تأجيل لقاء القمة

اصدر الإتحاد العام بيانا أمس قرر فيه تأجيل لقاء القمة بين الهلال و المريخ الذى كان من المفترض أن يقام يوم الجمعة 11/5/2007 ليلعب قبل بداية الدورة الثانية وذلك نسبة للظروف الصحية التى تمر بها البلاد و مراعاة للمصلحة العامة.

الخرطوم .وكالات

هاها ها...مشت فيكم

شخصيا كنت أتمنى أن يحدث هذا لعدة أسباب:

1- أولا: الوضع الصحى: حرارة الجو هذه الأيام تسجل أعلى درجاتها و ليس من الحكمة فى شئ أن يحشر 30 ألف مواطن معا فى هذه الظروف التى ينتشر فيها مرض السحائى. شهر مايو أصلا ليس من الشهور المناسبة للعب كرة القدم فى السودان ولا أدرى لماذا يركز الإتحاد العام نشاطاته فى مثل هذا الشهر.

2- ظروف إنتصارات القمة المتلاحقة فى البطولات الأفريقية و التأثير السلبى الذى يمكن أن تحدثه هزيمة أى من الطرفين فى هذه المباراة و بالناديين ما يكفى من المشاكل. فريق المريخ سوف يلاقى بطل تنزانيا بعد حوالى اسبوع من المباراة ولو طلعت نتيجة مباراة القمة فى غير مصلحته ربما لن يستطيع تخطى الفريق التنزانى. ونذكر كيف ان هزيمة الدورى فى العام الماضى أطاحت بالمدرب و كادت أن تطيح بالفريق بكامله وذلك نسبة للتاثير المبالغ فيه لهذه الهزائم على الفريقين.

3- الشد والشحن العصبى الزائدين عند مشجعى الفريقين وجد بعض المتنفس فى الآونة الأخيرة و ظهرت بعض الأيجابيات فى معاضدة جمهور الفريقيين لبعضهما البعض فى المباريات الأفريقية. مباراة القمة سوف تقضى على هذا وتعيد الشد العصبى ورد الفعل المبالغ فيه للمربع الأول.


أخيرا أتمنى أن يتعامل جمهور الكرة و إدارة الناديين مع هذه المباراة بشكل عادى فهى مباراة فى كرة القدم ونقاطها 3 نقاط ككل مباريات الدورى و أنسوا الحديث الفارغ بتاع مباراة ثأرية ودربى أم درمان و انها دورى فى حد ذاته كل هذه أحاديث يسوق بها كاتبوها بضاعتهم وهم لا يدرون انهم يصبون الزيت فى النار وييرفعون من درجة حرارة الدرجات التى هى ملتهبة أ:ثر من حرارة الجو.

والله يا ود المجمر

ما كنت فاكرك سيد جرسه بالشكل دا

أخي الكريم ود المجر


صباحك نور ، ، ،

Quote: أخيرا أتمنى أن يتعامل جمهور الكرة و إدارة الناديين مع هذه المباراة بشكل عادى فهى مباراة فى كرة القدم ونقاطها 3 نقاط ككل مباريات الدورى

يا ريت يحدث ذلك لنجنب الفريقين الضغط النفسي والعصبي وبالتالي يؤدوا مباراة تليق بنا كشعب رائد في عالم كرة القدم .


لك ســـلامي ....

يا على محمد على

سلام

والله لا جرسة ولا حاجة

الهلال معروف فى الدورى الممتاز بيعمل شنو للمريخ وفريقنا قوى وجاهز.

المشكلة كلها فى المريخ ولو كنت ناسى ما حدث بعد ال3 صفر أذكرك. المريخ فقد الدورى كلو بعد تلك المباراة رغم انو كان متقدم ب 7 نقاط على الهلال.

من ناحية حساب النقاط حتى لو إنتصر المريخ غدا على الهلال سوف يتساوون فى النقاط و الهلال قد بلغ دورى المجموعات ولن يتأثر بمباراة الغد. لكن تخيل ما قد يحدث لو هزم المريخ؟

أنا أنادى بجعل مباريات القمة مباريات عادية لا يكون لها ما بعدها من تأثيرات سالبة.

بالمناسبة المريخ هو الذى طلب تأجيل المباراة وليس الهلال.

الحبيب هشام المجمر تحياتي وسلامي ومرحباً بك في الدوحة ونزلت أهلاً وحللت سهلاً
يازول الجرسة دي شنو سيب الجرسة وارجى الراجيك وبل راس مع الجماعة البلوا راسهم ومنتظرين
قال سحائي وزحام قال ياخوي السودان سخانته اصلها ما محددا بشهر معين السنة كلها السخانة فوق يعني بس حبكت معاكم في سخانتة اليومين ديل ولا دي الجرسة ساااااااكت

إبراهيم على

سلام

أنت ياكا زولنا بتاع الأمتداد ولا واحد غيرو.

أها كان للجرسة انتو الغلب محمدكم وفى الدورى الممتاز ده ما بتقدرو على الهلال
شايف عملتو ليكم رويشات بعد قبلة الحياة التى أعطاكم ليها الهلال ( طمبل- علاء الدين-مجاهد)

ديل برضو بكرة ما بينفعوكم ولو كرة القدم عادلة انتو بتمرقو بفضيحة
الفرق بين مستوى الفريقين كبير ودى حقيقة ما بينكرها إلا مكابر

أرجو الجاييكم

الجمعة بس يا هشام، والكويس قالو في كشف (منشطات) كمان

المجمر ياخوي سلام تاني انت بالجد حتكون قدمك سعد خير على المريخ ومن هنا انا بدعوك للنوم مبكراً بعد انتهاء الشوط الأول فقط لانو هلالاب الدوحة لمن يتقلبوا بضهبوا من بيوتهم ومكان عملهم ودي اسأل منها ودرملية اللقوه رايح وبفتش لمحل سكنه ودي أسأل منها فردته راكوبة

نصيحة لوجه الله نوم بدري واتعشي من المغرب

العزيز المجمر ليس انا ود الامتداد ولكن لي عظيم الشرف بها وانا ود شرق الله البارد ناس بطانة أبوعلي

غايتو يا راكوبة الهلال حتى لو إتغلب ما بتحصل ليهو حاجة بس أنتو بتتفرتقوا عديل

بعدين موضوع المنشطات ده عارفين منو اول من دخلوا السودان
نسيتو لقاء الهلال و المريخ فى سيكافا؟

اعتاد رئيس نادى المريخ فى الآوانه الأخيره الذهاب لمصر بصورة ملاحظة قبل كل لقاء للهلال والمريخ، حدث هذا قبل مباراة كاس السودان، وجاء رئيس نادى المريخ قبل 3 ايام فى زيارة سريه للقاهرة، وعاد اول امس وسبقه عضو المجلس الكيماوى بثلاثة أيام ورجع يوم أمس !!
صاحب " العقل" يميز !!! ويعرف مع من ذهبت " حلاوة المولد" .. عشان ناس المؤتمر الوطنى ما يتشربكوا فينا!!
وبالكيماوى الحقيقى أو السحائى .. فالرد كسر .. وهسه فى زول اتكلم عن المنشطات؟؟

ابراهيم على

غايتو انا بكره ضامن قروشى و متعشى بعد الكورة

حكاية ضامن قروشى دى قالو فى شايقى إستلف ليهو عشرة جنيه(زمان) من واحد فى الحلة وقال ليهو برجعه ليك بعد إسبوع. أها الاسبوع مر و الشهر فات و دخلن فى شهور والشايقى بقى شارع بيت الراجل ما بجى بيهو ويلاقيهو فى أى حته يزوغ منو. مرة الشايقى كان واقف فى خشم بيتو و مالى جيبو بلح و بياكل فيهو الراجل المدينو نزل عليهو زى القضاء المستعجل وما أداهو أى فرصة يزوغ وطوالى قاليهو يا فلان قروشى وين؟

الشايقى قال ليهو شفت البلح الباكل فيهو ده. بعد ما آكلو ح الم الحصايات بتاعتو واقوم ازرعهم وبعد ما أزرعهم أقوم أنقلهم و بعد ما يكبرو أجيب الناس يقفذوهم و بعدين أجيبهم يحصدوهم و امشى السوق ابيع التمر و أديك فلوس. الراجل بعد ماسمع كلام الشايقى لم يتمالك نفسو من الضحك. الشايقى قال ليهو : ليك حق تضحك ما ضمنت قروشك.

Quote: الجمعة بس يا هشام، والكويس قالو في كشف (منشطات) كمان

ياراكوبه

قول لجماعتنا يحرصوا انو حموده بشير مايزوغ بعد المباراه مباشره ... سمح

يا هشام مالك على الجماعة هم من هسي كابين الجرسة ..
قدر ما حاولوا يأجلوا المباراة الإتحاد العام رفض ليهم ..
هسي تلقى الحمى ماسكاهم ..

أتذكر سنة 96 ولا 97 ما عارف كانت هلال مريخ فى الدورى الممتاز شغالة

كان النتيجة قبل نهاية الشوط الأول هدفين للهلال أحرز أحدهما زاهر مركز. يقوم دفاع المريخ يعرقل زاهر مركز من الخلف وهو منفرد بالقون و يحتسب الحكم ضؤبة جزاء صحيحة 100%. يقوم زيكو لا عب المريخ وقتها يشيل الكورة و يقول والله الضربة دى ما تتشات.

أها زيكو رفض يفك الكورة كلو كلو لغاية ما الحكم أعلن نهاية المبارة دون أن تكتمل.

خالى المريخابى جدا قام مبسوط وقال لى والله زيكو ده مفروض يعملو ليهو تمثال قدام نادى المريخ. الشى دى الليل كان ممكن تنتهى 8 صفر.

الأخ الباشمهندس هشام

باين من الجرسة ما قادرين تصبروا ، لو عاوزيت العجب ما يلعب ح نديهو راحة عشان الأعصاب تهدأ و تقدروا تلعبوا موش زي المباراة الفاتت 2 صفر و الله ستر ما زادت زي ما قال خالك ، و من هسع أعملوا وصية اذا القون التاني جا واحد يشيل الكورة عشان ما تزيد

ياهندسة الدوحة منورة ......... وبركة الشفناك وبقيت قريب عشان جمال ابوالقاسم وعصام بندة يشوفو ليهم سالفة تانية ............. اما تمرين بكرة الجماعة شايف اعصابهم بايظة رغم انهم متعودين ..... المهم نتمرن لمجموعات الكبار وانا شايف الاربعات قدام عيني

يا حاج حمد

سلام

بالعكس العجب ده عاونو أول واح فى الميدان.

عارف لو العجب موجود والهلال لعب كورتو البنعرفها المريخ مغلوب مغلوب.

كدى أسألك العجب ده لعب كم مباراة أمام الهلال و المريخ طلع مهزوم؟

عدهم تلقاهم كتار جدا. فى الدورى الممتاز بالذات العجب طوالى لاعب و طوالى مغلوب

بهاء بكرى

شكرا يا هلالابى يا أصيل

هم طلبوا التأجيل

ولسوء حظهم التأجيل طوالى ما بيجى فى صالحهم

الغلب محمدهم محمدهم

بس أتمنى أن يلعب الهلال بأسلوبه الهجومى الضاغط كما أتعودنا عليه

وب عد كده خلى الباقى على بهوية

Quote: الوضع الصحى: حرارة الجو هذه الأيام تسجل أعلى درجاتها و ليس من الحكمة فى شئ أن يحشر 30 ألف مواطن معا فى هذه الظروف التى ينتشر فيها مرض السحائى.

ود المجمر سلاام
من هسة وبقيت تنسى ؟؟
الرئيس الطيب عبدالله ( رحمه الله ) أقام المبارة مع التوانسة الثانية ظهراً
مالكم ما نضمتو ؟؟
مش برضو الجمهور سوداني ؟؟ ولا كان من الواغ واغ ؟؟
الرجفة ما بتحلكم .. صدقني فيها أربع اهداااف
هههههههه
أرجأ الراجيك وطفي نورك بدررررري

صدق يا ثابت أنا واحد من الناس كنت معارض بشدة لقيام تلك المباراة بتلك الطريقة

فى النهاية كرة القدم هى لعبة و ما بتستاهل ضياع حياة شخص

هى مجرد لعبة

بس لعبة مجنونة

يا هشلم أخوي

انبسطت مرتين مرة انك جيت الدوحة والمرة التانية انك من عشاق الموج الأزرق سونامي ايه رايك في الاسم دا بس طبعا علي الصهاينة.

تحياتي.