أين شاعرتنا الرقيقة سومه

اين شاعرتنا الرقيقة العذبة اسماء الجنيد
اين من تنظم القوافى من قلوبنا
أين من تختزل كل حنان الخالات والعمات والحبوبات فى حروفها
أين من تشعرك بكل جمال السودان فى ابياتها
أين اختفت تلك الانسانة التى لم تختلف يوما مع أحد
ولم تخاصم يوما أحد
ولم يحر نفسها يوما مع احد

نشتاق دفقات شعرها الجميل ليعيدنا الى الوطن
ونشتاق لقراءة كلماتها الصادقة الأصيلة فى حب الوطن

ترى هل تستجيب لنا ؟؟؟؟

up
dr mustsfs mshmoud

عمدتنا قرشو

تحياتي

Quote: اين شاعرتنا الرقيقة العذبة اسماء الجنيد اين من تنظم القوافى من قلوبنا أين من تختزل كل حنان الخالات والعمات والحبوبات فى حروفها أين من تشعرك بكل جمال السودان فى ابياتها أين اختفت تلك الانسانة التى لم تختلف يوما مع أحد ولم تخاصم يوما أحد ولم يحر نفسها يوما مع احد نشتاق دفقات شعرها الجميل ليعيدنا الى الوطن ونشتاق لقراءة كلماتها الصادقة الأصيلة فى حب الوطن ترى هل تستجيب لنا ؟؟؟؟

و الله فيك الخير يا عمدة بارك الله فيك و تسأل عنك العافية.

أفتقدها كثيراً بنت الجنيد. تحياتي لها و لأسرتها.

صحي والله

سومه الرقيقه ويين

العزيز خدر

لك التحية

لقد طالت غيبتها من المنبر يا سيدى وطال شوقنا لحلو الكلام الذى تنظم
حقيقة حنينا لكل قصائدها الجميلة يزداد ونأمل أن تعود

مع كل الود

الحبيب ابوجهينة

لك التحية

يا سيدى ليس فضلا منى بل وحشة لاشعارها الجميلة وهى رقم لا يخطئه أى قارى ومتابع لهذا البورد فقد كانت الواحة الوريفة حينما يشتد بنا هجير الخلاف نلجأ الى قصائدها لنرتاح فى ظلالها ونرحل للوطن بكل شفافية وكل حب ...

لك ودى

الاخ الحبيب دكتور مصطفى

لك التحية

واشكرك على رفع البوست وذلك يصب فى اهتمامك بغياب شاعرتنا الرقيقة سومه والتى طالما اسعدتنا بقصائدها الرائعة والتى كانت تؤثرنا بها فور انتاجها وانتهائها من كتابتها فكنا أول من نقرأ نتاجها الرائع الجميل ...

يديك العافية

قرشو
سلامااات

معاك بنسال عن الانسانة ... النقية ... الحنونة ... سومة

عبدو

ياااااااااااااااه

وين انت يا حبيب

Quote: معاك بنسال عن الانسانة ... النقية ... الحنونة ... سومة

اى والله هى كده وأكثر

يااااااااا اهلى الطيبين
وياااا عمدتنا الحنين
يعلم الله الشوق نيلين
جابنى الدرب وقلت اتاوق اشوف احوال الديره
المشغوليات كتيره ..
لكن ديمه فى البال والله
عمرى ما نسيتكم يا خريف تريان ورويان محنه
بلقى روحى وسطكم وبيناتكم
انتو الاخوان السند والركازه
والاخوات الحبيبات القريبات

تسلم يا قرشو وما تسال منك شينه يا عشا البايتات
حبابك انت وضيوفك
*****
حبابك دكتور مصطفى يعلا مقامك ويعظم شأنك بركة رب العرش العظيم

***
ابو جهينه يا شدر النخيل وروعة نيل يا ود الاهل القبيل
تسال منك العافيه يا سقف الاهل
يديك قدر نيتك يا صافى النيه
تحياتى لك اخى الكريم وعبرك لكل الاهل

****
خدر الفناااااااااان الانسااااان
يا روعتك انت يا حنين
تحياتى عبرك لست بيتك الرقيقه وستك الصغنونه
تسلم يا شفيف

****
اخى عبده
حبابك انت ود الحنان .عشا الضيفان
تسأل منك السعاده والصحه يابا
شاحده الله العافيه تبقالك هدم
والسعاده تبقالك رفيق طول الطريق

اهلى الطيبين .. كم اسعدتمونى ...
يديكم العافيه قدر فرحى بيكم شاحده الله

اخوى عمدتنا قرشو
ما طالبنى حليفه كلماتك الصادقه الوفيه
وسؤالك عنى اسعدنى حد الدموع
لك وللجميع الفرحه...
ولى باقى فرحكم يا ضى القبائل

dear soma
what can i say more
please give us more of this refine warm narration which can only come from a cute young lady


amin ya rub AL almeen
dr mustafa mahmoud

قرشو

والله تخيل سوما دي رقيقة الى حد انني استغرب وجودها في عالمكم المجنون هذا..

Quote: ولم تخاصم يوما أحد

خلقتها اصلا ما خلقة خصام ..
ولا اظن ان مثل ذلك البهاء بقدر يقطب حاجيبه في زعلة..



زوقك عالي يا قرشو في السؤال عن الناس..

صباحكم لمة اهل فى ضل ضحى ونكهة قلوة بكريه
يديكم العافيه ويصبحكم ويمسيكم بيها وين ما تقبلوا يا رب

ربنا يجمعنا ويلمنا كلنا وسط اهلنا بالصحه والعافيه والمحنة

دكتور مصطفى طلتك بالدنيا.. وفرحتى بيك لا تقل ابدا
من فرحة شدر الهشاب بالمطر .
اسمح لى اهديك شدر الهشاب يا جنا الاحباب
شكرا اخى الدكتور مصطفى ...شكرافرحة اهل
شدر الهشاب ..
اتشابا لي ضل السحاب
داير المطر ..
خايف اليباب ..
شاف ليه غيمه .. قال سراب .
ماظن تمطر كوم تراب ..
فجأة انهمر ..من غير حساب ..
بل الندى وعطر هضاب ..
بكت السماء..
رحل الرهاب
دنت الطيور من
الضباب ..
ركت تحت رسمت رحاب
رحل اليباس رحل الخراب ..
شدر الهشاب فرهد طرب
من تانى بى عودة الشباب
جدع صميغاتو ورقص..
رقصة غريب عاد للوطن بعد الغياب
****
اسماء الجنيد.. مسقط

****

دكيـــــــــن الزول الحنين
الشوق غيمه ومطرتين
تسلم يا ضى شبابيك القبيلة
ربى يخدر دربك ويسهل امرك
ويفرحك وين ما تقبل
قدر الفرح الفى كل القلوب
اخى دكين التحايا ليك مدمدمه بالمحنه
شكرا جروف وخضرة قيوف ..
***

والصباح يغشاك ابيض وبى خيره اخى قرشو
وتتمسا بالسعاده والعافيه ديمه ان شاء الله
شكرا اخى قرشو
شكرا أردب محنة ..

wonderful
warm
beautiful
more please
people like you soma make this place
a small oasis for happiness and a waterhole in the middle of the Shara dessert
dr mustafa mahmoud

الأخت الغالية شاعرتنا الرقيقة سومه

لك التحية والوداد

سعيد بعودتك للبورد وقد اشرقت جنباته لذلك
وقد ازدهى بكلماتك الحانيات التى ننتظرها دوما

الف حمدا لله على سلامتك عزيزتى

وشكرا للاستجابة والطلة البهية...

يديك العافية يا ستى

العزيز دكين

يسعد صباحك

Quote: والله تخيل سوما دي رقيقة الى حد انني استغرب وجودها في عالمكم المجنون هذا..

لا تستغرب سيدى فمثلها من يخلق التوازن لهذا البورد ويجعله محتملا ومقبولا ولو لا امثالها لكان طاردا...

يديك العافية

شاعرتنا العزيزة سومه

فى بحثى عنك وتقصى اخبارك حاولت ولوج موقعك وللاسف لم اجد له أثراً ...

طمنينا ماذا حل به واين نجد قصائدك الروائع ؟؟؟

مع مودتى

dear brother girshoo
min liga ahbaboo nisa ashaboo
not even a word for me
ya ragil
lol
akhouk mustafa

Quote: دكيـــــــــن الزول الحنين الشوق غيمه ومطرتين تسلم يا ضى شبابيك القبيلة ربى يخدر دربك ويسهل امرك ويفرحك وين ما تقبل قدر الفرح الفى كل القلوب اخى دكين التحايا ليك مدمدمه بالمحنه شكرا جروف وخضرة قيوف ..

بلاي تحت ياتو سما تاني بلقى جنس الكلام المدوزن ده؟؟
ياسومة انا لي واحد وتلاتين سنة على ظهر الارض مافي زول قال لي كلامك ده..
تسلمي يا رقيقة الحاشية على ما سطرته يداك..

اهلا بى طلتكم من تانى .. يا اهلى وخلانى
تسلموا من كل بلا ان شاء الله
اخى قرشو الدار منوره ومفرهده بوجودكم والله
كتر الف خيرك على السؤال والاهتمام يابا
بالنسبه للموقع موجود. طرأ تغيير بسيط فى الاسم
وكان مقفول فترة للتحديث .. عذرا والله للازعاج الما بالخاطر
بكتب ليك اسم الموقع مره اخرى
اتمنى ان تجد تحت (( نيمتى )) المتواضعه ضل يبرد الجوف ولو قليلا من حر هجير الدنيا
شكرا اخى قرشو
شكرا مطر دغش نازل غزير مليان برد
الموقع / www.soomat.com

***
اخوى الدكتور مصطفى ..
حبابك يا ود القبائل المى خمج
بركة العجبتك القصيده ..
شكرا اخوى على الاهتمام والمتابعه ..
ويا ريت تمشى مع اخوى قرشو لى نيمتى الوريفه سومات
بتلقى فيها غير شدر الهشاب ..
لمة اهلنا فى كل مكان من بلدنا الجميله
وان شاء الله يطيب ليك المقام ..
شكرا دكتور مصطفى
شكرا ضفاف ..
***
دكيـــن السمح مو شين
ود الجروف والطين
حبابك يا الزيــــن
والله ده تواضع منك يا خوى
انت تستاهل اكتر من كده يابا
ويكفينى شرف انه لى اخوان حنان زيكم بسالوا منى ..
تسلم يا ود البلد
شكرا محنة

احبتى جميعا لكم الود والتقدير
وشكراااا لا تكفى .......

ســـــــــوما

فيك طيبة أهلنا السمحين الزمان ..

كلامك محنة وحنية ..

عطري المكان بدررك ..

المنتدى عطشان لحروفك ..

دمتي أخت عزيزة كريمة ..

====

قرشـــو يكا الاصـــيل

dear soma
unfortunately your web site is not active
page can not be displayed
i hope it is a temporary fault

looking forward to read more of warm beautiful words
dr mustafa mahmoud

يسلملى خال فاطنه
خال فاطنه الحنين
الشوق قمردورين
حبابك انت يابا وحباب طلتك البتشرح القليب
والله ليكم وحشه يا اهلى الطيبين
كتر الف خيرك يا ود البلد على الكلام المن الجوف
انت زاتك منهم من الاهل هناك .. وسط اللمه ناس يابا ويمه
يديك الف عافيه وحبابك الف
شكرا اخى الخال الحنين
شكرا دعوات طيبين
****
دكتورنا الغالى
لك التحايا النواضر والتجله
على كل الاهاتمام يا ذوق
عذرا لاى ازعاج ما باليد والخاطر من ناحية الموقع
عارف يا خوى انا التكنلوجيا المشاتره دى .. ما بخبرها تب
لكن بتماشى معاها حسب الظروف
ىسفه مره اخرى للازعاج .. لكن ان شاء الله المره دى تنجح
رجاء حاول فى اللنك ادناه
شكرا قلدة امات ودعوات خالات

http://www.soomat.com/

thank you
it worked for now
dr mustafa mahmoud

to prove it is working i got your baby tatara here so we can all read it
*** ترتاره ***

ترتاره ترتاره فى الحله والحاره ..
صوتك الرنان فى ترابنا طمباره ..
وراكى كوم شفع تشابا تتجارا ..
فرحانه بيك ديمه كانه طياره ..
قضيتى كم مرسال لى يمه والجاره ..
ما بتخذلى الاطفال ما بتصدمى الماره..
تقيفى لو فى الحا ل لا اماره لا شاره ..
بترولك افراحهم وانفاسهم ا لحاره ..
كم شلتى فى طيك اخبارك الساره..
معروفه بى جودك ما بتعرفى الضاره ..
متجمعين حولك صغارنا فى داره..
لامه ذكراهم فى ليلنا ونهارا ..
معروفه فى كل دار من كسلا لى بارا ..
موزونه من يومك ما خابره شتاره..
لا دراسه لا مرسوم.. طابعنو فى وزاره..
تتقبلى المشوار لو جيتى فى زياره..
تتبسمى وتجرى تقضيه نواره
تعودى لى دارك لو تهتى محتاره
لا خرطه فى دربك لا جواز.. ولا سفاره..
ولوفه معروفه فى فريقنا كيف باره ..
ترتاره ترتاره ..
حديده معكوفه وسلكه فرفاره ..
لا كلفه فى صناعتك لا هم ولا خساره ..
مجهودك الجبار كانه سياره ..
قراشك النيمه لا اوضه لا عماره..
ترتاره ترتاره حنينه من يومك
فى دنيا وداره ..

سوما
2/6/2004 مسقط

العزيزة سوما

زرت الموقع الآن
جميل حد الجمال
بسيط,
لطيف,
ذوقة عالى
الوانة جميلة متناسقة
اسجل اعجابى,
و اتساءل عن البوم الصور
لا ادرى,
و لكننى دوما ما احب
ركن الصور
احس بها تعرفنى
على الكاتب او الشاعر
الانسان

لكى منى كل الود
و الشكر لعمو قرشو
على السؤال

غادة

دكتورنا الجميل الانيق
تحيه صباحيه تروى الريق
اسعدتنى طلتك مرتين
فرحانه بى وجود امثالك فى الدنيا الواسعه والغربه الضيقه
سعدت جدا لوصولك نيمتنا البارده
واختيارك حنين زى اهلنا الحنان
اتمنى ان لا تقادرنا ابدا..
تصبحنا وتمسينا فى ضل نيمتنا وتشرب معانا فنجان جبنه
شكرا قدر الفرح الجواى بيك اخى الكريم ..
واحب ايضا ان ابشرك وكل من يسال عن الاضافات الجديده للموقع
سوف تنزل فى خلال هذا اليوم ان شاء الله
اتمنى ان ارى توقيعاتكم المن مداد الاهل فى حوش الضيفان البى هناك
شكرا محكره فى الدواخل ...

***
غاده الجميله بت المناضل الجسور
التحيه ليك لا تكفيها السطور
التحيه ليك ممتده قدر المسافات البينى بينك
ومحفوفه بالمحنه يا وديعه
عجبتنى طلتك ورقتك وحنيتك الباينه فى ملامحك
تسلمى يا ستى على احساسك العالى وحسك الشفيف
اتمنى ان اشوفك دائما معانا يا غالية من وسط اهلنا
بالنسبه لالبوم الصور ..
بصراحه ما اضفت القسم ده .. بفكر فى المستقبل ان شاء الله..
تكون فيها لوحات وصور من بلادى ..
لو حبيتى تتعرفى اكتر على صورة اختك الغبشه بتلقيها صغيرونه فى نفس الموقع
قاعده فوق شمال الموقع تتاوق للسمحين الزيك البجو يزورونا لووووول
شكرا غاده الجميله
شكرا باقه ملونه بكل الوان الطيف

و بعيداَ عن شِعرها الرقيق .. سومه تملكـ عيناَ جميله و قلم انيق السرد
إتفضلوا




الجنيد الحلة ** البنطون ** وبالعكس

العباره الفوق دى تلقاها محكره فى بكاسينا المشلهته بين الحلة والبنطون ،
شايله جواها المحنه بى ألوانها من دغشا باكر.. وطيبة خاطر ...
الموظف المحترم القرأ واتعلم بى بنطلونه الرمادى وقميصو الابيض المخطط بى بنى باهت ، اكلت خطوطو مكواة الحديد المصديه !! ورغم كمية الصدأ الطافح ومغطى كل الجهات لكن برضو تلقاها كريمه ومخلصه بتأدى مهمتها بى مزاج بدون ما تغلط على القميص وتوسخ ملامحو ...
طلبة المدارس بى القمصان المكرفسه والعوينات الزايغه من جدول الضرب والشعر المبروم ليه شهر ما شاف مشط الا عند الحلاق .. والكريعات المخرخرات رملة وغبار من لعب كورة أمس العصر والشبشب المهرود طرفو ..
أمنا الحاجه بى قفيفتها المهلهلة ، وجرجيرها البايت بى مويتو ، محكره فى نص البوكس معاها مفاريك ومقاشيش وكوم ويكه ..
حاج اللمين والجلابيه الجيبها مقدود والعمه النصها مبرقع بى موية الظهر(( البقى تقليد نصو حبر )) وطاقيتو الحمراء باين طرفها..
ست التسالى الجات جاااااريه وتناغم : أقيف يا حاج .. أقيف ياحاج .. شايله صينية الطلس نصها فول مدمس ونصها تسالى ملحو زايد ، مقنعه بى طريحتها ولابسه سفنجتها الخدرا مربوطه فردتا بى دبارة ..
فاطنه أم الصغار لافحه توبا وشايلا وليدها فى صفحتها مدمدم بى طرف توبا
وبشكير اصفر جاها هدية من السعودية .. جاريه لاحقه البوكسى ولاحقه الصف الطويل فى العياده ومقابلة الطبيب البشل الجيب .. ورجعتها بدرى للخدمة وغداء الوليدات ..
وفى طرف الباب كراع جوه وكراع بره .. ولدنا الكمسارى بى قميصو الاتحفظ لى كل الركاب وبنطلون الجينز المرقوع .. خامش ومكرفس فى إيدياتو الضعاف
قروش الركاب والفكه فى الجيب الباهت الرهيف .. يناغم ده ويصابح داك ويسالم الفات .. ويطنطن مع السواق الملفح بى شالو ولابس نضارتو السوداء ، ويبخبخ فى دخان سجارو الزهج بنيات المدرسة ..
كل الملامح الشفتوها دى فى البوكس الكريم البقوم بى واجبو كل يوم ، وفوق لى الشايلو بى جوه .. شايل فوق راسو المسطح ربط البرسيم البتلب قشو بى رقراق السقف فى جيب الموظف القبيل ..
وشايل شوال البصل حق حاج اللمين ، وبمبون البصل طاقه ريحتو وملخبطه بى دخان سجار السواق معكننه الجو لى الوليد المحموم وليد فاطنه .. مصرصر وشيهو ويئن تحت بشكيرو.. لكن ما فارقه مع وليدات المدارس ولا حليمه ست التسالى ..
فى نص الطريق والبوكسى ما قادر يتنفس غايص نصو فى وحل التراب !!
رغم ده بقيف لى نفرين جاريين ، نفسهم مقطوع .. واحد شايل جريده والتانى جارى مخلاية الليمون الملقطو بالليل من الجنائن .. وحزمة النعناع غرقانه فى نص المخلايه ... شويه تدى البوكس نكهة ،، الفواكه البسمعوا بيها وما بشوفوها الا قليل من ربط العنكوليب ، وقصب السكر ، وأكوام الموز ..
المنظر البديع ده بتكرر كل يوم .. لا مرض لا قرف غربه ، لانهم بجو صادين آخر النهار لى ديارهم العامره حنيه ....
لكن حالنا نحن بتختلف الجنيد البنطون المطار .. والدميعات النفسهن حار
والعبرات البتتقطع فى الحلوق والعوينات الرادفه الحزن اتنين, والحشا البدافر الوجع والخطوات المعسمه تتوسل الرجعه للناس القبيل والشوق تقيل... والسفر الطويل.. وكل ما تقول تتناسا يجيك طرف الجواز الاخدر يكايدك بى مغصه ويتحداك
منظر الشنط المردمة بى باقى المحنة الاستلفناها معانا لحين.....


الجنيد الحلة ** البنطون ** وبالعكس**

خدر الفنان الانسان
حبابك يا عشا الضيفان
الشوق اطنان
وينك راجينك من قبيل
ولا خلاص خرفت ونسيت
التحيا عبرك لناس البيت
لكم الشوق والمحنه
شكرا من تانى يا شفيف