Post: #1
Title: *** مصطفى السنى0000 يلهب مسقط ***
Author: soma
Date: 04-20-2004, 09:14 PM
Parent: #0
مصطفى السنى0000 يلهب مسقط
فى أمسية الأربعاء الموافق 14/4/2004 ، حل ضيفا عزيزا على مدينة مسقط الفنان المبدع " كروان المهجر " ( مصطفى السنى ) المقيم بالمملكة المتحده ، والذى إستجاب مشكورا لدعوتنا له بتشريف الجالية السودانيه بقدومه الميمون ، قادما من مملكة البحرين ، فى جولة محدوده ببعض دول الخليج 0 فاستقبلته المدينه بترحاب وأمل عريض ، وتشوق لسماع صوته الذى أذاب ثلوج أوروبا بدفئه وعذوبته0
فمن لم يسمعه يشدو من قبل ، أصبح أكثر تشوقا لسماعه ممن سمعه0 فقدومه كان موضع تحد منا 00 مراهنين عليه وبكل الشروط دون تحفظ ، ودون أن يخالجنا أدنى إحساس بالمجازفه 0 إنطلاقا من أن قناعتنا بمقوماته كمطرب كانت كافيه لأن نكون على ثقة تامه بأننا سوف نكسب الرهان000
وقد كان 0000 ففى ليلة الخميس الموافق 15/4/2004م أثبت الكروان أنه أهل لكل تحد 0 وإسم يمكن أن يقترن بأى عنوان له إرتباط بالأغنية السودانيه0000
فبصحبة العازف المتمكن الشاب / محمد إبراهيم بلال الذى تجلت موهبته فى تطويع آلة الأورغن فى إتجاه إحساسه ، شدا الكروان كما لم يشدو من قبل 000 تغنى فأبدع000 نوع فأطرب000 تجاوب فأخلص 000 صفقت له الكراسى والجدران قبل الحضور 000 شكل بطبقات صوته الفريد أوبريتا نسجه من أطياف الفلوكلور السودانى فحاك به حلة معطرة بعبق بخور الصندل المرشوش بفلور دمور ، وسوار دى باريس ، وقلامور 00 توشحت بها جنبات نادى الجاليه السودانيه على إمتداد ساحته العريضه000
كانت بحق ليلة لم تشهد مسقط مثيلا لها على مدى عدة سنوات ، تعاقب خلالها عدد من المطربين السودانيين00 وبشهادة كل من كان لديه تحفظ على رهاننا00
والآن وبعد أن أعلن الأخ المبدع / مصطفى السنى عن نفسه بقوة ، بات من لم يسعفه الحظ بالحضور فى تلك الأمسيه يتساءل متى يكون الموعد القادم ؟ 000 فنقول له قريبا 00 فلن يغادرنا كروان المهجر دون أن يرضى الجميع000
فأهلا به بين أهله ومحبيه ومعجبيه إنسانا خلوقا مرهفا ، ومطربا مبدعا أصبح إسمه موضوع الساعه 000000
الفاتح الجنيد
حباب اهلى بعد غيبه ..
كما ذكر ود الجنيد الله يديه العافيه.. كانت ليلى لا تنسى نحتت فى الذاكره..
الكلام بعد ود الجنيد يصعب .. بكتفى بالمطايبه لكم يا اهلنا
والتحيه للاخ نزار حسين .. والف شكر على الثقه .. وبقول ليك يا اخى نزار الاخ مصطفى السنى فعلا مبدع وبيننا اعمال مشتركه لونها بالحانه الرائعه وزاد من جمالها بادائه المتميز بحنجرته الحنون.. اتمنى ان تسمعها ويسمعها كل محبى مصطفى ..
متعه الله بالصحه والعافيه ومزيدا من الابداع يا مصطفى الحنين..
سوما
|
Post: #2
Title: Re: *** مصطفى السنى0000 يلهب مسقط ***
Author: nazar hussien
Date: 04-21-2004, 08:37 AM
Parent: #1
مبدعتنا سوما....بس اوصيك بان تكوني انانية جدا...وتسمعي مصطفي قبل
ان يغادر وبالعود دون مصاحبة اي كشكشة...وتطلبي منه يا قلب انا كنت قايلك تبت من تعب السفر...ما تخلي زول جنبكم ينضم ولا يجيب شاي..ولا يفتح باب...تفادي السييييييك سيييييك...والسلامات الفي نص الغنا...خذيه الي مكان هادي واسمعيه وبدون مؤثرات او مكبرات صوت...
عندو نقرشة في الصوت والعود لا يعرفها الا...مدستر زي وزيك وزي الجندرية.....
|
Post: #3
Title: Re: *** مصطفى السنى0000 يلهب مسقط ***
Author: soma
Date: 04-21-2004, 04:59 PM
Parent: #2
سلام نزار المدستر .. قلت لى عندك زار يا نزار.. والله بينى وبينك مصطفى مش بجيب زار .. مصطفى لما يدوبى الكراسى بترقص زى ماقال ود الجنيد .. ربنا يحفظه والله وعينا باااااااااااااااارده ما يقوم هسه يشرق يقول دى سوما ونزار .. غايتو انا بره ..
نزار ياخوى ما توصى حريص .. مصطفى بالعود مش سمعته بس.. سجلت منه كمان .. ايه رايك ..واليوم عندنا معاه حفل عائلى معتبر فى جو فنى فى دار الاخ ناجى ابو زيد وزوجته الحبيبه جوليا وردى.. حا نستمتع ليكم معنا ..
وابشرك انه لحن 3 اغانى جديده من مجموعة القصائد العنده ..طبعا اكتر فنان اتعاملت معاه هو .. مش عنصريه لانه قريبنا وكده هههههههه لكن لانه انا المحظوظه يختار لى فنان مبدع زى مصطفى مجموعه من اعمالى المتواضعه .. مصطفى فنان بكل ما تحمل الكلمه دى معانى .. مبدع صوتا واداء وربنا يحفظه..
|
Post: #7
Title: Re: *** مصطفى السنى0000 يلهب مسقط ***
Author: Outcast
Date: 04-23-2004, 04:38 AM
Parent: #2
الاخت سوما ... و الله لي اسبوع حسى بحاول انزل اغنية لمصطفى السنى وما عارفة كيف ؟؟ اها مشيت على بوست تمبس وخالد لكنى لم اجد ضالتى ...
لوعندك اغنية بالله نزليها ...
لك محبتى ...
|
Post: #4
Title: مصطفى السنى..يلهب مسقط
Author: sinco
Date: 04-21-2004, 05:22 PM
Parent: #1
الاخ الفاتح الجنيد..يديك العافية
الاخت سوما..مصطفى حبيب وللقلب قريب ولما اسمع صوته طوالى دمعتى بتجرى
فيهو حاجة حنينة كدة .....وانتى كمان بتكتبى كلام يثير الشجون
سمعت منه اغنيتين ليك(بت الاصول)واحدة منهن
ماكنت قايلاهم تلاته,الولد دة اتخابث على والا شنو؟
باتنى على كلام الاخ نزار واغنية ياقلب للرائع عركى وكمان خليهو يغنى ليك عيونك كانوا فى عيونى لعبد المنعم حسيب لو مابكيتى لومينى.
انا حاسدااااااااااااااااااااااااااااااااااااااااااااكم عليهو ودة آخر كلام!
|
Post: #5
Title: Re: مصطفى السنى..يلهب مسقط
Author: soma
Date: 04-22-2004, 06:33 PM
الحبيبه sinco .. حبااابك بت امى .. واليوم السعيد اللينا جابك .. والله ياختى ليك الف حق فى حسادتك لينافى ود امى الحنين مصطفى .. باقى اليومين ديل منفردين بيه انا وود الجنيد .. مبارينو وين ما مشا.. ويوم يكون مرتبط براه بنحس بى وحشه ما يعلم بيهاالا الله .. ده كلو هين الكلام يوم السفر.. غايتو الا اجيك ناطه بى هناك واجيب الشرايط السجلناها منه .. ونشتت دميعتنا سوا لووووول.. ان شاء الله يا حبيبه نتلم فى فرحه وعرسه.. ربنا يهديه ويديه بت الحلال البتسعده.. اسمعى اقول ليك سر بينى ما بينك .. بس ما يقوم يجى ناطى يقراه .. اها رايك شنو .. نجى نتآمر عليه ونشوف ليه واحده .. غايتو انا ما بتورط معاه مية الميه بتضارا فيك .. عشان بعدين ما يقول سوما وما ادراك ما سوما .. وانتى براك عارفاه لوووول..
طبعا العديله على .. عديله حنينه زيو كده .. بى مزااااااااااااااااااج .. عقبال ما نتلاقى ونحننو .. هسه بنكون طيرنا منو الجكس نحن صاح ؟ هههههههه
يلا حبيبه سلام ونشوفك ونسمعك قريب باذن الله. وبالنسبه للاغانى الوصيتينى اسمعهم منو .. لومك على الليله السهره بيهن ..
سلام والله معاكم وتحياتى وود الجنيد ..
|
Post: #6
Title: مصطفى السنى..يلهب مسقط
Author: sinco
Date: 04-23-2004, 02:36 AM
Parent: #1
الغالية العالية سوما
كنت اعلم ان تحت القصائد الناعمة الحنينة يختبىء قلب رقيق.. شفيف.. انيق
احب لك جدا (انا ماحبيتك..لكنى عشقتك)
ولااحب ان اقول ماتفعله بى هذه القصيدة فى كل مرة اقراها فيها
سعدت كثيرا بتواصلك الحنين من القلب للقلب ونحن لم نر بعضنا راى العين ولكن كان يقينى دوما ان القلب يرى مالاتراه العين.
بت امى..أرق عبارة نحملهاما نكنه لمن نخاطبه بها, وانا اشكر لك رقيق المشاعر يا(حبيبة القسا) .
سلام كتير ليك وللعيال وأبو العيال والسلام امانة لود السنى الغالى علينا ودايما رافع راسنا
وانا متفقة معاك ياحبيبة طوالى نفذى الفكرة وليك على انا باتحمل المسئولية ,والله يكفينى شر لسان فلان.قولى ربنا يرمينا فى بت الحلال التغنينا عن الذلة وأكيلة اللحم.
مناى ورجاى فى الدنيا دى نشوفه فى بيت العدل وربنا يديهو بت حلال قدر ماشايل من سمح الخصال.
ومنو غيرك البنسمح ليهو يكتب العديلة؟عقبال ماتعدلى لبناتك واولادك.
انا متفقة معاك تجيبى لى الاشرطه السجلتيها وانا باجيب ليك الانا سجلتها بس انا باكون فايتاك بى درجة,عارفة ليه؟عشان انا مسجلة ليهو فيديو كمان.
خليتك عافية وتحية ود ومحبة ليك ولأهل مسقط وكان الله مد فى العمر ,بنتلاقى
|
Post: #8
Title: Re: مصطفى السنى..يلهب مسقط
Author: Outcast
Date: 04-23-2004, 04:39 AM
Parent: #6
معليش يا اخوانا .. لقيت مداخلتى فووق ... لم اقصد
|
Post: #9
Title: Re: *** مصطفى السنى0000 يلهب مسقط ***
Author: بدرالدين شنا
Date: 04-23-2004, 05:31 AM
Parent: #1
| Quote: وتطلبي منه يا قلب انا كنت قايلك تبت من تعب السفر...ما تخلي زول جنبكم ينضم ولا يجيب شاي..ولا يفتح باب...تفادي السييييييك سيييييك...والسلامات |
والله أنا أخش وأحضر معاهم وأبشِّر وأزغرد كمان
| Quote: كانت بحق ليلة لم تشهد مسقط مثيلا لها على مدى عدة سنوات ، تعاقب خلالها عدد من المطربين السودانيين00 |
أنا طبعاً ما سمعت مصطفى السني الإ ونسة بالتلفون لكن غناهو ما سمعتو وعليه سأظل واقفاً في محطة المبدع عاصم البنا وتفرده والقبول الذي لا قاهو من الجالية في مسقط والتي غنى لها عشرات الحفلات والرحلات وطالبوه بأن يعود مرة ثانية وربما أتحرك من هذه المحطة بعد سماع مصطفى قريباً
الفاتح الجنيد
يعجبني هدوءك وإسلوبك الرصين وقلمك الشفيف
لك الود
سوما يا (بت الأصول)
تشكري إنتي والفاتح والجميل سيف الدين عبدالرحمن للأريحية والإستقبال والكرم لضيوف مسقط مصطفى السني ومحمد إبراهيم
لكم جميعاً تحياتي وجيش أشواقي
|
|