***** برااااااى قاعده اون لاين ******

Post: #1
Title: ***** برااااااى قاعده اون لاين ******
Author: soma
Date: 10-28-2004, 11:03 PM
Parent: #0

سلام يا النايمين والصاحيين ومشغولين ..
من اطرف ما لاقانى فى صباح الجمعه المباركه دى ..
قلت اشوف منو موجود اون لاين ..
لقيت موجود اون لاين 107 .. عضو واحد .. و106 زائر ..
عضو واحد سوما ..لووووووووووول
قلت دى ما حصلت من ما جيت داخله الدار دى .. والظريف فى الموقف ارد على بعض المداخلات .. وكل ما ارد القى اسمى براه محكر فوق .. رصيت الردود رص .. قلت اكيد عندى مشكلة فى النت .. ما انا التنكلوجيا الشترا دى ما بفهم فيها كتير .. لانه متأكده تماما انه اختلاف الوقت هو السبب انه الناس تلتقى ببعض واكيد لو فى ناس نايمه.. فى غيرها صاحى ومقمبر زى كده ..ولا عشان رمضان يا ناس ؟ وحتى لو قلنا الجمعه اجازه .. اهلنا فى بلد العجم ما عندهم جمعه اجازه ..
بديت افكر فى موقفى الانا فيه ده .. قاعده براااااى فى حوش بكرى الكبير ده .. حارسه ليكم بيوتكم كلها .. فيكم البابو نساه مفتوح ونام .. وفيكم البتكلم فى التلفون.. وفيكن الشغاله فى السحور ومسابقه الزمن عشان جغمة مويه .. وانا الوص بى بره .. مره اشم لى قلوة بن من طرف بيت ناس ود عطا المنان ..ومره نكهة عصير جوافه من خلا ناس بدر الدين شنا ..ما عندهم فى خلاهم داك غير شدر الليمون والجوافه ..
وطبعا انا ازازى بى بره والخوف مسيطر على الموقف .. القال ليك يا سوما تاوقى بى بره وشوفى المعاكى منو ..منو ؟؟
لكن الاحساس سمح بالحيل رغم الموقف .. طايبتكم من طرف ..وصبحت الصباحو اشرق من بعيد ومسيت على الشمسو طاحت .. وودعت الليلو فلل..
اسال الله لكم جميعا الدعوات السمحه فى اواخر الشهر الفضيل .. قبل ما يودعنا الحنين ..
والتحايا ليكم كوم محنه.. وصحن بليله
والشكر هدية.. تبروقه وسبحه..
ورمضان كريم

Post: #2
Title: Re: ***** برااااااى قاعده اون لاين ******
Author: abuguta
Date: 10-28-2004, 11:20 PM
Parent: #1

سوما
ياشاين...
يابت
المدائن....
وشبه المزروع
فى الجنائن...
كيف براك
اون لاين...
وانا قاعد
فيك بعاين...

اسماء انا قاعد من صباح الرحمن ما شايف زول
غير ودقاسم صحى اسى...عشان الليلة الجمعة
الناس مؤجزة وضاربة النوم...
ابشرك لى يومين ضربت العصيدة بالنعيمية والتقلية....
ابرى احمر..لكن ما لقيت الابيض....
زولك المن الجنيد اسمه هاشم...
شكرا على
النسمة الصباحية

Post: #3
Title: Re: ***** برااااااى قاعده اون لاين ******
Author: soma
Date: 10-29-2004, 04:02 AM
Parent: #2

ابو قوته الحنين ..
ود الخدار والطين..
صباحك سمح وزين ..
عارف ياخوى يا ابو قوته .. فرحتنى جنس فرحه بى اكلك لى العصيده وملاح النعيميه و شرابك للابرى ..
يعلم الله لمن حسيت جوفى باااااااااااااارد .. التقول اكلت ولا شربت انا ..
ينفعك يا العشا .. وكتر خيرو العزم اخوى .. قدمو ان شاء الله لى ابو ابراهيم ..
والله يا ابو قوته الا جيتو داخلين هسه كلكم ..لكن من قبيل قاعده براى ..شايفه اسمى بس اون لاين .. عارفاكم اخوان حاره ..مما ناغمتكم جيتو جاريين ..انا خيتك ابو قوته ..
اخوى ابو قوته..
التحيه ليك
قعده وسط جنينه ولمة اصحاب وونسه حنينه..

Post: #4
Title: Re: ***** برااااااى قاعده اون لاين ******
Author: Tarig Sidahmed
Date: 10-29-2004, 04:30 AM
Parent: #1

لحظة لا يمكن أن تتكرر بسهوله وعرفتي تسجليها لا يمكن أن يتكرر أيضا

دوما نعيش معك الجمال - متابعين جدا لكل ما تكتبين أيتها الرائعه الجميله

طارق ع الأحمدي

Post: #5
Title: Re: ***** برااااااى قاعده اون لاين ******
Author: خضر عطا المنان
Date: 10-29-2004, 04:46 AM
Parent: #4

فراشتنا الجميلة : سوما

من يسكنه الابداع والجنون الزاهي لا يمكن أن يكون يوما
( قاعد براهو) .
كل الحروف معك وأحلى ما فينا ياسوما .

لك المعزة كلها
والمحبة كلها
وأسمي آيات الود والاحترام وأنت تنسجين ( شملة غتانا) في صقيع المنافي .

ربي يخليك
والعافية تكسيك
من راسك لى رجليك .

خضر عطا المنان

Post: #6
Title: Re: ***** برااااااى قاعده اون لاين ******
Author: Dr. Moiz Bakhiet
Date: 10-29-2004, 07:47 AM
Parent: #5

ما براك
يا سوما أبداً ما براك
حتى القمر سهران معاك

والدنيا والخير والحنين

ومعاك خضر..
وابقوتا..
طارق..
والصباح
ومعاكي كل الرائعين..

ومعاك أنا
جاييك موشح بالمنى
بالفرحة واشواق السنين

Post: #7
Title: Re: ***** برااااااى قاعده اون لاين ******
Author: Raja
Date: 10-29-2004, 07:59 AM
Parent: #1

الحبيبة سوما..

مساءاتك او صباحاتك فل..

تجربة حلوة ان تكوني حارسة المنبر ومؤتمنة على بوستاته.. وبعد كده بجد الزول ينوم مطمئن ان مثلك هو الحارس..

لك الود..

Post: #8
Title: Re: ***** برااااااى قاعده اون لاين ******
Author: تاج السر حسن
Date: 10-29-2004, 08:49 AM
Parent: #7

سوما
كيف تكونى براك ؟؟؟
والكلمه بتحلق معاك
لكن قأأأأأعدة دى براها بتاعت تماضر
وأون لاين دى بتاعت رجاء
لكن الأتنين معا بتاعات سوما.

Post: #9
Title: Re: ***** برااااااى قاعده اون لاين ******
Author: أبو ساندرا
Date: 10-29-2004, 09:56 AM
Parent: #1

سوما

يا للحظ التعيس ! براااااك في البيت !والله دي فاتتني عديل ، الكلام ده كان زي الساعة كم ؟
غايتو دي ما حصلت علي لكن مرة دخلت تاوقت للمتواجدون الآن لقيت ودقاسم براهو بيبرطع في الحوش خفت وإتخارجت بسرعة قبل ما يشوفني ، دي كانت حا تكون حكاية.
هسع عليك الله لو دخل عليك كبسيبة بسنيناتو كنتي حاتعملي شنو؟ لو صرخت ال107 من الزوار ما حايسمعوك

Post: #10
Title: Re: ***** برااااااى قاعده اون لاين ******
Author: بلدى يا حبوب
Date: 10-29-2004, 09:57 AM
Parent: #1

سلام سوما
الشوق الكتير غبانه
وعشرة الحوش الكبير ضامنا
فى رمضان بقول يا فرحنا
سوما ذى الهلال زارتنا
وبرضو بقول يا الله
ناس حوش بكرة اتقبل صيامهم
واطل العيد السعيد بلقاهم
تحياتى

Post: #11
Title: Re: ***** برااااااى قاعده اون لاين ******
Author: ابو جهينة
Date: 10-29-2004, 10:06 AM

أسماء الجنيد ( سوما )

تحياتي

(لكن الاحساس سمح بالحيل رغم الموقف .. طايبتكم من طرف ..وصبحت الصباحو اشرق من بعيد ومسيت على الشمسو طاحت .. وودعت الليلو فلل..) ..
تكفي رفقة إحساسك .. فهي تشمل كل الناس .. النايمين و الصاحين مساهرين هنا و هناك في بوادينا و عتاميرنا

أرقدي عافية

Post: #12
Title: Re: ***** برااااااى قاعده اون لاين ******
Author: مجدي شبندر
Date: 10-29-2004, 10:36 AM
Parent: #11

سوما العزيزة
يبدو انك تهربين الي زمن هادئ ومطمئن الحديث مع الذات يحتاج مثل هذة الزوغات وللذات عالم واسع ونسيها غالطيها تصالحي معاها والذات تمارس الاستحمام في بحر هذه الاوقات .وايضا تمارس الاستجمام للراحة قليلا من رهق طويل .واصلي الحضور براك في هذة الاوقات فلم يبق من درنك شئ .

عموما كل الناس النائمون سوف يصحون مغبشين .

لك كل زمن هادئ ومطمئن

مجدي شبندر

Post: #13
Title: Re: ***** برااااااى قاعده اون لاين ******
Author: بدرالدين شنا
Date: 10-29-2004, 08:47 PM
Parent: #1

سوما بت أمي
سلامي وإحترامي وإكرامي لك يا أم رامي
Quote: ومره نكهة عصير جوافه من خلا ناس بدر الدين شنا ..ما عندهم فى خلاهم داك غير شدر الليمون والجوافه
إنتي البوديك تتشمشمي من الصباح شنو؟؟؟ وبعدين أنا عندي عذر قايلاني فاطر ساكت
الواحد لو فطر جوا بروفايلو الناس ما تريحوا
برااااااااااي قاعدة أون لاين
برااااااااااي (قاعدة) بن لادن
سووووووووووووووووووما أون لاين
أساااااااااااااااااااااامة بن لادن
على كيفك غايتو
التقدير لك والشنا لي

Post: #14
Title: Re: ***** برااااااى قاعده اون لاين ******
Author: بدرالدين شنا
Date: 10-29-2004, 10:46 PM
Parent: #1

Quote: المتواجدون الان بالمنبر الحر 112 شخص » (1 )عضو و (111) زائرا

»بدرالدين شنا
هذه الصفحة يعاد تحديثها كل 120 ثانية.
المنبر الحر | أرشيف المنبر الحر 2003 | أرشيف المنبر الحر للنصف الاول لعام 2004 | تعارف و زواج سودانى| نادى القلم السودانى | دليل الخريجيين السودانيين | الاخبار اليومية عن السودان بالعربى| مكتبة الراحل على المك | مواضيع توثيقية و متميزة
سجل الزوار|اراء حرة و مقالات سودانية |غرفتنا فى البال توك| Sudan News in English | مواقع سودانية | اغاني سودانية | مكتبة الراحل مصطفى سيد احمد
جرائد سودانية |اجتماعيات سودانية | ونسة سودانية | دليل خريجى جامعة الخرطوم |دليل الاصدقاء السودانى |

مع تحيات بيان للمعلوماتية
أها رايك شنو في دي؟؟؟ برااااااااااي أون لاين وموثقة كمان
هيييييييييييع

Post: #15
Title: Re: ***** برااااااى قاعده اون لاين ******
Author: soma
Date: 10-30-2004, 08:33 AM
Parent: #14

سلام اهلى السمحين .. وعذرا على التأخير .. باقى اخوى ابو ساندرا وبدر الدين شنا خوفونى .. قلت اخلى الواطه تصبح واجيكم راجعه ...

طارق الاحمدى يا سمح يا زين ..
حبابك يا بذرة الطيبين ..
شكرا على الطله .. ونتابع معاك دائما سمحك يا ود القبائل ..
قلت لى لحظات تستحق التوثيق يا طارق يا خوى ..
وجيتك دى برضو تستحق التوثيق يا مرهف ..
شكرا سحاب ...

****

خضر يا حنين .. يا قرة الوالدين
العافيه تكسيك انت يا يابا وين ما تقبل ..بركة العشر الاواخر والدعاء الطاهر
آمين يا رب العالمين ..
يديك العافيه يا ود الاصول .. كتر خيرك على كلامك الوشاح البفخر بيه كل صباح..
اخوى خضر .. شكرا مطر الشرق .. لا رعد .. لا برق .. نازل حنين .. دافق دفق ..
والود غيوم ..
****
د/ معز ...
حباااااااااب الزول السمح ..
والله انا محظوظه بالكوكبه الرائعه دى .. من الناس الجميله ومبدعه ..
وبيك انت يا رجل يا شفيف ..
تخلق من كل كلمه حديقة وارفة الازهار.. وكثيفة المعانى وظليله بى عطر كلامك يا سمحنا .. كما يسميك الحنين اخونا خضر عطا المنان ..
د/ معز التحيه ليك غنا عشاق ..
والشكر ليك واحة شعر ..

****
رجاء بت امى الحبيبه ..
رمضان كريم عليك يمه .. وتصومى وتفطرى على الف خير
كل سنه وانتى طيبه ..
جيتك براها دى يا رجاء ياستهن لى حدهن تطمن القلب .. وترد الروح يا حنينه ..
لكى حبى وتقديرى ..
وشكرا بسمة رضيع قبل الفطام ....

****
اخوى تاج السر .. يا تاج راسنا يا الحنين ..
سلامى واحترامى .. وينك يا العشا ..
طولت الغيبه .. ولا ده رمضان ..يا عشا الضيفان ..
يديك العافيه يا تاجنا العزيز ..
وحبااااااااابك انت وحباب تماضر ورجاء ..
وشكرا ضفاف تقالد النيل ..

****

اخوى ابو ساندرا ..
رمضان كريم فى الاول .. وكل سنه وانت طيب ..
هسع عليك الله لو دخل عليك كبسيبة بسنيناتو كنتي حاتعملي شنو؟ لو صرخت ال107 من الزوار ما حايسمعوك ( لوووووووووووووووووووووول)
مالك على يا يابا .. خالعنى من دغشك ده ..
خليتنى اتلفت براى يمين وشمال .. قربت اقوم جاريه واخلى القدامى ..
ما شايف ناس رجاء ود/ معز وخضر/ وابو قوته وطارق / وتاج السر ..
كلامهم سمح ويرد الروح كيفن ؟؟
عارف قربت احلم بى سنينات كبسيبه .. قلت كمان بدل ما تجينى ليلة القدر .. يجينى كبسيبه وسنيناته .. ان شاء تجيك انت ويجيك.. الدمبعلو البتقولو لينا حبوبه ..واقول ليك كمان يجيك سجيمان وام الخير .. ..وتجيك ليلة القدر يا حنين ..
ابو ساندرا اسعدتنى الطله .. يعلم الله ..والاستراحه الاجمل من المظله ..
والتحيه لكبسيبه بى سنيناتو .. ولى ام الخير وسجيمانها ..
والشكر قعدة جروف ...
****
حبوبنا الحبيب .. بلدى يا حبوب
حبابك بى خيرك وبشايرك يا وش الخير ..
يعظم شانك .. ويعلا مقامك ..
ويخدر دربك .. ويسهل امرك ..
ويسمع منك الله الدعاء .. كلكم قولوا آمين يا السمحين
رمضان كريم عليك وتصوم وتفطر على خير ..
شكرا يا الحبيب .. شكرا دعوات اهل .. فى هذا الشهر ..وطول الدهر
والود محنه ...

****
ابو جهينه الحنين .. ود النخيل والطين
ما اجمل احاسيسك انت دايما يا كثيف ..
يديك الف عافيه .. ويجعل ايامك كلها فرح وسرور ..
تحياتى للاهل الطيبين وكل الاسره يا حنين
ابو جهينه ..شكرا نخيل..

****
اخوى مجدى شبندر ...
سلام يا الاجواد ..
رمضان كريم عليك .. وكل سنه وانت طيب ..
عجبتنى جدا مفرداتك .. وتعابيرك الجميله ..
حقيقى محتاجين للزوغات دى فى مثل هذه الاوقات ..وبالزات لينا نحن فى بلد الشتات ..
تعرف يا مجدى يا خوى ..
مره ..مره كده بزوغ وبتطاول فى زوغانى وبمشى البلد .. شفت كيف لا تذكرة لا جواز
ولا محتاجه ليهم الاتنين ..
لانه خيالى اسرع من اى سودانير واى خط طيران فى الدنيا .. وما محتاجه حتى لى مضيفات عشان يونسونى ويقولوا لى اربطى الحزام ..
لانه مافى احزمه ولا فى قيود فى العالم الانت بتتكلم عنه ده ..وانا فهمته .. وسرحت فيه زيك..
بمشى براى لى طرف الجروف . اصلى بعشق طبيعة قرآنا حد النخاع ..
وبقيل تحت الشدر وبسمع زقزقة العصافير .. وبجينى نسيم النيل وريحة الطين ..
وبشوف ناس الطيب وحد الزين .. قاعدين يتيربو .. لا هم ولا همين .. وصارين الفرح غناوى وحجوتين ..
وفاطمه وام الزين قاعدات وراجيات رجعة السمحين .. وووووووو
اها رايك شنو نرجع ..فى ناس منتظرين ..
اخوى مجدى يديك الف عافيه ..
والشكر نيلين ..
****
بدر اللدين الحنين ..
السمح مو زين ..
لووووووووووووووووووووول فاطر جوا ..
يعلم الله مانى عارفاك فاطر .. ومن الله ما خلقنى ما شفت لى زول بفطر من موية اضنيو ..
تانى ما شايفه ليك مرض ..
انا قلت ما عندكم ريحه فى الخلا داك غير ريحة الجوافه والليمون ..
مش كتر خيرى ..
ما جبت سيرة البرسيم ..ووالضلافين ..لوووووووووووووووووووووووووووووول بدر الدين
كمان بتقول على بن لادن ؟
غايتو انت وابو ساندرا شكيتكم على ابو حراز .. يجيكم شايل العكاز .. وشكيتكم على سجيمان .. يجيكم طاير حفيان .. وشكيكتم على بكرى ابو بكر .. يديكم لى انذار آخر الشهر ..
وشكيتكم على الجندريات يجن هسسسسسسسسسع طايرات
بدر الدين
شكرا كوريه حلو مر
وصحن بليله من امى عشة
وارقدو عاااااااااااافيه ..

Post: #16
Title: Re: ***** برااااااى قاعده اون لاين ******
Author: أبو ساندرا
Date: 10-30-2004, 09:26 AM
Parent: #1

سوما
شكرآ على الرد الحميم ، ولامح فيك حنان الأمهات خاصة وإسمك على إسم أمي ، أسماء ، يعني تاني الواحد ممكن يقول ليك ماما
وبعدين ياماما إنتي لسع مخلوعة من كبسيبة لمن بقيتي { تنقطي } غلط قعدة خروف مش جروف ، النقطة فوق
وكل الإحترام وهبوه ليك

Post: #17
Title: Re: ***** برااااااى قاعده اون لاين ******
Author: soma
Date: 10-30-2004, 10:03 AM
Parent: #16

ابو ساندرا حبابك من تانى يا العشا ..
لوووووووووووووول قعدة خروف .. انت ياخوى قالوا ليك العيد الجاى ده عيد ضحيه ؟ ..لا والله شكلك انت المخلوع باقى رمضان دخل عضمك خلاااااااص ..لووول
قلت لى الوالده الحنينه اسمى زيها .. يا بختك يا سوما .. وانا اقول فيك غبشة اهلى .. تسلم يا ابو ساندرا يا يابا ..لكن قول لى يمه .مش ماما ..
تسلم والود محنه.

Post: #18
Title: Re: ***** برااااااى قاعده اون لاين ******
Author: أبو ساندرا
Date: 10-30-2004, 11:10 PM
Parent: #1

ألليلة يا يمه ،،اللوول الجد ياهو دي ، هسع أنا أونلاين منفرد مع برير إسماعيل يوسف و103 زائر متفرج ، فيا جماعة لو أنا حصلت لي أي حاجة لا قدر الله أعلمو أن برير { إتبربر } فيني

Post: #19
Title: Re: ***** برااااااى قاعده اون لاين ******
Author: Ishraga Mustafa
Date: 10-31-2004, 06:23 AM
Parent: #18

ابوساندرا يجازى محنك

بوست طريف ياسوما واصلوا خلونا نضحك فى زمن قلت فيه الرغبة للضحك

Post: #20
Title: Re: ***** برااااااى قاعده اون لاين ******
Author: soma
Date: 10-31-2004, 07:58 PM
Parent: #19

لووووووووووووووووووووول ابو ساندرا.. يتبربر بالبروده ويتحرحر بالحراره .. زى ما قال عادل امام ..
بعيدن انت يا العشا تناغمنى وانا نااااائمه تحت النيمه .. وحات الله ولا جايبه خبرك ..
انت عارف رمضان ورقدة النهاريه تحت ضل النيمه وفى الهباب ..
علا يصحينى ديك ناس فاطنه ..جنو نبيح ليل نهار ..
اها ودعتك الله .. وابقى عشرة ....

****
اشراقه الحبيبه
اشرقت علينا تباشير الصباح والانشراح
بطلتك يا حنينه ..
كل سنه وانتى طيبه
ورمضان كريم عليك
ان شاء الله الابتسامه ما تفارقك لحظه
وربنا يجعل ايامك كلها فرح
لك كل الود
والشكر بسمه..

Post: #21
Title: Re: ***** برااااااى قاعده اون لاين ******
Author: Al-Shaygi
Date: 11-01-2004, 01:01 AM
Parent: #1

Quote: برااااااى قاعده اون لاين

سلام يا بتنا الرقيقة سومه

والله العنوان ده مريت بيه أكثر من مره وفي كل مره بيبقى لي حاجة كدة فيها "القاعدة وبن لادن..!!! وطوالي بكب الزوغة منه حتى بدون ما ألاحظ اسم الكاتب ...
ما عارف يظهر الصيام عامل لي طشاش،،،

بس الليله عاينت كويس وقدرت قريت العوان صاح ومشيت على الكاتب لقيتك يا نوارة البورد ...

طبعاً عمك ما شاعر ولا كاتب وحتى لو كان فقد سبق الدكتور معز والناس الرقيقين وكتبوا فلن أتي بخير مما أتوا به.

..

Post: #22
Title: Re: ***** برااااااى قاعده اون لاين ******
Author: HAMZA SULIMAN
Date: 11-01-2004, 02:46 AM
Parent: #21

الشاعره سوما
كل سنه وانتى طيبيبيبيبيبيه
انتى دايما ان لاين
لاننا دائما نعيش كلماتك ونناقشها ونحاول ان نكون الى جانب احاسيسها لذلك
انتى دوما فينا
نتجمل بك
نغنيك
اذكر تلك الهنيهات التى التقيتكم فيها
شعرك يشعرنا بالخير فجملى حواسنا لتكون دوما بخير

Post: #23
Title: Re: ***** برااااااى قاعده اون لاين ******
Author: معتصم دفع الله
Date: 11-01-2004, 03:10 AM
Parent: #22

العزيزة سوما

كل سنة وأنت بألف خير ..
تعرفي أنا مرات كتيرة بفتح المنبر دا ما بلقى فيهو أي زول ..
عدد الأعضاء ( 0 )
وقبل أيام نزلت بوست بالحكاية دي وحتى عملت منه صورة ..

لك كل الود ..
كل التقدير ..

Post: #24
Title: Re: ***** برااااااى قاعده اون لاين ******
Author: soma
Date: 11-01-2004, 11:03 AM
Parent: #23

الشايقى الحنين .. سلام يا ود الجروف والطين..
كل سنه وانت طيب ورمضان كريم عليك ..
لوووووووووووول طبعا ضحكتنى مرتين ..المره الاولى نفس كلامك ده قالو لى بدر الدين شنا
قال لى سوما اون لاين
سوما بن لادن.
مالكم على يا الحنان؟
دايرين ناس القاعده هسه يجونى طايرين ويودونى افغانستان ولا اى مكان ..
وتانى ضحكت فى رمضان الطشش ليك عينيك ..
حالتو لسه يا دوب فى نصه .. هسه كان كنت صائم فى الشماليه كنت سويت شنو ؟
تمشى الجروف وتجى صادى نص النهار ولا لو كنت صائم فى الجنيد وتمشى الحواشات وتجى مع الفطور .. كنت طششت من تانى يوم
لوووول الشايقى الحنين
..
شكر على الطله يا ود نخيل بلدى السمح ..

****
مبدعنا حمزه سليمان
كل سنه وانت طيب يا فنان يا رائع
طبعا حضرت ليك الفقره مع اخوانا ناس عقد الجلاد .. وكنت متميز جدا والله
والهنيهات على قولك الالتقينا فيها كانت من اجمل فقرات الحفل كلو
ربنا يجمعنا فى ساعة خير .. ان شاء الله
ولو لاقيتك قريب بوريك مجموعة القصائد الرسلتها لى اخوانا ناس النو .. عن طريق استاذ صلاح الباشا.. ان شاء الله يكونوا محظوظين وتلحن ليهم من المجموعه دى
استاذ حمزة..
شكرا نغم..

*****
الحنين معتصم دفع الله..
كل سنه وانت طيب
رمضان كريم
تسلم على الزيارة يا ود الاهل ..
ما كنت تقول لى يا معتصم..الحاجه بتحصل لى اى زول ..وحصلت ليك انت برضو
كنت شوية يقنت ..وما خفت ..وبقيت اتضهب براى
فى حوش بكرى ..واقول يا ربى الاحصل شنو ؟
ويتفسحوا فينى اعمامك ناس بدر الدين شنا وابو ساندرا ..
ومره يقولوا لى بن لادن..ومره يقولوا لى يجيك كبسيبه بى سنيناتو ..
هسه ما كنت طمنتنى يا ود امى ..
تسلم اخوى معتصم كتير
والشكر ليك
غيمات خريف ..
مطرها لا بفتر ولا بقيف ..