Post: #1 Title: الحقو السودان يا ناس Author: هشام المجمر Date: 09-25-2007, 10:02 AM
هذا الصباح اتصلت والدتى تتطالب ببعض البيزات بلغة هنا و الكنجالات بلغة السودان امى تقول انها تمر بظروف صعبة و يجب ارسال البيزات فورا ومافى مفاهمة لا اريد ان اصرح بما نرسله شهريا لكى يستطيع اعضاء المنزل القلائل( الفضلوا) أن يأكلو ويشربو و يدفعوا حق الكهرباء والموية وما إلا ذلك من متطلبات المعيشة فى السودان انها عدة ملايين يا جماعة عدة ملايين المفترض تكفى للعيش بدون مشاكل وللعلم نحنا عندنا بيت و ما مؤجرين !!!!!!!!!!!!!!!!!!!!!!!!!!!!!!! تكلl الناس هنا عن الخرطوم و كيف انها أغلى مدينة فى العالم نحن بنصرخ وبنرسل لأهالينا نحن ابناء الطبقة التى كانت سابقا تسمى الطبقة الوسطى تم دحرجة المكان الذى كنا نشغله المجرم قصد لنا اختفاءا قسريا معدلات الفقر ترتفع بصورة مخيفة كل يوم ينضم للركب آلاف من الفقراء إذا كنا نحن نحمى أهلنا من الوقوع فى دوامة الفقر المتسعة من يحمى من ليس لهم ابناء مغتربين او مهاجرين من يحمى ملايين السودان الثلاثين الذين جرفتهم فعلا دوامة الفقر؟ !!!!!!!!!!!!!!!!!!!!!!!!!!!!!!!!! بلغت الروح الحلقوم الحقو السودان يا ناس
Post: #2 Title: Re: الحقو السودان يا ناس Author: Ishraga Mustafa Date: 09-25-2007, 10:04 AM Parent: #1
Quote: بلغت الروح الحلقوم
يادوب ياهشام؟ ولله محظوظ انت
ربنا يديك العافية ويخدر ضراعك كمان وكمان
Post: #3 Title: Re: الحقو السودان يا ناس Author: نصار Date: 09-25-2007, 10:09 AM Parent: #1
محنة و مغسة ح تودينا الاخر
Post: #4 Title: Re: الحقو السودان يا ناس Author: اسعد الريفى Date: 09-25-2007, 10:09 AM Parent: #1
Quote: الحقو السودان يا ناس
صادق يا هشام
Post: #5 Title: Re: الحقو السودان يا ناس Author: هشام المجمر Date: 09-25-2007, 10:14 AM Parent: #1
الناس المرقت اولادها من المدارس بسبب ضيق ذات الايد
الناس البتموت كل يوم بسبب عدم مقدرتها على دفع تكاليف العلاج
الناس البمرقوا الخلاء كل يوم لقضاء حاجتهم
الناس البشربو موية تعافها البهائم
كل يوم عددهم بيزيد و ما بتناقص
عشان كده قلنا
الحقـــــــــــــــــــــــــــــوا السودان يا ناس
Post: #6 Title: Re: الحقو السودان يا ناس Author: abuguta Date: 09-25-2007, 10:26 AM Parent: #5
يامجمر شايف واحد من المكنكشين فى الحكم بتكلم فى النيل الازرق امس العصر ,,فى برنامج اوارق.. د. منو كدا عمر ,الزول المكعوج البشيه راج كومار,,الموضوع عن انتقاضادات الترابى قال ان المنتظر الانقاذ تمشى انتظاره سوف يطول قال نحن حزب مثلنا مثل الامة والدمقراطى ,,والشعارات لسنا مطالبين بها والله كلام يغيظ.... يامجمر ما كنا نعيم ابو الهل فاز وابو الهل هزم المصارة
Post: #7 Title: Re: الحقو السودان يا ناس Author: Ishraga Mustafa Date: 09-25-2007, 10:30 AM Parent: #5
سلامات تانى ياهشام
طبعا رسالتك واضحة من اول سطر هو انك بتحكى عن السودان والناس التعبانة اللى انا بنتمى ليهم من زمان ولحسع وعارفة معنى انو الزول يكون فقران وماقادر يحقق ابسط احلامه
ومع ذلك ربنا يخدر ضراعك وضراع كل الهمهم على الناس
وتصوم وتفطر على خير
Post: #8 Title: Re: الحقو السودان يا ناس Author: doma Date: 09-25-2007, 10:52 AM Parent: #7
الوجع كتير وكبييييير من شده غلبنا بغلبنا الكلام وفترنا من الشكوي
Post: #9 Title: Re: الحقو السودان يا ناس Author: Abuobeida Ali Abdullah Date: 09-25-2007, 11:16 AM Parent: #1
الأخ هشام....
ديل انتهوا زمان من الطبقة الوسطى !!!!
بقى في طبقتين بس ... ناس الأنقاذ وباقي الشعب السوداني.
أبوعبيدة
Post: #10 Title: Re: الحقو السودان يا ناس Author: هشام المجمر Date: 09-25-2007, 12:33 PM Parent: #1
نصار
سلام
Quote: محنة و مغسة ح تودينا الاخر
بعد ما قلنانصبر على المحنة
ونخلى الكلام الفاجعة
لكن السودان ما بخلينا
اشراقة مصطفى
شكرا ليك وكلك ذووق
البنعملوا ده اقل من الواجب
ابوقوتة
تحياتى
والله كلامك صاح بس زى ما قلت فوق البلد صنارتو طويلة وصيادو ماهر
Post: #11 Title: Re: الحقو السودان يا ناس Author: بكري اسماعيل Date: 09-25-2007, 12:47 PM Parent: #10
Quote: الحقو السودان يا ناس
too late Hisham
Post: #12 Title: Re: الحقو السودان يا ناس Author: هشام المجمر Date: 09-25-2007, 01:13 PM Parent: #1
اسعد الريفى
سلام
صيحناويل وما فى فايدة
دوما
سلام
الالم كبير وعميق
Post: #13 Title: Re: الحقو السودان يا ناس Author: بكري الصايغ Date: 09-25-2007, 01:23 PM Parent: #1
بعـد خـراب سوبا دق النـوبة".
هـشام- كل رمـضان وانت طـيب.
Post: #14 Title: Re: الحقو السودان يا ناس Author: هشام المجمر Date: 09-25-2007, 01:29 PM Parent: #1
بكرى اسماعيل
وبكرى الصايغ
انتو قنعتو تب
انحنا حنواصل الكوراك
و يابكرى الصايغ والله النوبة دقينها من دقت مزيقتم و حنفضل ندقها
نعمل شنو؟ مافى حل ما بنقدر نقنع من بلدنا
Post: #15 Title: Re: الحقو السودان يا ناس Author: Emad Abdulla Date: 09-25-2007, 01:54 PM Parent: #14
بلدكم ياتا يا هشام ؟ دي ؟؟؟ .. ما مشينا خليناها تسأل الناس إلحافاً أنْ : يا بو مروّة .. و لا في كان أبو مروة زمانئذ و لا أبو النوم .. طنشناها .. عملنا نايمين .. و قعدنا ننبح بس بخطاباتنا القديمة و حراباتنا السقيمة .. و ترهاتنا المستديمة .. ( و لسه بننبح ) .. يا نضال يا برتكاني و يا نضال يا أخدراني و يا نضال يا فرتكاني .. لغاية ما بقت مطلوقة .. و ركبوها العربات .. و دخلوها البيوت الباخرة .. و عنكشوها شوارع بيش و كهارب بيش و ذمم بيش و أسامي أبيش .. ومواقف بيش .. و جلاليب و نيون و بترول و شركات و بخرات و لافتات و عربات و ناس مقلوعة العيون مخلوعة القلب .. و كلو بيش .. ثم .. رضعت من ثدي الحرة الضباع .
كلام فاينال : دي بقت ما بلدكم .. بلدكم ديك راحت شمار في مرقة .. الهسع دي حاجة تانية .. سميها شكلوتة ( و هي نوع من المسخ أو البعاتي ) .. و ممكن تتلولو معاها تعضيك تسممك .
رسل المصاريف للحاجة .. و مرة مرة كده أذكر حسنات قتلاك - كان قدرت - ..
الكلام ده نهائي .
Post: #16 Title: Re: الحقو السودان يا ناس Author: Elawad Eltayeb Date: 09-25-2007, 02:59 PM Parent: #15
ما ضاع حق وراءه مطالب.
والفجر خاتمة الظلام.
اشتدي أزمة تنفرجي ... قد آذن ليلك بالبَلجِ
Post: #17 Title: Re: الحقو السودان يا ناس Author: doma Date: 09-25-2007, 03:08 PM Parent: #16
Post: #18 Title: Re: الحقو السودان يا ناس Author: بكري الصايغ Date: 09-25-2007, 06:54 PM Parent: #1
الأخ الـحبيب الحـبوب، هـاشـم،
رجـعت لك تاني عشان أقول لك اني زعلان منك جـدآ عشان بتشـوه صـورة "الانقاذي الـحضاري" ... "الشافو كلو قام جاري!!!".
مالـهاحـالة البلاد?.. وشـنو الماعجـبك فيها?،
اولآ، الحكومة قـدرت تتخلص من عصابات" و" مافيـا غسيل الأموال" وجرجرت للمحاكم بعض المتهميـن ب "غسيل الأموال".... وصـحيح انو المتهميين طلعوا براءة بعـد ماسـحب الوزير القضية من قـدام المحكمةوهـذامايدل علي عـدالة محاكمنا،ونزاهـة مسـؤولينا!!.
ثانيآ: كـذبآ كاذب كلامك حـول الخـبـز "الـمسـرطن"!!!!، والصـحيح انو الـموية هي "الـمسرطنة" بسـبب اختلاطـها بمياة "السـيفونات" ولكن "الأنقاذ"عـالجت هـذه القضـية وأنشـئت مسـشفيات خـاصـة بتمـويل بنوك إسـلامية لعمليات "الكلي"ورغـم ان الأطـباء يؤكدون انه ويـوميآ تزداد حالات الاصـابات بامراض السرطان والكلي الا ان الوزارة الصـحة لن تتقاعـس عـن مهامها في محاربة الامـراض ب "الادويـة الفاسـدة و الـمنتهية الاجـل !!" وسـتقضـي علـي مـرض التيـفويـد والسـحائي والسـرطان تـمامآ كما قضـت عـلي مـرض الأيـدز ، وكانت الأحـصائيات القـديـمة بعـدد الأصابات بالايـدز في السـودان قـد وصـلت الي مليون و100 الف مـصـاب والان عـد المصابيين مليون مصاب فـقـط وال100 الفالاخـريـن توفـوا الي رحـمه اللـه!!.
ثالثآ: "الأنقاذ" الـحـضاري طورت العلـم في البلاد وخـرجـت اطـباء مابعرفـو يكتبوا "الروشـتة!!"، والقـصـد من عـدم تعليـم الطلاب بتاعيـن الطب في الجامعات الحكومية والخاصـةاهـمية كتابة "الروشـتة.... انو اصـلآ ماعنـدها فائـدة لانو الـمرضـي ماحـيقدروا يشـتروا الأدوية!!!.
رابعآ: "الأنقاذ" ابتكرت اساليب جـديـدة للتآديب والتعـذيب و" حـقوق الاختراع محـفوظةلـوزارة الداخليـة". اي واحـد يقل ادبـو علي الحـكومة يقـوموا ناس وزارة الداخلية يـعتقلوا والـدة الـمتهـم ويـجردوها من كل ملابسـها قـدام ابنها الـمتهـم وبالطريقة دي كل احـد حـيخاف علي امـه ويبطل مشاكسـة النظام!!!!، اول ناس اخـترعوا الاسـلوب ده الـمخابرات الايـرانية وحـصلت حالات اغـتصابات للمعتقليـن بلا فـرز!!!واللـه يسـتـر من تطـوير الفكرة انقاذيآ!!!.
خامسآ: صـحـيح انو الغـلاء ضـرب البلاد لـدرجة انو بعـض الأسـر إضـطرت لـدفن مـوتاهـا ب "الـجـلابيب" بـدلآ عـن الكفن الذي اصـبح شـراؤه مـحـنه ولاتقـدر عليه الأسـر الـمدقعة في الفقـر، وهناك ايضـآ نساء ورن الثـري بـ" تيابهـن "!!. ولكن "الأنقاذ" ومـحاربة منها رخـصـت اسـعار "البطـيخ والجـرجـير".
رغـم صـعوبة حـصـول التلامـيذ عـلي كراريس الـمدرسـة والاقلام المساطر في المناطق المـهمشـة وبضـواحـي الـمدن الا ان الـدولة قـد سـهلت لكل مواطن فرصـة اغـتناء "هـانـدي" مع الزام البنوك الأسـلامية التي اسـتوردتها وان تـملأ السـوق بالبطاقات والكـروت!!.
ده حال البلـد.... حـتـي بيان عسكـري" رقـم واحـد" قادم قـريب!!!.
Post: #19 Title: Re: الحقو السودان يا ناس Author: Alshafea Ibrahim Date: 09-25-2007, 07:06 PM Parent: #1
أخي هاشم والأخوة/ت الكرام .. ألحقوا السودان ياناس صرخة قديمة قدم ثورة الإنقاذ ومشروعها الحضاري .. الآن أدركوا النفوس فهي هالكة هالكة ... ومايجي محمد فرح يقول الإنقاذ راح تدخل الصرف الصحي في أمدرمان أو الضرائب اصبحت 15% أو الموية في كل الخرطوم بعد كم قرن ... مودتي الشفيع إبراهيم
Post: #20 Title: Re: الحقو السودان يا ناس Author: بكري الصايغ Date: 09-25-2007, 07:34 PM Parent: #1
.... فـي سـنة 1984 قام الرئـيس السابق جـعفر نمـيري بزيارة للمناطق التـي تاثرت بالـجفاف والتصـحـر بالشـمالية، واثناء تفقـده لاحـوال الاسـرة ولـمس اوضـاعـهم الـمزرية وحالات الفقـر والمعاناة انعدام المـؤن والأغـذية... انفعل نـميـري وقال:" واللـه لو ماكنت رئيـس للبلـد دي كنت... قـلبتهـا!!!".
Post: #21 Title: Re: الحقو السودان يا ناس Author: Emad Abdulla Date: 09-25-2007, 07:44 PM Parent: #20
يا بكري ..
Quote: واللـه لو ماكنت رئيـس للبلـد دي كنت... قـلبتهـا!!!".
و تقول حبوباتنا حين تصل بهن الغضبة ذروتها .. و يردن أن يسختكن : ( يقلب حالك .. رجيت الله عليك ) .
البلد دي " قلبوها " و بقت مسخوتة .. يا كمان نحنا المساخيت .. و لا عزاء للحبوبات .. و أبو عاج .
رسل المصاريف يا هشام .. وللا الجماعة بيشيلو العدة .
Post: #22 Title: Re: الحقو السودان يا ناس Author: omar ali Date: 09-25-2007, 08:59 PM Parent: #1
Quote:
الحقو السودان يا ناس
ناس ياسين عمر الامام شالو عليه الفاتحة وانت تقول الحقوا !!!
Post: #23 Title: Re: الحقو السودان يا ناس Author: هشام المجمر Date: 09-26-2007, 06:47 AM Parent: #1
ابوعبيدة
سلام
صدقت وهذا ما قصدته فى حديثى أن الطبقة الوسطى اخفيت قسرا
عماد عبد الله
سلام
كدى قول لينا انت وين فى البلد المسروقة ولا عندنا بى جاى؟
اها الفلوس رسلناهن جرى. طلبات الامهات أوامر
فيما يخص البلد صدقت فى احساسك بأن البلد أخذت من شعبها
انها تحت قبضة الاستعمار الوطنى
لكن يا عماد نحن ما بنخليها
بنقالع فيها
الاستعمار لابد ذاهب
Post: #24 Title: Re: الحقو السودان يا ناس Author: jini Date: 09-26-2007, 07:00 AM Parent: #23
Quote: : الحقو السودان يا ناس
ونجحت الانقاذ ايضا فى افقار المغترب وذلك بتخليها عن مجانية التعليم ومجانية العلاج ليقوم المغترب بذلك وبذلك يستوى المواطن والمغترب! جالنا يذكرنى بالمرحوم خالد الكد: يظل المغترب يكدح السنين الطوال ليبنى بيتا! لا ليسكنه! ولكن ليشيع منه! سلام يا صديقى جنى
Post: #25 Title: Re: الحقو السودان يا ناس Author: هشام المجمر Date: 09-26-2007, 10:18 AM Parent: #1
Quote: ما ضاع حق وراءه مطالب.
والفجر خاتمة الظلام.
اشتدي أزمة تنفرجي ... قد آذن ليلك بالبَلجِ
صدقت اخى الطيب العوض
وهاهو ركب الانتفاضة يسير فى بورما
دولة الظلم لن تدوم للأبد
Post: #26 Title: Re: الحقو السودان يا ناس Author: هشام المجمر Date: 09-26-2007, 10:40 AM Parent: #1
أخ
Quote: ي هاشم والأخوة/ت الكرام .. ألحقوا السودان ياناس صرخة قديمة قدم ثورة الإنقاذ ومشروعها الحضاري .. الآن أدركوا النفوس فهي هالكة هالكة ... ومايجي محمد فرح يقول الإنقاذ راح تدخل الصرف الصحي في أمدرمان أو الضرائب اصبحت 15% أو الموية في كل الخرطوم بعد كم قرن ... مودتي
الشفيع إبراهيم سلامى
محمد فرح عايش فى نعيم الانقاذ بيشوف الفقراء وين
Post: #27 Title: Re: الحقو السودان يا ناس Author: هشام المجمر Date: 09-26-2007, 10:46 AM Parent: #1
Quote: ناس ياسين عمر الامام شالو عليه الفاتحة وانت تقول الحقوا !!!
عمر
سلام
يسين شال الفاتحة على تنظيمو الفاسد وبيعتقد بموت تنظيمو السودان بموت لا لهذا الربط المخل
السودان ابدا ما بنشيل عليهو الفاتحة عيالو السمحين النجاض بيجو ذات يوم
جنى
يا صديقى
هو فضل فيها مغترب الجماعة ديل بقو احسنم ناس معايش ساكت يا حليلي المغترب الببنى البيت
Post: #28 Title: Re: الحقو السودان يا ناس Author: عاصم ابوبكر حامد Date: 09-26-2007, 10:57 AM Parent: #1
الاستاذ هاشم المجمر لك التحية
Quote: بلغت الروح الحلقوم الحقو السودان يا ناس
اتمنى ذلك وان تكون هناك ثورة تصحيحية لهذا الامر من قبل الشعب ..
تسلم
Post: #29 Title: Re: الحقو السودان يا ناس Author: omar altom Date: 09-26-2007, 11:06 AM Parent: #1
Quote: من يحمى ملايين السودان الثلاثين الذين جرفتهم فعلا دوامة الفقر؟
القال ليك منو السودان فيهو تلاتين مليون
في اتنين مليون ماتوا في حرب الجنوب
واتنين مليون مشردين في تشاد
وميتين الف ماتو في دارفور
وتلاتة مليون قاعديت في القاهرة
وتلاته مليون موزعين في جغرافية العالم اوربا ...امريكا وكندا ....الخليج...وباقي الدنيا
كل يوم السودان بيموت فيهو زي الف زول ...امراض (ملاريات....تايفويد...امهات اثناء الولادة...اطفال حديثي ولادة ).....وبالحروب ...وبي حوادث مرور.... وبي موت الله سااااي....
حي يجي يوم الرئيس يصحي الصباح يلقي نفسوا قاعد براااااه في البلد.....الله ورقبتو...
الانقاذ....يا له من انجاز!!!!!!!
Post: #30 Title: Re: الحقو السودان يا ناس Author: Dr. Ahmed Amin Date: 09-26-2007, 11:09 AM Parent: #1
هشام
سلام ورمضان كريم
كما قالت دومة .. اغنية حاجة آمنة اكثر اغنية معبرة
والله يرفع البلاء
Post: #31 Title: Re: الحقو السودان يا ناس Author: Safia Mohamed Date: 09-26-2007, 12:25 PM Parent: #1
مهندس /هشام سلام تحية لك وانت تفتح اماكن الوجع فينا
Quote: لغاية ما بقت مطلوقة .. و ركبوها العربات .. و دخلوها البيوت الباخرة .. و عنكشوها شوارع بيش و كهارب بيش و ذمم بيش و أسامي أبيش .. ومواقف بيش .. و جلاليب و نيون و بترول و شركات و بخرات و لافتات و عربات و ناس مقلوعة العيون مخلوعة القلب .. و كلو بيش .. ثم .. رضعت من ثدي الحرة الضباع .
اخونا عماد ازيك ،والله ما قلت الا الحق "فقر الاخلاق" هل له من علاج ؟؟؟؟؟؟؟؟؟ زي ما قالوا هلنا دوام الحال من المحال والدنيا دوارة وفي كل يعنون الفقر المادي كل فقر وان طال الزمان يزول الا فقر النفس والايمان والاخلاق. صفية
Post: #32 Title: Re: الحقو السودان يا ناس Author: مجاهد عبدالله Date: 09-26-2007, 03:41 PM Parent: #1
المحترم هشام سلامات ورمضان كريم..
يلحقوه كيف .. من بكره سعر الخبر يمكن يضاعف لأن اليوم حدثت زيادة جنونية لسعر الدقيق في السودان بنسبة 33% ..غايتو الله يكون في عون الشعب السوداني..
الود لك ..
Post: #33 Title: Re: الحقو السودان يا ناس Author: Omer Abdalla Date: 09-26-2007, 04:21 PM Parent: #1
الروّاسي شعر حاتم حسن الدابي غناء جعفر السقيد
مدِّر مدِّر يا رواسي نحن بعاد لحقنا القيفة انت مدبج ونحن نقاسي برد ام شير والموج والزيفة مركبك الماليها مطارق تمشي .. تقيف .. تسرح بي كيفا مرة مغارب ومرة مشارق وانت تخاف الريح وحفيفا سوّها زينة وفوقها بيارق وانت مدبج توب وقطيفة فيها المات والضاربو الفالج والسالمين في حالة مخيفة
كل الناس ترزح في كفة وانت وناسك فوق الدفّة الدايشين والراسهم لفّ والشاخصين في المدى للضفة صوت أطبالك فوقهم ألفى جوه الموية وريقهم جفّ من العطش النص اتوفى وباقي النص الفضّل جيفة
ضاقوا المر والحال استعصى الشغال واللاحق الحصة الواصال للرحم اتقصّ والهاداي مو لاقي الفرصة الرساي سافر ما وصى خل مُحمد وأحمد و حفصة الأطفال العرفو القِصّة سدت جوّ حلوقهم غُصّة من الجوع الدم اتمصّ واصبح كل الحلم رغيفة
كل الراكب شاف أحلامو دون احساس ماتت قدامو فنّ كتابو وكسر أقلامو للوالدين لا جال مالامو ناس الحلة القعدوا وقاموا أصرّ وألحّ يمشي كلامو هزموه اخوانه البيجوع ناموا وكم خريج مالاقي وظيفة
يالفكيتها وقلتّ لها سيري وعارف انو الدنيا دميرة لا في ضفاف لا شفنا جزيرة لا في الحيرة ولا في الطيرة كسرت جناحها وقلتّ لها طيري واتملكت الكانت ميري يالسودت الناصع جيرة إيد الحق صابونة وليفة
قبلك كم متعلم وقاري عكس الريح فكّولو الصاري مشدوهين متعشي وحاري ريسها شلته والبحّاري كم سنوات علامّها الباري واقفة وهم شيايفنها جاريي بقينا هلاك والقيف متضاري لا حجّار لا دوحة وريفة
حسِّك عينك ما تتمادى وتنسى الراكب عندو إرادة الأهوال الشافها وخاضها كان في مدرسة ولا عيادة شفنا الإيد الكان أجوادة يا مبتورة ويا شحادة وياما رقاب كانت سدادة علّمت الله من التعريفة
يا ريسنا قدر مدّيرك فك الدّفة وأدّها غيرك أحفظ نفسك ترضي ضميرك وقّف أوعى تواصل سيرك كان طاوعتنا شن بيضيرك عرض أكتافك وفك البيرك لاهنا شكرا وكتّر خيرك وكل انسان في الأرض خليفة
Post: #34 Title: Re: الحقو السودان يا ناس Author: هشام المجمر Date: 09-27-2007, 06:35 AM Parent: #1
عمر التوم
سلام
نلحق الشعب السودانى (الفضل)
د. احمد امين
شكرا على الاغنية المعبرة
Post: #35 Title: Re: الحقو السودان يا ناس Author: هشام المجمر Date: 09-27-2007, 06:51 AM Parent: #1
د. صفية
سلام
وشكرا على المتابعة
مجاهد عبد الرحمن
تحياتى
Quote: من بكره سعر الخبر يمكن يضاعف لأن اليوم حدثت زيادة جنونية لسعر الدقيق في السودان بنسبة 33% ..غايتو الله يكون في عون الشعب السوداني..
قبل شهر ونصف كتبت بوستا متوقعا فيه زيادة اسعار الخبز نسبة لزيادة اسعار القمح عالميا وقلت ان الحكومة لن تتبرع بأى دعم بل بالعكس هى تريد ان تربح على حساب المواطن.
Post: #36 Title: Re: الحقو السودان يا ناس Author: Abubakr Osman Date: 09-27-2007, 07:01 AM Parent: #1
هشام حقيقى المسأة هى مأساة الناس الغلابة السودان اصبح من اغلى بلاد الدنيا الاسبوع الماضى عدت من رحلة خارجية ذهبت لشراء بعض الاغراض من البقالة خمسة اصناف فقط كانت تكلفتها نصف مصاريف شهر كامل من حيث اتيت ما بالك بمصاريف العلاج اذا مرض احد الاطفال الله يكون فى عون الشعب السودانى الفضل
Post: #37 Title: Re: الحقو السودان يا ناس Author: Walid Safwat Date: 09-27-2007, 09:26 PM Parent: #1
Quote: بلدكم ياتا يا هشام ؟ دي ؟؟؟ .. ما مشينا خليناها تسأل الناس إلحافاً أنْ : يا بو مروّة .. و لا في كان أبو مروة زمانئذ و لا أبو النوم .. طنشناها .. عملنا نايمين .. و قعدنا ننبح بس بخطاباتنا القديمة و حراباتنا السقيمة .. و ترهاتنا المستديمة .. ( و لسه بننبح ) .. يا نضال يا برتكاني و يا نضال يا أخدراني و يا نضال يا فرتكاني .. لغاية ما بقت مطلوقة .. و ركبوها العربات .. و دخلوها البيوت الباخرة .. و عنكشوها شوارع بيش و كهارب بيش و ذمم بيش و أسامي أبيش .. ومواقف بيش .. و جلاليب و نيون و بترول و شركات و بخرات و لافتات و عربات و ناس مقلوعة العيون مخلوعة القلب .. و كلو بيش .. ثم .. رضعت من ثدي الحرة الضباع .
كلام فاينال : دي بقت ما بلدكم .. بلدكم ديك راحت شمار في مرقة .. الهسع دي حاجة تانية .. سميها شكلوتة ( و هي نوع من المسخ أو البعاتي ) .. و ممكن تتلولو معاها تعضيك تسممك .
ماقاليك فاينال ياباشمهندس بلدكم ديك رااااحت والهسع دي مشروعهم الحضاري ورقصني ياجدع اخير النرقص يمكن نفلت من الرضاعة ...
Post: #38 Title: Re: الحقو السودان يا ناس Author: Al-Shaygi Date: 09-27-2007, 10:00 PM Parent: #1
والله يا هشام لقد صرخت بما نكتمه في صدورنا.
Quote: وللعلم نحنا عندنا بيت و ما مؤجرين
طيب رأيك شنو في بيتين منهم شقة مؤجرة!!! أنتحر يعني!!!!
الشايقي
Post: #39 Title: Re: الحقو السودان يا ناس Author: هشام المجمر Date: 09-28-2007, 05:33 AM Parent: #1
همر عبد الله
سلام
وشكرا على القصيدة
ابوبكر
تحياتى
Quote: الاسبوع الماضى عدت من رحلة خارجية ذهبت لشراء بعض الاغراض من البقالة خمسة اصناف فقط كانت تكلفتها نصف مصاريف شهر كامل من حيث اتيت ما بالك بمصاريف العلاج اذا مرض احد الاطفال الله يكون فى عون الشعب السودانى الفضل
لازما فى حل
Post: #40 Title: Re: الحقو السودان يا ناس Author: أشرف البنا Date: 09-29-2007, 09:44 PM Parent: #1
هشام المجمر خالص التحايا... أتعجب ممن يدعونني كل إجازة للعودة إلى ( هناك ) أعود كي أصبح سفاحاً يمص دماء الآخرين أو ضحية تمتص دماؤها أما أولئك الذين ليس له مغترب يطعمهم سنوات عمره التي تفترسها الغربة فقد باعوا اللحم البشري بكافة أنواعه ... و شروا اللقمة بكرامتهم ... و شروها بشرفهم ... ترى هل يرى أحدكم الضؤ في آخر النفق ؟؟؟ لنا الله ...
Post: #41 Title: Re: الحقو السودان يا ناس Author: هشام المجمر Date: 09-29-2007, 09:56 PM Parent: #1
اشرف البنا
سلام
Quote: أما أولئك الذين ليس له مغترب يطعمهم سنوات عمره التي تفترسها الغربة فقد باعوا اللحم البشري بكافة أنواعه ... و شروا اللقمة بكرامتهم ... و شروها بشرفهم ... ترى هل يرى أحدكم الضؤ في آخر النفق ؟؟؟
كلامك صادق يا اشرف و من شدة صدقه ينزل فى الجوف كالسكين