الكيزان مرتاحين راحة يحسدوهم عليها عينا باردة عليكم

مرطبين في السودان وقاعدين فيهو براكم تعملوا فيهو الدايرنوا تتحالفوا الليلة مع قرنق وبكرة تجيبو محمد عثمان الميرغني تقعدوهو في الواطة وتقولوا اتفق معانا وبنخمس ليك ..جري يتفق معاكم وبكرة تقولوا ليهو شتت بلا اتفاق بلا بطيخ .. تلموا ناس التجمع وتطرحوهم وتقسموهم وتوزعوهم تجيبوا امينهم العام تبقهوهو مستشار رئيسكم وتطردوا شيخكم... وشيخكم المطرود يستلم ناس دارفور ويحركهم زي ما داير لمصالحه ومصالح حزبه المطرود ما برضو كيزان
والنص التطردوا منكم يعني شيخكم وجماعته يمشوا يتفقوا مع الحزب الشيوعي في مدني اول مرة اشوف لي حزب شيعوي يساري يقعد يتفق مع حزب يميني لكن ما الكيزان بعملوا الدايرنه وتوقعوا معاهم الاتفاق في مدني كمان ولا الخرطوم وين ما دايرين بتعملوا الدايرنه ما السودان حقكم والبلد بلدكم ..وكيف ما بلدكم وانتو المتصرفين المطلقين فيها ومعارضتكم القوية مشغولة شهر بي حقوق المراة علي الراجل وبعد انتهوا جوا انشغلوا عنكم بواحدة سبت الدين ..ليهم اسبوع قالوا نصهم من حقها تسب زي ما عاوزه وقالوا التانين كيفن تسب دينا وقت قالوا يعملوا حاجة عشان يسقطوكم قبل كدا قاموا قعدوا شهر يحتفلوا بموت محمود المات قبل عشرين سنة امكن يسقطك الاحتفال دا اصلوا الحكومات بقت تسقط بي حاجات غريبة الايام دي ..امس معارضتكم تلحس في جزمة امريكا براها الليلة جيتو اديتوها العين الحمرا ومسكتوا جزم امريكا الاتنين واشتغلتو فيها ورنيش بي لسانكم ومافي معارضة اقوي من حكومة لو في اللحس زاتو وهو منو السائلكم زاتو ما انتو الكل في الكل ... امس نايب رئيسكم مشي لجون قرنق عشان يقسموها خلاص لانه خالتو امريكا خلاص قالت ليكم ورانا انتخابات يا شباب شدوا حيلكم شوية ... ومعارضتكم ولا علي بالها لسع مشغولة بي تلفون البت السبت الدين للادارة والايبي ادرس حقها ياهو ولا ما ياهو غايتو بختكم يا الكيزان اتجدعوا في البلد وبيعوها كان دايرين والله العظيم بالطريقة دي مافي زول حيسالكم ولا واحد يقول ليكم بغم غايتو البدق قلبه فيهم حيقول ليكم حقنا وين يا شباب من البيعة دي وزي دا ممكن تدوهو لو عاوزين وممكن تركبوا ليهو وش برضو لو عاوزين
غايتو عيني باردة عليكم بتعملوا الدايرنو في البلد ومعارضتكم تغني ولا علي بالي كان قلبي خالي ... واليوم الزعلوا فيهو ودايرين يطرشقوا يوم الغناي راغب علامة قال ليهم بناتكم قوشام وكلهم باكات .. اها الكلام دا حرقهم في الصميم ولعنو سلسفيل ابو اهلو وفي النهاية الولد طلع ما قال الكلام طلع مظلوم ساكت ...لكن احلي حاجة عجبتني في ناس المعارضة دي انه النسوان قالوا عاوزات حقهم براهم ودي قعدوا فيها اسبوعين برضوا يتغالطوا مع انه النسوان في السودان واللاقياتنو مافي مراة لاقياهو في الدنيا والله في امريكا زاتا ما لاقياتنو لكن ديل بعرفوا للغلاط كويس اي واحدة تسالها تقول ليها ابوك واخوانك معامكلتم معاك كيف وراجلك تقول بحترموني وبقدروني وماخدة حقي تالت ومتلت طيب مساواة كيفن اكر من كدا والله بعد كدا الا يعرسوا ليك مراة حتي ترضي لكن نقول شنو دي المعارضة ودي حكمتها وفنونها ونرجع ونقول للكيزان عينا باردة عليكم يا المرطبين يا المعارضتكم الز من الشوربة شفطة واحدة وتلحسوها كلها وابرد من الاسكريم لحسة لحستين وتسوح منو الزيكم انتو يا الرجال يا اسياد البلد

امكن الحاجة المزعلاني في الموضوع دا كله زي عادل عبد العاطي هو وشريف ادوم الناس دي قلنا اكيد ديل موسي ما زي ناس المعارضة الباقين لكن الليلة طلعوا فراعنة عديل كدا
كل واحد ماسك التاني ويغني
كضاب ..كضاب
يا البيعيو يمين كضاب
انا ما كضاب انا ما كضاب
حالتوا قلنا ديل العاقلين والمنهجين وكل واحد قال للتاني لازم تقول لي معليش ؟؟ معليش بت ناس منو ؟؟ قال ليهو لانه انت قلت زول المعارضة داك قريبي والتاني قال ليهو انت ما اسمك ادم اسمك ادوم اها وقعدوا يتفلقوا بالحجار وما فيهم واحد راضي يقول للتاني معليش ؟؟
خليهم خليهم الطلعوا فراعنه ديل الشريف الزول الصنديد الما بتهزوا الريح الليلة جابها تكركب قال التانين بيغيروا من الحزب الشيوعي ومدينوا عين ؟؟؟ يدوو عين فوق شنو ؟؟
لا ماسك حكومة لا ماسك معارض لا ماسك نفسوا زاتو ويدوعو عين ويحقدوا عليهو ؟؟؟ طيب الكيزان يدوهم شنو وقت الحزب الشيوعي يحقدوا عليو ؟؟
والله الا يكونوا ناس حسادة ساكت غايتو

الاخ اساسى
هنالك اشياء كثيره نحسد عليها الكيزان
ويكفى شكل المعارضين الذى لم يفهموا منطق الكيزان
فى التناحرات السياسيه وبكل اسف ناس المعارضه ينتاحرون
مع بعضهم والكيزان يبنون فى الاجيال التى تخلفهم وبرغم
اختلافنا جملة وتفصيلا مع الكيزان الا اننا نحفظ لهم الحق
فى العمل وليس الكلام والعبارات الغوغاء التى نسمعها من
ادعياء المعارضه ـ ت لك كل الود

الاخ/الابن اساسى

بما انه بعض مناضلى المعارضة البوردية انعموا على بلقب(كوزة)من الدرجة(المقدسة)،لفحت توبى ودخلت بوستكم دة.
غايتو رغم ان المعارضة الآن ضعيفة ومغلوبة على امرها،لكنى مازلت اتوسم الخير فى المعارضة الشريفة ولو كانت ضعيفة،اما المعارضة الغير شريفة فستنقرض وتتلاشى حتما لأنه الشعب كل يوم بزيد وعى ومعرفة.
لكن الجملة دى:

Quote: ومافي معارضة اقوي من حكومة لو في اللحس زاتو

اتقطعت فيها ياولدى!!!

الدكتورة مهيرة
صباحات الله بي خيرن
تعرفي يا خالة قصة معارضة شريفة دي بالشفناهو بي عيونا ديل في المنبر دا الله اعلم تكون شريفة ناس تهم جاهزة وتصنيفات مفصلة
اظرف حاجة امس واحد من البورد قال لي انت كوز لكن ما عارف نفسك يعني كوز بدون ما تشعر والله دي غلبني افهمها كيف؟؟
علي العموم معارضة شريفة ولا معارضة ما شريفة يا خالة الكيزان قسموها مع جون قرنق وطلعوا ناس المعارضة مشغولين مشغولية شديدة بالبت السبت والبت البتحترم راجلها والمراة الماكلين حقها الرجال

مكرر

صادوح
تحية بنكهة اللقيمات مع اللبن المقنن
تعرف انت هبشت حتة سمحة خلاص وهي تربية جيل جديد لا يعرف عن المعارضون الا انهم عملاء ومرتزقة وخونة وكل يوم يترسخ في راس الجيل الجديد النظرة دي تجاهم مما يسوقه الكيزان عنهم ويساهمون فيه هم بنسبة كبيرة اولا بطناشهم خالص للجيل الجديد وثانيا بانشغالهم عن فعل المعارضة الاصيلوماحولة كسب ود النظام اول ما يجدوا فرصة مما يعني انهم لم يكونوا الا ساعين للسلطة من البداية لذا نجد كثير من التحالفات والاتفاقات التي تمرر يوميا بينهم والنظام
المشكلة العويصة خالص انه الجيل الجديد دا بيعتبر دعم لوجستي للكيزان لاربعة عشر سنة قادمة يعني ناس المعارضة ديل قايلين انه الشعب السوداني حيقبلهم ويلفظ الكيزان ودي حاجة ما حقيقية في الواقع لانه كان حقيقية كان الشعب السوداني عملها زي ما عملها في اكتوبر وابريل لكن الغريبة انه صابر علي الموضوع ونايم علي كدا لانه عارف لا خير زيد ولا عبيد واحسن تمشي الامور زي ما هي ماشة
انت عارف الجيل الجديد دا الربتو الانقاذ بتاع الاساس والحيخش الجامعة السنة دي حيدخل وهو حافظ نص المصحف وقدره احاديث من المناهج العملتها الانقاذ ليهم جيل زي دا حتتفاهم معاهو في علمانية كيفن ؟

الفـــــــــــــاضي بيعمل قـــاضــــــي

الاخ الزنجي
اولا تحية
لفت نظري موضوعك عن انهيار التعليم ويسالني الله قلت ان هذا هو الموضوع الوحيد المهم الذي نشر في المنبر طيلة هذه الفترة الماضية ولكنه لم يلقي رواج لانشغال الناس بواضيع اخري هذا دار في حوار بيني وبين احد اعضاء المنبر
ولكني ااسف لتعليقك التهكمي هنا والذي يصب في باب الهتر والذي لم نتعوده منك ولكن في النهاية هي وجهة نظرك التي نحترمها ونتمني ان ننشغل بعبادته عن الانشغال بالامور الفاضية
ولك الشكر للمرور من هنا

اخى الحبيب اساسي لقد اعتدت على قرات ما تكتبه فى البورد وكنت اقول فى نفسي بان الرجل جدير با لاحترام لموضوعية ما تكتبه ولكن عندما دخلت لهذا الموضوع وبصريح العبارة ليس بمستوى كتاباتك
قلت يمكن الراجل كان مزاجو مـــأ رايق وفاضي كدا نزل ليناحبة خترفات .. ربما ان ترمى لبعيد !!!!! ولكن لا تحرمنا من كتاباتك الشيقه واذا لم استطيع فهم ما تقصد فالمعذرة واخدنى على قدر عقلى يا طيب
ولك خالص ودى

الاخ الزنجي لا عليك يا رجل
الحقيقة فكرة الموضوع في راسي كبيرة وقد اكون لم اوفق في اختيار طريقة اللغة التي كتبتها بها .. كنت اريدها لغة بسيطة موغلة في البساطة مما يعطيعها بعدا بانها بلسان محمد احمد الذي ينظر للفريقين ويقيم الوضع ويتحسس حجم المصيبة ويشير اليها وكان بامكاني ان اكتب هذا بلغة اعلي ولكني ايضا اردته ساخرا بعض الشئ لجو المنبر العام الكئيب الملي بالشحنات السالبة والنفوس المتعبة من العراك فحببت ان الفت النظر الي قضية اهم بلغة بسيطة وساخرة ولكنها حقيقية ولك الشكر مرة اخي اخي الزنجي

..
.
عين الفتاه تقد الواطه
عين الصبي تطعن الجدى
عين العجوز الفنك....

مالك حاسدنا!!؟؟
البلد بلدنا ونحن سيادا !!
والبلد الما فيها تمساح يقدل فيها الورل..
وبلدى يا حبوب يا ابو جلابية وتوب سروال ومركوب وجبة وصديرى
ومؤتمرات .. ونظريات .. وفنادق .. وغوغاء .. وكفاح كلمات.


بالمناسبة يا أساسي
ياخى دا ما الزنجي !!
الزنجى بتاعنا دا بكتب مواضيع وطنية
وخصوصا عن تدهور التعليم فى بلادنا وبسببكم انتم أيها الظلاميون
المندسون فى وسط الوطنييون الاحرار الشرفاء ..
أكيد فى زول سرق النيك نيم بتاعو ؟؟ زى موناليزا البريئة براءة
الذئب من استخدام الالفاظ النابئة ضد الذات الالهية ..

بس منو السرق الباص ورد دى ؟؟ يكون يا ربي ..!!




والله البورد دا حيرنا عديل
ما بتعرف زاتو شايلك اى ريح عاتية ..
بس اهلو صار وطنا فى زمن الاوطن .. يا ماهــّرى


تحياتى
مجرد فرفشة ساخرة

سربعة خارج اطار اي حاجة يا تبلدي
باص وردي ولا باص محمد الامين
ولا باص وردي وباص زهري

الخوف يجي دكين يقول راجعة ورا برضو ..
دكين دا يوم حيرجعنا في صناديق
والعفش داخل البص علي مسئولية الكمساري

الزنجي زول مهموم بقضايا وطنية مهمة والغريبة هو الوحيد الانا شايف انه البوست دا شايت في اتجاهو بس مشكلة اللغة عندنا حترجعنا ورا خالص ولكن بالرغم من انه تعليقه الاول كان محطة سلاخية خالص الا انه يحسب للرجل اهتمامه بقضايا اعمق وسعيه خلفها

تعرف يا الزنجي ردك دا زكرني بنكتة

Quote: اخى الحبيب اساسي لقد اعتدت على قرات ما تكتبه فى البورد وكنت اقول فى نفسي بان الرجل جدير با لاحترام لموضوعية ما تكتبه ولكن عندما دخلت لهذا الموضوع وبصريح العبارة ليس بمستوى كتاباتك قلت يمكن الراجل كان مزاجو مـــأ رايق وفاضي كدا نزل ليناحبة خترفات .. ربما ان ترمى لبعيد !!!!! ولكن لا تحرمنا من كتاباتك الشيقه واذا لم استطيع فهم ما تقصد فالمعذرة واخدنى على قدر عقلى يا طيب ولك خالص ودى

المسطول مربي جداد في قفص كل يوم يدخل يلم البيض ويفطر بيهو
اها يوم شال عكازو ودخل علي الجداد ولما فيهو ضرب وشبكهم ليك
كل يوم بيض بيض بيض جبنة مافي؟

..
.
اها اوريك السربعة الجد دا كوم ولقيت البورد واقف
فجاة جريت للمتواجدين اتخيل المفاجاة :

المتواجدون الان بالمنبر الحر 69 شخص » (2 )عضو و (67) زائرا

»sheba
»Tabaldina

بالله انا ما متسربع برااى ؟؟
يكون خطفوكم ؟؟

سلام

الاخ الكريم اساسى
لك تحايا بطعم الحلو مر
طبعا موضوع الجيل الجديد ده موضوع قائم بزاته فالكيزان شغالين
بقانون التبرعم يعنى اى كوز لازم اكون عامل كم كوز من الجيل الجديد
والمعارضه كل همها بس الرؤس التى على الكراسى فما يحدث للكيزان والمعارضه سيوكن مثل الدوله الامويه ومعارضيها كلما ذهب خليفه ياتى
اخر من نفس النظام اما المعارضه فستكون مثل النار التى بمجرد ان تنطفى تتحول الى رماد تاخذه الرياح
لك كل الود يا اساسى

اساسي الاساسي

اضحكني واحزنني ما كتبت ؛
وشر البلية ما يضحك؛
في قولك الكثير من الحقائق؛
ولا بد من الفرز ..

عادل

الترابي ...علي عثمان خائف علي مصيره..وسف يتنازل عن ابيي

الكيزان في موقف لا يحسدون عليه.

دينق.

يا أساسي يا خوي وقت الكيزان مرطبين ما تشوف لي طريقة معاهم
الكيزان ياهم الماسكين البلد و ناس المعارضة كل يوم في مؤتمر و إجتماع و زيارة
لي اليابان و الواق الواق و الكيزان كل يوم إسحبوا منهم راس يوم الهندي ويوم ولد ناس المهدي
دا غير المهمشين في المعارضة و شكلوا كـدا جون قرنق قريبا على شاشة سينما الكيزان و لسه المعارضة واقفة في مكانها و كل يوم إقولوا ليك المسألة مسألة وقت النظام خلاص على وشك الأنهيار. لكن بختاروا تعابير و كلمات رنانة جدا بس التعابير دي ما إتغيرت بقت زي الديناصورات اللي من أتولدنا بنسمع بيها الظاهر ناس المعارضة عندهم مشكلة في التجديد.

أسـاسي يا خوي لـسـه ما حددتوا مكان إجتماع الكيزان علشان الظاهر أخوك أخد لقب كـوز