سارة و المدرسة

سارة إلتحقت بالمدرسة KG 1 فى هذه السنة الدراسية وبالتحديد فى الأسبوع الثانى من سبتمبر.

شخصيا كنت معترضا على إلتحاقها بالمدرسة فى هذه السن المبكرة ( 3 سنوات ) ولكن والدتها كان لها رأى آخر.

رأى كان يتلخص فى أن الدخول للمدرسة فى هذه السن المبكرة يحرم الطفل من الإستمتاع بطفولته و يفرض عليه الإنضباط فى هذه السن المفترض يلعب فيها بحرية و يتعرف على العالم من دون أى قيود.

ضربت المثل بطفولتنا وكيف اننا استمتعنا بها رغم فارق الإمكانات المهول بين ذلك الزمان وهذا الزمان.
لقد استمتعنا بالألعاب السودانية المختلفة
استمتعنا بالخريف و حرب الضرب بالطين
وقبض الجراد
و مراقبة الزنابير والحشرات المضيئة
كان أغلب وقتا ملئ بالممتع من النشاط الطفولى الحر
وكان أهلنا لا يمانعون فى ذلك بل يرون أن الطفل الطبيعى هو من يفعل ذلك
عندما إلحقنا بالمدارس كان سن اصغرنا 6 سنوات
و بالنسبة لى لا مجال للمقارنة بتلك السنوات الستة و سنين سارة الثلاثة

والدتها تقول ان الزمن إختلف وإن المدارس إختلفت وهناك العديد من الألعاب داخل رياض الأطفال و سارة لو لم تلتحق بالمدرسة فى هذه السن سوف تعد كبيرة بالنسبة لأقرانها وتضيع عليها سنة واضافت أن من المهم لها كطفلة أن تلتقى باطفال مثلها فى هذه السن خاصة ونحن فى هذه الغربة حيث لا يلتقى الأطفال كثيرا.

برضو منطق معقول

إتفقنا على إستشارة مديرة المدرسة المرشحة للإلتحاق بها و التى ناصرت رأى زوجتى فى النهاية ( مرتين إتلمو على)
وألحقناها بالمدرسة

لكنى ما زلت أعطف عليها كثيرا و انا اراها تضطر للصحو مبكرا ة و للإستحمام و تسريح الشعر وجر الشنطة التى تبلغ طولها تقريبا
و اقول فى سرى : إنعل ابو القراية لو كانت بهذه الطريقة.
لو حضرنا الزمن ده بالتأكيد كنا بقينا فاقد تربوى.

بالمناسبة كنا قد استشرنا بعض الأصدقاء فى اثناء التشاور

معظم الرجال من الآباء كان لهم نفس رأى

اما الأمهات فقد اتفقن جميعا مع زوجتى

بالتأكيد ليست صدفة

قلت ليهم:" أها حسع منو الجنس الخشن فينا؟"

ود المجمر

وانا من رايك حتى نصبح راجلين ضد مرتين
يعنى انا وانت ضد حرمكم المصون والست الناظره

وربنا يخلى ليك ساره ويجعلها من بنات الاسلام والوطن الصالحات

Quote: استمتعنا بالخريف و حرب الضرب بالطين وقبض الجراد و مراقبة الزنابير والحشرات المضيئة

فى دى الله يجازيك
فقد اثرت فينا الشجون وذكرتنا بالذى مضى ..

على محمد بشير

تحياتى

كويس انك متفق معاى

لكن تعرف يا على

النسوان فى النهاية بسون الدايراتنو

أها دى يحلوها كيف؟

Quote: النسوان فى النهاية بسون الدايراتنو

لوووووووووووووول يا هشام

عفو يا ود القبائل
اتاريك رافع العلم وانا ما عارف



















بس بينى وبينك كدا كلامك صحى
قدر ما نعارض فى النهايه قاعدين نرضيهن ونمشى ليهن العاوزاتنه
وياربى دا يكون من شنو ؟؟؟؟

هشام

كويس انك عملت البوست ده

لانو اخوك في نقاش وجدل شديد

بنتي نــــــــورا سنتين ونص

بتحاول انها تتكلم بعض الكلمات

ولكن لسانها لم ينطلق بعد

ارى ان ادخالها المدرسة هو الحل حتى تتكلم بطلاقة

وبسرعة

وبرضو يا هشام البيئة الاتوفرت لينا زمان للعب ام الصلص وحرينا وسك سك والبت يا لبوت

لا تتوفر لجيل اليوم خاصة من هم في الاغتراب وممكن توفير جو اللعب في المدرسة اكثر مما

نوفره لهم نهاية الاسبوع

على

مالك يا أخوى داير تفضحنا

الراية مرفوعة مرفوعة

بس

قول مرفوعة نص نص

زمان عمى سعيد الله يرحمو قال لى : يا ولدى المرة تقول ليك أى حاجة قوليها لا و بعدين أعمل ليها الحاجة الدايراها.

اها لازم تكون عارف المثل الصينى المشهور البيقول مرتك لو قالت ليك أطلع الجبل أحسن تطلعو الصباح بالبرودية مما تطلعو فى نصة نهار

الأخ هشام

السلام عليكم

أنا من رأي (النسوان) بعدين KG1 دي ما كلها لعب في لعب

و أن شاء الله سارة حتعيش طفولتها بالطول و العرض

بعدين أسلوب لعبكم زمان دة ما بينفع الزمن دة العالم أطور


جراد شنو يا هشام فضحتنا لكن



خالد

قرجة

تحياتى

اتلومت فى نورة
سنتين ونص صغيرة خالص
كان للكلام بتتكلمو ما تقلق

قلبى معاك يانورة
يا قرجة كدى قول بسم الله و اديها سنة تانية

Quote: اها لازم تكون عارف المثل الصينى المشهور البيقول مرتك لو قالت ليك أطلع الجبل أحسن تطلعو الصباح بالبرودية مما تطلعو فى نصة نهار

الله يجازى محنك ومحن اهلنا الصينيين
والله ياهشام ضحكت للمثل دا لمن دمعت

انتا عارف اهلنا الصينيين ديل اهل حكمه وكدا

يا هشام

أنا اتفق معاك في عدم رضاي بدخول الطفل وهو صغير للروضة لسببين
السبب الأول كما ذكرت انت حرمانه من التمتع بطفولته وتقييده بواجيات وانضباط وبعدين قصة صحيان بدري دي والله بتوجع الأب وجعة شديدة.
السبب التاني لو الطفل كره مسألة الانضباط والواجبات دي فحتبقى ليهو عقدة بعدين ويكره حاجة اسمها مدرسة وقراية.

أهو نحن دخلنا المدرسة وشنبنا قايم ولا قرينا روضة ولا حاجة. أها الفاتنا شنو وبعدين الناس مستعجلة لي شنو . ححتخرج وتمارس العطالة.

لكن إنت عارف ليه الأمهات بيصروا على دخول الأطفال للروضة في سن مبكرة؟؟؟؟

عشان ينوووووووموا لحدي الساعة واحدة.

Quote: جراد شنو يا هشام فضحتنا لكن

يا خالد

سلام

الحمد لله انو أنحنا لعبنا بيهو بس فى ناس بياكلوهو

الأخ العزيز..هشام
تحية و ود
يا سيدي أنا زاتي مع (( أم سارة ))..ما عشان أنوم للساعة واحدة و ما عشان البرودية..
لكن لأنو سارة ح تقعد في البيت تتابع التلفزيون أو تتابع أمها من أوضة ل أوضة و ح تزهج.لكن في الروضة ح تكوٌن صداقات جديدة .ح تكتسب مهارات إجتماعية جديدة.ح تعرف معلومات جديدة غير المعلومات الفي سبيس توون. ح تتعلم تشارك و تتشارك . و الأهم من ده كله..ح تنتظم ساعات نومها و بالتالي صحتها تتحسن (( و دي عن تجربة )).
بعدين يا أبو سارة..زمان كان التعليم القبل المدرسي رفاهية..لكن حسي الحضانة و الروضة أساسيات بيتعلموا فيهم قراءة الحروف و الأرقام و نطقها بطريقة بسيطة..على أساس لمن يدخلوا المدرسة الأمور تبقى ليهم ساهلة.
قوٌي قلبك يا راجل و إستمتع بحكاويها لمن ترجع من الروضة..و شوف ح تستمتع كيف.
كل التوفيق للحبيبة سارة و تحياتي لأمها و ليك.
ممكونة

Quote: لكن إنت عارف ليه الأمهات بيصروا على دخول الأطفال للروضة في سن مبكرة؟؟؟؟ عشان ينوووووووموا لحدي الساعة واحدة.

يا شماسى

سلام

كده بتجيب لينا المشاكل

أها يا ممكونة

جنس كلامكم السمح ده هو البخلينا نتنازل و نوافق

شكرا لك على المشاركة الثرة

الاخ هشام كيفنك انت والاميرة سارة

طبعا مسألة العيال والمدارس ده فيلم لسة مادخلناهو وشهرا ماعندنا فيهو نفقة

بس عجبني والله المثل الصيني

Quote: مرتك لو قالت ليك أطلع الجبل أحسن تطلعو الصباح بالبرودية مما تطلعو فى نصة نهار

شرروم

سلام

يعنى عجبك المثل الصينى كيتا فينا نحن الأغلبية الصامتة

عموما يا أخى

" بكرة نطلع الحيطة و نسمع الزيطة"

نحن السابقون و أنتم اللاحقون

كلنا لها

أستاذ هشام.. تحياتي.. وتحياتي للمدام..
تعرف يا أستاذ.. الأم بتعرف .. وما بقول الكلام ده تحيّز لأم سارة.. بس لو هو قاعدة مع سارة في البيت وما شغاله.. انا متأكده إنها بتكون بتعرف إنه الصباحية دي سارة بتقضي معظم وقتها نوم.. ولما تلعب.. بتكون بتلعب براها... وأمها مهما حاولت ما حتقدر تلعب معاها زي ما ممكن يلعبوا معاها أطفال قريبين ليها في العمر.. انا بفكر في المسألة دي ليل نهار والله.. محمود على الرغم من صغر سنّه إلا إني بحس بإني ما قادرة أقدّم ليه أهم شي في حياة الطفل.. كونه ينوم الصباحية ويصحى على كيفة ما حنّية عليه.. بالعكس.. الطفل أحسن ليهو يتعلم يصحى بدري ويمارس نشاطه عشان ينوم بدري بالليل..
صدقني المدام سوّت عين العقل..


ملحوظة:
د.عصام المجمّر أخصائي الباطنية في العين، ببقى ليك شنو؟
بنت الحسين

Quote: برضو منطق معقول

اهو برضو تصحيكم لى صلاة الصبح!
قلبى معها ست أبوها وأمها خليها تنتهى من القراية ودقها مبكرة ثلاثة سنوات كان القراية بتنتهى!
وفى الكى جى دايما القراية اقل واللعب اكثر ما فى مشكلة اصلا وبكون احسن لو المدرسة قريبة جدا!
وطول ما هشام ابوها ما بتجيها عوجة
لينا ابنتى عمرها سبعة سنوات وثلاثة اشهر وفى G3 صغيرة ولكنها متفوقة على زميرتها اللائى يكبرنها بسنت ينوتدرس كل المواد بالانجليزية اضافة الى اللغة العربية والفرنسية ترسم وتعزف وترقص يعلمونهم اشياء كثيرة وعندهم استعداد فهم جيل تلفزيونى قدراته هائلة ليس مثلنا ما اجمل ان يكمل الطالب الابتدائية وهو يتحدث ثلاث لغات ويرسم ويعزف هذا القدر من المواهب يجمل الانسان وينمى فيه الجمال والمحبة والاخلاق السامية!
سارة بمعاييرنا صغيرة ولكن بمعايير عصرهم فى سن مناسبة لا تخشى عليها ياصديقى
ولك ولوالدتها تحياتى ولسارة محبة عمها جنى ولسهى الصغيرة الفبلات
جنى

ود المجمر
الرأى بقى رأى النسوان وكلنا فى الهوا سوا
المسألة كلها توزيع للاطفال لى كم ساعة
غايتو بتظهر بعدين لان الجامعات الان بها اطفال
لم يكملوا طفولتهم بعد
احجامهم صغيرة وكذلك تفكيرهم

مريم بنت الحسين

تحياتى

ولك الشكر على المشاركة بالرأى

د. عصام هو شقيقى الأكبر ( البكر يعنى)
بس طلع بكر شاطر

تحياتى يا هشام وكيف الأحوال

طولنا ياخى ما لاقيناك
إن شاء الله إنت وحبانك كلهم بخير وعافية وسعادة

تلاتة سنين، حسب نظريات التعلم، وناس جون ديوى وبافلوف بتاعين التنظير، يخيل لى شوية على المدرسة، الموضوع بتعلق بمدى الإستعداد الفسيولوجى والنفسى للأطفال وقابلية التلقى، والشغلانة مفروض تدريجية عشان كده نظام البرى - اسكول والتمهديى والروضة نظام كويس جدا، يعنى لحدى بعد خمسة سنوات فى الغالب الطفل بكون مهيأ جسديا ونفسيا وعقليا لتلقى دروس معينة ممكن تكون بداية التعليم النظامى، بدون ما ننسى الحالات الإستثنائية طبعا

تعرف أنا "آمنة" بنتى دخلت المدرسة وعمرها أقل شوية من خمسة سنوات، وصراحة كنت خائف إنها تضيع ساى ولا تلم هنا ولا هناك، لكين خيبت توقعاتنا كلها وهسه هى فى الفصل السابع فى مرحلة الأساس، وكل سنة بتكون الأولى على مستوى المحافظة كلها

لكين تلاتة سنين دى، فى مستوى التعليم النظامى، يخيل لى شوية

وتحياتى مجددا يا مجمر

Quote: لينا ابنتى عمرها سبعة سنوات وثلاثة اشهر وفى G3 صغيرة ولكنها متفوقة على زميرتها اللائى يكبرنها

طبعامش بت جنى لازم تكون ذكية زى أبوها

موضوع المدرسة و سن الإلتحاق بها سببو أنو أنحنادايرين أولادنا يعيشو عيشة سعيدة او قل عيشة افضل من العشناها انحنا بس يبدو أن الزمن وطريقة الحياة المفروضة علينا ليها كلمة اخرى.

لكن يا جنى موضوع تعلم المسيقى و الرقص و الرسم ده موضوع مهم جدا
الطفل ذهنو بيتفتح على الجمال ودى حاجة صحية

لك مودتى

ابوذر بابكر

سلامى واشواقى الكثيرة

Quote: تلاتة سنين، حسب نظريات التعلم، وناس جون ديوى وبافلوف بتاعين التنظير، يخيل لى شوية على المدرسة،

شكرا لقيت لى رفيق يعاضدنى

عارف يا ابا ذر

الحكاية كلها حنيةاب على بنتو و خوفو عليها من المدرسة والتلتلة فى سن مبكرة
هو عليكم الله المدرسة دى بتتراد؟

لك مودتى

Quote: هو عليكم الله المدرسة دى بتتراد؟

هشام ازيـــــــــــــــــــــــــــــك
كيفن ماب تــــــــــــــــــــــــتراد


ـــــــــــــــــــــــــــــــــــــــــــــــــــ

الصورة لشفع الروضة فى نورى ( الجريف ) بالشمالية

Quote: قلت ليهم:" أها حسع منو الجنس الخشن فينا؟"

غايتو .. جريت واطي يا هشام ..


أنا زاتي قرصوني القرصة دي ..
و برضو .. ( الجنس الخشن ) فاز في النهاية .


يديك العافية

Eid Mubarak Ya Abu Sarah...
I totally agree with you on the right of the child to have more fun and less structure/discipline in her life...
what is the rush?
I like to send you this link from my Sarah whom once was so little like yours...


http://www.alsarah.com

regards
mohamed elgadi
Abu Sarah

عصام عبد الحفيظ
تحياتى و أشواقى يا صديق
ليش ما بتجى بى هنا؟ الناس كلهم بيجو ناطين اليوم و التانى لدبى . انت دبى دى فيها شنو يا عصام؟
المهم انت بالذات دايرنك تجى
كدى فكر فيها_ معرض فى الشارقة ، فى ابوظبى

Quote: الصورة لشفع الروضة فى نورى ( الجريف ) بالشمالية

الصورة جميلة ...لكن
المدرسة برضك ما بتتراد..انا ما كنت بريدها
انت كنت بريدها يا عصام؟ امرق النصيحة

عموما يمكن مدارس الأيام دى مختلفة..و الله أعلم


عماد عبد الله

سلام

Quote: أنا زاتي قرصوني القرصة دي .. و برضو .. ( الجنس الخشن ) فاز في النهاية

مرحبا بك فى نادى المقرصين
يا أخوى احسن لينا نتبع المثل الصينى ونريح نفسنا

عزيزى محمد القاضى

سلامى و أشواقى

دى السارة الحضرنا عرسها فى ابوظبى؟

استمتعت بالعمل و اشيد بروحها المبتدرة والقوية

للأمام يا سارة

كنت اتمنى تداخل عدد من المختصين فى هذا البوست لنعرف ما هو المناسب لأولادنا

كما توقعت ايضا ان نسمع رأى الأخوات خصوصا الزوجات وعن تجاربهن فى هذا الخصوص

تبادل التجارب هو الذى يطور المعرفة و يحسن من نوعية الحياة

الرائع/ هشام

مواضيعك دائما جميلة ومعاشة ، ريشتك تنقر على اوتارا حساسة

قالوا صاحبك كان حلقو ليهو بل راسك ، فانا سوف اكون في بداية العام القادم في نص المعمعة ، رايك شنو ابدأ بالهجوم قبل ان اهاجم بما انك صاحب خبرة سابقة مع هؤلاء الظلمة والاشداء( الحريم )

اسامة الخولى

تحياتى و شكرا على الكلمات والصورة الجميلة

اما موضوع الهجوم فلا أنصحك به لأنو الباكات شداد و اكيد حتتعوق

انا بتداخل هنا كأم و"جنس خشن" عادى ..ما كمتخصصين

اوافق حرمكم المصون والست الناظرة واختلف معاك ومع محمد القاضى

تعلم الديسبلن وبدايات القراءة والكتابة اصلو ما بيضر الطفل بينفعوا

مع مراعاة انه اللعب هو احد اساليب التعليم الاساسية فى هذه المرحلة

الطفل بتنمو عنده "مهاره اجتماعية" ..فهو بيعرف البيه والعليه وحده وحد الآخر ..يعنى البسموها social skills من ضمنها مثلا * احساسه بالتيم وناس تشاركه فى لعبته ويكون عنده دور يلعب ودور يصبر على التانيين يلعبوا .*.الغياب عن البيت لساعات بيحس فيها بقيمة الاسرة وقيمة المجتمع الكبير* احترام الاستاذ فيه بعد اجتماعى وفيه رمز للسلطة او تصغير لاحترام القوانين ..

الاحساس بالنظام decipline مثلا * نظام الوقت * ونظام اللبس * الطلوع بره البيت * ركبة البص او سيارة الام "الخشن فيهم طيب" * الاصطفاف فى طابور* الاكل بمواعيد وكل الممارسات اليومية . لما يتعود عليهاا بيكتسب انتظام حسى مثلا لدورات الجسد "الهضم النوم الدورة الدموية .." وانتظام سلوكى اجتماعى نظام للعضو فى المجموعة ..الخ


التعلم نفسه مهارة هامة بيكتسب منها فوائد عضوية فمثلا *دماغه بينمو بالاكتشاف والمعرفة ..ومعروف انه دماغ الطفل فى السنوات دى بينمو بالاستنفار وكل ما عرف معلومه زاد تجويفو تجويف..وفوائد اكاديمية ..القراءة والكتابة فى سن مبكرة ودى الاكثر أهمية

اللعب ما بيختفى من حياة الطفل طبعا لانه زى "ما ذكرنا فى البداية" (وهنا فى الجملة دى بالتحديد لقيت نفسى بشبه الناظرات ولا مقدمات البرامج ياربى أكون ناظرة فى سرى وانا ما عارفة ؟) انه وسائل التعليم فى السنين دى بتعتمد على اللعب.

تانى تجو؟

وبمناسبة الجنس الخشن فينا منو

دى قالتا هادية طلسم قبل سنوات ونحن فى بيتها فى واشنطون كان عندها بروفة فى البيت

وتعمل فى الاكل فى المطبخ وتغسل فى العدة وانا معاها والرجال فى الصالون يضحكوا ويتونسوا فجأة فقعوا الضحكة فهى اتغاظت

عاينت لايدينا وهى بتغسل فى العدة قالت لى:حسة الجنس الخشن فينا منو؟

تماضر

سلام


شكرا على المداخلة القيمة

ونحن من زمان قلنا تانى ما بنجى

هادية طلسم كلامها صاح بس بعدين ماتنكروا

أمس ذهبت و إلتقطت عدة صور بمدرسة سارة

و الصور جاياكم واحدة واحدة

إنتظروا

مديرة المدرسة



صف سارة

سارة و معلمتها الإيرلندية مسز ماندى

الأخ هشام
قرأت ما كتبت زقد عدن بي سنوات طويلة وطويلة جدا للوراء... حفظ الله سارة وأعانها على هذه (الورطة) فما زال الطريق أمامها طويل... أعاني نفس هذه المعاناة مع أطفالي ولكني أكتشفات ذات يوم أن مفهوم اللعب عندهم قد اختلف ... جاء هذا الإكتشاف بمحض الصدفة عندما (عملت فيها) راجل بتاع تراث... ففي احدى الإجازات السنوية بحثت عن كتاب الأحاجي السودانية للبروفيسورعبد الله الطيب ووجدته بصعوبة بالغة(كعادة النشر عندنا) وهند عودتنا عملت للعيال حبوبة وبدأت (أحجي فيهم) وعند نهاية أول أحجية رمقتهم بنظرة المنتصر لأرى رد فعلهم فإذا بي أفاجأ بضتبادل ضحكة ساخرة بين عمر وزينب وكانوا يضحكون من (النعجة التي تتكلم او (كما جاء) في الأحجية.
قطعاً إذا بحثت عن الأمر فقد تجد أن لسارة رأي آخر غير رأيك القديم هذا .. هذا جيل الإقناع والإقتناع فقد تكون مبسوطة وتطلع إنت (شايل وش القباحة)

لك الشكر فقد كانت هذه استراحة رائعة لي

شكرا كمال محجوب

نعم انهم مولودون لزمان غير زماننا ولا ينفع معهم ما كان يمتعنا بل يبدو ساذجا و مثيرا للضحك كما فعلا طفلاك ربنا يخليهم ليك.

تعرف يا كمال دائما ما اقع فى حيرة عندما أفكر فى موضوع تربية الأبناء.
بعض المرات بقول النجاح فى هذه المسألة محض توفيق من الله.

لكن دعنى أقول لك أننايجب أن نفعل ما يجب علينا من حيث تعليمهم و تثقيفهم
الموضوع الفاشلين فيهو تماما هو معرفة كيف يفكرون و كيف يرون العالم؟

يعجز أغلبنا عن فهم الطريقة التى ينظر بها أطفاله للأشياء
الطب النفسى للأطفال علم تطور كثيرا فى الآونة الأخيرة و يقال انه نجح فى حل العديد من المشاكل.

احلم بأطباء و باحثون من مجتمعاتنا يولون هذا الموضوع إهتماما خاصا و يدبجون فيه الدراسات والكتب و ينصحون فيه الآباء بما يفيد أبناءهم.

كثرت فى هذا الزمن مشاكل الأطفال ولكنها لا تجد أدنى إهتمام لا من الحكومة ولا من التربويين ولا من عامة الشعب

الأخ العزيز / هشام المجمر
لك التحية والتقدير ولجميع المتداخلين ...
تعرف اليوم الثلاثاء 14/11/2006م ، قد إنتصرت أخيراً على زوجتي أم سعيد بعد أن كانت مصره على عدم إلتحاق إبني بالمدرسة KG1 لأنه صغير على عكس زوجتك تماماً ، علماً أن أبني قد أكمل عامه الرابع قبل شهرين .. وقد فشلت جميع محاولاتي في إقناعهاحتى تأخرنا عن العام الدراسي .. ولكن أخيراً إستعملت الدكتاتورية وذهبت أول أمس وسددت الرسوم وعملت كل اللازم وفأجاتها بأنني سجلت إبني في المدرسة ( وقلبت المثل الصيني ) .
المهم صحينا اليوم الساعة 6 صبحاحاً وذهبنا جميعاً برفقته وعندما وصلنا المدرسة وجدت إبني دون مقدمات إنخرط في اللعب مع الأطفال والجري وكان فرحان جداً ثم في تمام الساعة السابعة والنصف أتي مدرس الرياضة وأطلق صافرة تجمع الطلبة كلهم في فناء المدرسة وأنا أراقب أبني من بعد فوجدته تلقائياً وقف مع الأطفال الذين من سنه وبدوا في حركات رياضية ثم تم إدخالهم إلى الفصل بطريقة مرتبة .. وبعد قليل نظرنا إليه من النافذه وجدناه مندمجاً مع الأطفال .. فسألت زوجتي أه رايك شنوا .. قالت لحدي أسع كويس ..وربنا يستر.
حقيقة الزمن إتغير .. وظروف الغربة تختلف عن السودان .. الأطفال هنا محرومون من أشياء كثيرة .. فالمدرسة تعوضهم عنها .. لأن التعليم هنا مختلف .. فأنا أنصح أي إنسان يحاول يلحق إبنه برياض الأطفال وإن إستطاع بالمدارس الأجنبية .. فحتماً سوف يكون هو الكسبان .. لأن هذا هو زمن التعليم .. وقد إطعلت من قبل على تقرير عن التعليم في اليابان ففيه ذكر أن اليابانيين يعدون أبنائهم من سن الثانية لإختبارات قدرات القبول للتمهيدي .. وأن من يتعدى سن الثانية .. حيث أنه لايتم قبول الأطفال مالم تجرى لهم بعض الإختبارات التي تحدد مدى ذكائهم وإستيعابهم .. أنظر ياأخي أين وصل اليابانيون .. ونحن نضيع (5) سنين في اللعب ومن ثم نود أن نلحق بركب الأمم .
ختاماً لك التحية ..
ونسأل الله أن يجعل لنا من أبنائنا قرة عين .. وأن يلهمنا وإياهم التوفق والنجاح ..
خالد الأرباب

يا ارباب

تحياتى

اربعة سنوات مناسبة جدا لكجى ون فى الخالة دى انت الصاح لكن ما تزعل ام سعيد و تستعمل الديكتاتورية لأنو بتشوفو قدام

اليابانيون ديل متطرفين فيما يخص العمل و الجدية عليك الله سنتين شنو يسوى ليهو إختبار؟
عارف يا ارباب التعليم المبكر ما مختلفين عليهو لكن الفرق فى ماذا يريد الشخص من الحياة؟

انا شايف نديهم فرصة يستمتعوا بطفولتهم وندخلهم الكى جى ون فى سن الرابعة ومعظم البلدان المتقدمة بتعمل كده.

لك مودتى وربنا يخلى ليك سعيد

ابو بكر عثمان

تحياتى

اسمك ظهر ولكن المداخلة لم تظهر ربما لخطأ ما لا ندريه
ارجو إعادة أرسالها

ولك الشكر