*** لحن الخاطر ***

.. لحن الخاطر ..

مدفون جواك..
فى عمق الخاطر ..
لامى معاك ..
الريد الدافر..
بتهجاك..
واجمع فيك ..
بقدرة قادر ..
واستناك ..
افكر فيك..
لى يوم باكر
واترجاك ..
تشيلنى معاك .
غيما ماطر.
اتوه فى سماك ..
وليك اسافر ..
اعيش جواك..
الملم فيك
ونبضك طاهر..
اتمناك
اغنى معاك
لحنا عاطر
حروف منثوره..
درر وجواهر ..
وبيك اتحدى
قيس الشاعر ..
واحلم ديمة
باجمل حاضر ..
يحلق يرفرف ..
بى جناح طائر ..
يناجى الماضى..
ويفضل فاكر ..
كلمة رواها ..
البدر الدائر ..
عم شذاها ..
النسم الحائر..
يا يوم باكر .....
انت الامل
الاخضر ناضر..
وانت الريد
الفيه بذاكر..
وانت القلب
الكلو ازاهر..
يا يوم باكر....
انت النيل
البجرى مشاعر..
وانت الحلم
الليه بخاطر..
ادمر بيه
قيود وعساكر ..
اكسر تحته
الحظ العاثر..
وابدأ معاك
العمر الزاخر ..
بالافراح الليها بداية
ومن دون آخر ..
بالافراح الليها بداية
ومن دون آخر ..
اسماء صديق الطيب
مسقط عمان 12/1/ 2003

الأستاذة أسماء صديق
يعجبني هذا الإيقاع السريع، وأحبه لأنه سوداني جدا. ويذكرني بالغناء السوداني الذي أفتقده جدا..

قصيدة لطيفة جدا
شكرا لك لهذا الشذي!

إيمان

سوما

ها انتي تعودي مرة اخري بنفس الوهج ونفس الروح العالية وهذه المفردات السلسة والبسيطة والتي تشكلك ..وتحلق بنا بعيدا

تسلمي كتير وكل عام وانت اكثر وهج

تنقو

سوما
دايمآ اشم في كلماتك ريحة حميمة وودودة
قصيدة جميلة وبسيطة
تسلمي يا رايعة
وكلو سنة وانتي سوما
وكلو يوم تفرحينا

سلام من جوه القلب للغاليه سوما
وكل سنه وانتي طيبه وبصحه وسلامه مع العائله الكريمه ان شاء الله
بيك وبحروفك العيد يكتمل ويزهر لينا

اطنان ود وشوق
ليون

الحبيبه ايمان تسلمى يا غاليه وكل سنه وانتى طيبه .. كلامك برضو ذكرنى السودان وناس السودان الحنان .. اهديك الحنيه الجواك يا ايمان ..وتسلمى ....


عمنا الغالى تنقو ..ربنا يديك العافيه وكل سنه وانت طيب .. ربنا يحقق امانيك يخليك يا رب ..
شكرا بحر عمنا الحنين على كلامك الجميل ..
بهديك دعوات العيد الصباحيه ..منى ليك عيديه ..

الحبيه منا .. كل سنه وانتى طيبه .. ربنا يحقق الامانى ويديك الفي مرادك .. الف شكر على طلتك البهيه يا نواره ..وتسلمىى


ليون الغاليه يا قمر السماء ..حقيقة ليك وحشه زى هلال رمضان الفاتنا بى خيره وبركته ربنا يعيده لينا بالخير والصحة .. وليك فرحه زى فرحة العيد.. كل سنه وانت عيديه حلوه فى قلوب الناس يا رقيقه .. ربنا يديك الصحه ويحقق امنياتك .. وشكرااا اعياد على كلامك الجميل ..وتسلمى..

احبتى لكم جميعا كل الامنيات الطيبه ولكم التحايا العطره .. ولكم كل الموده والشوق .. وربنا يحفظ الجميع ويحقق كل الامانى ويعيد العيد بالخير والصحة والفرحه الكبيره بلم الشمل فى بلدنا الغالى .. وتسلمواااا

سومه ياملكه الوداعه شكرا لك علي هذا الابداع الدافق وساهل وكل عام وانت بخير ومجبوره خاطر.
ابدا مامه دومه

سوما شوفي التمامة دي ،،،،،


استنيتك
قلت أظنك
ترجع دافر
أنا من بعدك
حالتي درادر
شوفي طشاش
وللسكة اساسق
لا صادفتك
فرهد قلبي
وطاب الخاطر
لا نسيتك
وإرتاح البال
البيك مشغول

كل سنة وانت طيبة العزيزة سوما

لحنك ..جميل وموقع..وبهيج

تسلمي

كم هو طاعم هذا الإيقاع ، ولحن الخاطر فعلا هو .
لو كنت أجيد التلحين والغناء للحنته وغنيته ،
لكني للأسف لا أستطيع حاليا أن أردد :
علمي أنت رجائي
وباللحن كمان .
لك التحية ، وننتظر المزيد

سوما الحبيبه

والعيد السعيد يروي عافية شرايينا بالفرحة واللقاء ، يشغل انتباهتي تضرعاتي الى العلي القدير ان يعفوا عنا ويتقبل صيامنا وصلاتنا .
وكل سنه وانتم بالف خير

دوما الديمه حنينه .. وكل سنه وانتى اكثر حنيه ..وكل سنه وانتى طيبه ..ربنا يديك الصحه والعافيه .. اسعدتنى طلتك العيديه .. منى ليك مليوه تحيه وتحيه .. شكرانغم البلوم تطرب معها كل الجداول والغصون .. ربنا يدك الفى مرادك وتسلمىىى يايمه ..


نادر الفرح الباكر .. بهديك غناك ..وبهديك لحن الخاطر ..
تمامه لطيفه وكلامك جميل .. خلانى احب لحن الخاطر اكتر واكتر .. ربنا يديك الصحه والعافيه وكل سنه وانت طيب .. شكراليك على لحنك العاطر ..

بنت النيل وسلالة الفرح الجميل .. كل سنه وانتى طيبه ..ربنا يحقق امنياتك يا حبيبه .. وشكرا موية صافية جارية من نيلك ونبعو ..

ود الوطن ..ود قاسم .. انت الفرح الفينا باسم .. وانت الغنيوات المحكره فى كل المواسم .. كلامك كان من اجمل الالحان ..ربنا يديك الصحه والعافيه وكل سنه وانت طيب يا عشانا .. بتعجبنى فيك وطنيتك الساكنه فيك وباينه فى ملامحك .. شكرا علمنا البرفرف شامخ شموخ اهلنا .. تسلم يا ود قاسم ..


شيرى يا رمز الوداعه .. انتى الفرح الديمه عاطر ..وانت النغم الجانا زاير .. وانتي الحنين الكاتبو شاعر ..
كل سنه وانتى طيبه وربنا يحقق كل امنياتك يا رب ..
اسعدتنى طلتك النديه ..منى ليك مليون تحيه ..وامنيه عيديه ..
شكرا رحيق يا رقيقه .. وتسلمىىى