااكنةفي نص صنقوروا ده غير كم زول من حبايبنا ناس الراكوبة اداهو محطات في ضهره ، خسووووووسا الشافع المعجزة , والله صحي
اماني يا حبيبتنا مشتاقين والله ، تسلمي إنتي يا غالية ويسلموا كل المعاك وجمعتكم وكل ايامكم مباركة إن شاء الله
لكن يا أماني شريطك مبالغة , ياخ الناس ديل مبدعين لامن بي هناك ، ويا بت امي ما بخجلوا نوهااااااائي من نضميهم ده !!! والله صحي يا ربي يكونوا شايفين روحهم متألقين ؟ حكمتوا بااااالغة زولا نصيح واحد فيهم مافي ! غايتو ما قصرتن معاي إنتي ومها ما يقصرن ايامكن إن شاء الله , اتحفتن البوست بالصوت والصورة , والله صحي
Post: #39 Title: Re: *** الرندوق الإنقاذي *** Author: مها عبد الله Date: 04-20-2012, 07:23 PM Parent: #38
فوق
Post: #40 Title: Re: *** الرندوق الإنقاذي *** Author: مها عبد الله Date: 04-20-2012, 07:55 PM Parent: #39
لما طلبوا من البشير يسلم أحمد هارون قال ( إحنا ما بنسلم كديسة )
الراجل دا ما قرأ فى إبتدائي ( قطتي الصغيرة سميتها سميرة ) طيب خلوها قطة ممكن هِرّة
سلام يا الحبان ، البوست ده دخلت إيدي في سحارة بكري ومرقتو نفضت الغبار الفيهو مخسووووووس عشان ملافظ الكيزان وهاكم جمعة لحس الكوع قال شنو قال مصطفي إسماعيل بدافع عن المو نافع، قال نافع ما قاصد الشعب السوداني بلحس الكوع ، لكن قاصد المعارضة تعرض عريان عادم الدلقان يا مصطفى التغيان , امانة إت ماك بليد ومخك مقلوب ولا حس كوعو والله صحي والمعارضة دي جاية من وين ؟ زرعوها ضريسة وقامت ناس ؟ ولا شذاذ آفاق ,؟ المعارضة مش من بطن الشعب ومن الشعب ولي الشعب ؟ مش معارضتها زاتها من أجل الشعب يا قليل الفهم عالم تحير والله صحي
Quote: سوما عليك الله أضيفي ( نفرة ) الأيام دي زاد إستعمال هذه المفردة
يا مهوية وينك يا خية والله مشتاقين شوقنا مطرة وغيمتنين
والله نفرة دي زي زنقة يا مها
المشكلة ناس السودان اي إسم يطلع بطلعوا منو حاجة موضة قبل كم إسبوع كده جاتني زولة لذيذة جدا فرحااانة قالت لي جابوا لي اخواتي آخر موضة توب في السودان لما شفت التوب خطوطو عرضية زي شذاذ الآفق لوولز والله صحي لكن في الوان تجيب ابو الشهيق قلت ليها يا بت امي حب الناس مذاهب ، علا انا جيني وجن اللون البطشش عويناتي اها قالت لي ياخ ده آخر موضة في السودان وإسمو زنقة زنقة والله صحي لكن هو صحي زنقة زنقة يزنقك في عيونك بي لونو ويزنقك في اللبس بي شتارتو عالم فعلا نفرة والله صحي مهوية ياخ تعالي لينا ولا انا بجيكم الإجازة سوا سوا نعمل نفرة والله صحي
