عندما يدمدم الحزن فرح القلوب

عندما يدمدم الحزن فرح القلوب الحنينه ..
لوحه بتخيلها من على البعد وانا فى اقصى ركن من بلاد الله الواسعه ..وفى اقصى منطقه وفى ركن قصى من منزلى وفى زاويه مضلمه ..كل هذا لكى اضارى ولو اقدر قليلا من حزنى العميق.. من بقية افراد المنزل والحوالينى فى هذه اللحظه..
تخيلوا يا احبه حالى ..
اهلى الغبش بى حنانهم وتحنانهم شدوا الرحال من امس وباكرية هذا اليوم المبارك ..
ليباركوا عقدر قرآن ست الحسن والصون شقيقتى الدكتوره الصغيره سوسن لى سعيد الحظ دكتور غازى الخواض الشاب المتواضع والمتوشح بى كل صفات اهلنا الغبش..
شادين الرحال وحازمين الدموع فى ملامحهم البسيطه ..
ساعة السلام دمعاتهم بتسبق الكلام ..
كيف بكون اللقاء فى ساحة الدار .. وهم متعودين بترحاب ذلك الحنون فى مقدم افراد البيت والقبيله ..
وكيف بكون حال اهلى واخوتى الصغار وقبلهم جميعا امى الحنينه ساعة عقد القرآن.. هل يتبادلوا التهنئه ام تعود دمعات الحزن المنتكى فى الحنايا والضلوع ..مستنى لحظه تحركوا ومتحايل على الجفون والخدود الاتنخرت بالدموع..
سوسن الكان قبل سنتين حفل تخرجها موشح بدموع الغالى والدنا الذى زرع فيها حب الخير للناس وخدمتهم بتفانى من خلال مهنة الطب مهنة الانسانيه ..
كان بقول ليها انتى حنينه وتنفعى فعلا يا سونا تكونى طبيبه ..
بعد فرحة التخرج بى شهر كان رحيله المفاجىء ..
فى لقائى الاخير بيها فى الاجازه .. كانت فرحتهابى خطوبتها من زميلها مدمدمه بى حزنها على فقدان الغالى .. وكنت بقرأ الحزن فى ملامحها البريئه ..
الليله الفرحه كبيره لكن الذكرى مره ..
يوم العقد دايرين ولى الامر ..
يوم العقد دايرين كبير البيت
يوم العقد تم العقد من فلانه بت المرحوم فلان على فلان الفلانى
آآآآآآآآآآه يا سوسن فرحتى جووووووووه ما قادره تتنفس
وزغروتى خانقاها العبره
اعذرينى حبيبه ولكى امنياتى السعيده بزواج ميمون
ولى ابونا الرحمه ولينا الصبر
ارجو من الاحبه ان يترحموا معى على روح والدى الجليل
والرحمه لجميع موتانا
وعذرا لو فتحت جرح ما بندمل للبعض..

سومة

الف رحمة لي للوالد

والابو الانتي بنتو حاشا ما مات..... شايلة اسمو تفاخر بنات جيلها....

منو الابو العايش وحي وعندو بنيّة متلك؟..... قُُلال... وحات الله قُلال....

افرحي يا سومة.... روح ابوكي فرحانة بك...وتقول لي رفاقتا شوفو في الدنيا بنيتي سوما....

وحال الدنيا .... ما في فرحة تامة..... علا الحزن قاعد يتم ويدفق....

بعد مرات دمعية الحزن تجي في عز الفرح تدافر في دموع البهجة...

الغربة قاعدة تكبّر في عيونا وفي قلوبنا الاسى حتى لو كان باقي منو شوية....

مبروك لاخيتيك...وبيت مال وعيال.....

الاخ سوما لله ما أخذ ولله ما أعطى

ونسأل الله الكريم رب العرش العظيم أن يجيركم فى مصابكم ويغفر للوالد ويرحمه ويجعله من أصحاب اليمين انه ولى ذلك والقادر عليه

اخوكم مكاشفي

الاخت العزيزة سوما

اولا اقول الف مبروك للعروس وربنا يجعله زواجا مباركا

وارجو ان تحبئي احزانك - هذه الاحزان التي تسكن الدواخل لرحيل احبابنا- في لحظة الفرح هذه

شاركي اختك فرحتها باتصال هاتفي وستجدي ان كل اهلك هناك هم ابيك الذي تسري روحه فيكم جميعا وسترينه فرحا لهذ اليوم ،
والله نسأل له الرحمة والمغفرة وان يبارك في ذريته الي يوم الدين

سوما

وهكذا الحياة تعطى وتأخذ تضخك وتبكى مبروك زواج سونامع التمنيات بحياة زوجية سعيدة
والف رحمة ونور على قبر الوالد
تحياتى

الزول السمح .. اخوى د/ عادل الزول المو سجيمان .. ركازة الحبان
التحيه ليك بقدر جمال سطورك وبقدر مشاعرك النبيله ..
حقيقة كان لكلامك عميق الاثر فى نفسى ..
شفتك معاهم هناك وبينهم ..حايم مع ناس العقد وحات الله .. ومانى دايره اكبرك..
لكن شفتك ملفح بى طيبتهم وحنيتهم .وبتقول لى مبروك على خيتك وعقبال الباقين والرحمه للوالد الحنين الخزين
شكرا اخوى د/ عادل شكرا دعوات اهل .. وشكرا فرحة قبيله
وعام سعيد عليك بقدر سعادتك المشتته فى قلوبنا جميعا
والعفو والعافيه للجميع...

***

الاخ المكاشفى الف شكر على طلتك ومواساتك ومباركتك
وان شاء الله نبارك ليك السمح ..
كل عام وانت بالف خير يا رب ...

***
الحنين ود قبائل البطاحين ..
سمباتيكو .. الشكر نيلين
التحيه ليك قدر الجواك يا صافى
وتهنئتك وصلت يا حنين ..
وعقبالك بركة الجمعه الجامعه والدعوه العند الله سامعه
قول آميــــــن
اها انا ماشه احضر العرس فى العيد باذن الله .. عندك وصية .؟ بس ما تقول لى عروس ..لوول
شكرا بحر سمباتيكو وكل عام وانت بالف خير ..

***
الحبيب زولنا الحبوب ود البلد الحبيب

حبابك بعد غياب ..وعام سعيد ليك ان شاء الله يا رب..
يباركو ليك الجديد السمح ان شاء الله يا بلدى يا حبوب
تتبارك ايامك وتتهنأ فى مكانك وتتعلا مراتبك قادر يا كريم
شكرا بلا حدود
وعام سعيد ان شاء الله للجميع

فراشتنا الجميلة : سوما

قرأتك هذه المرة وانت تجمعين بين حزن لوالد راحل

و فرح لأخت تتأهب للدخول لحياة جديدة ..

وفي الحالين أراك كما عرفتك :
بهية الحرف
صادقة الحزن
سامقة الأصل
شفيفة الروح

لوالدالكل كل ما في الوجود والآخرة من رحمة.

ولأختك الكريمة ورفيق دربها الجديد صالح الدعوات

بحياة ترفرف عليها بوارق السعد والهناء والمسرة.

ولك الصبر وطول العمر .. وكل عام وانت بالف خير .

خضرعطا المنان