Post: #1
Title: *** عز الضلام ***
Author: soma
Date: 04-02-2004, 11:28 AM
Parent: #0
عز الضلام***
عز الضلام .. والليل هجع ..
تطعن همومك زى سهام ..
جوه الضلع ..
تحسب تعدد في الايام ..
كم يوم طلع ..
تهمس مواويل الغرام..
والكون سمع
حتى الودع وصلوا الكلام
جلس استمع ..
ودع السماء تحت الغمام
ابيض نصع..
مرات يشع ..
مرات يفر زى الحمام..
مرات يحن جاييك رجع
مرات يقيف سارق السمع
شايل معاك خوف الضلام ..
منك دنا جالس ركع..
كيمان نجوم زى الخيام
تحلف تقول في منتجع
صمت السماء وهمس الأنام
لولايو زى طفلا رضع ..
نفس الزهر لحظة وئام
ودع خلاص صوت الوجع
تبداها بى حرف السلام
تسرح تهيم زى طيف فزع
لى زول هناك شايلو المنام
ساند على حيل انفدع
وانت في ليلا بهيم .
تتوهم الغفوة وتقع
سارح مع الحلم النعيم
تترجى ضيا لو طلع
تترجى ضيا لو طلع
أسماء الجنيد مسقط
|
Post: #2
Title: Re: *** عز الضلام ***
Author: 3mk-Tango
Date: 04-02-2004, 11:39 AM
Parent: #1
سوما العزيزة
ماذا تقول الكلمات .. امام هذا الشلال من الكلمات .. ربنا ايديك العافية .. ويسلم قلمك الراقي البسيط ..
تنقو
|
Post: #3
Title: Re: *** عز الضلام ***
Author: almohndis
Date: 04-02-2004, 11:50 AM
Parent: #1
Quote: وانت في ليلا بهيم .
تتوهم الغفوة وتقع
سارح مع الحلم النعيم
تترجى ضيا لو طلع
تترجى ضيا لو طلع |
استاذناسوما
ايديك العافية
|
Post: #4
Title: Re: *** عز الضلام ***
Author: سجيمان
Date: 04-02-2004, 07:53 PM
Parent: #1
سوما
الله يخليكي
|
Post: #5
Title: Re: *** عز الضلام ***
Author: soma
Date: 04-03-2004, 08:53 AM
Parent: #4
عمى تنقو الحنين ..سلام يا قبلة الوالدين..
سلام يا ود الجروف والطين
تسلم انت على طلتك ..وكلامك المن جوفك يا صافى النيه..
يديك الف عافيه ويمتعك بالصحه يا رب..
المهندس حبابك يا العشا..
شكرا ليك على طلتك وكلامك الزين .. ربنا ما يحرمنا منكم يا اهل
كتر الف خيرك يا مهندس وشكرا خداااااااااار
سجيمان المو سجيمان .. الفنان المو خمجان .. ود القبيله ركازة الحبان
تسلم يا حنين وحبابك وحباب الطله يا ذوووق
اخوتى لكم منى جميعا كل التحايا والعرفان ..
|
Post: #6
Title: Re: *** عز الضلام ***
Author: Ahlalawad
Date: 04-03-2004, 08:57 AM
Parent: #1
الأستاذة سوما : بس حبينا نقول مرينا بي هنا ، قرينا وارتوينا واستمتعنا ..
ممكن طلب؟
قصيدتك بمناسبة مرور سنة على الوالد عليه الرحمة .. أرجو ألا أكون قد قلبت عليك المواجع
|
Post: #7
Title: Re: *** عز الضلام ***
Author: soma
Date: 04-03-2004, 10:44 AM
Parent: #6
حبااااااااااب اهل العوض .. وين الحى بيكم اريتكم طيبين وحالكم زين..
شكر وكتر الف خيركم اهلى الحنان .. اهل التكيه والضيفان..
وغاالى والله والطلب رخيص بالنسبه لقصيدة الوالد عليه رحمة الله .. هو بتنسى ود امى؟ ولا بتقلب لى مواجع..الوجعه قاعده محكره فى الجوف..بتزيد ويتزيد معاها الخوف من الوحده واليتم..والله غالب..
دعواتكم معاى ليه الرحمة..ولينا الصبر..
وليك القصيده ..
بعد مرور عام على رحيلك يا غالى
فى جنات الخلد باذن الله يا ابى العزيز
مرت سنه ...
مرت سنه كانت الم.. كانت ضنى ...
دمعات تقطع فى الحشا...
زى ام حنون فقدت جنى ...
انات وجع تحكى الفراق..
تحكى اليتم مر العنا ...
آهات بتعصر فى القليب هنا وهنا ...
تفتح جرح ما بند مل...
مليون سنه .. ومليون سنه ....
كيف اندمل .. كيف احتمل ...
صورتك معاى.. جواى هنا...
انت الابو انت الاخو...
انت الصديق كنت المنى...
كنت الرفيق طول الدرب ....
كنت الاهل كنت السنا....
مشيت بعيـــــد يتمتنا ..
حسيت براى انا ما انا ...
كيفن اكون كيفن انا ...
بعد الفقد .. بعد الفنا ...
كنت الفرح ..كنت المرح ..
بعدك خلاص البسمه…
راحت مننا ….
حتى الطيور فوق السماء ...
رحلت بعيد من حينا ...
والفراش خلى الزهر ..
سافر رحل من زهرنا ..
كل الحروف رثتك شعر ...
والنيل بكاك .. مايل دنا ...
دمعو سال.. زى الجمر...
يبس خدارو.. و انحنى ...
حتى الجروف ..لبست سواد...
عم الحداد فى شرقنا..
وكل غربنا ...
وبيتنا داك ما بتوصف...
لا ضاق فرح .. لا حس يوم بالهنا....
عم الحزن كل الارض...
حتىالشدر .. عرف الحزن مال و انتنى ..
صغار الفريق ...عرفو الدموع..
لا يوم نسوك .. لا صدقوا يوم فتنا ...
سؤالم عليك فى كل صباح ..
الهب شجونا ولوعنا ...
ابكوه يا اهل العلم ...رحل القلم ..
جف الحبر.. ما عاد يسطروجعنا ...
ابكنو ياخالات .. ويا عمات ..
و بنوت عمنا ...
ابكن معاى عز القبيله وعزنا ...
ابكوه يا دخرى الجدود ....
غابت شمسنا.. وضلم بدرنا
فقداً عظيم .. مو لى براى ..
فقد الاهل كل الاهل ..كلنا..
مهما كتبت وقلت فيك...
كل الكلام ماظن يضمد جرحنا ...
سفرك بعيد من غير رجوع ...
دعواتنا ليك من قلبنا ..
الرحمه ليك يا فقدنا ..
ولينا الصبر من ربنا ..
ولينا الصبر من ربنا ..
=========
ابنتك
اسماء صديق الطيب الجنيد
مسقط سلطنة عمان
14/5/2002
|
Post: #8
Title: Re: *** عز الضلام ***
Author: THE RAIN
Date: 04-03-2004, 11:03 AM
Parent: #1
التحايا وعاطر السلام
العزيزة سوما
شكرا على الكلام الرويان
وعلى الحروف المسقية بى ندى الجمال
ودوام الألق
أبوذر
|
Post: #9
Title: Re: *** عز الضلام ***
Author: خالد الحاج
Date: 04-03-2004, 11:26 AM
Parent: #8
سوما..
ده والله كلام ساحر وجميل..
يديكي العافية..
|
Post: #10
Title: Re: *** عز الضلام ***
Author: Hisham Amin
Date: 04-03-2004, 11:36 AM
Parent: #1
سومتنا الغالية
بتخيل انو القلم بيستناكى علشان تكتبى
ولحظات الطرب عندة والانتشاء لمن يسطر على الورق اجمل واصدق كلام
ويديكم العافية اهل البيت
|
Post: #12
Title: Re: *** عز الضلام ***
Author: Habib_bldo
Date: 04-03-2004, 12:07 PM
Parent: #10
أنا أخوك يا سوما
كلام جميل والله والله يدي العافية
وبالمناسبة أنا مشاركتي هنا لسببين
الاول إعجابي لشديد بكلماتك الأنيقة
والسبب التاني والأهم ردك الجميل والنعوت اللطيفة ولسانك البينقط شهد
ومنتظر المزيد
|
Post: #11
Title: Re: *** عز الضلام ***
Author: الجندرية
Date: 04-03-2004, 12:03 PM
Parent: #1
تترجى ضيا لو طلع
تترجى ضيا لو طلع
والله انت ضؤنا يا سومة
في ليل البورد لمن يضلم
وسحابة الغم والمشاكل تملا السماء
وتغطي شمس المحبة والخير
يخليك ربي يا قمرنا
|
Post: #13
Title: Re: *** عز الضلام ***
Author: بدرالدين شنا
Date: 04-03-2004, 12:31 PM
Parent: #1
Quote: عز الضلام .. والليل هجع ..
تطعن همومك زى سهام ..
جوه الضلع .. |
هوي أرجعاكن أهلنا
|
Post: #14
Title: Re: *** عز الضلام ***
Author: جورج بنيوتي
Date: 04-03-2004, 05:27 PM
Parent: #13
والرايه: بيضـــــا
تدوم بلدي ويدوم أهلا ..
إستمتعت بحقٍ...
|
Post: #15
Title: Re: *** عز الضلام ***
Author: soma
Date: 04-03-2004, 08:41 PM
Parent: #14
المطر
المطر .. سيد الخير الما محسوب ولا منحصر .. خيرك مشتت تروى من طرف جوف الو اطه اليابس .. وتخدر البلاد وتضحك السرابات.. وترقص ألسلوكه .. ويزغرتن طروف الجروف بالخير الطمح بحرن وغرق صدرن وفات .. فات لى هناااك يا كريم..
تسلم كتير كتير يا ابوذر شكرا قدر حبات رزازك المندى النوار ....
***
خالد ود الحاج ..حبابك يا ضل الأهل ..وحباب جيتك لى عندنا .. ودخولك دارنا وقعدتك في عنقريبنا المحكر في بطن الحوش .. وان شاء الله جبنتنا تنفعك ..
شكرا الأخ خالد على كلامك السمح ..وكتر خيرك كتير ..
***
هشام الحنين حبابك يا اخو البنيات ..
تسلم يا كريم الخصال .. وتسلم على كلامك الجاري من نبعك الصافي
هشام شكرا غنوات أهل..
***
حبيب بلدو... وقبيلتو..
أنا خيتك يا الحبيب .. يا القريب .. إن شاء الله ديمه يا يابا أنت طيب
وأنا سعيدة جدا لجياتك البتنور الدار وبتزيد المقدار .. أنت من هناك يا حبيب بلدو ..من وسط أللمه .. في طرف البيوت.. تطايب الغاشي..و البفوت ..
كتر خيرك على المطايبه ألحنينه يا ضلالتنا..
تسلم يا حبيب بلدنا .. ويعظم شأنك ..
***
الجندريه السمحة وفنجريه ..
حبابك يا نوراة الفريق .. بشوفك نسمه في لحظة ضيق ..وبشوفك رفقه في طوووووووووووووول الطريق ..
الجندريه تسلمي يا لؤلؤة ويا عقيق..
***
بدر الدين الحنين.. والله ضحكت فيك جنس ضحك ألليله ههههههههههه قطعت مصارينى والمعاى .. الله يديك قدر محنتك دى يا سقف البيوت ..بيوت ناس امى عشه وخالتي سعدية .. اها عندك قروش لمن ترجع اهلك توصلك الجنيد ؟ أنا خيتك البدرى ود الانصارى ..
***
جورج بنيوتى .. حباااااااب ألطله ود الفريق والحلة ..
وحقيقة اسعدتنى الحروف ورايتك البيضاء زى قلب صاحبها ..
أوجزت ووفيت وكفيت ...
شكرا ليك أخوى جورج كفوف ..كفوف من ريحة الأهل ودعواتهم
وشكرا قيف بحر..
|
Post: #17
Title: Re: *** عز الضلام ***
Author: bamseka
Date: 04-04-2004, 02:18 PM
Parent: #15
اسماء
الله يرحم الوالد ويسكنه مع الصديقين والشهداء
........
رائعة القصيدة وهكذا ترسلي جمل الكتابات وندون باسمك على دفتر الزكريات ... فلا تبخلي زويدينا...... الف سلام
|
Post: #16
Title: Re: *** عز الضلام ***
Author: ايهاب
Date: 04-04-2004, 11:36 AM
Parent: #1
|
Post: #18
Title: Re: *** عز الضلام ***
Author: faisal44
Date: 04-04-2004, 04:33 PM
Parent: #16
سوما
تسلم اناملك
وكتر الف خيرك
|
Post: #19
Title: Re: *** عز الضلام ***
Author: لؤى
Date: 05-26-2004, 06:07 PM
Parent: #1
فوق ، ودام الجمال عنواناً لهذا المكان الجميل
|
|