*** إشتهيت عيشة الغبش ***

إشتهيت عيشة الغبش

إشتهيت طُقطُق مطيراتنا الدُغش

من غير سلام فوق البرش

والشوق يتاوق من بعيد

غالبو الصبر

كرْوَشْ ترابنا على الجروف

دربا حنين خاتي الخدش

اشتهيت ريحة الفريق

ملخوخة بي شيتا كُتر

دوكة وملاح

مع فكة الريق الصباح

قهوة وعرق

والقلوة بتناغم البكر

اشتهيت مرقة بهيماتنا الفجر

لاحقه المراح

ديك الصباح

كبر وصاح

خابر الذكر

اشتهيت لمة عيال

عند الكنار جنب الترع

زفة مطامير المطر

اشتهيت مرقة بناتنا على البحر

سايقات نسيمات العصر

لافحات طرح

طمح الصدر

اشتهيت لمة كبارنا بلا وعد

والشورة فال عند الخدر

اشتهيت يا يمة ريحة هدمك الملتوق

ودهنك المعتوق

كركارو حر

كورتك ممسحة بالودك

بتناغم الديس البجر

قرضك معتق زى بخور

فصين لبان تيمان ضكر

ريحة مسيرتك جرْتَقَة

معجونه بى طين الصبر

غُرة جبينك يمة باقيالي ضي

في غربة الخوف والكدر

اشتهيت عيشةَ الناس الغبش

شاي الدغش

لبن الزريبة بلا عرش

زادى الحنين الفي الحكر

اشتهيت طبْعاً عدم في كل بلود

عدمانه يالزايلة ام قدود

حارياها عند اهلي الغبش

خاتية البطر

........................

اسماء الجنيد

Quote: اشتهيت عيشةَ الناس الغبش شاي الدغش لبن الزريبة بلا عرش زادى الحنين الفي الحكر اشتهيت طبْعاً عدم في كل بلود عدمانه يالزايلة ام قدود حارياها عند اهلي الغبش خاتية البطر

العزيزة الغالية / سوما

سلام

يا ست الكلم الرزين
والنغم الحنين..
حروفك شدتني
وشوقتني لريحة التراب
للاهل والاحباب..
يا يمة
يا سعد الغلابة
الله يفرحك دوما
ويرد غربة وطنا..
ونمشيه رجعة
وعودة حلوة
بين الغبش..

مودتي

Quote: العزيزة الغالية / سوما سلام يا ست الكلم الرزين والنغم الحنين.. حروفك شدتني وشوقتني لريحة التراب للاهل والاحباب.. يا يمة يا سعد الغلابة الله يفرحك دوما ويرد غربة وطنا.. ونمشيه رجعة وعودة حلوة بين الغبش.. مودتي

حبيب عزيز العزيز , ود القبائل اب طبعا رزين مو مايل
كتر خيرك يابا على الطلة الحنينة وكلامك الديمة بروي الجوف
اريتك إنت طيب وكل المعاك
والله يا عزيز الغربة دي شدة مي قاسية
مرات تقعد تفكر في الحياة الساهلة والطيبة المشتتة الخليتها بي وراك
وتتمحن في الزمن الشتت الناس بالبلود
وكتير تصحا تلقا زول من معارفك ختر في صمت
مودع دنيتنا الفانية
تتحسر على العمر البمشي وإنت مضيعوا في حاجات في الفارغة أم قدود
وتقول يا ريتني كان كنت مع الغبش الزاهدين حياتهم وشارين الآخرة بي قوة العزيمة
ربنا يجمعنا بي اهلنا اصحاب القلوب النضيفة الشفيفة
تسلم يا عزيز على طلتك الحنينة
إن شاء الله دائما سعيد ومبسوط يابا

سلام يا أسماء

والله شهيتينا حياة الطبيعة مع الحياة العايشنها وما ليها طعم دي


اشتهيت فول الملم عروشو عند العصاري وأحرقوا

Quote: إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش والشوق يتاوق من بعيد غالبو الصبر كرْوَشْ ترابنا على الجروف دربا حنين خاتي الخدش اشتهيت ريحة الفريق ملخوخة بي شيتا كُتر دوكة وملاح مع فكة الريق الصباح قهوة وعرق والقلوة بتناغم البكر اشتهيت مرقة بهيماتنا الفجر لاحقه المراح ديك الصباح كبر وصاح خابر الذكر اشتهيت لمة عيال عند الكنار جنب الترع زفة مطامير المطر اشتهيت مرقة بناتنا على البحر سايقات نسيمات العصر لافحات طرح طمح الصدر اشتهيت لمة كبارنا بلا وعد والشورة فال عند الخدر اشتهيت يا يمة ريحة هدمك الملتوق ودهنك المعتوق كركارو حر كورتك ممسحة بالودك بتناغم الديس البجر قرضك معتق زى بخور فصين لبان تيمان ضكر ريحة مسيرتك جرْتَقَة معجونه بى طين الصبر غُرة جبينك يمة باقيالي ضي في غربة الخوف والكدر اشتهيت عيشةَ الناس الغبش شاي الدغش لبن الزريبة بلا عرش زادى الحنين الفي الحكر اشتهيت طبْعاً عدم في كل بلود عدمانه يالزايلة ام قدود حارياها عند اهلي الغبش خاتية البطر

العزيزة سوما
ربنا يديك العافية
غايتو جو الجزيرة اليومين ديل
بشبه القصيدة دي
ولو لقيتي طريقة قدي السلك
وتعالي ليك كم مطرة كدى
وبل الشوق بالمطرة مع الغبش
كسرة
دي أول قصيدة الواحد يشمها شم موش يقراها
الله يخليك

Quote: سلام يا أسماء والله شهيتينا حياة الطبيعة مع الحياة العايشنها وما ليها طعم دي اشتهيت فول الملم عروشو عند العصاري وأحرقوا

حمد ود عمي عبد الغفار ,, شوق الأهل حنين وحار
حبابك يابا وحباب طلتك السمحة
واشتهيت معاك ريحة الدخاخين القاسمة الفريق نصين

حياة ساهلة يا حمد يا خوي
واهلها مرتاحين بعد شقاوة يوم طويل
يجروا عناقريبهم ووسط السهلة ونومة للصباح ما يصحيك منها إلا ديكا صاح
شكرا على طلتك يا حمد يا خوي

Quote: مرات تقعد تفكر في الحياة الساهلة والطيبة المشتتة الخليتها بي وراك

للاسف يا سوما دي معادلة الغربة الصعبة..
والمشكلة ان الحياة السهلة يشاركك فيها
آخرون...لهم عليك حقوق...

بينما الطيبة المشتته الخليتا بي وراك
ربما تعرفها انت أكثر ممن يشاركك هذه
الحياة الساهلة...

وقبل ذلك شكرا علي القصيدة المترعة بالحنين

Quote: العزيزة سوما ربنا يديك العافية غايتو جو الجزيرة اليومين ديل بشبه القصيدة دي ولو لقيتي طريقة قدي السلك وتعالي ليك كم مطرة كدى وبل الشوق بالمطرة مع الغبش كسرة دي أول قصيدة الواحد يشمها شم موش يقراها الله يخليك

عادل ود ابوي فضل المولي ليك السلام حنين
يعلم الله تعبيرك ملاني عافية لامن شهقت
إت يا يابا تتعلا ما تدلا شاحدة ليك الله

عارف يا عادل اخوي زمان وكت كنت قريبة رغم الغربة
بجي اتاوق كل خريف احضر لي مطرتين
امرق راسي من سوبا والباقير اشرب هواء الشرق ده لالالالا حدو
ولامن اصل البحر آخد لي جغمة من موية الطين الفي القيف
لكن هسة كيف؟؟
وحات خوتك في بلدا رغم مطرها الكتير ورغم خضرتها المتل الليل
علا ماني شامة لي لا طين لا دعاش
الله غالب
ربنا يرد غربتنا قريب
ونشبع نوم في الهمبريب
تسلم على طلتك الحنينة يا ود امي

اسماء الجنيد

سلام تربيع


قريت العنوان والله تذكرت قصة قريبنا مسك السبحة اللالوبة من والدنا المهم بعد شهرين كدة

شاف الحكاية كده ماشة سمحة جا قال لوالدنا والله انا عايز ازهد الدنيا خلاص اها والدنا سعلو

قال ليهو عندك حساب في البنك قال لا قال ليهو عندك عربية قال لا قال ليهو عندك عمارة قال لا

والدنا قال ليهو تزهد للدنيا شنو انت الدنيا زاهداك

كمان انا قلت متين اسماء فارقت الغبش عشان تشتهي عيشتهم

وقفة بس وقومة احترم
وامتنع التعليق
تسلمي و بس

Quote: تزهد للدنيا شنو انت الدنيا زاهداك

دي كلام حكم ( بكسر الحاء

Quote: اسماء الجنيد سلام تربيع قريت العنوان والله تذكرت قصة قريبنا مسك السبحة اللالوبة من والدنا المهم بعد شهرين كدة شاف الحكاية كده ماشة سمحة جا قال لوالدنا والله انا عايز ازهد الدنيا خلاص اها والدنا سعلو قال ليهو عندك حساب في البنك قال لا قال ليهو عندك عربية قال لا قال ليهو عندك عمارة قال لا والدنا قال ليهو تزهد للدنيا شنو انت الدنيا زاهداك كمان انا قلت متين اسماء فارقت الغبش عشان تشتهي عيشتهم

سيف ود عمي مساعد حبابك يابا
الغربة يا خوي قاااسية
الغبش القاهم وين في بلدا طيرا عجمي
يا حليلي انا يا خوي
يعلم الله مشتهية عيشتهم ومشتهية لمتهم الحنينة
وبالزات ايام الإجازات
باقي المطول من اهلو كلو بجيهم جاري
وتسمح اللمة في الخريف
ربنا يرد غربتنا ونسعد بي لمتنا إن شاء الله

Quote: إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش والشوق يتاوق من بعيد غالبو الصبر كرْوَشْ ترابنا على الجروف دربا حنين خاتي الخدش اشتهيت ريحة الفريق ملخوخة بي شيتا كُتر دوكة وملاح مع فكة الريق الصباح قهوة وعرق والقلوة بتناغم البكر اشتهيت مرقة بهيماتنا الفجر لاحقه المراح ديك الصباح كبر وصاح خابر الذكر اشتهيت لمة عيال عند الكنار جنب الترع زفة مطامير المطر اشتهيت مرقة بناتنا على البحر سايقات نسيمات العصر لافحات طرح طمح الصدر اشتهيت لمة كبارنا بلا وعد والشورة فال عند الخدر اشتهيت يا يمة ريحة هدمك الملتوق ودهنك المعتوق كركارو حر كورتك ممسحة بالودك بتناغم الديس البجر قرضك معتق زى بخور فصين لبان تيمان ضكر ريحة مسيرتك جرْتَقَة معجونه بى طين الصبر غُرة جبينك يمة باقيالي ضي في غربة الخوف والكدر اشتهيت عيشةَ الناس الغبش شاي الدغش لبن الزريبة بلا عرش زادى الحنين الفي الحكر اشتهيت طبْعاً عدم في كل بلود عدمانه يالزايلة ام قدود حارياها عند اهلي الغبش خاتية البطر ........................ اسماء الجنيد

يا سلام يا سلام الحبيبة سوما بت عمي الجنيد
يا سلام على الحنية والكلام البيدخل الجوف
ويستقر عميقاً عميقاً جمالاً وروعة
شكراً على إتحافنا بأناقة حرفك
الذي يقطِّر حنــــانـاً يا سوما،
الله يديك العافية على هذا الإنعاش
مع عيشة الغبش.
لكِ المحبة صادقة وعميقة دائماً.

Quote: للاسف يا سوما دي معادلة الغربة الصعبة.. والمشكلة ان الحياة السهلة يشاركك فيها آخرون...لهم عليك حقوق... بينما الطيبة المشتته الخليتا بي وراك ربما تعرفها انت أكثر ممن يشاركك هذه الحياة الساهلة... وقبل ذلك شكرا علي القصيدة المترعة بالحنين

هلا حباياك يا نزار واريتك طيب يا الحنين
عارف يا نزار لما اسافر الإجازة من ما امرق من جو العاصمة متجهة على الجزيرة
تلقاني مبحرة في شوارعنا وغبشة اهلنا
وكل ما العربية تقيف ولا تلاقي ليك زول بتكلم تتمحن في همومو البسيطة
تلقاهم جارين شواويل الخدار
ولا مخالي فيها القليل البسد عيشة اليوم
ولا يمكن يفكروا في باكر في شنو!
عكسنا نحن نخطط لي حول الليلة
وشايلين هموم الدنيا كلها
ده غير هم الغربة وضريبتها القاسية
ما اجمل حياتهم وما ابسطها
حتى همومهم ابسط من البسيط
ربنا يسعدهم ياخ ويدينا يقينهم ورضاهم
شكرا ليك إنت يا نزار لطلتك الحنينة زيهم

Quote: وقفة بس وقومة احترم وامتنع التعليق تسلمي و بس

حباب عمنا شادول حبابك بالعرض والطول
سمحة الطلة يا ضي الفريق والحلة
كتر خيرك يابا يا ضل السحابا
ربي يملاك عافية بقدر ما مليتني سعادة حد السقف
شكرا ليك بحر وقيف
وحواشات سكرنا وقت الخريف

Quote: يا سلام يا سلام الحبيبة سوما بت عمي الجنيد يا سلام على الحنية والكلام البيدخل الجوف ويستقر عميقاً عميقاً جمالاً وروعة شكراً على إتحافنا بأناقة حرفك الذي يقطِّر حنــــانـاً يا سوما، الله يديك العافية على هذا الإنعاش مع عيشة الغبش. لكِ المحبة صادقة وعميقة دائماً.

يا سلام عليك إنتي يا حبيبتنا سعاد وعلى روحك الحلوة دي
التواضع شيمة الناس الفاهمة زيك
إحساسك امانة مو حنين
بوديني اهلي وبرجعني ملانة شوق منهم وليهم
ربي يسعدك ديمة يا ست الفهم والعلم والذوق يا اصيلة ورزينة
ربي يمتعك في الدارين بركة رب العالمين
ويوفقك شقيش ما تقبلي
وربنا يجمعنا في ساعة خير يا وش الخير
شكرا يا حنينة أردب محنة ومطامير فرح بطلتك البتشبهك برااااااااك

بت عمي

حبابك ويا حليلك انت كل يوم بتأكد
انو حبوباتنا بنات عم ... والله صحي
رجعتينا لعيشة الغبش ويا حليلها
فهي خاليه من كل تعقيدات حياتنا


يا حليل زمن الاخوة
ويا حليل زمن المحنة
لما كانت الدنيا جنه
كل زول بعين اخوه
ومافي بين الناس مظنه


تحاياي

يا حليلك ياسومة نكت لينا جروحنا نكت والدم سال وغلب الشيال



والذكري جوه القليب في ترحال والله جد صورة رائعة بفتش ليها وما لاقينها


ولمن نمشي الاجازة ونسال عنها بيقول يا حليل حياة عايشة باثر رجعي جد بعزك

لانك بتقولي اللي انا عايزة اقولو


مع تحياتي وحبي واحترامي

Quote: بت عمي حبابك ويا حليلك انت كل يوم بتأكد انو حبوباتنا بنات عم ... والله صحي رجعتينا لعيشة الغبش ويا حليلها فهي خاليه من كل تعقيدات حياتنا يا حليل زمن الاخوة ويا حليل زمن المحنة لما كانت الدنيا جنه كل زول بعين اخوه ومافي بين الناس مظنه تحاياي

يا حليلك إت آآآود ابوي البشاري
سلامنا ليك شايلوا الطير الخداري
بنات عم ساي آآ ود ابوي
وحات الله بكونن تومات
والله صحي
خيتك على الهشة والشوق خانقني ومعسم قفاي
جننت شبكة التلفونات جن وحات خوتك
اها اول ما يقولوا الو سوما
اقاطعهم ليك
اوعاااااااااااااكم تقولوا يا حليل سوما
بجوعر طوااااااالي
والله صحي
ياخ اهلنا حنان وقلوبهم تريانة حنين
الله يجمع شملنا ساي ويرد غربتنا
تسلم ود البشاري وسلملي على ست بيتك يابا

تحياتي أستاذتنا أسماء الجنيد

قرأت النص البورتريه
تداعت كل الصور بأسود و أبيض كشريط فيلم عتيق
بل كادت بعض الأصوات أن تنساب إلى مسامعي ، و بعض العبق و كثير من تفاصيل تلك العيشة

دمتم

جعلتينا نجتر النقاء والصفاء والعفوية فى زمن اصبح كل من فيه يعيش حالة ما قبل الانتحار
واصلى يا ام رامى

Quote: يا حليلك ياسومة نكت لينا جروحنا نكت والدم سال وغلب الشيال والذكري جوه القليب في ترحال والله جد صورة رائعة بفتش ليها وما لاقينها ولمن نمشي الاجازة ونسال عنها بيقول يا حليل حياة عايشة باثر رجعي جد بعزك لانك بتقولي اللي انا عايزة اقولو مع تحياتي وحبي واحترامي

يا حليلك إنتي يا حيوتة يا الخرزة والياقوتة
يا جرتقنا المعتق بالحريرة والسيموتة
يعلم الله نفس الشعور يا يمة
معزتك من معزة اهلي العزاز المارقة إنتي من مطمورة طيبتهم
ومكندكة بي كرمهم وغبشتهم وسماحتهم الفارة الفريق صباحية
ربي يسعدك ويرد غربتك ويملاك سعادة وعافية
زي ما بتمليني فرح بي طلاتك الحنينة
وسماحة نضميك المارق من الجوف
تسلمي الحبيبة حياة
والشكر ليك خدار بلدات

Quote: دوكة وملاح مع فكة الريق الصباح

الله عليك يا بت ابوي


دوكة وملاح

مع فكة الريق الصباح

وصوت قمريي تقوقي مع النواح
وفي الدغش يجيك نضم حبوبة مع النعاج عند المراح
وامي تمسح في مسايرها من تالا ود ناس صلاح
وبنية الفريق تتبسم مكملة السماح

الأخت المرهفة ذ/ أسماء الجنيد..

التحيات لك .. ولحرفك الذي يجيد التغلل في المسام ..

كوني بخير،


أخوك/ الأرباب

Quote: دي كلام حكم ( بكسر الحاء

صدقت اخي عثمان
فعلا اهلنا الكبار كلامهم كلو حكم ومعاني نبيلة
شكرا لمرورك الجميل

Quote: تحياتي أستاذتنا أسماء الجنيد قرأت النص البورتريه تداعت كل الصور بأسود و أبيض كشريط فيلم عتيق بل كادت بعض الأصوات أن تنساب إلى مسامعي ، و بعض العبق و كثير من تفاصيل تلك العيشة دمتم

ابو جهينة يا ريس حبابك واليوم السعيد اللينا جابك
إت زاتك يا الحنين طالع من باقي الزمن السمح
إحساسك بالحاجات بشبه دواخلك النقية وأحاسيسك الملونة بجمال كل الفصول والأزمنة
ربي يسعدك ديمة وشكرا مارقة من الجوف لطلتك القمر دورين

Quote: جعلتينا نجتر النقاء والصفاء والعفوية فى زمن اصبح كل من فيه يعيش حالة ما قبل الانتحار واصلى يا ام رامى

هلا والله وحباب ابو رامي
طلتك براها شوفة كل الأهل والحبان في كل مكان
والمواصلة ما بتجي يا ضراي إن ختيت سندتك لي بي عزيمتك المالياني يقين
تسلم يا ابو رامي ويديك الف عافية يا رب

Quote: الله عليك يا بت ابوي دوكة وملاح مع فكة الريق الصباح وصوت قمريي تقوقي مع النواح وفي الدغش يجيك نضم حبوبة مع النعاج عند المراح وامي تمسح في مسايرها من تالا ود ناس صلاح وبنية الفريق تتبسم مكملة السماح

ود ابوي جبريل حبابك آآآلحنين
وإت دميعاتك اقرب من خيتك سوما
وآشريري من حالنا والغربة الهردت حشانا
لا متين آ طارق آ خوي؟؟
الحيل انهد والقليب بقى رهيييييف بدور ينقد
لينا الله آآ يابا
علا قوقاي القمري ده آآ طارق امانة مو حنين
امانة ماهو ببكي الشدر الواقف طولوا
ربي يرجعنا اهلنا سالمين تامين بركة رب العالمين
تسلم يا الحنين

Quote: الأخت المرهفة ذ/ أسماء الجنيد.. التحيات لك .. ولحرفك الذي يجيد التغلل في المسام .. كوني بخير، أخوك/ الأرباب

حباب الأرباب ضل السحاب
طلتك بتجيب المطر
وبتضاحك القمر
وبتدندن غنيواتنا البكر
حباب الطلة يا ود الفريق والحلة
شكرا قدر سماحة طلتك يا الأرباب
ربي يسعدك ويملاك عافية
بقدر ما مليتني فرحة بي طلتك الندية
شكرا لمة أهل عصرية

Quote: إشتهيت عيشة الغبش إشتهيت طُقطُق مطيراتنا الدُغش

كلام زي السكر

ما أحلاك

شكرن كتيرن!

إبداع لايشبه الأ اسماء الجنيد...الله يرد غربتنا كلنا...لكن بيني وبينك يا بت الجنيد برااااانا عملناها في روحنا....ماااااالو بلدنا ....والله شبعاً بلاهم جوع مقداره خمسين الف سنه...والله يا سوما ياختي غربه لي غربه وغربة امريكا دي طعمها بره....دمتم. 

غايتو يا اسماء تزعزعى يقين القانع بنوع
كلامك الطاعم ده..
الواحد لا يعرف يشكرك واللا يداعيك
الله يخليك بس ولا ازيد،،،

Quote: كلام زي السكر ما أحلاك شكرن كتيرن!

وطلة كلها حنين يا حبيب نورتنا
ما اجمل بهاك إنت يا الحلو غناك
شكرا ليك إنت يا السمح وزين

Quote: إبداع لايشبه الأ اسماء الجنيد...الله يرد غربتنا كلنا...لكن بيني وبينك يا بت الجنيد برااااانا عملناها في روحنا.... ماااااالو بلدنا ....والله شبعاً بلاهم جوع مقداره خمسين الف سنه.. والله يا سوما ياختي غربه لي غربه وغربة امريكا دي طعمها بره....دمتم.

هلا بالحبيبة الغالية منال بت عمي الطاهر
ست القليب الكبير وبالمحنة عامر

والله صدقتي يا منال
كل ما اقعد احسب في السنين القضيناها في غربة السجم
بعيدين من الضحكة واللمة والونسة
والفقدة الصباحية
تتمني لحظات مع الحنان
متجمعين في شاي الصباح واللقيمات ويجيك كم زول داخل ولا يناغم بي فوق
ورغم إنه شاي الصباح كبايتين بي صحن لقيمات
لكن تلقي روحك منتظرة صينية الفطور عبى جمر وبطنك خاوية
تفطري بي مزاااااااااج حتى لو كانت الصينية فيها ملاح نعيمية وصحن شعيرية
وتقبلي على الشاي اب نعناه وجبنة الفطور بي بخورها يناغم الجيرا
وتحت الشدرة الوسيعة يتلموا بي بساطتهم ونسة وضحك ومنهم من جاية طابة ملوخيتها عشان يساعدوها في الوريق
ومتين تجي وجبة نصة نهار
مرة قراصة تمر ومرة بليلة ومرات مديدة بي سمنها البلدي
تتمددى تأخدي ليك نومة بعد الضهر وبعد شوية تشمي قدحة التوم لي الملخوية الإتورقت بي العون الذاتي
تأكليها بي سلطة وطرقات كسرة
وتقومي تشوفي الحاصل في الفريق
لامن يجي شاي المغيبر واللبينة الجاية من المراح
آآآآه يا منال سويناها في رقبتنا برانا وبرضو بنقول قسمتنا نجي نعيش مع العجم وبلدنا الميجوع بقى طاااااارد
تسلمي يا حنينة على الطلة مرقتني معاك في فريق قدام
ربي يرد غربتك وغربتنا جميعا ونعيش باقي العمر مع الناس الملانة طيبة وحنين

اخر اجازة كنت في السودان يا استاذتنا الغالية اسماء الجنيد
كنت قاعد جنب امي اعصر ليها في كرعيها الذين تعبتا من الجري والرحيح وراي عندما كنت صغيرا وشقيا ومتعبا
والقعدة دي في نص الحوش الذي ان رسلت الشافع اجيب ليك من ركنو فردة نعالك التي طارت مع عنفيضة دحيش احمد اخوي
امش الشافع وما اجيك راجع فالمسافة تنسيه ما ذهب اليه ولا ياتي اليك بخفك ولا بنفسه
اها يا اسماء في القعدة دي تجي خالتي فاطنة ومن قولة سلام علمت بانها تحمل في قسمات وجهها امرا جلل
وبالفعل بدأت تسرد ما اتت من اجله على الفور دون مقدمات
يا خادم الله اختي انا جيتك لامر مهم خلاس ان قضيتي لي كتر خيرك وكان عاد يا بت امي ما قضيتي لا حاشا
جبدت امي كرعيها من راحة يدي وقالت لي كدي يا ولدي حود شوية انشوف خالتك دي مالا .....
خير يا بت امي ... شن جاك
خالتي فاطنة : انقول ليك يا بت امي .... ديكي اللحمر ما بتعريفهو ؟
آي بعرفوا تب .... مالو ماااااااااات
الفظيفها من خشمك آ بت امي اموت عدوهو ديك بخيتة بت عمي احمد
ديكي كان قاعد مع جداد بخيتة بت عمي احمد في امان الله ومولد ليها جدادا ولادة الفورة
قامت الليلة جابت ليها ديك ما اياهو المعولق القبيح نافش ريشو زي اليوم الشال احمد اخوي
وات يا الديكة .... الديك الديك حارب الديك .... زعطك زعطك ات يا ديكي عافية منو زعط ديك بخيتة بت عمي احمد
وجاتني جارية العرق اتخرت منها وزعلانة وفرررررررر جدعت لي ديكي في بطن البيت وخترت وقالت لي تاني
ديكك دا كان جاني قسمت بابوي كان اجيبو ليك فطيسة
اها اسع ربطو في كراع العنقريب وجيتك قلت اشاورك قبل ما اجيبو ليك
اها شن قولك
احتارت امي في الامر ولكنها فاجأتها بانه لقيت ديكا الكان رايح منها وديكين في دكة واحدة يصعب تعايشهما
فاخبرتها بقصة لقيان ديكها وخاب ظنها وكادت ان ترجع دون ان تبل ريقا بموية
لانها حلفت اكان غرضا ما انقضا ما تشرب لا موية ولا جبنة
فحاولت ان اتدراك الموقف وتدخلت في الامر وقلت لي خالتي فاطنة ات ديكك دا ما تبيعيهو
قالت لي الليام دي الجداد رخيس بخليهو لحدي ما اغلى الجداد والديك اجيب الشي الفلاني
طيب يا خالتي فاطنة بعد اغلى بجيب كم ؟
اكان تلاتين ولا كان اربعين
اها يا خالتي انا بديك فيهو خمسين رايك شنو ؟
فضحكت خالتي فاطنة ضحكة لو دفعت مقابلها عشرات الخمسينات ما حصلت عليها
واخدت خمسينها حامدة شاكرة
واخذت امي فورا حق البصل والزيت وخرجت خالتي فاطمة قبل ان ينفطر قلبها بذبحه الذي اصرت عليه
الوالدة خوفا من اخذها القروش ومعاهو الديك .....
.
.
تحياتي استاذنا واميرتنا اسماء الجنيد

Quote: غايتو يا اسماء تزعزعى يقين القانع بنوع كلامك الطاعم ده.. الواحد لا يعرف يشكرك واللا يداعيك الله يخليك بس ولا ازيد،،،

ود الموج يعلم الله متقريفة لي لي دقة مطرة نصصصصة نهار ونقعد نتضاير بي فرق البيوت ونتلص على الحيطة
واقرب حوش وكوشك نجي نابلين
يتلقوك بي فرحة
تعالي جاي تعالي كدي هاك الهدم ده لا حولا يا بتي مالك ما جيتي داخلة من بدت تنقط
والله قلت إمكن تسكت
عاد كيفن تسكت ام برقا قبلى دي
إن ما حلبت السماء لا حدو آ بتسكت يا بتي دي
عاد إنتو يا حليلكم يا ناس برة ما بتعرفوا مطر بلدكم
كدي يا بت فوري اللبينة دي سوي لي خيتك سوما شاي بي عرق
كان يبرد جوفها من الهواء الششربتوا ده
الله يكفيك شرها المطيرة دي يا بنيتي
ما يجيك انتهاب اب حمي داك
شفت كيف يا ود الموج !! النبي ما لي حق اصرخ في بلد العجم دي واقول ليهم مشتهية مطر بلدي ودعاش بلدي الريحة طينو بتصحي الغمران !!
شكرا لطلتك الحنينة يابا

Quote: إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش

سوما زكرتينى الساريه التى تبدا طقطق فى بيت البرش مع نسمات الصباح قبل طلوع الفجر
وان طلع الفجر لابد من عتمه لان السحب تمنع فلق الصباح وتحس با ن الليل مازال طفل يحبو
تبدا تنهال بريس بريس حتى تسمع شوووووووووو تسمع الحبوبات يخاطبن مكائيل الموكل بالمكر
كيل يا مكائيل بى الربع الكبير فتصبح البلد نفساء و النا ر ما بتولع الا بواسطة الجاز لان العود اصبح مبلول
دا جزء من عيشت الغبش

Quote: اخر اجازة كنت في السودان يا استاذتنا الغالية اسماء الجنيد كنت قاعد جنب امي اعصر ليها في كرعيها الذين تعبتا من الجري والرحيح وراي عندما كنت صغيرا وشقيا ومتعبا والقعدة دي في نص الحوش الذي ان رسلت الشافع اجيب ليك من ركنو فردة نعالك التي طارت مع عنفيضة دحيش احمد اخوي امش الشافع وما اجيك راجع فالمسافة تنسيه ما ذهب اليه ولا ياتي اليك بخفك ولا بنفسه اها يا اسماء في القعدة دي تجي خالتي فاطنة ومن قولة سلام علمت بانها تحمل في قسمات وجهها امرا جلل وبالفعل بدأت تسرد ما اتت من اجله على الفور دون مقدمات يا خادم الله اختي انا جيتك لامر مهم خلاس ان قضيتي لي كتر خيرك وكان عاد يا بت امي ما قضيتي لا حاشا جبدت امي كرعيها من راحة يدي وقالت لي كدي يا ولدي حود شوية انشوف خالتك دي مالا ..... خير يا بت امي ... شن جاك خالتي فاطنة : انقول ليك يا بت امي .... ديكي اللحمر ما بتعريفهو ؟ آي بعرفوا تب .... مالو ماااااااااات الفظيفها من خشمك آ بت امي اموت عدوهو ديك بخيتة بت عمي احمد ديكي كان قاعد مع جداد بخيتة بت عمي احمد في امان الله ومولد ليها جدادا ولادة الفورة قامت الليلة جابت ليها ديك ما اياهو المعولق القبيح نافش ريشو زي اليوم الشال احمد اخوي وات يا الديكة .... الديك الديك حارب الديك .... زعطك زعطك ات يا ديكي عافية منو زعط ديك بخيتة بت عمي احمد وجاتني جارية العرق اتخرت منها وزعلانة وفرررررررر جدعت لي ديكي في بطن البيت وخترت وقالت لي تاني ديكك دا كان جاني قسمت بابوي كان اجيبو ليك فطيسة اها اسع ربطو في كراع العنقريب وجيتك قلت اشاورك قبل ما اجيبو ليك اها شن قولك احتارت امي في الامر ولكنها فاجأتها بانه لقيت ديكا الكان رايح منها وديكين في دكة واحدة يصعب تعايشهما فاخبرتها بقصة لقيان ديكها وخاب ظنها وكادت ان ترجع دون ان تبل ريقا بموية لانها حلفت اكان غرضا ما انقضا ما تشرب لا موية ولا جبنة فحاولت ان اتدراك الموقف وتدخلت في الامر وقلت لي خالتي فاطنة ات ديكك دا ما تبيعيهو قالت لي الليام دي الجداد رخيس بخليهو لحدي ما اغلى الجداد والديك اجيب الشي الفلاني طيب يا خالتي فاطنة بعد اغلى بجيب كم ؟ اكان تلاتين ولا كان اربعين اها يا خالتي انا بديك فيهو خمسين رايك شنو ؟ فضحكت خالتي فاطنة ضحكة لو دفعت مقابلها عشرات الخمسينات ما حصلت عليها واخدت خمسينها حامدة شاكرة واخذت امي فورا حق البصل والزيت وخرجت خالتي فاطمة قبل ان ينفطر قلبها بذبحه الذي اصرت عليه الوالدة خوفا من اخذها القروش ومعاهو الديك ..... . . تحياتي استاذنا واميرتنا اسماء الجنيد

يا حليلن يا ود البوش ناس خادم الله وفاطنة وبخيتة
الحياتهم اسهل من مما نتخيل وابسط مما نتصور
مشاكلهن وهمومن في الدنيا الزايلة دي ما تزيد من مشكلة ديك خالتك فاطنة
او عتود حاج فلان
لا عندهم هم غربة ولا قرف مسؤلية تعسم المخ قبال الضهر وتشيب الرأس
اذكر مرة في الإجازة جاتني واحدة من الأخوات شايلة هموم الدنيا في قلبها
فهمت من دخلتها على مع المغربية عندها غرض ودايره توصل معلوماتها فى المغارب وبعيد من ناس البيت
اها حسيت بيها تمرق في الكلام زي الصخر ة من الجبل
وبي طبيعتهم اهلنا ديل حساسين وعينهم ملانة رغم الفقر وضيق العيشة
بادرتها ضاحكة ياخ الحال من بعضو يا خية قولي
قالت لي واله يا سوما مقروضة فيك اختى الصغيرة فلانة نجحت وشالوها في الجامعة الفلانية
وابوي قال لي مافي غير سوما تحلنا من المطب ده
قولي ابشري والله يقدرني
تصور كل طلبها شنطة قديمة تلم فيها اغرض البنية الماشة تدرسوما اكتر شنط المغتربين زي ماك عارف
قلت ليها بس؟؟؟
عاينت لي وانفرجت اساريرها
ده انت قايلاهو يا سوما غرض ساهل؟؟؟
يعلم الله 3 يوم ما نمنا واختي مهمومة وعارفة قلة الحيلة
دخلتها جوة البيت قلت ليها اختاري اي شنطة
كل الشنط كبيرة ,, قالت لي لكن ديل ما كبار وغاليات
قلت ليها كتير بنجي بي الشنط دي وبنخليها فاضية وبنرجع ما تشيلي هم
اخترت ليها شنطة شالتها وطلعت
قالت لي الليلة البيت كلو بنوم
تاني يوم قالت لي لامن جيت داخلة ابوي قعد في نص السرير واتدعا ليك لامن دمع
بكتني باقي الليل كلو يا ود البوش
عليك شوف دعوات وامنيات زي دي عند ربنا إن ستفوها لي في الشنطة دي ما بتكيلها وتملاها وتفضل؟
قلت ليها يا حبيبة دي شنيطة فاضية لو كان ملانة كان سويتوا لي شنو ؟؟
قالت لي السويتوه نحن عارفين قدره قدر قلة حيلتنا,,
عجبتني فرحة خالتك فاطنة
ربي يفرحك ديمة
ويسلموا اهلنا الغبش

سوما ازيك وكيفنك اريتك طيبه
انقول ليك كلام انا من جيت راجعه من الاجازه مسكني جن المرض الانتي بتنضمي بيه ده
وعليه قلت البيان بالعمل اه قمت لفيت بكراع واحده لحدي مالقيت بيت في ارض الله دي وفيه جنينه
اه قمت الملم في حطب الراكوبه واليومين دي ناويه افتش كرعين لي الهبابي طبعا من زمن اشتريت المروق والعراضات
وبعد ده كلو ياريتو يخفف من البي

Quote: سوما زكرتينى الساريه التى تبدا طقطق فى بيت البرش مع نسمات الصباح قبل طلوع الفجر وان طلع الفجر لابد من عتمه لان السحب تمنع فلق الصباح وتحس با ن الليل مازال طفل يحبو تبدا تنهال بريس بريس حتى تسمع شوووووووووو تسمع الحبوبات يخاطبن مكائيل الموكل بالمكر كيل يا مكائيل بى الربع الكبير فتصبح البلد نفساء و النا ر ما بتولع الا بواسطة الجاز لان العود اصبح مبلول دا جزء من عيشت الغبش

حبابك ود عمي المحرب تسلم يا الحنين
والله وصفك بديع يا ود البطانة الرويانة وتريانة
يا حليهم اهلنا يا خالد يا خوي ,, والله اليومين ديل قالوا امانة خريفهم مو اخضر ورويان.
اختي في إجازة في الحلة قالت لي جو خريفي ماطر
لو شفتي القعدة تحت الشجدر وشراب الجبنة مع اللمة والونسة والضحك
تقولي إن شاء الله الإجازة ما تخلص
قلت ليها كان بي مرادي اطير فر ارك وسطكم
اهلنا سمحين بي بساطتهم وطيبتهم
تسلم يا ود عمي الكلس , سلام ليك وللعقاب بطرفكم

Quote: سوما ازيك وكيفنك اريتك طيبه انقول ليك كلام انا من جيت راجعه من الاجازه مسكني جن المرض الانتي بتنضمي بيه ده وعليه قلت البيان بالعمل اه قمت لفيت بكراع واحده لحدي مالقيت بيت في ارض الله دي وفيه جنينه اه قمت الملم في حطب الراكوبه واليومين دي ناويه افتش كرعين لي الهبابي طبعا من زمن اشتريت المروق والعراضات وبعد ده كلو ياريتو يخفف من البي

اهلا حبابك يا مني اريتك طيبة يا خية
عارفة يا منى حاجاتك دي كلها انا عندي وحات خوتك
اولا بالت بادي البيت وسط ريف الآيرش الطيبين
والمطرة النهار ما طال
الماء والخضر والوجه الحسن
والمزارع ورارنا وقدامنا بي بهايمهم البتشهيك في السعية
لكن يا خية وين القى لمة الحبان وقهوة الضهر
وين نلقى الهدم الريحتو بتشفي النفس السقيمة
وين المطايبة بالحيطة
يا بت امي خليها على الله ساي
ربنا يرد غربتنا كلنا إن شاء الله

وإشتهيت عيشة الغبش
وخدار جروفنا والتبش
رد الله غربتنا جميعا

كان القى غردي انا فرّ اطِيّر...


يا اخواني مُشتاق شوق كتيّر
شوقاً يهِد حيل البعير
شوقاً قدُر جرف الكِرير
شوق المريض للعافية
اضناهو السرير
شوق البِتِب في قيدو
للحرية في الظلمات اسير
انا شوقي للنيل والبلد،
شوقاً قسَم بالحيل كتيّر
كان القى غردي انا فرّ اطِيّر
الحق بنياتنا البِيردن
في الحفير
واشرب مع حبوبة
فنجان جبنة في ضُل العِصيّر
واخدِم مع تربالنا في وهج الهجير
وإتغدى في الرآكوبة
بدمعة وفطيّر
والنِيّمة مكدُوّن فيها زِيّر
مويّة بحر، تحلف تقول
مويّة عصير...

اكان القى غردِي انا فرّ اطِيّر
الحق مع صِبيانا لمآت النفير
ولماتنا في الحوش الكبير
ود العوض، وعلي الصغير،
عبد الحفيض و ود النِعير
يشاغلوا في شنبو العوير
ورُقادنا في حوش التمُر
فوق عنقريب، مافوق سرير
القمرا فوقنا ملجلجة
وبابور حسن يهدر هديّر
مِندلقة في الحيضان
جداولوا معربدة
وبحرنا كِيّر

كان القى غردي انا فرّ اطِيّر
للسمحة في حِلتنا اقدِل زي أمير
وإدسى في دِيسا الغزير
وحفيان ازور شيخنا الضرير
يا شيخنا واقع في حوآك
ومن الفُرآق بيك مِستجير
انا وين اروّح؟
انا وين اطٍيّر
يا اخوانا عُووووووووك
حالة البلد مازي زمآن
والغربة عِيشتا زمهرير
ياخواني عآد انا وين اطِيّر؟
انا وين اطِيّر؟
انا وين اطِيّر؟
انا وين اطِيّر؟
انا وين اطِيّر؟
؟
؟
؟
...........إلخ
ود المدير...


غايتو يا بت الجنيد يا قول حبوبتي:
الله يلزمنا الصبُر...

Quote: اشتهيت يا يمة ريحة هدمك الملتوق

يا سلام عليك إنتـي





إزّيِّك

سوما

لعلك طيبة

والله اشتهينا كلماتك التي تزيل الهم وتمسح قليل من عزابات السنين المثقلة

سلام لنبضك .. واحاسيسك .. الجميلة .. التي تتغلغل مباشرة بين المسامات .. وتضخ في الجسد

الطهر والجمال والوصال ووو يااااا

سوما

وردة ودوشوق لكي .. لقلمك .. ولقلبك

ومتابـــع فاكهتك الطازجة



----------------
التعديل لاضافة حرف

Quote: إشتهيت عيشة الغبش إشتهيت طُقطُق مطيراتنا الدُغش من غير سلام فوق البرش والشوق يتاوق من بعيد غالبو الصبر

ياسلام ياحبيبة على الكلام الحنين
الأنيق ألمن القلب ويدخل القلب ..
سلمتي من كل بلا ..
وإشتقت ليك يا خيه ..

سلام سوما

Quote: وإشتهيت عيشة الغبش

قارعين الدموع بالتصقيع
ردالله غربتنا اجمعين

Quote: كان القى غردي انا فرّ اطِيّر... يا اخواني مُشتاق شوق كتيّر شوقاً يهِد حيل البعير شوقاً قدُر جرف الكِرير شوق المريض للعافية اضناهو السرير شوق البِتِب في قيدو للحرية في الظلمات اسير انا شوقي للنيل والبلد، شوقاً قسَم بالحيل كتيّر كان القى غردي انا فرّ اطِيّر الحق بنياتنا البِيردن في الحفير واشرب مع حبوبة فنجان جبنة في ضُل العِصيّر واخدِم مع تربالنا في وهج الهجير وإتغدى في الرآكوبة بدمعة وفطيّر والنِيّمة مكدُوّن فيها زِيّر مويّة بحر، تحلف تقول مويّة عصير... اكان القى غردِي انا فرّ اطِيّر الحق مع صِبيانا لمآت النفير ولماتنا في الحوش الكبير ود العوض، وعلي الصغير، عبد الحفيض و ود النِعير يشاغلوا في شنبو العوير ورُقادنا في حوش التمُر فوق عنقريب، مافوق سرير القمرا فوقنا ملجلجة وبابور حسن يهدر هديّر مِندلقة في الحيضان جداولوا معربدة وبحرنا كِيّر كان القى غردي انا فرّ اطِيّر للسمحة في حِلتنا اقدِل زي أمير وإدسى في دِيسا الغزير وحفيان ازور شيخنا الضرير يا شيخنا واقع في حوآك ومن الفُرآق بيك مِستجير انا وين اروّح؟ انا وين اطٍيّر يا اخوانا عُووووووووك حالة البلد مازي زمآن والغربة عِيشتا زمهرير ياخواني عآد انا وين اطِيّر؟ انا وين اطِيّر؟ انا وين اطِيّر؟ انا وين اطِيّر؟ انا وين اطِيّر؟ ؟ ؟ ؟ ...........إلخ ود المدير... غايتو يا بت الجنيد يا قول حبوبتي: الله يلزمنا الصبُر...

ود ابوي المدير السلام ليك ليك كتير كتير
يعلم الله نضميك سمح علا الصبر على الحالة صعب بالحيل
حليل اللمة
حليل حوامة الحلة
حليل ناس يمة
حليل وحليل ,
الله يلزمنا الصبر يا الحنين
علا قصيدتك آ يابا يعلم الله تجري الدمعة الغلابة
وتطري الرفقة وصحابا
وقعدة المغربية مع لبينة المراح وحجوات تلوليك لا الصباح
الله غالب
شكرا يا ود المدير
وعذرا يابا على التأخير
يعلم الله ما شفت ردك والأخوان المعك إلا هسة
لك ولهم العتبى حتى ترضوا

Quote: يا سلام عليك إنتـي إزّيِّك

إزيك إنت يا الضي الحنين
ويا سلام على طلتك البتشبهك براك

مشتااااقون ياخ
سلام حنين لكل المعاك

Quote: سوما لعلك طيبة والله اشتهينا كلماتك التي تزيل الهم وتمسح قليل من عزابات السنين المثقلة سلام لنبضك .. واحاسيسك .. الجميلة .. التي تتغلغل مباشرة بين المسامات .. وتضخ في الجسد الطهر والجمال والوصال ووو يااااا سوما وردة ودوشوق لكي .. لقلمك .. ولقلبك ومتابـــع فاكهتك الطازجة ---------------- التعديل لاضافة حرف

عاطف الحنين
ود الجروف والطين
حباباك يابا
طلتك رتينة تضوي عتامير الغربة
وتقرب المسافات وتجيب خريفنا باكرية
الشوق ملفح بي طيبة اهلنا ومحنتهم البتروي الظمأ
شكرا يا عاطف مارقة من الجوف
لكل السمح الجاني من تالاك يا ود القبائل
وعذرا يابا على تأخير الرد
يعلم الله مع زحمة الحياة ما شفت المداخلات الأخيرة دي إلا قبل شوية
تسلم يا حنين
وشكرا أردب محنة

Quote: ياسلام ياحبيبة على الكلام الحنين الأنيق ألمن القلب ويدخل القلب .. سلمتي من كل بلا .. وإشتقت ليك يا خيه ..

اماني يا تومة الروح
حبابك يا حبيبة المن القليب قريبة
يعلم الله مشتهية شوفتك إنتي والونسة معاك
ربي يجمعنا في بلدنا بعدم يجمع شملو ويخدر دربو ويسهل امره
شكرا يا غالية نيلين ومقرن
وعذرا لتأخير الرد يا حنينة

Quote: قارعين الدموع بالتصقيع ردالله غربتنا اجمعين

مني بت عمي التوم حبابك يا حنينة
اللهم آمين يا منى ربنا يجمع شملنا ويرد غربتنا كلنا
وإن شاء الله في بلد الشتات ده نتقابل يا خية
باقي إنتو ما بعيدين مننا
ربي يسهل ونتقابل في الصيف ده

تسلمي يا حبيبة وعذرا على التأخير في الرد
شكرا كورية حلو مر ورمضان على الأبواب

الأستاذة/ أسماء - سلام كتير كتير
----
شن أسو
بت الجنيد متلك مشتت
لا في الأرض
لا في الجو
ورايا البلاد مطرت
الشوق لي بت المطر
حبيبات البرد في ريسينا تنقر كو كو كو
بكرف يوت دعاش القبلي
الهجيع ودرني ... هداني تب ... قت هوووو
متين أرجع أحش وأزع
أموص الكسرة فوق سنام ترعتنا
أترع واضرع متل صقر
طاير في سماء الله الواسعة
أسوي خو خو خو
الكاربني يا بت الكرام
حمل البيت كتير بلحيل
يهد الحيل ... الهجيع ودرني
هداني تب ... قت هووو
قريشاتا تطير ... متل سرب الرهو
شقيش راحت ... دا الما قدرت أوجهو كو كو
مرة مرة يجيني هاتف
مهاجر شأن اللاكل؟؟؟
تأكل القوووووووو ...
+++
حمد إبراهيم محمد دفع الله

---
يا بت الأكارم بعد إستسماحك بسأل عن د. غادة الجنيد
حرم ولدنا د. محمد الصادق هل هناك صلة قرابة بينكما
أم اسم علي اسم؟
تسلمي

Quote: الأستاذة/ أسماء - سلام كتير كتير ---- شن أسو بت الجنيد متلك مشتت لا في الأرض لا في الجو ورايا البلاد مطرت الشوق لي بت المطر حبيبات البرد في ريسينا تنقر كو كو كو بكرف يوت دعاش القبلي الهجيع ودرني ... هداني تب ... قت هوووو متين أرجع أحش وأزع أموص الكسرة فوق سنام ترعتنا أترع واضرع متل صقر طاير في سماء الله الواسعة أسوي خو خو خو الكاربني يا بت الكرام حمل البيت كتير بلحيل يهد الحيل ... الهجيع ودرني هداني تب ... قت هووو قريشاتا تطير ... متل سرب الرهو شقيش راحت ... دا الما قدرت أوجهو كو كو مرة مرة يجيني هاتف مهاجر شأن اللاكل؟؟؟ تأكل القوووووووو ... +++ حمد إبراهيم محمد دفع الله

حبااااااااااااب حمد ود عمي إبراهيم
حبابك يا العزيز عقابك
يعلم الله شهيتني اللمة والمطرة تحت الضلمة
حليل اهلنا وحليل حياتهم البسيطة وزهدهم وراحة بالهم
وحنيتهم المشتتة في السهلة
يجوك يناغموك من صباحا باكر بي محنة وطيبة خاطر
ويجوك يفقدوك نص النهار وعند المغيرب وساعة المطرة تسكت
يجوك جاريين ها ناس إن شاء الله البيوت ما جاتها عوجة !!
هسة البيوت سكنها الطير
الناس هجت سافرت وخترت
ياما ناس بانيين بيوتهم وسط اهلهم رحلوا خلوها
ويا ما ناس بدوا بنيانهم وغلبهم يتموهو
غايتو الحمد لله
ربنا يرد غربتنا جميعا إن شاء الله
كتر خيرك يا يابا على الكلام الحنين والنضمي المارق من الجوف

Quote: --- يا بت الأكارم بعد إستسماحك بسأل عن د. غادة الجنيد حرم ولدنا د. محمد الصادق هل هناك صلة قرابة بينكما أم اسم علي اسم؟

سبحان الله يا خوي قرررربت اقول ليك اختي شقيقتي
اولا غادة إسم شقيقتي الأصغر مني
والدكتورة ما غادة لكن اصغر من غادة وزوجها برضو طبيب لكن إختلاف الأسماء رغم الشبه في غسم الجد
بتكم بتكون من ناس الجنيد الفي الجريف او اهلنا القريبين للمصنع
والغريبة معظم الأسماء مسمية على جدنا شيخ الجنيد سيد افسم المسمين عليهو مشروع السكر
والقرية الفيها اهلنا بالشرق
حبابك يا خوي كلنا اهل

Quote: اشتهيت مرقة بناتنا على البحر سايقات نسيمات العصر لافحات طرح طمح الصدر اشتهيت لمة كبارنا بلا وعد والشورة فال عند الخدر اشتهيت يا يمة ريحة هدمك الملتوق ودهنك المعتوق كركارو حر كورتك ممسحة بالودك بتناغم الديس البجر قرضك معتق زى بخور فصين لبان تيمان ضكر ريحة مسيرتك جرْتَقَة معجونه بى طين الصبر غُرة جبينك يمة باقيالي ضي في غربة الخوف والكدر[/QUOTE ياسلام عليك يا أسماء يا رائعه .... كلام زي الكلام زكرنا الناس الحنان ، ياخ يالغت عدييل كده كورتك ممسحة بالودك بتناغم الديس البجر أقول ليك شنو بس الله يديك ألف عافيه قدرت ما سويت فينا من دروب الإبداع والبهره .....

---

Post: #56 Title: Re: *** إشتهيت عيشة الغبش *** Author: معاوية عبيد الصائم Date: 07-11-2011, 09:10 PM Parent: #55 Quote: شن أسو بت الجنيد متلك مشتت لا في الأرض لا في الجو ورايا البلاد مطرت الشوق لي بت المطر حبيبات البرد في ريسينا تنقر كو كو كو بكرف يوت دعاش القبلي الهجيع ودرني ... هداني تب ... قت هوووو متين أرجع أحش وأزع أموص الكسرة فوق سنام ترعتنا

---

Post: #57 Title: Re: *** إشتهيت عيشة الغبش *** Author: معاوية عبيد الصائم Date: 07-11-2011, 09:10 PM Parent: #55 Quote: شن أسو بت الجنيد متلك مشتت لا في الأرض لا في الجو ورايا البلاد مطرت الشوق لي بت المطر حبيبات البرد في ريسينا تنقر كو كو كو بكرف يوت دعاش القبلي الهجيع ودرني ... هداني تب ... قت هوووو متين أرجع أحش وأزع أموص الكسرة فوق سنام ترعتنا

---

Post: #58 Title: Re: *** إشتهيت عيشة الغبش *** Author: اسماء الجنيد Date: 08-03-2011, 02:49 AM Parent: #57 رمضان كريم يا الحبان تصوموا وتفطروا على الف خير إن شاء الله تقبل الله منا جميعا صيامنا وقيامنا وصالح الدعوات واشتهيتلي كورة حلو مر يا اخواني والله صحي

---

Post: #59 Title: Re: *** إشتهيت عيشة الغبش *** Author: اسماء الجنيد Date: 09-29-2011, 08:04 AM Parent: #58 إشتهيت لمة اهلي الحنان في كل مكان

---

Post: #60 Title: Re: *** إشتهيت عيشة الغبش *** Author: Abdlaziz Eisa Date: 09-29-2011, 08:08 AM Parent: #59

---

Post: #61 Title: Re: *** إشتهيت عيشة الغبش *** Author: اسماء الجنيد Date: 09-29-2011, 09:10 AM Parent: #60 تسلم يا عزيز الحنين وشكرا مارقة من الجوف للباقة الجميلة يا فنان يا جميل جعلت صباحب فرايحي كألوانك الفرايحية ربي يسعدك ديمة يابا