Post: #1
Title: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-12-2007, 07:32 AM
Parent: #0
لم يكن سبتنا كسبت بني يعقوب ... فقد اتتنا حيتان حبورنا شرعا.. وتنادوا .. ةاتوا رجالا وعلى كل كامري .. من كل فج من فجاج الخير.. فمن دخل سودانيز اون لاين فهو آمن .. ومن دخل دار بورداب الرياض فهو اكثر امنا ..
جاء شتات ( داود المنبر ) مستصحبا جباله .. اواه ... تحدث عن جمال اللآلئ السوداء .. حلق بنا في عالم التفرد .. وانزوى استحياءاً حين احس بانه نائح لا محالة ولسان حاله يقول :
جلست قرب النبض في قلبي
شكوت له اساي
فرق
حتى كاد يخفت
محمد عبد الجليل ( الباحث عن الناس الكتار) ارتجل مرحبا ولم ينسى الهم الاكبر حملة دارفور
من لم يمت بالعشق مات بغيره
محمد الفاتح الجنيد المحتفى به ( حلاة البلدي فوقه) جلابيته رغم انها لم تكت بيضا ولكنها كانت مترعة ومشعة.. وتقدم الطرب الحقيقي .. حقيبة الفن جمال المفردة ورصانة التعبير والاستاذ الفنان رزق
الاستاذة اسماء الجنيد بمعية المعتصم ترتدي ساريه ازرق كنيل بلادناد فاضافت للجمال نكهة لم يالفها من قبل .. يتقدم احمد ( ستار توب) صديق البورداب .. يقدم باقة ورد للمحتفى بها ... فضحكت الورود ابتهاجا بوردة المنتديات .. وادركنا بالجنيد حلاوتان
السكر .. وشهد عامية اسماء
وتدفق الشعر .. والحضور شعور .. وتناوب البورداب تعريفا بانفسهم وتعليقا واضافة ..
وتداخل الطرب مرة اخرى والاخ ود الشيخ
وسكر السمار والخمار في حان الغرام
افتقدنا وزير الري .. القنقليز يا تمرجي .. ففقد علاء حيمور بوصلته
وتفرقنا جمعا جميلا
سالني احدهم لماذا ليالي البورداب صافية وجلية كخمرة مي
اجبته
لانها
عفوية
|
Post: #2
Title: Re: ليلة القبض على سوما - اسماء الجنيد تعتقل بورداب الرياض
Author: إسماعيل وراق
Date: 08-12-2007, 07:52 AM
Parent: #1
Quote: سالني احدهم لماذا ليالي البورداب صافية وجلية كخمرة مي
|
أعمل حسابك يا دكتور مي دي بنت عمنا.. ما يجيك هشام هباني بسوط عنج كمان.
تعرف يا دكتور السبب واضح لأن أسماء تملك ناصية الحرف الجميل وتحلق بمعجبيها في عوالم الشعر الندي، كلماتها صادقة ومعتقة بريحة ودعاش البلد، ريحة التراب وحنين الأرض البكر.
|
Post: #6
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-12-2007, 10:55 AM
Parent: #2
Quote: [أعمل حسابك يا دكتور مي دي بنت عمنا.. ما يجيك هشام هباني بسوط عنج كمان.
. |
وما اجلى الهبانية
اما هشام فعارف انو اليومين ديل عنده اجندة تانية
اها لما يفضى لينا بنكون تبنا من السكر
مودتي يا اسمعيل
|
Post: #3
Title: Re: ليلة القبض على سوما - اسماء الجنيد تعتقل بورداب الرياض
Author: حمزاوي
Date: 08-12-2007, 08:16 AM
Parent: #1
لياليهم خضر ديما
بهاء وبسمة وورد
طرب وفرح
وعطر فواح
وحب ومحنة
ياهو دوول اهلي
وياهو دا السودان
سوما بت الجنيد
شاعرة العصر
مستلهمة من وادي عبقر
وسمح القول من خشم سيدو
الماحضر ليلة امس مع بورداب الرياض
لقاء سوما
اقول ليه
واأسفاي
|
Post: #7
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-12-2007, 11:00 AM
Parent: #3
Quote:
الماحضر ليلة امس مع بورداب الرياض
لقاء سوما
اقول ليه
واأسفاي ] |
ولما يتاتو
زي قدلة جنا الوزين
يتاتوا
الخال
الماشافاك امس عمره كلوا ضايع
|
Post: #4
Title: Re: ليلة القبض على سوما - اسماء الجنيد تعتقل بورداب الرياض
Author: معتصم دفع الله
Date: 08-12-2007, 09:49 AM
Parent: #1
السبت دائماً بيذكرنا بالمدرسة والعمل ..
لذلك نصحو فيه متكاسلين ..
ولكن سبتنا هذا أتى في غير العادة ..
كان يحمل في جواه لحظات فرح عارم وسعادة غمرتنا جميعاً ..
بلقاء الشاعرة والزميلة أسماء الجنيد وزوجها الأستاذ محمد الفاتح ..
لحظات حلوة قضيناها مرت سريعاً لأنها رائعة بروعة الحضور الجميل ..
وعلى أنغام مرزوق وودالشيخ إستمعنا وشدونا وحلقنا بعيداً ..
ما أجمل تلك الليلة والتي ستظل عالقة في أذهان كل من حضرها من بورداب الرياض وضيوفهم ..
شكراً دكتور محمد حسن ..
شكراً لكل البورداب الجميلين ..
|
Post: #5
Title: Re: ليلة القبض على سوما - اسماء الجنيد تعتقل بورداب الرياض
Author: معتصم دفع الله
Date: 08-12-2007, 10:46 AM
Parent: #4
يسر أسرة أبناء الجنيد وأسرة الشاعرة أسماء صديق الجنيد ..
دعوتكم اليوم الأحد 12/8/2007م بأستراحة أجا وسلمى بطريق القصيم ..
خلف مبنى الضمان الإجتماعي الصحي - تليفون 0500724230
وذلك إحتفالاً وتكريماً لبورداب الرياض والأستاذ محمد الفاتح والأستاذة أسماء الجنيد الذين يشرفوننا هذه الأيام بمدينة الرياض ..
المرجو الحرص على الحضور وإبلاغ بقية البورداب البعيدين عن المنبر ..
الزمان :
الساعة 9 مساء اليوم الأحد 12/8/2007م
|
Post: #9
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-12-2007, 11:32 AM
Parent: #4
Quote:
وعلى أنغام مرزوق وودالشيخ إستمعنا وشدونا وحلقنا بعيداً ..
.. |
وانا طبعا تشابهت علي الحروف
التصحيح راقي
شكرا يا شفيف
|
Post: #8
Title: Re: ليلة القبض على سوما - اسماء الجنيد تعتقل بورداب الرياض
Author: محمود بكر
Date: 08-12-2007, 11:21 AM
Parent: #1
ليلة السبت
كانت اجمل الليالي على المدى القريب
كنت اول الحاضرين وخفت من فشل الليلة ولكن مع مرور الوقت بدا توافد الجميع حتى امتلات الاستراحة وفاضت واستمع الجميع وانصتوا لاشعار اسماء وغناء مرزوق فكانت ليلة لاتنسى
لقد كشفت لى هذه الليلة ان صلاح شتات شاعر وذو القاء رائع يكاد يذوب وهو يلقي الشعر سقتلك الشعر يوما ياصلاح اما معتصم فقد كان مقدم الحفل ومحاور الشاعرة كل هذ كان مخبيء وين يامعتصم لكم التحية ياشباب والقادم احلى
تعريجة
استراحة اجا وسلمى ياشباب طريق القصيم مخرج حي الصحافة (هناك مخرجان اول والثاني بعده ب 20 مترا) مبنى التامين الصحي مباشرة بعد المخرج الثاني يمين الاستراحة خلف المبنى
|
Post: #10
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-12-2007, 11:36 AM
Parent: #8
| Quote: [كنت اول الحاضرين وخفت من فشل الليلة ولكن مع مرور الوقت بدا توافد الجميع حتى امتلات الاستراحة وفاضت واستمع الجميع وانصتوا لاشعار اسماء وغناء مرزوق فكانت ليلة لاتنسى ÇáãÈäì |
محمود ايها الرائع دايما سباق
|
Post: #11
Title: Re: ليلة القبض على سوما - اسماء الجنيد تعتقل بورداب الرياض
Author: Mohamed Abdelgaleel
Date: 08-12-2007, 11:45 AM
Parent: #1
د. محمد حسن - تحياتي،
صراحة مساء يبعث العافية ويطـــرد
الوهن .. كلام بسيط وعميق وسمح ..
أسماء أطلقت الشعر .. والبورداب
أحسنوا الإصغاء وجاءت تعليقاتهـم
ذكية فزادت ثراء مساء الشعر ..
كان حمزاوي نجم المساء بعد
أسماء ..
كان الغناء الجميل .. مرزوق وود
الشيخ مع ترانيم الموج ..
شكراً لكل الزملاء والمشاركيـــن
الذين منحونا هذا اليوم الجميل
|
Post: #21
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-13-2007, 07:25 AM
Parent: #11
| Quote: [كان حمزاوي نجم المساء بعد ] |
يا محمد عبد الجليل اليومين ديل الخال بقى نجم الشاشة الاول
|
Post: #12
Title: Re: ليلة القبض على سوما - اسماء الجنيد تعتقل بورداب الرياض
Author: ismeil abbas
Date: 08-12-2007, 11:53 AM
Parent: #1
ألأخ/د محمد حسن
لقد وفيت وكفيت .كلامك حلو زى سكر الجنيد.وبحق كانت ليلة أمس أحلى من السكر.حتى الصديق عادل جبارة سكرو إرتفع أمس.
الحضور كان فى غاية الروعة...وإكتشفنا لينا مزيع جديد كان محاورآ راقى وراسى (معتصم دفع الله)
0
ألق وجمال تلك الليلة مازلت أستطعمه فى لسانى.طعم بنكهة ألأخاء الصادق والوفاء ألاحدودى لبورداب الرياض الجميلين المتحدين فى السراء والضراء..إفتقدت الكثير وكم تمنيت أن يكون معنا ألأخ/هاشم أحمد خلف الله لآنه يهوى الشعر ويرحل معه أينما كان.
الجميل حمزاوى كان فى منتهى ألأبداع فى مداخلاته التى لاتخلو من الطرفة هنيئآ لنا به .
أبدع مرزوق وودالشيخ لحنآ وتغنوا بالجميل ورقصت الرياض طربآ وصديق الموج فرحآومساندتآ للفنانين خاصة مع أغانى الحقيبة المكتول فيها.
أبناء الجنيد شكلوا حضورأ جميلآ للمشاركة بالآحتفال بالآستاذة /أسماء الجنيد التى تألقت روعة فى حضورها وشعرها.وأيضآ زوجها ألأخ محمد الفاتح الجنيد الذى شكل حضورآ جميلآ بخفة روحه وسماحتها.إلتقينا لساعات بكم أبناء الجنيد وكأننا نعرفكم لسنوات..
شكرآ إخوتى بورداب الرياض لتوحدكم وتكاتفكم وحقآ
اسعدتموتا بجمالكم.
شكرآ د/ محمدحسن
إسماعيل محمد أحمد عباس...................
|
Post: #22
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-13-2007, 07:41 AM
Parent: #12
اسمعيل محمد احمد عباس
الرجل المسكون بالطرب
كان متميز الحضور
بس مكتول كمد
|
Post: #13
Title: Re: ليلة القبض على سوما - اسماء الجنيد تعتقل بورداب الرياض
Author: ahmed haneen
Date: 08-12-2007, 12:05 PM
Parent: #1
يا اخوانا والله الكلام وقف ..
والريق نشف ....
امام هذا الأبداع .. السهل الممتنع
الشكر للأستاذ محمد الفاتح ود الجنيد ..
والشكر لأستاذة اسماء بت الجنيد ...
فبمثل قدومكم هذا تزدان الرياض ..
وبمثلكم يجب الأحتفاء ....
وكانت ليلة .. خالدة من ليالي الرياض التي لا تنسي ..
ويا شباب الأعلام ..
خاصة الود الشفيف .. مقدم البرنامج .. معتصم ..
والشاعر الضليل ... شتات ..
والمخرج .. تمبس ..
عليكم الله نزلوا لينا .. قصيدة الدنيا حر
ولا ام الزين
|
Post: #14
Title: Re: ليلة القبض على سوما - اسماء الجنيد تعتقل بورداب الرياض
Author: ادم الهلباوى
Date: 08-12-2007, 01:16 PM
Parent: #13
بسم الله الرحمن الرحيم
يا دكتور ياراقى كتاباتك رصينة ووصفك راقى
شفقتنا فاتتنا المرة الفاتت لكن دى إن شاء الله معاكم
كما قدرنا نقبضها ليكم على الاقل نحوشها ليكم
الشكر موصول لكل راقى متفهم يدعم دارفور معنويا
هذا لوكان ببيت شعر رصين ... والشكر موصول للراقية سوما واهلها الكرام
حضور ان شاء الله يا ود دفع الله ..الله يحينا .
|
Post: #15
Title: Re: ليلة القبض على سوما - اسماء الجنيد تعتقل بورداب الرياض
Author: humida
Date: 08-12-2007, 01:41 PM
Parent: #14
التحية لـ( سوما ) الغبشاء ..
يعجبني ( الشعر العامي ) .. اتأمله من جميع النواحي ..
أجد في كل مقطع صورة ( شارع ) ينتهي بـ( لفة ) تقود الي فضاءات ارحب ..
ربما قد تكون مزروعة ببعض ( البرسيم اب اربعين ) و كثير من ( البشاشة ) ..
..
..
ازيك يا أومحمد أحمد ..
كيف اصبحت يا شيخ عبد المنعم ..
حاجة بتول علها اصبحت طيبة ..
لا طيبة .. راحت مع نفيسة لناس احمد ود العوض في سوبا قالت تأخد لها يومين معاهم ..
..
..
كلما اقرأ او استمع لـ( سوما ) اتذكر هذا الحوار ..
ترسم لي ( سوما ) وجه البشاشة الذي كانوا يحملوه ..
..
..
فقط تمنيت ان يواصل ( شتات الشاعر ) بقية الحوار ..!!
تخريمة ..
أما آن لهذا ( الفارس ) ان يترجل ..!!
|
Post: #35
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-14-2007, 09:24 AM
Parent: #15
تخريمة ..
أما آن لهذا ( الفارس ) ان يترجل ..!!
الاخ حميدة
فقدناك الاحد
تحيات
|
Post: #16
Title: Re: ليلة القبض على سوما - اسماء الجنيد تعتقل بورداب الرياض
Author: عادل جبارة
Date: 08-12-2007, 02:13 PM
Parent: #14
د . محمد حسن
ألف تحية ومليون سلام ..
صديقي ... رأيتك بالأمس حراً طليقاً كما لم أراك من قبل .. رأيتك متلبساً ومبتدراً حفل التعارف .. صافي الذهن منفتح الشهية مرتب الأفكار ... سرحت بنا في لغة رصينة مع محمد الغالي وآخرون بينما نحن من ضاعت منا لغة الكلام ..و مضت بنا الساعات عجلى وما كنا نأبه لسطوة الدوام و ( غلاسة ) يوم السبت حتى أفقنا على همس شتات وهو يذكرنا بأن ساعة الرحيل قد أزِفَتْ وليته لم يفعل .. ليلة لا أدري إن كان سيكررها التاريخ أم مضت برونقها وعطرها للأبد ..
شكراً لضيوفنا الكرام ... الأستاذ محمد الفاتح الجنيد والشاعرة المجيدة أسماء الجنيد ولكل من ساهم في إمتاعنا في تلك الليلة ... الأخ مرزوق وود الشيخ ...
أما أنت يا دكتور فلا زلت أؤكد أنك كنت كامل الحرية منطلق الأحاسيس ....
|
Post: #23
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-13-2007, 07:47 AM
Parent: #13
Quote: عليكم الله نزلوا لينا .. قصيدة الدنيا حر
ولا ام الزين ] |
ا########## حر
والموية بتسخن عليك
حننزل ليك الزين وامه ما الزين براه
|
Post: #17
Title: Re: ليلة القبض على سوما - اسماء الجنيد تعتقل بورداب الرياض
Author: عبدالله داش
Date: 08-12-2007, 02:58 PM
Parent: #1
أمسـيه ذات بهاء عجيب
ستكون راسخه إلى أبدٍ ما لأنها متفرده
وبها من الجمال ما لا يحتمل
الشاعره أسماء
غنت شعراً لم أسمعه منذ زمن
الحضور جميعاً .. كانو صفاءً جميل
أظنهم كحالهم عادةً ,( حميمون للقلب أكثر )
الصديق عادل جباره كنت دافع أساسى لهكذا جمع
فلك منى موده عميقه
|
Post: #18
Title: Re: ليلة القبض على سوما - اسماء الجنيد تعتقل بورداب الرياض
Author: مصدق مصطفى حسين
Date: 08-12-2007, 03:10 PM
Parent: #1
فعلا يوم توقف عنده التاريخ برهة ....
مستردا أنفاسه اللاهثه من عناء المسير و الهروله ،
و أصغى و إيانا منتشيا بالكلمات و الألق الوضىء
كلمات سوما المنمقات ... و الوجود المشع لودالبلد الفاتح ود الجنيد،
بس لو ما ناس معتصم و تمبس و شتات
قاموا على جنهّم و مارسوا هواية (أنا ) ألملم الكراسى دى ....
آآآخ يا ضهرى ،
بس الحمدلله اليوم نحنا ضيوف ... بلا كراسى بلا لمه 
|
Post: #19
Title: Re: ليلة القبض على سوما - اسماء الجنيد تعتقل بورداب الرياض
Author: ALGARADABI
Date: 08-12-2007, 04:08 PM
Parent: #1
| Quote: الاستاذة اسماء الجنيد ترتدي ساريه ازرق كنيل بلادناد |
أصيلة يا سومه
|
Post: #20
Title: Re: ليلة القبض على سوما - اسماء الجنيد تعتقل بورداب الرياض
Author: مهدى الصادق السيد
Date: 08-12-2007, 07:43 PM
Parent: #1
انه الابداع السرمدى ليلة فريدة من ليالى الرياض
على شرف اسرة الاستاذ الفاتح الجنيد ورفيقة دربه
صاحبة الحرف الانيق أم رامى (سوما ) التى اطربتنا
بروائعها العفوية التى شدت الحضور وكم تمنينا ان يطول الليل
لكى يستمر هذا الابداع المنهمر ....
ومما زاد الليلة حلاوة ....
حضور مرزوق محمود الذى غنى كما لم يغنى من قبل وكذلك الرائع
ودالشيخ .
غايتو ليلة لن يجود بها الزمان قريبا معليش للذين لم تسعفهم
الظروف بالحضور .
انت وين يا دكين ؟؟؟؟؟
|
Post: #24
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-13-2007, 08:11 AM
Parent: #1
لم تكن شهرزاد تدري ان بين بدايات الغسق ... ونهايات الليل .. تتناثر اللآلئ السوداء.. يضوع مسك الكلام .. فيعبق الكون ..
وبعد طواف القدوم .. تيممنا صوب عرفة .. ولحق بنا غير القارنين من البورداب .. آدم الهلباوي .. زعيم الاوغاد الحسيب النسيب دكين، وليد طه، حمد فتح الرحمن، والارباب خالد سعيد .. وحفتنا ضيافة آل الجنيد .. ولاول مرة يحدث اختراق لجسم بورداب الرياض من قبل جهات تحمل كل هذا الجمال.. ولم تكن تعي شهرزاد ان الليل في عرف السودايين طفل يحبو حتى وان سفرت الشمس وصارت ضحى...
اري برقين حين تجمعا رقصا
وحين تفرقا نقصا
وحين توجعا شخصا
كان للجمع حلاوة
وبالنسيم نداوة
وللشعر طلاوة
وكانت الحضرة
وفي حضرة من اهوى عصفت بي الاشواق
حدقت بلا وجه ورقصت بلا ساق
وزحمت براياتي وطبولي الافاق
عشقي يفني عشقي
وفنائي استغراق
مملوكك لكني
سلطان العشاق
تسامرنا والاستعدادا ت تعلن وجودها
واقر شتات وباعتراف مكتوب كيف كتب منشورات الجبال لاتلتقي .. ونحتفظ بحق النشر
قائد الدفة صديق الموج .. كان سهلا ممتنع
اعلن الطرب على وجوده جهرا .. لله درك يا مرزوق
مداخلات البورداب الذين لحقوا بالركب
آدم الهلباوي فاجأه الجمال.. فاختلطت عليه الايام .. فارتقى منبر الجمعة .. ونحن في نهايات امسية احد
ولكن لا تثريب عليه فقد اعلنها داوية انه ليس برجل حديث ولكنه كاتب ( مع وقف التنفيذ حتى رفع العقوبة من قبل الاتحاد العام)
خالد سعيد اسفر عن تكسره وانه في دروب الريد غرق...
دكين والتراحيب الجميلة بالجميلين الفاتح وسوما
كان للحضور النسائي صوت فطلبوا من الشاعرة انيقة الحرف .. بسيطة المفردة اشعار بعينها ولم تبخل الاستاذة عليهم بشئ من الجمال
وفارس الحوبة محمد الفاتح الجنيد اكد فحولته الشعرية واشجى السمع بروائع شعره
يوسف حمد النيل هذا الانيق الرقيق
عبدالله داش القادم من رحم القصيد اسكن الدهشة فينا
وكانت لحظة التكريم
بورداب الرياض تتقدمهم اسرة المحرب خالد وعفاف .. وتم تقديم الشهادات للمحتفى بهم..
وكانت الهدية هي قلب بورداب الرياض
شكرا آل الجنيد
|
Post: #25
Title: Re: ليلة القبض على سوما - اسماء الجنيد تعتقل بورداب الرياض
Author: salma subhi
Date: 08-13-2007, 10:58 AM
Parent: #24
شايفة دكين بي هناك كمان ...
الله يجمع الناس دايماً في الأفراح...ومع سوما
|
Post: #28
Title: Re: ليلة القبض على سوما - اسماء الجنيد تعتقل بورداب الرياض
Author: ادم الهلباوى
Date: 08-13-2007, 01:07 PM
Parent: #25
بسم الله الرحمن الرحيم
يا دكتور بصراحة بوجودكم كانت ليلتناكأنها حلم جميل
عبركم أسمح لي بهذه العبارات لهذا العزيز وغالي
الشكر موصول لهذا الظريف الذى كان نجم يتلآلآ القا
هذا المبدع الهميم الحميم الذى زادها رونقا وبهاءا
وعاشها بكل حواسه ووجدانه دون حياءا ولا وجل
عاشها كالطفل القرير في براءة وحبور فى حضور
هذا المبدع الغريد فى فرح وترحيبابهذا القادم المتفرد
الشكر موصول لك يااخى العزيز صديق الموج ضميرك الأبيض
وروحك الطيبة زودت مبتنا لك حفطك الله ورعاك فقد أضفت الكثير المثير
لهذه الليلة الأسرية المباركة لك التجلة وفائق الأحترام .
|
Post: #29
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-13-2007, 03:03 PM
Parent: #28
Quote: عبركم أسمح لي بهذه العبارات لهذا العزيز وغالي
الشكر موصول لهذا الظريف الذى كان نجم يتلآلآ القا
هذا المبدع الهميم الحميم الذى زادها رونقا وبهاءا
وعاشها بكل حواسه ووجدانه دون حياءا ولا وجل
عاشها كالطفل القرير في براءة وحبور فى حضور
هذا المبدع الغريد فى فرح وترحيبابهذا القادم المتفرد
الشكر موصول لك يااخى العزيز صديق الموج ضميرك الأبيض
.
|
انت اظنك داير تعرس ليك واحدة تانية من الجعليين
والله اتجدعت يا رونالدينو
|
Post: #26
Title: Re: ليلة القبض على سوما - اسماء الجنيد تعتقل بورداب الرياض
Author: DKEEN
Date: 08-13-2007, 12:44 PM
Parent: #24
ابو النسب د. محمد حسن
طبعا قعدة يوم السبت دي يخربني ماسمعتا بيها..
ولامن سالتا الناس قالو لي كنا خاتين الدعوة قروباوي في بوست وليد درافور..
عملوتها من ورانا بس رد الله كيدكم في نحر ليلة ليلاء فشخُـبت انوارها وتناثرت ضياءا..
كم كان ترحابا جميلا لمن يستحقون الترحاب اكواما اكواما..
شكرا يادكتور للكتابة الراقية الجميلة ..
|
Post: #27
Title: Re: ليلة القبض على سوما - اسماء الجنيد تعتقل بورداب الرياض
Author: DKEEN
Date: 08-13-2007, 12:47 PM
Parent: #24
والتحيات عطرات الى مهدي الصادق وحرمة وبناتهم في ضحكاتهم التي تشبه النجوم .
يامهدي اسمع ليك القصيدة..
امي وضعت طفلة..
كنت اريدها طفل ..
ولكنها طلعت طفلة ..
احببتها حين رايتها..
ضحكتها تشبه النجوم..
waaw...what a child
|
Post: #30
Title: Re: ليلة القبض على سوما - اسماء الجنيد تعتقل بورداب الرياض
Author: شتات
Date: 08-13-2007, 03:41 PM
Parent: #1
د. محمد حسن ..
عندما تتحرر اللحظة من أسْرِها المكاني ..
عندما تنسى أنك في نجد في قلب الصحاري التي لا تعرف الرحمة .. عندما تنسى أنك في مدينة الرياح .. تلك المدينة الداجنة ببياتها المقيم .. عندما تنسى أنك في حافة الطريق الجنوبي السريع .. وعندما تتجلى عبقرية البقعة الخرافية ..
عندما تتحرر اللحظة من قيدها الزماني ..
وتنسى أنك في أغسطس وذلك الصيف الحارق .. وأنك في أخريات زمان الغيمات .. عندما يدنو السماء ويتدلى .. عندما تصبح النجمات قاب قوسين أو أدني .. وعندما تنبض الساعة حباً .. وشوقاً .. وشعراً .. وفنا ..
عندما يكون في ضيافتك محمد الجنيد ..
ابن النيل الأزرق .. ذلك الأصيل الذي يجعلك تشعر بأنك تعرفه منذ زمن سحيق .. لأن شفافية الحواجز ترفع ستار الزمن الكثيف .. ولأن مصداقية الشعور تزرع في راحتيك ألف شتلة وتبني ألف جسر للعبور ..
عندما تكون في ضيافتك أسماء ذات النورين ..
بحضورها الملوكي وقلبها النورس .. عندما تتساقط القوافي كحبات المطر .. عندما تنتفض الآذان وتهتز كأنها لأول مرة تسمع الشعر .. عندما تشعر بأنك من قمة جبل تهوى في وادٍ عميق ..
..
.
إنك إذن بوادي القرى لسعيد ..
وعندما يوقظك الوقت انتباهاً ..
يا هذا ..
صه ..
كم تنادي ولا مجيب ..
لقد سكنت الديار .. وسكت صوت السواقي ..
عندما تفيق على صوت الكمنجات الحزينة وموسيقى الغروب ..
عندما تهتف ذات اللحظة ..
جئنا تباعاً ..
مضينا سريعاً ..
وهنيئاً للراحلين ..
..
.
عندئذ أعلم أنك من المحزونين ..
..
.
ولكن ..
العزاء كل العزاء والسلوى كل السلوى .. أن رزاز الذكرى يتساقط برفق في أرض اللحظة الحزينة ..
وختاماً ..
إلى د. محمد حسن الهامس الوديع ..
الجالس بقرب النبض والشكوى والضوء الخافت ..
إلى استاذنا محمد عبد الجليل .. وتر القوس المشدود حنيناً لنا بين البحر الطامي والنجود ..
إلى الوقور جداً .. فخرنا الاستاذ محمود بكر .. لك الشكر ضفتين ونهر من محبة ..
الولد الشقي حميدة ..
العزيز مصدق مصطفى حسين .. عبد الله داش .. اسماعيل عباس .. عادل جبارة
إلى جناحَيَّ تمبس ومعتصم .. فرسي الرهان .. وكتوف الشيل ..
وبقية الكواكب ..
كلماتكم بقع مضيئة في دفتر الوفاء ..
والتحية مجدداً لمحمد وسوما وكل آل الجنيد ..
وعلى سواحل الود نلتقي ..
صلاح / شتات
تخريمة لمن يهمهم الأمـــر :
الليل البهـيم يستوعب أكثر من نجمٍ ساطــع لو كنتم تعلمــــون
|
Post: #31
Title: Re: ليلة القبض على سوما - اسماء الجنيد تعتقل بورداب الرياض
Author: معتصم دفع الله
Date: 08-13-2007, 04:17 PM
Parent: #1
 محمد عبدالجليل متحدثاً باسم بورداب الرياض ..  عبدالمنعم الزين وعلى يساره مصدق حسين ومجموعة من الضيوف ..  محمد عبدالجليل وأحمد حسن ( ستار توب ) ..  الأستاذ محمد الفاتح زوج الأستاذة أسماء ..  الأرباب خالد المحرب ..  الأستاذ عادل جبارة ..  الأستاذ محمود بكر ..  إسماعيل وراق وصديق الموج ..  الخال حمزاوي وإسماعيل وراق ..  أحمد حنين وعلاء الدين حيمورة ..
|
Post: #32
Title: Re: ليلة القبض على سوما - اسماء الجنيد تعتقل بورداب الرياض
Author: علاء الدين حيموره
Date: 08-13-2007, 08:43 PM
Parent: #31
Quote: ميلااااد
فى ميلادى ...البكرى
الحازم نصو وخاتر يجرى
سارق الضحكة الفينى بتسرى
ودافن الآهه تأجج صدرى
تفج الوجعه الضفرت قدرى
تسند الحر اللافح يهرى
جاتنى اللحظة وشلت فكرى
ردت روحى وحلمى العذرى
الشد رحالو وهاجر بدرى
وزى بتضارا منو وبجرى
اشوف الغيمه واحرس مطرى
امكن ينزل يخدر شدرى
امكن يرحل يطول سفرى
وفى الحالتين يدندن وترى
ويحكى قصيدة ....
اصلى معاكم وجوة وحيدا...
فينى الفكره اللسة وليدا
طاوية الذكرى الواقفة عنيدة
تدافر مره وترفع ايدا
تدوزن غنوة الحانها عنيدا
دايره تشارك بى ترديدا
تناغم القيف الغازل صيدا
صفق شدرو الحت جريدا
يحكى القصة وتانى يعيدا ..
فيها الخاطر الكاسر قيدا
مدون اسفو الدامى وريدا
مطرق سيفو القاسم جيدا
وبين الدهشة الشلت ريدا
طلت نسمة قريبه بعيدا
شلعت نورا و ضوا خديدا
هلت دنيا تانى جديدا
فيها حياتنا طفلة سعيدا
تضاحك روحا تنادى نديدا
سومااا
|
دحين كان قلت اي كلام بخرب كلام سوما السمح ده ..
شكرا يا دكتوروشكرا ونحن ضيوفا على اسرة الفاتح الجنيد ..
|
Post: #33
Title: Re: ليلة القبض على سوما - اسماء الجنيد تعتقل بورداب الرياض
Author: مهدى الصادق السيد
Date: 08-13-2007, 09:16 PM
Parent: #1
اخونا شتات لا عليك فانت نجم متوهج وقدرك عندنا عالى .
ولكن قد ضاع ليلنا بتأخر الساوند وكثرة المداخلات وهناك من اخذ اكثر من فرصة
فى سلام وترحيب مكرر . المهم ان ليلة السبت تعد من اجمل ليالى الرياض فى السنين الاخيرة .
نكرر شكرنا لبوردابالرياض وتفاعلهم وشكرنا الجزيل الى الاخ الغالى الفاتح الجنيد ابو رامى
والى رفيقة دربه ام رامى التى عطرت سماء الرياض ويمتد شكرنا الى باقى الاسرة د/ رامى وايه ومؤيد والى كل ابناء الجنيد الذين اكتنذوا كل هذا الابداع الخرافى .
ويا شتات العفو والعافية وانت تعلم مدى حبنا لك ولكل الاخوان
|
Post: #34
Title: Re: ليلة القبض على سوما - اسماء الجنيد تعتقل بورداب الرياض
Author: معتصم دفع الله
Date: 08-14-2007, 07:12 AM
Parent: #1
 حوار مع سوما ..  قراءات شعرية ..  الأستاذ محمد الفاتح وأسماء وجلسة صفاء ..  سوما وإخلاص الموج وصديق الموج ولحظات تكريم ..  سوما والأستاذ محمد الفاتح ولحظات طرب ..
|
Post: #36
Title: Re: ليلة القبض على سوما - اسماء الجنيد تعتقل بورداب الرياض
Author: معتصم دفع الله
Date: 08-14-2007, 10:15 AM
Parent: #34
 الفنان الجميل مرزوق محمود ..  مهدي الصادق ..  مصدق حسين .. مهدي الصادق .. محمد الفاتح الجنيد ..  الأرباب خالد سعيد ..  عبدالله داش وصلاح شتات ..  يوسف حمد النيل أبووجيدة ..  آدم الهلباوي ..  الأستاذ الفاتح الجنيد.. شكراً جميلاً أبناء الجنيد على الليلة الرائعة كروعتكم ..  دكتور محمد حسن ..
|
Post: #37
Title: Re: ليلة القبض على سوما - اسماء الجنيد تعتقل بورداب الرياض
Author: مهدى الصادق السيد
Date: 08-14-2007, 10:51 AM
Parent: #1
شكرا معتصم دفع الله صور رائعة وجميلة
واصل باقى الصور
|
Post: #38
Title: Re: ليلة القبض على سوما - اسماء الجنيد تعتقل بورداب الرياض
Author: salma subhi
Date: 08-14-2007, 11:01 AM
Parent: #37
شكراً معتصم وكأننا عشنا معكم المناسبة برؤية هذه الصور الجميلة.
|
Post: #39
Title: Re: ليلة القبض على سوما - اسماء الجنيد تعتقل بورداب الرياض
Author: أبووجيدة
Date: 08-14-2007, 02:03 PM
Parent: #1
الغالي / د. محمد حسن
لك التحية وللأعزاء الأستاذ/ محمد الفاتح والأستاذة الشاعرة / أسماء الجنيد ...
وفي حضرتهم لبست الحروف مرقوعة الروعة فقد حلقت بنا الرائعة الأستاذة /أسماء إلى عالم آخر بمفردات تمنحنا بريق
الحياة وتدعونا لحزم حقائب فرحنا بها والرجعة إلى موطن العشق ( الوطن ) حيث المعاني وبساطتهاهي أصل اللغة، لكم
جميعاً تحية ود وتقديـــر ولي عودة .
|
Post: #40
Title: Re: ليلة القبض على سوما - اسماء الجنيد تعتقل بورداب الرياض
Author: معتصم دفع الله
Date: 08-14-2007, 03:52 PM
Parent: #1
 يوسف السماني ..  وليد طه ..  علاء تمبس في التصوير ..  حمد فتح الرحمن ..  خالد المحرب وعبد المنعم عمر ..  إسماعيل وراق ودكتور أحمد حامد ..  مصدق حسين وصديقه هاشم ..
|
Post: #41
Title: Re: ليلة القبض على سوما - اسماء الجنيد تعتقل بورداب الرياض
Author: ismeil abbas
Date: 08-14-2007, 05:57 PM
Parent: #1
جميلين يابورداب الرياض
تسلم يامعتصم .....تصويرك رهيب أم الناس أجمل؟
هذا الجمال من جمال تلك الليلة.
دمتم
إسماعيل محمد أحمد عباس..............
|
Post: #42
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-16-2007, 11:17 AM
Parent: #1
الناس القيافة
فاتو الناس مسافة
|
Post: #43
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-17-2007, 09:24 AM
Parent: #42
صباحكم زين ولمة حبان فى حوش الضيفان
الحق يقال لى يومين واكتر شايله الهم كيفن اطايبكم عبر السطور
وكيفن اوفيكم حقكم على من روعة وحفاوة استقبال لم اشهدها من قبل.
اللقاء وجها لوجه ما كان اصعب على من اللقاء عبر حروفكم النازفة
رحيق ومقطره شهد .. اغالب فى الدميعات وابلع فى العبرات منذ اللقاء الاول
والاحساس بالرهبه كيفن اوادع زى ناس ديل.
الشالونا فى كفوف الراحه وختونا فى حدقات العيون
فرحتكم دمدمتنا محنة واحساسكم بالسعاده بينا ملانا حد السقف ..
غلبتونا وهزمتونا بطيب معشركم يعلم الله
خليتونا نتضارا و نتضاير ورا هدمونا
كل ما شفناابتسامة عريضه من وجهوكم المشرقة سرور وحبور ..
كفيتوا ووفيتوا يا اولاد القبائل اسياد الطبع المو مايل
شرفتونى وشرفتوا اهلى من آل الجنيد فى كل مكان..
التلفونات تتخابت يمين وشمال من اهلى البعاد ..
شوقناهم بيكم وبى لمتكم السمحة ..
وغلبناحتى الوصف للحظات الفرح الخرافى الجمعنامعاكم يااهل من بطن البلد
عذرا ان خاننى التعبير .. احيانا تضيق العباره
**
اخوى الدكتور الرصين محمد حسن
يا رجل من الزمن القبيل.. من اين ابدأ
من كلامك المرصوص زى خرز العروس فى تلك الجلسة البديعه؟
ام من لقاء الحفلتين وانت تشع بريقا وفرحا وطربا..تضاحك الجميع
وتطرب الحرف المنمق .اخجلت كل الحروف الفى الكتب ..
احساسك كان واصل وفايت بى غادى .. معرفتنا بك لم تكن وليدة لحظه
اخوى الدكتور محمد لا اشكرك بقدر ما احى فيك روح الاخوة الصادقة
ونبل المشاعر الدافقة .والسلام امانه من ود الجنيد والاسرة الصغيرة
شكرا محنة...
اسماء الجنيد / مسقط
**
متاوقة بجيكم صاده بى مهل ياباقى الاهل
|
Post: #44
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-17-2007, 10:28 AM
Parent: #43
اسماعيل وراق ود العزة والمهلة
شريت فرحك ملون فى السهلة
ورويت بوادينا مطر
غرق مطاميرنا وفتر
جيتنا معمعم بى طيبة اهلك السمحين
موكرين طيبة وملفحين خيرين
شايل المحنة منهم درت وخريفين
بهديك طيبتهم الساكناهم سنين
وبهديك ام الزين يا الحنين
شكرا ود عمى وراق
شكرا قمر دورين
أم الزين
ضلاله بي طرقه
مشروره في حيطة
متكوله بي مرقه
رقراقا بيتاوق
بيناغم ألفرقه
حداها أم الزين
لابساها نص فتقه
بلامه في وجيها
ملتوقه بي لفقه
شايلالا خماره
في حليلة متحرقة
وقودا في اليدين
حازماه بي بتقه
جهالا بي غادي
تشابا في شفقه
تغنى وتهاتي
لصغيره بي رقه
تحجي يوماتى
خايفالو من شرقه
مقسومة في العينين
ما بتعرف ألمرقه
معيشة زى همين
تبداها بي طرقه
وحليلة في منقد
بصلاتها متفرقة
قفيفه مقدوده
مرقوعه بي ورقه
تتناول الفندك
تنادى للرفقة
كريمه أم الزين
بتقسم ألنبقه
حنينه للمسكين
تسقيه بالبقة
دمعاتها جوه العين
فرحانة مى حرقه
تلولى في الكرعين
ما بتعرف النقه
تحجي بالوالدين
لا صرخة لادقه
السمحة نواره
مرسومة ألخلقه
تتفقد ألجاره
بالنية مي زرقة
***
حمزاوى يا فاكهة الزمن الجميل
عارفاك من زمان يا كردم مكردم جواك كوم فرح
لكن اليوم داك فكيتوا للجميع بى طيبة خاطر وشوقا ماطر
سقيتنا من يمك الصافى سلسبيل غناك المارق من الجوف
خدرت جوانا جروف ونورتنا بى طلتك روعة قطوف
تسلم اخونا حمزاوى يا ود عز البلد
الشكر مننا ليك ما ليه حد
شكرا سماحة طيبتك وحلاوة طبعك ..
***
ود امى الحنين معتصم دفع الله ود الفريق والحلة
اباريك من وين وابداك كيف يا المكمل من البداية ومجمل للنهاية
عارفاك من زمان ود بيوت الطين
ملفح طيبه ومدمدم خدار جرفين
موشح غناك للتانيين
بعرفوك بالطبع الرزين
وبخبروك اهلك الزينين
عندك بقيف لا بقدراوصف ولا بخبر كيف
شاحده الكريم يوم شكرك ما يجى
نجيك فى السمح والزين
يا غرة الوالدين
نحضر جديدك ونجرتق عديلك
شكرا معتصم دفع الله
شكرا مجرتقه
( تخريمه بعد الجرتق ده دق صدرك وادينى خبرك السمح قريب
خلينى النفك زغروته تشق حوش بكرى ده اتنين)
***
الزول الرزين اخوى محمود بكر
بارك الله فيك وين ما تقبل
اسعدنى والله وجودك ومشاركتك رغم الهدوء الوراه كل الجمال والروعه
احساسك بينا كان باين ومسطر فى ملامحك . ما كان محتاج شرح منك ولا كلام
حسيناه جووووووة موكر وسط الضلوع
ولمسناه فى طلتك البهية وجيتك للحفل باكرية
اخوى محمود بكر شاحده الله السعاده تبقالك رفيق طول الطريق
والسعاده تبقالك هدم يا ود العم
وشكرا اردب محنة
***
الزول الجميل محمد عبد الجليل
الكلام الجاى منك شارب من طين البحر
والرحيق الفى حروفك دافر زى سيلا كسر
غرقنا حنين لاهلنا الطيبين
متعتنا حد الثمالة بى درر حروفك الندية
اخى محمد عبد الجليل اهديك ندى الحقول
وشذى الياسمين يا ضى شبابيك الاهل
شكرا مارقه منك وليك
شكرا جدول محنة
***
وليد الناس اخوى اسماعيل عباس
دايره اناغمك من حروفك اسرق الشتلة
المفرهده فى جروفك
شاربة منك ومن قيوفك
لفحت الضى البتاوق
نورت دريبنا المساسق
وجمعتنا تحت راكوبة محنة اهلك الجاى منهم
شكرا قدر الفرح المخزن فى القلوب
شكرا بسمة رضيع قبل الفطام
**
شكرا اخوتى الغاليين ولى عودة ايها السمحين
|
Post: #45
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-17-2007, 11:38 AM
Parent: #44
احمد حنين سيد النضم الرصين
حبابك يا دخرى الغاليين
الهرج الجانى منك سد كل المسام بى حلو الكلام
دفر كل الشين بعيد فى غربة الزمن العنيد
ووهط حروفك رويانه من بطن النيل
روت كل العروق الناشفة صبحت نديانه من ريقك الحنين
اخوى ود حنين شكرا لا تكفى يا ود القبائل المى خمج
شكرا نيلين
واليك الدنيا حر كان تبرد جوفنا شويه من نيلك الجارى ضفتين
الدنيا حر
لمن تكون صافى المطر
تسقى الحنين غيمات ضهر
تجنى الامر آخر العكر..
مافى مفر .. ما الدنيا حر..
حين تنشتل فى قيف بحر
للموج رفيق للطين وزر
ما تفتكر صفق الشدر
عايش معاك فصل العمر
ما الدنيا حر..
لازم يجف لونو السمح
يصبح كتر ..
والضل يهيم تارك الشدر
واقف حزين نصو انشطر
يمكن يعود بعد الفجر
وامكن يكون مر وعبر
ما الدنيا حر ..
لمن تلم نصين شتر
تغزل خيوط صبحت وتر
ما تفتكر نسجك غنا
لحنك عطر..
ما الدنيا حر
وكيف تنتصر وانت النفر
وسط الجيوش جاتك دفر
مزروع دريبك شوك سدر
طعناتو فى نص الضهر
والدنيا حر ..
وكتين يفيض شوقك دفر
ضامى الخدار حزمة زهر
ضافر النخيل جرتق نضر
ما تفتكر الكون حضر
والنيل طمح غطى الصخر
ما الدنيا حر ..
وكتين تصوم كايس الفطر
عز الهجير ريقك حجر
ما تنتظر فجر القدر
ما قال صبر
لكن صبر لمن فتر
ما الدنيا حر ..
ما الدنيا حر
الدنيا حر
***
اخوى الاصيل آدم الهلباوى
حبابك يا ضى القبائل
يا سيد الطبع المو مايل
بى بشاشتك تحتوينا
وبى ظرفاتك زرعت البسمه فينا
احساسك بينا واهتمامك يا اصيل
فرهد جوانا فرح
وشتل البرابى بلح
شكرا معممه بى طيبة اهلنا الهناك
شكرا قدر المسافة البينا بينك يا ود ملوك النيل
|
Post: #46
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-17-2007, 09:41 PM
Parent: #45
العزيز حميده سلام بحجم نضميك السمح
تشبيهك لبعض ما يدور من حوار لاهلنا الغبش
ده احساس نابع منك لانك بتشبهم فى طباعهم العفويه
والاحساس بيهم شىء ما ساهل يا حميده يا خوى
عيشتهم ساهلة تفكيرهم ساهل حياتهم مافيها اى عقد
زى عقد زمنا الاشتر
الطيبه ساكناهم وموكره فيهم حد النخاع
عفويتهم هى سر محنتهم الزائده ومدفقه بلا حدود
تسلم يا الحنين ود الطيبين
وبما انه عاجباك الغبشه الفى اهلنا
وخيتك سوما الغبشة من وسط الغبش
بهديك قصيدة سميتها (( الغبشة)) ليك ولكل الاخوة والاخوات زوار البوست
وان شاء الله تعجبكم
لك الود محكر اخوى حميده
وشكرا تملاك محنة وتغشا الحداك
غبشه ***
السمحه وارده على البحر
شايله الصفيحه على الصفيحه
وتوبا بالواطه بيجر..
تتناطا من بين الغنيمات المبطحه فى الدريب
وتناحى فى الديك المجفلا غادى كر..
تزازى جاى .. ومره جاى
وتنهر الكلب البهوهو خايفه وتقول ليه جر..
*****
رفيقاتا القبيل سبقنها فاتنها
ما لاقيه واحده تآنسا وتبقالا فى الحالتين وزر..
فطومه مره تمد .. ومره تجك ..
وتتعتر تقشقش فى العرق والدنيا حر..
قديمات الحمام اتغبرن .. والشبشب المهرود
يبرطش فى التراب جاراه فوق كرعيها جر..
****
احى انا .. نفسى انقطع..
تنهيده تمرق من رويحة السمحه
زى فصين درر ..
****
لمن لفت نص الطريق ..لاقت رفيقاتا القبيل
رجعن خلاص من البحر..
يتهامسن .. و يتضاحكن ..
نظراتن الشمتانه تكوى السمحه..
زى كى الجمر..
وقفت ... وبى نظرة عتااااااااب ..
انا ما رفيقتكن .. نسيتن اللمه فى ضل الشدر ؟
اتلملمت لفحت طرف توبا وجرت..
ما عاينت قداما.. فجأة اتعترت فوق الحجر..
****
السمحه مى شبه التعب والبهدله ..
لكن ظروفا القاسيه اقوى من الدهر..
فطومه ديمه شايله شغل البيت..
لا يوم شكت لا اتململت .. واياما فى الدنيا بتمر..
*****
وكتين دنت سمحتنا من طرف البحر..
رمت الصفيحه وكوعت ايدينا فى نص الضهر..
ملت الصفيحه .. اتنهدت ..
لوت الوقايه بى ضجر ..
وهطت الصفيحه.. ورجعت تجرر فى الخطى..
والمويه من خرمين تسيل فوقا وتخر..
***
وصلت خلاااااااص آخر المطاف.. والفيها كملت
من مشيوير الورود ساعة العصر...
تكت الصفيحة تكبها فوق الزوير..
البالى من زمن الجدود مال واتنخر...
فلتت ادياتا الصغار من الوهن ..والمويه سالت..
تحت كرعيها زى جدول عبر..
اتزحلقت .. اتمايلت .. وقعت تراااااااااااح ..
فى لحظه كانت سابحه فى بركة مطر..
اتاوهت .. اتوجعت .. اتندمت 00 اتحسرت
والدمع من عينيها طفر..
اتحكرت فوق طينا داك .. تندب الحظ
المعتر ليها دوم طول العمر..
تندب الحظ المعتر ليها دوم طول العمر..
***
الاخ العزيز عادل جبارة
وجودكم كان له طعم خاص ونكهه خاصة
احساسكم النبيل عبانا فرح ..
ما زلنا نجتر من ذكريات ليلتنا معكم وبينكم ايها الاخوة الافاضل
صدقت اخى العزيز / د محمد حسن كان منطلق الحريه وكامل الاحاسيس
تعبير بليغ منك ود/ محمد حسن كان حضوره بهيا امتع الجميع
الشكر لك اخى عادل من الاعماق والتحية والتقدير للدكتور محمد حسن وللجميع
شكرا اخى عادل شكرا دعوات قبيلة..
***
الشاعر الشفيف الوريف
عبد الله داش
شفيف المشاعر وريف العباره غزير المعانى
ادهشنى حضورك الشعرى
كلماتك لا تحتاج منى لتزكية ولا اطراء
بل فرضت نفسها للجميع
معنى واداء
فلك منى التحية والتقدير ايها الشاعر الانسان النبيل
وفى انتظار الكثير منك لتتحفنا بدررك الغوالى
وشكرا تشبهك براك يا دخرى الاهل
***
الفنان الاصيل المأصل مصدق
ما صدقت روحى وانت معنا تشاركنا بفرحة غامره ايها المبدع دوما
حس الفنان مباريك وين ما تقبل
نظرتك الثاقبه رغم الزحمه كانت باينه من خلال متابعتك للقاء
فيك معانى راسخة وابداع ننتظره جميعا
وجودك معنا اسعدنى ايما سعاده يعلم الله
تخريمه
قلت لى ناس تمبس خلوك تلملم الكراسى ؟
كر على .. والله لو عارفين يا مصدق ما كنا خليناهم..
كنا لميناهم قبل ما نمشى
حقك علينا المره الجاية انا كان ما شيلت تمبس الساوند ما اكون سوما
تمبس شوف ليك محل رياضة من هسه اتعلم حمل الاثقال هههههه
شكرا مصدق شكرا قدر طيبتك يا حنين
***
القردابى حبابو الهلالابى
عجبك الازرق قلت لى ..
عارف يا قردابى من اكتر الالوان القريبه لى نفسى اللون الازرق
غير انى هلالابيه على السكين
شكرا يا هلالابى يا رصين
***
شيخ العرب ابو الصادق
اخوى الكريم ود الكرماء مهدى ود حاج الصادق
اصيل ومأصل يعلم الله
تسد عين الشمس هيـــــــــع انا خيتك يا ابو الصادق
الحق يقال يا اهلنا يا بورداب الرياض الفضل كل الفضل
بعد ربنا سبحانه وتعالى لابو وأم الصادق الطيبين الكريمين
هم السبب الرئيسى والقاسم المشترك بينا والدينمو المحكر للقاء الاحبه
كانوا متابعين رحلتنا قبل ان نتحرك من مسقط
ومواصلين الاتصال واللقاء قبل وبعد ذهابنا للعمرة
ما غريبه عليهم اولاد الأصل ياها المحرية فيهم
ياكم انتو اهلى وياكم انتو سندى فى غربتى
لهم منى الشكر والتقدير ..وانا عارفه ما راجين مننا لا شكر لا تقدير
ديل ناس طبعهم غير وشبهم غير واهبين روحهم للغير
خيرهم كتير وفضلهم اكتر
ما بقدر اجازيهم غير بالدعاء
ان شاء الله ربى يسعدكم ويهنيكم
ومن كل الشرور يحفظكم ويغطيكم
ويجعل البركه فيكم وفى وليداتكم
وشكرا مطامير فرح
|
Post: #47
Title: Re: ليلة القبض على سوما - اسماء الجنيد تعتقل بورداب الرياض
Author: Abd Alla Elhabib
Date: 08-18-2007, 02:20 AM
Parent: #46
يا دكتور سلامات....ياخى والله خوفتنى بى عنوانك العجيب ده !!
ليلة القبض على سومة؟؟...والله يا سومة شلت هم لى لحظات
قلت خلاص..البوليس السعودى قبض سومة بى مخالفتين..بدل واحدة.
السرعة الشديدة..وقيادة حرمة للسيّارة!!!
بجيكم راجع...يا فاتح سلام..ناس مهند وآية وتسنيم عاملين كيف؟؟
|
Post: #48
Title: Re: ليلة القبض على سوما - اسماء الجنيد تعتقل بورداب الرياض
Author: إسماعيل وراق
Date: 08-18-2007, 07:55 AM
Parent: #47
العزيزة سوما
ربنا يديك العافية يا ست الكلام السمح وزين..
لقد إتكأنا على وريف حرفك الندي الذي طاف بنا إلى عوالم كلها حب وصفاء في زمن أشتر أغبر فكنت النسمة التي هبت علينا من كل إتجاه ونحن بديار نجد وصحاريها.
أسماء.. كم هي قاسية الغربة.. وكم هي جميلة الحياة بصحبة جميلين من أمثالك..
لك الود ولود الجنيد مليون تحية.
.
.
شكراً عزيزي د. محمد على ربطك لنا بالجمال.. فأنت جميل تحب الجمال.. أعلم ذلك يا صديقي.
|
Post: #49
Title: Re: ليلة القبض على سوما - اسماء الجنيد تعتقل بورداب الرياض
Author: معتصم دفع الله
Date: 08-18-2007, 08:57 AM
Parent: #46
سوماً شكراً جميلاً ..
شكراً بكل الطيبة والحنية الفيك ..
|
Post: #58
Title: Re: ليلة القبض على سوما - اسماء الجنيد تعتقل بورداب الرياض
Author: مصدق مصطفى حسين
Date: 08-18-2007, 11:41 PM
Parent: #46
Quote: وجودك معنا اسعدنى ايما سعاده يعلم الله
|
أختى المبدعه أسماء الجنيد
بل وجودكما أنتم أشاع فرحا حقيقيا فى قلوب كل من حضروا للقياكم ،
أشكرك على كلماتك الطيبه فى حقى مع أصدق تمنياتى لك و للأخ الكريم
الفاتح الجنيد و عاطر تحياتى له .
|
Post: #50
Title: Re: ليلة القبض على سوما - اسماء الجنيد تعتقل بورداب الرياض
Author: حمزاوي
Date: 08-18-2007, 10:01 AM
Parent: #1
سوما اختي
مسكاقمي
شاعرة بحجم السودان
الف حمد الله على سلامة الوصول
لك الشكر من قبل ومن بعد
|
Post: #51
Title: Re: ليلة القبض على سوما - اسماء الجنيد تعتقل بورداب الرياض
Author: مهدى الصادق السيد
Date: 08-18-2007, 10:41 AM
Parent: #1
ام الصادق بواسطة الحبيب مهدى الصادق
تتهااافت العباااراات 00 لأفق الكلمااات00 تبتسم المشاااعر00
وسط روح الآخاء 000لأجد جنة الخلجاات00 ونو ر الاحسااااس000
وأسمو فوق الحدود00 لأصل لفضاااء الابدااع00 وسمااااء التالق000
كل هذا أجده هنــــــــــــا 000 نعم هنا 000 في صفحة استاذنا الرائع
د محمد حسن كما عرفته ِ قلم رائع بحق
اما عن سوما فماذا اقول وماذا اكتب فشهادتى فيها مجروحة ولكنها
اشبه بشمعدان يحمل تلك الشموع ..قد تزيد عدد شمعا ته عن حروف اسمها
فحروف إسمها ثابتة لاتتغير بينما ماتعطينا في ازدياد ....
هي صدق .. هي دفء .. هي وفاء
هي ....
لن توفيها العبارات ولا الحروف حقها ..
تلك الصديقة التي إكتشفت معها أن الصداقة كلمة من نور, وأن النور الذي يلي نور الهدى
هو وجودها في حياتي ...
..
رائعة كلماتك كما هي رائعة صفاتك كما هي رائعة صداقتك كما هو رائع اللقاء بك
سلمتي لنا ريحانتنا الغالية وتظلين دوما أطيب ماتمثله الصحبة الطيبة..
تحياتي لك .. ومزيدا من الضياء عزيزتي أتمناه لك
وشكرا بحجم الشمس للاستاذ الشاعر الرائع اخى محمد الفاتح للحظات الفرح التى منحتونا اياها
وتحايا خاصة منى ومن العيال الذين احبوك كما احبونى وعبرك للاحباب رامى واية ومؤيد .
واعزرى عجز احرفى فما احسه لا تترجمه المفردات مهما تفننت .
|
Post: #52
Title: Re: ليلة القبض على سوما - اسماء الجنيد تعتقل بورداب الرياض
Author: ismeil abbas
Date: 08-18-2007, 12:08 PM
Parent: #1
أم الصادق وأبو الصادق
صدقتم فى ماقلتم..
ألأخت إسماء الجنيد..إبداع فى الشغر..وجمال فى التعامل..وطيبة فى ألأخلاق
سعدنا بلفاءهم ومعرفتكم أنتم أيضآ....
ألأخ/مهدى ما تشوف لى أم الصادق دى طريقة دخول للفريق عندنا نقص فى الهجوم...
سلمتم جميعآ.........وشكرآ على الكلام الموزون يا أم الصادق.
إسماعيل محمد أحمد عباس..
|
Post: #53
Title: Re: ليلة القبض على سوما - اسماء الجنيد تعتقل بورداب الرياض
Author: عادل جبارة
Date: 08-18-2007, 12:41 PM
Parent: #52
أخي محمد الفاتح الجنيد ... الرجل الهادئ الرزين وصاحب الكلمات
المعبرة
أختي الشاعرة المجيدة سوما ...
كان وجودكم بيننا كما الخيال الحالم ما أن صحونا على فراقكم
حتى تبين لنا حجم الهالة المضيئة التي أحالت ليالي الرياض
شعلة من البهاء والطهر والنقاء ... كم مر بنا من الأخوة والأصدقاء
وكم مررنا بهم ووجدنا إحساس سعادة اللقيا وألم الفراق حينما يستبين
ولكنها ربما المرة الأولى التي وجدنا فيها طعما ونكهة مختلفة
لوجودكم بيننا... شعور غمر الجميع بلا استثناء حتى صار حديث بورداب الرياض
وأصدقائهم ... أصبحت أمسياتنا مختلفة دون أن نستطيع تمييز هذا الإختلاف
أو نعبر عنه ... فقط نجد السرور والفرحة مرتسمة على الوجوه ... نسمع
كلمات الثناء والإطراء على أهل الجنيد كافة كأنما اكتشفنا لأول مرة
هؤلاء الرائعين الكرماء البشوشين ... كم وددت أن تكون أسرتي هنا في الرياض
خلال تلك الفترة حتى أستطيع القيام ببعض وليس كل واجبات الضيافة والترحاب
ولكن الظروف هي التي حرمتني من تلك السانحة حيث غادرت الأسرة قبل فترة قليلة
ولكن بإذن الله سيجمعنا الوطن على المحبة والألفة والنقاء كما التقيناكم في
الغربة ... لكم التحية والشكر على كلماتكم الراقية التي تمتلئ عفوية ونقاءا
يشبه نقاء قلوبكم الصافية ونتمنى أن نكون عند حسن ظنكم بنا دوما إخوة في الله
وللأحباء الصغار أهدي قبلاتي وأسأل المولى عز وجل أن يحفظهم ويوفقهم ...
|
Post: #54
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-18-2007, 12:42 PM
Parent: #52
الحبيبه الغالية سلمى صبحى
التحايا ليك قدر سماحتك يا حنينه من بطن الاهل
احساسى تجاهك انك جميله تعشقين الجمال
وده باين من مداخلاتك يا ست البنيات لى حدهن
شكرا يا سلمى وابقى معانادوما
***
اهل الشعر والقلم والفكر
الانسان الشفيف ابو وجيده
جاد الله عليك بكل خير اخى العزيز
من كلامك ببدأ معاك يا مرهف المشاعر
ومن هدوءك بسرق اللحظات الجميله العشناها معاكم
حقيقه نحن اسعد ناس .. نحمد الله ونشكره حبانا بمعرفتكم الكنز
ربنا يدوم البينا ان شاء الله
طبعا من اروع واجمل الهدايا اخى العزيز
كان ديوان شعرك الغالى جداااا عندى يعلم الله
عايشه معاه هذه الايام امتع اللحظات
احيانا اقرأ القصيده عدة مرات وكل ما اقرأها اشعر كاننى اقرأها اول مره
من جمالها وصدق احاسيسك المتدفقه فيها..
وده حال كل قصائدك .. وانشاء الله ارد عليك مفصلا فى اقرب فرصة فى الاميل
تسلم ابو وجيده الشاعر الشفيف
ربى يسعدك ويهنيك بقدر ما اسعدتونا
شكرا قدر جمال حروفك ياشفيف
|
Post: #55
Title: Re: ليلة القبض على سوما - اسماء الجنيد تعتقل بورداب الرياض
Author: ادم الهلباوى
Date: 08-18-2007, 01:32 PM
Parent: #54
بسم الله الرحمن الرحيم
يا الله ايه الحلاوة دى وايه الكلام البقطر عسل ومنظوم نظم
اوصف ايه وله عن ايه اقول والله الجميل جميل لو صحوه من النوم
الشكر والتقدير وفائق الاحترام يااختنا ويا عزنا ويا درنا المكنون
هذه الكلمات الرقيقة المنسابة لا اظنها تاتى تباعا هكذا لولا صدق المشاعر
حقيقة اتحفتمونا يا آل الجنيد بما عندكم من شعر وطيب معشر وجود وكرم وكل
الصفات النبيلة يا اهل الصفات النبيله ومهما نوصف لن نستطيع ان نوفيكم حقكم
لكن كل الذى أستطيع ان أقوله كان لنا عظيم الشرف فى معرفتكم فهي عندى مكسب غالى ..
|
Post: #56
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-18-2007, 02:21 PM
Parent: #55
شتات الشفيف تحايا بعمق النيل الخالد
ليلتها يا شتات نثرت حرفك بساتين فرح وكرنفالات من البهجه
عطرتنا ولونت فضآءتنا بهاء
للكلمه عندك احساس مميز بالحضوروالشفافية المطلقه
حلقت بنا فى سماوات تمنينا ان نظل نسبح دوما بها
ولكن هيهات .دائما الجميل يمر سراعا كالبرق
ورغم ذلك سعدنا حد الثمالة بكلماتك المضيئه
عارفاك شفيف من زمان وصاحب مفرده متفرده ومميزه
لكن المقروء دائما غير المسموع ووجها لوجه له طعم ومذاق خاص اكيد
علمت من الاخ معتصم دفع الله الحنين فردتك وتوم روحك
انك غادرت ارض الغربه متوجها للوطن الغالى وحمدت الله على سلامة وصولك
وايضا من خلال صديقك معتصم الله يديه العافيه
نتمنى ليك اجازه سعيده وسط الاهل والاحبة وسلام لكل الاهل
والى ان نلتقى لك الود قناطير والشوق مطامير
وشكرا من جووووووووة يا امير الحرف الندى
شكرا شتات قدر سماحة نضميك الزين
***
اخى العزيز جدا علاء حيمورة
يا سلام عليك يا شفيف وعلى اريحيتك الباينه فى احساسك الدافق بحر
احساسك ادانى دفعه لى قدام بطول النيل وعرض الشوق الممتد فى كل البلد
تسلم علاء ود عمى حيموره تسلم من كل بلا
وان شاء الله السعاده تبراك وين ما تقبل يا ود البلد الماصل
ربى يسعدك قدر سعادتك لى بى طلتك الحلوة
وشكرا معمعمه حنيه
|
Post: #57
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-18-2007, 03:04 PM
سلاااااااااام عبد الله الحبيب الرجل الحبيب القريب
شوق بطعم سكر ربك البنى المحروق وطعمو زايد لا فوق
وينك يا حنين
قلت لى خفت اكون اتكلبشت مع ناس السعوديه
مالى بسوق فى السعوديه قالوا ليك انا جنيت ؟
ود خالتى قال لى يا سوما لو دايره تسوقى البسى ليك عقال لووووول
لكن عليك الله اتكلبش كيف وعندى اخوان حنان زى الكوكبه الرائعه
الشايفها قدامك دى هيـــــــــــــــع يا سوما وراك جبال حديد
نحن فى رجاك يا الحبيب تجى صادى بجمالك البنخبروا برانا
شر فرحك وشتت غناك معانا
شكرا عبد الله قدر مكانتك الخابرها يا ود الاهل القريب
شكرا محنة
****
سلااااااااام حمزاوى الجميل
والله فقدناك يوم الحفل التانى
ومخصوووووووص جهزت ليك قصيدة كجبار
وقريتها للشباب
وسالت عليك قبل ما اقراها
لكنى ما كنت محظوظه انك تكون مع الحضور الجميل الانيق
وعشان خاطرك يا حمزاوى الاصيل وعشان خاطر روعتك وروحك الحلوة
بنزلا ليك هنا وابقى قريب دائما معانا
شكرا حمزاوى شكرا تشبه طبعك السمح يا اصيل يا نبيل
شكرا نخيل وطنا
***
اخوى العزيزجدا آدم الهلباوى حبابك يابا
والله حلاوة النضمى باديه منكم ومنتهيه عندكم
طوقتونابى محبتكم وكرمكم الفائض
جزاكم عند الله وحده
وربنا يقدرنا نسعدكم وتجمعنا
الظروف بيكم ونديكم ولو قليل من حقكم علينا
شكرا اخوى هلباوى شكرا ترع محنة
|
Post: #66
Title: Re: ليلة القبض على سوما - اسماء الجنيد تعتقل بورداب الرياض
Author: علاء الدين حيموره
Date: 08-20-2007, 02:17 AM
وبتغالب الدمعة حروفك .. وتزل سخية في جروف شوقنا ليكم ..
ما انتي الجمال .. الصحى قلوبنا وخلانا نذوب بفرحة فيكم ..
تسلمو لينا يا راقين وربنا ما يحرمنا منكم ..
مودتي
|
Post: #59
Title: Re: ليلة القبض على سوما - اسماء الجنيد تعتقل بورداب الرياض
Author: ASIM AL BANNA
Date: 08-18-2007, 11:56 PM
Parent: #1
ناس الجنيد ديل سوكرهم(عشان تتقرى كويس) دايما جميل لمن مغبش زى كتاحة السودان وطاعم ..... يا ابو الجنيد ربنا يخليكم لى للناس ركازة فرح وانتم توزعون الحب فى اقاصى الارض ودانيها .... لكم محبتى وتحيات لاهل الرياض وانشاء الله لياليكم عامرة بكل خير وفرح
|
Post: #60
Title: Re: ليلة القبض على سوما - اسماء الجنيد تعتقل بورداب الرياض
Author: Abd Alla Elhabib
Date: 08-19-2007, 00:42 AM
Parent: #59
| Quote: ود خالتى قال لى يا سوما لو دايره تسوقى البسى ليك عقال لووووول |
هااااااااع....والله عقال براهو ما كفاية..لازم تستلفى ليك "دقن" وتصبّغيها كمان !!
وتلللوب..يجى حسين ملاسى ناطى بى بوست " نساء يصبغن دقونهن المستدانة".
|
Post: #61
Title: Re: ليلة القبض على سوما - اسماء الجنيد تعتقل بورداب الرياض
Author: ismeil abbas
Date: 08-19-2007, 12:45 PM
Parent: #1
فوق
نحن ما زلنا بنشوة لقاكم فرحين..
إسماعيل محمد أحمد عباس...........
|
Post: #63
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-19-2007, 06:49 PM
Parent: #61
د محمد حسن مساك الله بكل خير وبركه
فتحت لينا طاقات فرح نحو قلوب الاحبه
فتحها الله عليك وين ما قبلت يا العشا يا قمر العشاء
شكرا محكره ومدورة قمر اربعتاشر
***
ام الصادق ست المحنه وصاحبة القلب الوسيع
ملان نفاجات فاتح على كل الاحبه تناغمى الطيبه من بكانها
وترسلى المحنه وين ما تقبلى يا التقيلة ورزينه
شايله طبعك من ليان طينة البحر
ومن غيوم شايلة المطر
تسلمى يا ناعمه يا ضل الضحى
ياناعسة يا نسمة عصر
الشكر ليك فى القليب محكر
والاحترام والتقدير ليك
ريدة نابعه زى سيلا كسر
شكرا يا غاليه يا ام الصا دق
والتحية عبرك لابو الصادق
و للحلوين الصغار
**
حباب ود وراق الحنين
تبراك العافيه وين ما تقبل
قول آمين
الكلام الجاى منك يعبى كل القلوب محنة ويكفى الباقين
احساسك واصلنا وفايت بى هناك يعلم الله
يديكم الصحة والعافيه قدر ما خدرتوا قلوبنا بساتين فرح
شكرا نوااااااار
**
مصدق الفنان الصادق شكرا مرتين للطلتين واحلا ليلتين
تسلم يا وريف الاحساس
شكرا قدر ابداعك وفنك
***
المحنة جاتنا براها تجرى
معتصم دفع الله
سلام يا حنين من بطن الاهل
شوقنا مباريك فى كل محل
بنساسق وراكم لى هسه
نسرق الضى الحواليكم من محبة صادقة
ومحنة نابعه من اهل عزاز
تسلم يا سيد الناس
***
|
Post: #62
Title: Re: ليلة القبض على سوما - اسماء الجنيد تعتقل بورداب الرياض
Author: مهدى الصادق السيد
Date: 08-19-2007, 06:27 PM
Parent: #1
up
|
Post: #64
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-19-2007, 07:27 PM
Parent: #62
الاخ العزيز عادل جبارة
خليت افكارنا محتارة
بتاوق فى نضميك ده وبساسق فى اليوم كم مره
بفتش لى فى كلام يستاهلك ويستاهل الزيك
اقدر اوفيك ولو قطره من بحر كلامك الدفقتو علينا بى حنية وطيبة نية
الزيك يردوا عليه كيف يا وريف
اخجلتنا حروفك النديه
وعباراتك المشبعه معانى حنينه وعميقة عبت قلوبنا سعادة وفرح لا يوصف
انا برضو بقول ليك كم تمنيت ان تكون اسرتك بيننا لكى نتشرف بمعرفة
اناس من طبعك وخلقك وأدبك يا كريم الاصل
نحن الما محظوظين فى شوفتهم ومعرفتهم
وانت وجودك معانا براه اكبر واجب يا عادل يا خوى
احساسك ده براه بالدنيا يعلم الله
وحاشاك التقصير يا نبع الجود و الكرم والخير
نتمنى للاسرة الكريمه اجازة سعيده وسط الاهل والاحبه
ويجوك راجعين طيبين وسالمين وتامين بركة رب العالمين
وباذن الله ربنا يعوضنا اللمه تانى وفى ارضنا الحبيبه
وابوابنا وقلوبنا مفتوحة ليكم فى اى مكان وزمان
لو ما شالتكم قلوبنا تتحكروا فى الراس من فوق وجوة العيون
شكرا اخوى عادل جبارة
شكرا ممتده بى طول بحرنا ومخضرة بخضرة جروفه
****
الحنين ود الطيبين
عاصم البنا ود اهلنا
الشوق محنه
كيفنك يا اب احمد
شوقنا ليكم ولى كوكى الصغير لا يوصف
تسلم يا صاحب الحنجرة الحنونه والحضور الباهى
فقدناك والله معانا بى هناك
وناس الرياض طارنك بالخير
على فكره عندنا ليك مفاجاة ..لكن ما بنكلمك بيها الا لما نتلاقى
اها شنو ليك التشويق ده ؟؟
سلامى بالاحضان للحبيبه ام احمد
ولك سلام خاص من ود الجنيد
***
اخوى اسماعيل عباس انت يا يابا يعلا مقامك ويعظم شأنك
ونجيك فى السمح والزين
قول آمين
شكرا سيرة عريس للبحر
|
Post: #65
Title: Re: ليلة القبض على سوما - اسماء الجنيد تعتقل بورداب الرياض
Author: ASIM AL BANNA
Date: 08-20-2007, 00:46 AM
Parent: #1
جاينكم فى مسقط جهزى فطور رمضان الما خمج وبخلعكم زى الجية الفاتت بس ما تفرتقى التلاجة بعد الاذان ... تحياتى لى ابو الجنيد المفاجاة لازم تورينا ليها
الى الامام
|
Post: #67
Title: Re: ليلة القبض على سوما - اسماء الجنيد تعتقل بورداب الرياض
Author: malamih
Date: 08-20-2007, 09:36 AM
Parent: #65
العزيزة سوما..
والله أنت تشرفينا محل ما أحلت قدماكم..
و التحية للفاضل محمد الفاتح و الأسرة الكريمة..
حفظ الله جميع آل الجنيد و أحفادهم..
|
Post: #68
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-20-2007, 11:46 AM
Parent: #67
عاصم حبابك من تانى
قلت لى جاى مسقط ؟ حبابك والله
لكن عليك الله لو جاى فى رمضان لازم تحضر معانا العيد
مش تشرد زى المره الفاتت
طبعا جيتك الفاتت انا ما شفت ليها شىء غير جكات البحر كل يوم
قربببببت تبقى لاعب كوره
المره دى لازم تركلس ومعاك ناس ام احمد
وكان لى جيتك الفاتت لى فطور رمضان .. هو انا لحقت افرتق التلاجه..
ما جيتوا مع الاذان التقول المؤذن متفق معاكم تصلوا الباب ويبدأ ياذن
اما المفاجأة يا سيد تبقى مفاجأة كيف لو وريتك
والله كان اتصلت تلفون ما اظنى اوريك ..الا نتلاقى بالدرب
لقيتنى بطحانيه ولا لا ؟
سلااااام بالله لى آل البنا بدون فرز وسلام مكنون لى ست العفاف والصون ام احمد
*** ملااااااااااامح
يا غالى من وسط الاهل مشتاقين يعلم الله يا الحنين
يا حليل الحبيبه فواتح كانت فيها ريحتكم ولو عبر الاثير
سافرت وخلت مسقط قاحلة وجافة
شكرا ليك انت يا ملامح على الكلام الجاى منك
وانت طلتك معانا فى اى مكان بتشرفنا وبترفع راسنا
وسلامك لود الجنيد وصل وببلغك كل الود
قريب حاتشوف ود الجنيد معانا هنا فى البورد
شكرا أردب محنة
|
Post: #69
Title: Re: ليلة القبض على سوما - اسماء الجنيد تعتقل بورداب الرياض
Author: إسحاق بله الأمين
Date: 08-20-2007, 02:08 PM
Parent: #68
وكانت ليلة
وللأسف الشديد فاتتنا تلك الليلة
إلا أن جمال المداخلات والمشاركات التي طالعنها
عبر هذا البوست عوض ما فاتنا من روعة تلك الليلة
الشكر كل الشكر لجميع القائمين على تنظيم تلك الليلة الفريدة
ودامت ليالي بورداب الرياض أفراح وأفراح
|
Post: #70
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-20-2007, 02:19 PM
Parent: #69
العزيز اسحق بلة
تسلم يا اصيل
وحزنت جدااا والله انك ما كنت من ضمن الحضور
يا ريت لو بتنعاد كنا مخصوص عدناها ليك
لكن عزانا انه الجايات اكتر
لومك على المره الجايه ان شاء كان الله هون الله نتصل بيك برانا
ونحن كان يشرفنا ويسعدنا تكون ضمن الكوبة الرائعه من بورداب الرياض الحلوين
شكرا اخى اسحق شكرا نيلين
اسماء الجنيد/مسقط
|
Post: #71
Title: Re: ليلة القبض على سوما - اسماء الجنيد تعتقل بورداب الرياض
Author: إسحاق بله الأمين
Date: 08-20-2007, 02:39 PM
Parent: #70
الأستاذة أسماء الجنيد
سلام سلام
أشكرك أختي مرتين
مرة على الكلام الحلو وجميل
ومرة على التواصل الراقي وحنين
وياكن ناس الجنيد اللي بالسكر مشهورين
ونحنا كمان منكم ما بعيدين
وفي الكديوة وعدالشيخ والبويضة وودالفضل عقابنا هناك وناساً لينا حلوين
|
Post: #72
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-20-2007, 02:56 PM
Parent: #71
حبابك حبابك اخى اسحق
واليوم السعيد اللينا جابك
انت مش قريب بس ؟ انت ود بطن الاهل يعلم الله
حبابك يا حنين من وسط اللمه
الجايات اكتر وان شاء الله نتواصل يا ود العم
شكرا ملفحه بى طيبة اهلنا
ونورت البوست يعلم الله
شكرا اخى اسحق
شكرا حواشة سكر
( بس ما تجى تقالعنى فيها من هسه
خلينى النرجع الجنيد ههههه)
شكرا اخى الحنين شكرا مرتين
|
Post: #74
Title: Re: ليلة القبض على سوما - اسماء الجنيد تعتقل بورداب الرياض
Author: إسحاق بله الأمين
Date: 08-20-2007, 03:18 PM
Parent: #72
الأستاذة أسماء
الحمد لله طلعنا أهل
ولينا في مصنع الجنيد ناس بنفخر بيهم وعلى رأسهم الباش مهندس عبدالله خالد حمد مدير المصنع سابقا ودا من أهلي ناس فداسي الحليماب ، وعندي قريبي معاكم هناك في مسقط وهو د. الطاهر الدرديري ، أها شفت كيف طلعنا أهل وأكتر من أهل
|
Post: #73
Title: Re: ليلة القبض على سوما - اسماء الجنيد تعتقل بورداب الرياض
Author: إيمان صالح
Date: 08-20-2007, 03:04 PM
Parent: #1
سلام يا دكتور
يا بختكم والله
والله كان عارفة
كان جيت ولو اركب المستحيل
سوما بتستاهل
ايمان
|
Post: #75
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-20-2007, 08:32 PM
Parent: #73
ايمان الحبيبه من القليب قريبه
يستاهلك الخير يا وش الخير
يعلم الله مشتاقة لى شوفتك
ان شاء الله ربنا يسهل ونتلاقى
فى وسط بلدنا كمان
تسلمى يا حنينه وربى ما يحرمنا من طلتك البهية ...
***
الاخ العزيز اسحق حبابك يا ود الاهل الحنين
يا ود عز الاهل
ناس فداسى اهلى
مولانا د/ الطاهر من اقرب الناس لبنا فى مسقط
يخجل اللسان والبنان عن الكلام عن د/ الطاهر الموسوعه
لو جمعتك بيه الظروف بس قول ليه اسماء الجنيد
وشوف السعادة البغمرنى بيها هذا الرجل المتواضع حد الدهشة
حاليا فى اجاوة بارض الوطن ربنا يرجعوا بالسلامه
فى آخر اجازة ليه للبلد قبل وفاة والدته عليها رحمة الله
هاتفنى من هناك ةقال لى بالحرف الواحد
يا اسماء لما جيت جمب الجنيد
من فوق للبحر سلمت على اهلك وبلغتهم سلامك
شفت الحنيه دى كيف ؟؟
الله يديه الف عافية
معلومه تانية د/ الطاهر من اكتر الناس البشجعونى
وباستمرار على كتابة الشعر
بلهجتنا العامية البسيطه المحببة لى نفسى
بقول لى يا اسماء الكلام الجميل حقنا
وحق اهلنا الطيبين ده انا خايفوا ينقرض
انتو عليكم التوثيق ولازم تستمرى فى التوثيق ..
وترسلى لى اى جديد منك
الكلام عن د/ الطاهر شيق وما بنقدر نوفيه حقو ..
بس دعواتنا ليه بكل خيرو يديه العافيه والصحة
وربنا يديه قدر نيته الصافية وقدر ما بساعد الضعفاء والمحتاجين
|
Post: #76
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-21-2007, 09:39 AM
Parent: #1
هي ليلة
تجولت فيها الاقمار بيننا
وغرقنا في انوارها
شع القها من بين عيوننا
ففارقنا النعاس
وافرد السهر حواشيه
في انتظار الفجر
|
Post: #77
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-21-2007, 11:44 AM
Parent: #76
د/ محمد حسن
لك التحيه اطنان يا عشا الضيفان وبهديك وزوارك شدر الهشاب
شدر الهشاب ..
اتشابا لي ضل السحاب
داير المطر ..
خايف اليباب ..
شاف ليه غيمه .. قال سراب .
ماظن تمطر كوم تراب ..
فجأة انهمر ..من غير حساب ..
بل الندى وعطر هضاب ..
بكت السماء..
رحل الرهاب
دنت الطيور من
الضباب ..
ركت تحت رسمت رحاب
رحل اليباس رحل الخراب ..
شدر الهشاب فرهد طرب
من تانى بى عودة الشباب
جدع صميغاتو ورقص..
رقصة غريب عاد للوطن بعد الغياب
********
سومــــا ...
|
Post: #78
Title: Re: ليلة القبض على سوما - اسماء الجنيد تعتقل بورداب الرياض
Author: إسحاق بله الأمين
Date: 08-21-2007, 01:26 PM
Parent: #77
الأخت أسماء
سلام واحترام
كلامك سمح بلحيل
وعن شيخ الطاهر بقول :ربنا يحفظه ويمد في أيامه ويزيده من فضله.
شيخ الطاهر علم من أعلام فداسي، وفداسي الأيام دي منورة بوجوده ، والناس في فداسي بتحسب لي جيتو، وبحرصو على حضور مجالسه، ولمن إقولوا الليلة شيخ الطاهر عنده درس أو محاضرة الأعمى تلقاهو شايل المكسر وبضيق المكان مهما كان وسيع.
إلتقيته في فداسي قبل إسبوعين وجلست معه مرات واستمتعت كما أستمتع غيري بعذب حديثه وعلمه الغزير، وحظكم إنتو ناس مسقط المعاكم أمثال شيخ الطاهر وود شيقوق وبت طلحة.
|
Post: #79
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-21-2007, 01:38 PM
Parent: #77
شدر الهشاب
اتشابا عانق للسحاب
بلل عروقه من الندى
اكد حقيقة انو عينيك
هي المدى
وهي بتدي للارض اليباب
ويتردد النغم الصدى
عشقك مؤكد يا وطن
ما كذبة ما موجة رهاب
|
Post: #80
Title: Re: ليلة القبض على سوما - اسماء الجنيد تعتقل بورداب الرياض
Author: مهدى الصادق السيد
Date: 08-21-2007, 11:53 PM
Parent: #1
اسحاق حمدلله على السلامه
ايام حلوة عشناها فى حضرة سكر الجنيد
عصرنا وارتوينا حتى شرقنا
الليالى موثقة وموجودة فى الذاكرة وكذلك معتصم وتمبس ما قصروا
ربنا يديهم العافية . ننظم ليك قعدة ونجر ليك الشريط من الليلة الاولى
عشان تسكر معانا . حدد انت وونحن جاهزين
|
Post: #81
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-22-2007, 08:16 AM
Parent: #1
اتلملم القمري المهاجر
رك فوق شدر الهشاب
نادى للسمبر
اقيف
البلد مطرانة جد
والشعر
دفاق يسيل
ما ليه حد
|
Post: #82
Title: Re: ليلة القبض على سوما - اسماء الجنيد تعتقل بورداب الرياض
Author: ابو جهينة
Date: 08-22-2007, 08:41 AM
Parent: #81
دكتور
فاتني القبض على روائع هذه المرأة القصيدة .. حظي بطال
***
Quote: سالني احدهم لماذا ليالي البورداب صافية وجلية كخمرة مي
اجبته
لانها
عفوية |
بل هي بنكهة القنقليز في قوارير باخوس
|
Post: #83
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-22-2007, 02:35 PM
Parent: #82
| Quote: بل هي بنكهة القنقليز في قوارير باخوس |
ولا يعلم الكثيرون
ان لباخوس
محطة في طريق الترام بمدينة الاسكندرية
اسكت كب
|
Post: #84
Title: Re: ليلة القبض على سوما - اسماء الجنيد تعتقل بورداب الرياض
Author: إسحاق بله الأمين
Date: 08-22-2007, 03:02 PM
Parent: #82
الأخ الأصيل مهدي الصادق
سلام سلام
دعوة كريمة من أخ كريم في شهر فضيل، ودعوة الكرماء تلبيتها واجبة، فبيت الأخ "معاوية" سيكون لقائنا ومع الناس "اللهيجم سكر" ستكون سهرتنا، وإلى الملتقى أخي مهدي أشوفك على خير.
|
Post: #85
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-23-2007, 07:20 AM
Parent: #1
وعلى المحبة نجتمع
وعليها نتفرق
|
Post: #86
Title: Re: ليلة القبض على سوما - اسماء الجنيد تعتقل بورداب الرياض
Author: Rawia
Date: 08-23-2007, 07:44 AM
Parent: #85
انتو حلوين
وضيفتكم احلى منكم
واحتفالكم بيها حلو وظريف
وتدوم المودة بين الناس الجميلين يارب
|
Post: #87
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-25-2007, 07:49 AM
Parent: #86
راوية
وما احلاك وانت تزينين هذا البوست بصورة الشهيد على عبد اللطيف
اليوم السعيد الليلة جابك
|
Post: #88
Title: Re: ليلة القبض على سوما - اسماء الجنيد تعتقل بورداب الرياض
Author: الفاتح الجنيد
Date: 08-25-2007, 09:46 AM
Parent: #87
دكتورنا الرائع محمد حسن
يا ريشةً غُرِست على سن رمح ،،،
ينفذ فى الدواخل دون أن تحس بوخزته ،،،
كلماتك أفيون يتغلغل ، يتملك روحك وعقلك ،،،
فتظل تترنح بانتشاء ، وتهيم فى فضاءات لا ترى لها حدود ،،،
ما كان هو ليلة من ألف ليلة وليلة ،،،
وما لم يكن هو سر يلوكه لحن الخلود ،،،
بك وبكم كنا ،،،
وبدونكم ما كنا ،،،
لك ودى وعميق امتنانى ،،،
|
Post: #89
Title: Re: ليلة القبض على سوما - اسماء الجنيد تعتقل بورداب الرياض
Author: abdulhalim altilib
Date: 08-25-2007, 04:47 PM
Parent: #88
دكتور محمد حسن ،
يا عشا الضيفان
لك كل الود والاعزاز ،
ولم تقل إلا الحق أخي ود الجنيد :
Quote: يا ريشةً غُرِست على سن رمح ،،،
ينفذ فى الدواخل دون أن تحس بوخزته ،،،
كلماتك أفيون يتغلغل ، يتملك روحك وعقلك ،،،
فتظل تترنح بانتشاء ، وتهيم فى فضاءات لا ترى لها حدود ،،، |
كم كنت أتمنى أن لو كنت
معكم في تلك الليلة الليلاء ،
وأنتم تستمتعون بالرواء العذب
من شعر سوما .. وإن غبت قسراً
عن تلك الليلة الرائعة ، حيث
كنت وقتها أخوض الوحل في شوارع
الخرطوم ، وأنا أمنِّي النفس بقضاء
أيام قليلة بين الأهل والأحباب هناك ،
أقول رغماً عن أن ليلتكم قد فاتتني ،
إلا أنك أخي وبقية المتداخلين قد
عوضوتموني الغياب بهذا البوست الرائع .
نعم .. فإن فاتحة حديثك الرائعة ، والتي
ذكرتني بذاك الأسلوب الرائع الذي تميز به
راحلنا المقيم الأديب عمر الحاج موسى ، خاصةً
في خطبة الوداع المشهورة في عهد نميري ،
أقول فاتحة حديثك تلك في أول البوست ثم
المداخلات الجميلة التي تلت من الأحباب هي التي
حفزتني للانطلاق والغوص في أعماق البوست والتوقف
عند كل كلمة أو فاصلة والاستمتاع بها حتى وصلت
لمسك الختام (مؤقتاًوحتى إشعارٍ آخر ) ثم السباحة
رجوعاً لأوله ، وهكذا دواليك .. مثنى وثلاث ورباع
وكأنني سأدخل به إمتحان نهائي ، وما ذاك إلا لروعته .
لقد أسكرتني كلماتكم عن تلك الليلة حتى الثمالة ،
وانفقت الساعات الطوال مابين صعودٍ وهبوطٍ ٍ وأنا أتلذذ
بكل حرفٍ خطه يراع كل متداخل .. إنها فعلاً ليلة القبض
على سوما ، تلك الشاعرة المسكونة بحلو الكلام وروعة
الحرف وجميل الشعر ، يحفظها المولى ويكلأها برعايته .
وأردد معك أخي (الخال) حمزاوي ، وأنا متحسر :
وا أسفاي .. وا أسفاي
حين لم أحضر تلك الليلة الليلاء ، حيث كنت ساعتها
- كما أسلفت - أتدثر بأمطار الخرطوم في الليل !
شكراً لكم جميعاً .. فلقد أحسست بهذا البوست وكأنني
كنت معكم أحضر تلك الساعات الجميلة في حضرة من
نهوى : شاعرتنا المجيدة سوما .
شكراً ومزيداً من مثل هذا التوثيق الرائع .
مودتي للجميع ،
( ليمو )
|
Post: #90
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-26-2007, 02:49 PM
Parent: #89
Quote: أتدثر بأمطار الخرطوم في الليل !
) |
وانت في حضرة المطر الخريفي
ونحن تعصف بنا الاشواق
رقصنا بلا ساق
وسكرنا بلا كاس وساق
ولنا بكم عودة
|
Post: #91
Title: Re: ليلة القبض على سوما - اسماء الجنيد تعتقل بورداب الرياض
Author: يوسف السماني يوسف
Date: 08-26-2007, 08:26 PM
Parent: #1
العزيز د. محمد الحسن
سلام
من نواصي القلب تنادت عصافير المحبة من فيافي الرياض تتدثر بثوب الابداع المتدفق من منابع الازرق الدفاق الذي روضتة شلالات الجنيد الابداعية فعزفت امواجة شعرا حرك سواكن النفوس التي تاهت في مدارات سوما الشعرية حتي يزوغ فجر اليوم التالي لتسجل ليل السبت ذكري تبقي في النفوس التي غنت تلك الليلة وفرحت في زمن الحزن المخيم علي خارطة الوطن ردحا من الزمن .
التحية لودالجنيد
والتحية لسوما قيثارة الزمن الجميل .
|
Post: #92
Title: Re: ليلة القبض على سوما - اسماء الجنيد تعتقل بورداب الرياض
Author: عبد المنعم سيد احمد
Date: 08-27-2007, 00:06 AM
Parent: #91
هنيئا لك شاعرتنا الرائعة
سوما
بهذا الوفاء
من اهل الوفاء..انت اهل لكل تكريم
|
Post: #95
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-28-2007, 06:59 AM
Parent: #91
التحية لودالجنيد
والتحية لسوما قيثارة الزمن الجميل .
والسلام وكثير المودة والاحترام
|
Post: #93
Title: Re: ليلة القبض على سوما - اسماء الجنيد تعتقل بورداب الرياض
Author: waleedi399
Date: 08-27-2007, 04:16 PM
Parent: #1
وآسفاي .... من ناس ديلا
عشان ما اتلاقينا هنا في الرياض ...
انشاء الله يا سوما نتلاقى في ارض الطيبين
ويا حليلك يا اللي في بالي ..
اخوك كان قصر برضو انت ابقى احسن منو واتذكروا
ولك العتبى حتى ترضين يا شاعرة النيلين ..
كنت اتمنى ان احظى بهذا اللقاء الطيب .. ولكن!!!
عسى الله أن يجمعنا مرة اخرى في ارضه الطيبه..
وكان حيين بنتلاقى .. ولك خالص الود والتحية
والتحية للدكتور محمد الحسن ..
من القى القبض على سوما
والتحية لجميع الاخوان الحاضرين والغائبين ..
ولكم خالص الود ..
أبوايمان
|
Post: #94
Title: Re: ليلة القبض على سوما - اسماء الجنيد تعتقل بورداب الرياض
Author: Khalid Saeed
Date: 08-27-2007, 07:26 PM
Parent: #93
سلام آل الجنيــــد ..
حضوركم جمل ليالينا .. وجعلنا نتذوق كل الأشياء بطعم الجنيد وسكّره ..
أتينا إلى ذللك الحفل البهي .. نمنى النفس بلقياكم أولاً .. ثم الغوص في عالمك الشعري الذي يشع جمالاً .. ويغوص بنا في زمن الألفة وأنفاس الحبوبة وطعم اللمة وريحة الدعاش فوجدنا أكثر مما تمنيناً .. كرم فاض وإدفق .. وشعراً يهز الروح .. وطرب جميل رطب قلوبنا المتعبة ..
شكراً كثيراً آل الجنيـــد .. فأنتم قوم مبدعين .. ونحن نتزلف للجنيد ومبدعيها لعلهم يهدونا مسكهم .. أو نجد منهم ريحاً طيبة .
تحياتي سوما .. وتحياتي الزائدة الفاتح الجنيد .. وسلام لكل الأسرة وآل الجنيد .
وسلام 4 سي سي للدكتور محمد الحسن .
أخوكم/ خالد الأرباب
|
Post: #96
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-28-2007, 11:50 AM
Parent: #94
ابو جهينه سلام يا اصيل
ليك وحشة يا ود ملوك النيل
كنت منور شاشة النيل الازرق
لكن نحن ما كنا محظوظين اننا نلتقيك وجها لوجه
مع كوكبة بورداب الرياض الرائعين بحق وحقيقة
كم تمنيت اللقاء بك و اسرتك الكريمه اخى العزيز
لكن نقول الجايات اكتر باذن الله
تسلم اخى ابو جهينه والف حمد الله على سلامة رجوعك
وتحايا خاصة لاسرتك الكريمه
***
راوية الحبيبه مشتاقين والله
حضورك اضفى بريق على البوست وانتشى كل الحضور
بجمال طلتك البهيه يا بنيه يا خضراء وندية
شكرا عميقا راوية وابقى اروينا من يمك بى كلامك الحنين الزيك
**
شاعرنا الوريف ابن بلدى الاصيل
عبد المنعم سيد احمد حبابك يا سقف الاهل..
شوقنا ليك معمعم بالمحنه
طلتك بتبشر دائما بفرح عامر
شكرا على كل السمح الجاى منك
منانا اللقاء الجاى نكون جميعا فى ارض الوطن
شكرا اخى منعم شكرا قيف بحرنا وخداره المفرهد
|
Post: #97
Title: Re: ليلة القبض على سوما - اسماء الجنيد تعتقل بورداب الرياض
Author: هاشم أحمد خلف الله
Date: 08-28-2007, 12:06 PM
Parent: #96
يا حظكم يا بورداب الرياض الشاعرة أسماء الجنيد بجلالة قدرها زارتكم في داركم
والله انتو ناس سعيدين يا ريت لو كنت حاضر معاكم في ذاك اليوم, الشاعرة أسماء
من الأسماء المحببة إلي نفسي ولطالما ما قريت اشعارها , ربنا يسعدها ويمد
في إيامها ويغطي عليها من الحسد فهي رقيقة في كتاباتها .
|
Post: #100
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 08-30-2007, 07:41 AM
Parent: #97
| Quote: يا ريت لو كنت حاضر معاكم في ذاك اليوم,. |
الحبيب هاشم
غيب وتعال
تلقانا نحن يانا نحن
|
Post: #98
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-28-2007, 12:13 PM
Parent: #96
العزيز الكريم الاخ عبد الحليم طالب (ليمو)
سلام بشوق الاهل الجاى منهم
رغم اننا افتقدنا زولا حنين زيك ملفح طيبة وموكر معانى سمحة
لكن عزانا انك امضيت اجازه سعيدة وسط الاهل والاحبه
اجازه مترعه بالحنيه ورويانه بالمطر والدعاش ومسقيه من ريق الاهل
اسعدنى سردك الشيق وتعليقك على البوست بكرم اخلاقك يا ابن البلد الاصيل
وصفك لحالتك وسط الوحل وتحت المطر ..
ارجعنى عشرات السنين لبلد المطر والخريف القضارف
كم تمنيت لحظتها ان اكون هناك مع الجوالخريفى والهمبريب البارد
مافى اجمل من كده اخى ليمو
حقيقى استمتعنا بلقاء اهلنا من بورداب الرياض
اقول الاهل ولست اعنى اهلى فقط آل الجنيد..
بل اعنيها حقيقة بورداب الرياض
هم بمثابة اهلى واكثر .. غمرونا حنان وكرم فائض
كم تمنينا ان تطول جلستنا معهم ..
عزانا ان نلتقى جميعا فى حضن الوطن
وان شاء الله اخى ليمو تكون معنا فى المرات القادمه
التحية لك بحجم الفرح الزرعتوا بكلامك يا شفيف
ولك الشكر ممتد ومتواصل الى ان نلتقى
شكرا محنة اخى ليمو ولك التحايا النواضر من ود الجنيد
وتحياتى .. اختك سوما
تخريمه كل شىء موثق وبالصور والصوت
امسك قوى فى تمبس ومعتصم دفع الله
|
Post: #99
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-28-2007, 02:15 PM
Parent: #98
سلااااام اخوى يوسف السمانى
حبابك يا عميق المعانى
تسلم يا العشا على كل السمح الجانا من تالاك
اسعدتونا حقيقى يا اهلنا فى الرياض الغناء بوجودكم
كنا الاسعد وكنا اسياد الفرح بدون منازع
بى زفتكم لينا بمحنتكم الداقة طبولها
وقجتكم لى خيمة الكرم والجود المشروره ضفتين
سعدنا حد الثمالة...
وربنا نحمدو ونشكروا ادانا من خيرو الكتير
تسلم اخوى يوسف وشكرا مارقة من الجوف..
***
وليد399 حبابك ابوايمان
وينك ياالحنين ياعشاالضيفان
غيبه طويلةاريتك انت طيب يابا
تسلم يا وليد على الكلام الزين الجانا منك
وحاشاك التقصير ان يا دخرى الاهل
نسأل الله نتلاقى فى ارض الوطن
لكن مافتك شىء يا وليد
كل شىء موثق زى ما قلت لى اخونا ليمو
ان شاء الله يصلك لحدى عندك صور على فيديو
شكرا اخوى وليد وبركة الطليت وعرفنا اخبارك واحوالك
تحياتى عبرك لكل الاهل
وتحية خاصة للاموره ايمان وامها
وتسلم
|
Post: #101
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 08-31-2007, 10:24 PM
Parent: #99
اخوى خالد الارباب سليل الاحباب
اهلك للجود والكرم فاتحنو باب
شوفتكم يا العشا كانت حلم وتحقق
عايشين للحظه نجتر ذكرياتنا الحلوة معكم جميعا
شرفتونا واكرمتونا واسعدتونا ايما سعاده يعلم الله
تسلم اخى خالد على كل الكلام الجاى منك
وعلى مشاركتك لينا فى الليلة البهية
نتمنى ان نلتقى فى اسعد الاوقات
وفى ارض الخير ارضنا الحبيبةالسودان
لك الشكر ممتد قدر المسافات البينا
ولك كل الامنيات الغوالى وكل التحايا من ود الجنيد
وان شاء الله يا الارباب ياخوى يوم شكرك ما يجى تب
تسلم يا ود اليلد وشكرا محنة
***
اخوى هاشم احمد خلف الله
حبابك يا المهل
يا ضينا وسقف الاهل
اريتك كان معانا يا هاشم ياخوى
لكن ان شاء الله الجايات اكتر
وباذنه تعالى نلتقى فى دروب المحنة والمودة
كتر الف خيرك على الطلة ..
وبى سماحة نضميك واحساسك دائما تفرش ساحاتنا فرح
ربى يسعدك ويهنيك يا اصيل
شكرا مثنى وثلاث ورباع والى ما لانهاية
|
Post: #102
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 09-01-2007, 07:59 AM
Parent: #101
ما ابهاك
وانت تتمخطرين بين الحروف
تنثرين الكلمة الدافئة للكل
فيزادن البوست
وتطرب قلوب
مودتي
|
Post: #103
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 09-01-2007, 12:38 PM
Parent: #102
لا آهة
لا رنة اسى
لا فرقة
لا دمعا هتون
شوقا رسى
بين الضلوع
كور انين
سهر جفون
عز المسا
يا روعة
يا همس المسا
|
Post: #104
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 09-11-2007, 01:32 PM
Parent: #103
غير قابل للارشفة
او التشفير
لنا فيه مآرب اخر
|
Post: #105
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 09-12-2007, 08:15 AM
Parent: #1
قضينا ليلة ساهرة
|
Post: #106
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 09-12-2007, 08:45 AM
Parent: #105
د/ محمد حسن
وما احلاها ليلة 
كل عام وانت والجميع بالف بخير
رمضان كريم عليك وتصوم وتفطر على خير
|
Post: #107
Title: Re: ليلة القبض على سوما - اسماء الجنيد تعتقل بورداب الرياض
Author: صديق الموج
Date: 09-12-2007, 10:28 AM
Parent: #1
كل الصيد فى جوف الفرا وانا اطهم فى بوست الوغد دكين
كلكم حلوين....
ليله ويا لها من ليله توزن الف ليله وليله..او كما قيل
نتمنى ان يجود الزمان بمثلها او بغيرها..
تلك معرفه تتمنى....
التحية لكل من عطر هذا البوست،،،
|
Post: #109
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 09-13-2007, 08:28 AM
Parent: #107
| Quote: التحية لكل من عطر هذا البوست،،،B] |
والتحية ليك يا موج
وين ما بتظهر الا مع الشهر
كل سنة وانت طيب وتحيات للاسرة
|
Post: #108
Title: Re: ليلة القبض على سوما - اسماء الجنيد تعتقل بورداب الرياض
Author: ismeil abbas
Date: 09-12-2007, 12:06 PM
Parent: #1
ليلة ما أحلاها من ليلة
فيها الجميع تجلا
وفيها البدر تزين حولو النجوم تحلا
والحضور روائع ما بين أسر وأخوان أجلاء
إلا الوقت سرقنا وما أدانا مهلة
......
سلامى للجميع
شكرآ د/ محمد حسن
ولكل الرائعين هنا..
مودتى
إسماعيل محمد احمد عباس..........ز
|
Post: #110
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 09-15-2007, 08:41 AM
Parent: #108
Quote: ليلة ما أحلاها من ليلة
فيها الجميع تجلا
وفيها البدر تزين حولو النجوم تحلا
|
شكرا ليك انت يا اسمعيل
وكل سنة وانت طيب
|
Post: #111
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 10-09-2007, 11:56 AM
Parent: #1
وجاء العيد
نهار ليلة القدر
فاهدى الكون فرحا جميلا
وتبتهج النفوس
انها للالق المنهج دوما
|
Post: #112
Title: Re: ليلة القبض على سوما - اسماء الجنيد تعتقل بورداب الرياض
Author: د.محمد حسن
Date: 10-31-2007, 07:01 AM
Parent: #1
وما زالت الرياض
تعيش نداوة اللقيا
|
Post: #113
Title: Re: ليلة القبض على سوما - اسماء الجنيد تعتقل بورداب الرياض
Author: soma
Date: 10-31-2007, 01:51 PM
Parent: #112
الدكتور الجميل حبابك يا ضى شبابيك الاهل
هذا البوست الجميل بى ناسو ورائع بروعة اللمه المعاكم
برجعنى لاحلا لحظات قضيناها بينكم ايها الاحبة المعبيين سماحة
لكم منى كل الود والتقدير
|
|