Post: #1
Title: دكين -- دي كفك ولا حيطة
Author: اساسي
Date: 05-31-2004, 08:20 AM
Parent: #0
دكين ضحوي ,أو الزول الوهم
دى كفك ولا حيطة
تلمس الطين يختفي
يبقى النضم
باقي التراب
تبقى الحروف
معنى الخصام
الفرحة تسرج نعجتا
ونجيك على بغل الحروب
وعليك باقي القروش وليك الاجر
دى كفك ولا حيطة
ريدتك تقوم
وسط المقابر
عشر وقام ليو شوك
من إيدو هرب الحلم
فى عيونو قضا
ويضحك الطين ويتسطل
عارف براك
بسوى شى
ريدتك تبتق طق تنطفي
زى اهازيج اللبخ
كفك تدق
طهر الغنا
وتصرخ عويل
تزبل الدعوات منى
وتسكلب اللحظة وتخت
ونجعر بى حسك "نشيل"
السراير وفي الحوش نفرشا
ودى كفك ولا حيطة
تبكي الروح وتتكوي
اشتر كلامك يبقي عِينه
ضلام الحروف جضم الشمعة
ورقصة الحب الشترا وعويرا
بى نشوة الغضب تنتنى طق تنكسر
ترفس حداك وليك تنبرش
وريحة العرق
كل القصائد والمواويل القديمة
تمباك على خشمك يسيل
وكفك تدق
طهر الغنا
وتصرخ عويل
والفرحة زى نزلة برد
صرة وشوش
مضاريه فى بوكسي الحكومة
ودى كفك ولا حيطة
وبى الفينا
بى كل الديون القديمه
و كل صرفة بتسقى
عطش الجيوب وتقطع انينا
نهديك شوكة ريد سنينة
وساعة نجى
تفتح الخطوه وتشبح في المشى
نبقى دفعة ونعمل جريمة
نرفس مع الطين نتسطل
ونهديك شوكة ريد سنينة
|
Post: #2
Title: Re: دكين -- دي كفك ولا حيطة
Author: اساسي
Date: 05-31-2004, 08:39 AM
Parent: #1
المطر ,.جورج . شتات . الملكة .. واخرون
حبا في هذا البوست الاسطوري الذي اصبح موردا يوميا لابد لنا ان نرتاده ونرد ترف ابداعه ...ولما كان ان لم نحظي ولم يهبنا الله هذا الضرب من الابداع وامكانية مجاراته ...
احببنا ان نمازحكم بهذا البوست بما نستطيعه
ليس تشويها وانما حبا
في صديقي المطر
هذا الرجل انا اشهدكم اني احبه في الله
|
Post: #3
Title: Re: دكين -- دي كفك ولا حيطة
Author: اساسي
Date: 05-31-2004, 08:48 AM
Parent: #2
اساسي ....
كفك بشيل قدح المونة
يرسم هوامش السور بالمسطرينة
نسرح مع باقي الغنم
يدك ردم أرضا حفر.
+++++
قالت : ما اسمك؟
قال : الوهم
قالت : وين باقي القروش ؟
قال : دينيني.....
و....وانبرم شتات
- جرت وراه , واشتكت في الشرطة: عريضة ..
لك ما يصطليني من حزن البحلقة الحقد..
وإلى حين أستوي نبوتا بقفاكم...عليك أن تتلحس
|
Post: #4
Title: Re: دكين -- دي كفك ولا حيطة
Author: اساسي
Date: 05-31-2004, 09:17 AM
Parent: #3
اساسي ..
سحابك فتح.. مطرك قطع..
بيوت مليانة طوب..
وانت البناي و الطُلب..
لطشة الجير القديم ..
وللزول الدشن .. كل الحقد
والمعمول عصيد ..
نحبك تنتهي الاحلام ..
نقابلك في طرف الحلة..
نضاربك .. نفتح راسك الكبير..
ونجري بعيد ..
نخت المطوةفي ايدو ..
ونضابح خروف العيد
نهدي ليهو القلوب والكلاوي والكبد ..
ريد اماتنا لحمة الصيد ..
ونتلاشي في صحن الشية ايدين..
تصيب معداتنا بالقرحة..
ونغرق في جرل الشربوت
..
اساسي.. دكين
ليكم مفاتيح البيت وطبول الباب .. والعذر كل العذر اذا تدافرت اللكمات عن قاماتكم ..
اساسي/ الفات
|
Post: #9
Title: Re: دكين -- دي كفك ولا حيطة
Author: Ahmed Khalil
Date: 05-31-2004, 06:01 PM
Parent: #4
|
Post: #5
Title: Re: دكين -- دي كفك ولا حيطة
Author: THE RAIN
Date: 05-31-2004, 12:21 PM
Parent: #1
أساسى العزيز
التحايا وطيب المنى ليك
ياخى متنازلين ليك عن كل حقوق الملكية، وهسه أنا بجمع ليك فى تواقيع التنازل من ناس الحيشان
بس لكين، أنا دكين ده والله ما بتحمل فيهو أى شئ
كل شئ إلا دكين
دكين ده يا اساسى أنا مسميه عروة بن الورد
وإسم التانى كمان، روح الورد
عشان كده البرشه بى موية الورد، أنا حأرشه بى موية جدة
ودمت يا زول يا جميل
|
Post: #13
Title: Re: دكين -- دي كفك ولا حيطة
Author: اساسي
Date: 06-01-2004, 10:02 AM
Parent: #5
المطر الذاخر
تعرف، أنا قلت "أتسدّا" فيك
وبرضه قدرت قدرة
إعتبر دى "قوالة وسواطة" بس
وإنت برضه ما تنتظر
تعرف الكلام ده مالفوا ليك من راسي دا
وبقلد فيهو
صلاح الفات
ابوجلمبو
جيران ناس خالي
قدرة فول
الربرابي
يا سارية النمل
خالف الناس
وناس تانى كتار مديننك زى كده، من كل زول خطفت لى "فرع شدرة" وقلنا نرمي ليك الجمل بما حمل
والمعزة
|
Post: #17
Title: Re: دكين -- دي كفك ولا حيطة
Author: THE RAIN
Date: 06-01-2004, 01:32 PM
Parent: #13
يا اساس يا عجيب
تعرف لو قدرت تجيب لينا دكين بن الورد ده راجع، تكون عملت انجاز رهيب والله
شايف ناس الرياض ما قدرو عليه لسه
لكين والله يا اساسى لحدى هسه أنا بضحك براى، الود البجيب الشاى فى المكتب لقانى قبل شويه براى وبضحك، عاين لى كده ومشى، تلقاه قال السودانى ده جنا ولا شنو
اسمع بالله لو قدرت صغر لى الصورة بتاعة المطرة دى ولو خليتها نصف الحجم ده يكون كويس، طبعا اخوك صفر فى الحاجات التكنكل دى
|
Post: #6
Title: Re: دكين -- دي كفك ولا حيطة
Author: بدرالدين شنا
Date: 05-31-2004, 12:57 PM
Parent: #1
أساسي سلاااااااااااااام
دا حرفك ولا سحابة
إنت لو من زمان بتكفِّت الناس بي قصائدك دي ما كان في زول بتجاسر عليك ... يا مبدع
|
Post: #14
Title: Re: دكين -- دي كفك ولا حيطة
Author: اساسي
Date: 06-01-2004, 10:08 AM
Parent: #6
يا بدر
الزول الشين ده
قلنا نحاول نرجع ليهو شويه من الشهرة والانزواء الدايرنو ليههو
بس برضه والله الكلام ما عايز قدره فول
كفتة قرمة
وكلبة جروة
كون مزخرف في السقالة
ولما عينيك تحوصيها
بنتقدم بالاستقالة
ويا نشاف الكلمة عندك
يا شناتها ويا شنافا
الزول ده يا بدر لسه باقى ليهو عندنا بشكير
ولا شنو
|
Post: #7
Title: Re: دكين -- دي كفك ولا حيطة
Author: ودقاسم
Date: 05-31-2004, 02:35 PM
Parent: #1
ما قلت ليكم أساسي ده زول عظيم
وما بيشبهكم ،،
قلنا ليكم سيبوه يمشي
جبتوه راجع
لي وجعنا
أساسي ما تسيب دكين في حالو
طفشت شيري ونويت على دكين
مش كفاية الهو فيهو ؟
مالك ما كتبت عن كف صاحبك هوبفل ؟؟
|
Post: #15
Title: Re: دكين -- دي كفك ولا حيطة
Author: اساسي
Date: 06-01-2004, 10:32 AM
Parent: #7
ود الباسم
يا شلاقتك والصباح شوال بصل
ويا شناة كل العضاضير
النقزت فوق الخروف
حيرانة بالفرح الهرب
إحتفاءا بدكين بحر العدم,نقيم الآن مهرجان الندم
وكل النوارس دراويش لابسين شباطا والماعندو لابس باتا
ربنا يكفينا شرك ان شاء الله
|
Post: #8
Title: Re: دكين -- دي كفك ولا حيطة
Author: walid taha
Date: 05-31-2004, 05:03 PM
Parent: #1
اســـاسي..
|
Post: #10
Title: Re: دكين -- دي كفك ولا حيطة
Author: حبيب نورة
Date: 05-31-2004, 08:29 PM
Parent: #8
أساسي !! دة بوستك واللا جوطـــة؟؟
|
Post: #19
Title: Re: دكين -- دي كفك ولا حيطة
Author: اساسي
Date: 06-01-2004, 02:18 PM
Parent: #8
وليد طه الذيذ
كيف جيبك ..؟
الليلة كل الكلام زرة كديس,مخربش في الجضوم، ممسح بالجرسلين والزيت، للزول الشين , بتاع الكلام طويل الدوام ,دكين بحر الخصام
ومدد مدد، يا أهل الركشة الباقية
دي ليك يا مطر
http://www.bayanit.com/upload/protected/raain.jpg
|
Post: #21
Title: Re: دكين -- دي كفك ولا حيطة
Author: walid taha
Date: 06-01-2004, 03:15 PM
Parent: #19
اساسي اخو الاخوان.. وقت القواسي يحبكن
Quote جيبك كيف
طريتنى الليلة مأمون جيب الله جارنا..
امبارح المدير شال كشف الرواتب معاهو وما معروف سافر لياتو جهة
فى ناس شافوهو فى المطار و لوما اخاف الكضب شافوهو داخل صالة
السفريات الدولية كمان..
كان ظهرت رقشة ما تنسونا باللوجستية وكده
الله يرحمنى
اخوك
|
Post: #11
Title: Re: دكين -- دي كفك ولا حيطة
Author: nada ali
Date: 06-01-2004, 00:34 AM
Parent: #1
احد اطرف العناوين التى قرأتها فى البورد مؤخرا
|
Post: #12
Title: Re: دكين -- دي كفك ولا حيطة
Author: سارة منصور
Date: 06-01-2004, 07:40 AM
Parent: #1
اساسي الحبيب ازيك وكيف حالك ؟ والله جد مشتاقين
دخلت اسلم عليك واقول ليك والله العظيم اظرف وافهم شخصية قابلتني
هو دكين ، لكنه مع الآسف عالم قائم بذاته ومجهول الهوية لدي
كثيرين ، تعجبني جدا كتاباته وارتاح جدا لما بقرآ بوست كاتب فيه دكين
فله مني تحية حب واحترام وريدة ولشخصك المحترم ايضا ..
|
Post: #16
Title: Re: دكين -- دي كفك ولا حيطة
Author: HAMZA SULIMAN
Date: 06-01-2004, 01:24 PM
Parent: #12
اساسى يا حلو
حقيقى عنوان بوست رهيب
|
Post: #18
Title: Re: دكين -- دي كفك ولا حيطة
Author: Ali Alhalawi
Date: 06-01-2004, 02:16 PM
Parent: #16
أساسى يا شفيف
جاييك من جب الطملة ديك
أخمج و أكفكف فى سروايل الندم
أعضعض شلاليفى المكان
تريانة تدشر بالشحم
أقطف من الحيطة درابة حقد
و أفلقك
أساسى يا مارق من العلب
كل مرة أدخل بوستاتك تلقانى أتضارى من العنوان
عناوينك بالجد بتهرش .. لكن برضو بنقراك
عديلة زى حد السيف .. عناوينك .. و نحن ناس رهاف خايفين ننجرح
و برضـو بنخش
أول مرة أقرالك عنوان بشبهك
فطستا من الضحـك
بس أسمع نصيحة ود قاسم
و قرط على كـدا
عشان ما أجيك أفلقك
|
Post: #26
Title: Re: دكين -- دي كفك ولا حيطة
Author: اساسي
Date: 06-02-2004, 06:05 AM
Parent: #18
علي الحلاوي ..
سيد اللحمة .. سيد البيت ..
ضرا الحيشان .. جضما معـوَّد على الكفيت ..
نشتهيك نماذج الكبسة باللحمة..
نكورك ليك ..
قلبا كبيييير خواف .. يبرم من البعيد والجـار ..
يحاسب حافلة الركاب ..
ويتمدد في بيت ناس بخيت ..
يكتر كلامك..
يغمر بحر الزول الدشن ودغيل ..
يهيج .. يشيلو الموت ونرتاح..
يضـرَّع .. يصارع الفيل ..
يتذكر "عنزة" يطلع من جيوبو قروش..
يحلف وراك يا "عنزة" .. حد السوق ..
نفوت نحن .. تزوغي انتِ .. سفة وكيس..
تمباك يا "عنزة" .. شنبك وراهو لعاب..
دواري الشرطة.. ترجف عديل ..
ورحيق للولد دكين.. حبة ملح..
مشتت في دكاكين السوق..
ضفاف بالخضرة جدبانة..
حروف بالعافية عطشانة..
تحية ما فيها كيف الحال..
وللجميع ..
فول وتسالي ..
حمزة سليمان .. قرجة
معليش يا شباب لو "كفتها " لأني والله "مديون" .. خلوني افتش جيوبي .. وانتو حاسبو المرة دي
اساسي/ الفات
* مقتبس Re: جورج -- دى كفك ولا غيمه
|
Post: #20
Title: Re: دكين -- دي كفك ولا حيطة
Author: garjah
Date: 06-01-2004, 02:25 PM
Parent: #16
قلت لي صاحبي
وصف لي اساسي
قال لي ياخي زولا شين
ورجيت الايام اقابل الزول
يعني شنو لو شين ما كلنا شينين
******
وفي ليلة عجيبة قابلت الزول
لكن هو زول والا روري مقلوب
هو زول والا عمارة طابقين ماشة شوب شوب
قابلني بالاحضان
وقدر ما امد يديني عساهن يقابلن بعض
بيغادي ورا حيشان بطنو واوض ضهرو
جن يديني راجعات شاكيات طول المسافة والمنى
شكن الاحضان ولعنن شوقن
|
Post: #25
Title: Re: دكين -- دي كفك ولا حيطة
Author: اساسي
Date: 06-02-2004, 05:46 AM
Parent: #12
يا يا ندى علي
وحاتك جاري ... بس ... كايس أطول لي هذا الحطام...
عبورك جيزان نبله... والبداية:
شِدْ حبل البهيمة
وغني يا سيد اللبن
وعدَكْ بِكِرْ
ضُفرَكْ معَلَقْ في الجِلِدْ
جِلدَكْ معَسَّمْ في الضهر
قبلِيكْ على كل الجِهاتْ
ورجعت بيك زي ما قبلت بيك صفر اليدين
سارة منصور, المطر، وليد طه ,حبيب نورة , احمد خليل.... يا نصاب هذا البورد ويا انبهات صورته المعلقة في حيطة الديوان
كفا بكف : قلبا نبكي لو يمنحنا حبل البير وما يقطعه.
مليون نملة من جحر صنعاء الغريق: كتاحة تداعب نكشة الوقت
الزيف!!!
* كل الردود مقتبسة من البوست الاصلي هذا الرد مقتبس من هذه المداخلة
Re: جورج -- دى كفك ولا غيمه
|
Post: #22
Title: Re: دكين -- دي كفك ولا حيطة
Author: DKEEN
Date: 06-01-2004, 03:38 PM
Parent: #1
الهالك اساسي
أنا قد أرضى انك تشوه ما تبقى من صورتي ..
لكن انتا عارف قبل غيرك انو هناك اعتقاد بان وجودي في بوست ما يجعل المكان قذرا بدوي الملامح والناس فيه يتحسسون مواضع فارغ الالفاظ ..
تجي تخت ابوذر في مواطن الشبهات ياخي ؟
الآن ُيشكل هذا العنوان خصما على رائعة المطر لو تستمع إلى أحسن القول ..
ولكن ما أنت بسامعٍ ما أقول...
الأثر السلبي لغيبة ضميركم رد الله غربتها ــ واظنها تزوجت ـــ تظهر جليا فيما تقوله هذه الأيام..تخريفاتك كترت وشخصيتك في الفوضى تهيم ..
من ناحية اخرى ما انا بسعيد حين أخبرك بأنني قد شفعتُ لك عند من كتبت لي من اجله...
خبرته بفلسفة الانسان السعيد الذي يكون مضافا إلى المضاف اليه...
وأخبرته ايضا كيف إن الامور تتعقد حين يأتي الرجل منا بضهر الدرب الوراني..
وأنت ُتعقد الأمور حين تختار هذا الدرب ..
وشفاعتي عندهم اظنها ُرفضت او إن الارشفة الأخيرة حقت بكري ودرت ميسنجر الشفاعة وطشا في دروب غير مقصودة ولم تصل شفاعتي اليه..
عموما المسالة دائما ابسط من كده
إنسان( جاوا) الأول مثلاً كان يعتقد انو أفضل طريقة للصيد هي الركض وراء الحيوان ...
تطور الإنسان بعد ذلك فجاء في معتقده أن الركض وراء الحيوان ومن ثم قذفه بحجر مسنون هو الأفضل ..
واستمر متطوراً فاكتشف أن الفِخاخ أجدى للإنسان الاول ...وتعلم الصبر من الفِخاخِ فكان الانسانُ ايامئذٍ جميلاً صبورأً..
إنسان نهاية التاريخ بتاع ( فوكو ياما) بقى .. عِرف وآمن بالبارود حين علم أن البارود يأتيك بما لم تستطعه الأوائل ..
اها دكين أخوك تطور أكثر من ذلك .... ففي مرحلة ما بعد الإنسان ستعلم كيف أنه لا الركضُ، لا البارودُ ُيجديان ..
وإن الجلوس في مغارة والتحديق في بيداء نفسٍ خاوية من ِذكر الله يأتيك بالغزلان عند عتبات الكهوف ...
مع مودتي يا بدائي
ابو ذر سيد الورود ..
يشرفني أن يجعلني هذا الأول مستعارا في إبداعك الإنساني ..
وشتان ما بين كهفي وكف جورج ..
والمعذرة أن تشابهت على صديقنا الكهوف..
قصدي الكفوف..
والسلام عليك سيد الازاهير ..
وبالناس المحبة وإليها السلام ..
|
Post: #23
Title: Re: دكين -- دي كفك ولا حيطة
Author: Outcast
Date: 06-01-2004, 09:05 PM
Parent: #22
جمييييل DKEEN...
"أنا من الناس الناويين المقاطعة... لكن ما قدرت أسكت على كلامك دة لغاية اا يونيو" ..
|
Post: #24
Title: Re: دكين -- دي كفك ولا حيطة
Author: المسافر
Date: 06-01-2004, 10:54 PM
Parent: #23
Quote: اها دكين أخوك تطور أكثر من ذلك .... ففي مرحلة ما بعد الإنسان ستعلم كيف أنه لا الركضُ، لا البارودُ ُيجديان ..
وإن الجلوس في مغارة والتحديق في بيداء نفسٍ خاوية من ِذكر الله يأتيك بالغزلان عند عتبات الكهوف ...
" .. |
اجيرونا يا صغيرونة ناركم بقت مجنونة
تسري من العروق الفي الغريق مكنونة
حتى المطامير لا نجت لا الشونة
أذكر يا دكين الخاوية ما مضمونة
مغارت الكهوف ولادة الغزال وسكونة
من غير الذكر كان خفنا لا تلومونا
|
Post: #27
Title: Re: دكين -- دي كفك ولا حيطة
Author: nada ali
Date: 06-02-2004, 09:48 AM
Parent: #1
يا ناس المنبر عوووع
انا متخارجة من حوش اساسى
انا ما فت بس (مصدومة) و (مصدوعة) و (مخلوعة) من البوست الاذاه فاح
اساسى،
يا نعيق بوم البسيط
كل الاذان تجنبتك
يالوعتك
يا ضياعهم فى الزمن الصاح
يا البنبان البق فينا
الخ
الخ
و
Down
يا جار!
مع الاعتذار لملكة سبأ (فى الوصلة ادناه) و اعتذارى الشديد للجميع لاستخدام كلمة (عوع) لعدم وجود كلمة بديلة تناسب (القافية)، و شكرا للمطر، و جورج و كل المتداخلين/ات فى البوست الرائع (جورج-دى كفك ولا غيمة)
Re: جورج -- دى كفك ولا غيمه
Re: جورج -- دى كفك ولا غيمه
|
Post: #28
Title: Re: دكين -- دي كفك ولا حيطة
Author: DKEEN
Date: 06-02-2004, 11:17 AM
Parent: #1
اوت كوست
مقاطعة شنو ؟؟
انتو صحي موضوع المقاطعة ده شنو؟؟
الوان البورد الجديدة ماعجبتكم ولا كيف؟؟
اساسي
تصدق يا اساسي انو الغزال المعني كتب لي بي كل ذوق واعتذر قائلا :
انو بتشرف بي اضافتك بس لكنو اعتزل الميسنجر ليهو زمن ..
واضاف قائلا انو احيانا بخش لكن ما طوالي..
وانا ما عارف شنو الخلاهو يعتقد أنو انتا في الماطوالي دي بتكون ما متصل ؟؟
ـــــــــــــــــــــــــــــــــ
ولو تدري ان افضلهن بالغٌ ما بلغ بهن الجمال يشغلنك عن فضل الله لك في عافيتك فيسوء بعدها حالك وتكون عند الله من الظالمين ما ركضت خلف غزال
وتاني مرة ما تحسد اخوك في ما لايملك ...
مع مودتي
الخدمة للاخوان رجالة
DKEEN international service for friends and girl friends
|
Post: #29
Title: Re: دكين -- دي كفك ولا حيطة
Author: Ali Alhalawi
Date: 06-02-2004, 01:52 PM
Parent: #28
أســاســى
ليك السلام كتاحة كابة من السماء
نجيك غالبنا المشى
نترّع البقـنية
نرقص و ننتشى
نجلط الجالوص
حيطة لى ود دكين
من الصباح للعشى
كمين ضراع
نلقى نفسنا
ما سوينا شى
نسينا الساس "الأساسى"
نحنف وشوشنا و نختشى
|
Post: #30
Title: Re: دكين -- دي كفك ولا حيطة
Author: اساسي
Date: 06-02-2004, 03:15 PM
Parent: #28
دكين ضحوي, الزول اللبد في كهف
ولانك لا تزال في حركاتك القديمة , افكر جادي في قطع اخر وسيلة اتصال بك , عبر تلك التي هي ليست لها طاقة بحركاتك القديمة هذه
انت لا تصلح لحياة المغارات والكهوف بعيدا عن زواتي الدلال مترقبا..
قد حدثتنا فيما حدثتنا يوما عن استهلاكك وانت بقربهن مترقبا متحفزا
استهلاكك الذي طال وانت قاب قوسين او ادني
الان ما تبقى لك بعد ان استهلكت لا يصلح معه ان تنفقه علي ترقب خلف غار ..
اقر بانك كنت تشكل خطرا حقيقيا ضمن اخطار حاقت بهذا المنبر وكادت ان ترديه وترمي به الي التهلكة لولا لطف الله عليه واخرون اكرمنا بهم الله كنا نسرح ونمرح في هذا البيت خلف هبة الله اليهم من الرحمة والاجر والثواب دروا عنا اخطارا مهيبة حاقت وكادت ان تردي بالجميع...لولا لطف الله ... وبعض بركات لضمير غائب تقديره رجع وراء خالص واظنه يجري الان ...
مثلك لا يعود الي الغار ابدا الا بعد ان يكل وينقطع امله بانه ليس في الجوار ما يثير حفيظة صياد جوال وليس مرتكز في غار...
من ناحية اخري ما كنت سعيدا مثلك ابدا بسماع اخبارك هذه ... لم اظن يوما انك ممن يفعلون هذا اصالة عن انفسهم ونيابة عن ...اخرون لديهم ضمائر غائبة ...واخري هائمة علي وجهها...
انت تعودت ان تطرق البيوت من ابوابها الخلفية لذا ... تري اخرين بعين ما تفعل ...لذا تحدث عنا وتخبر ....عن صعوبة طرق الابواب الخلفية ..
وانا اخبرك كنت اعلم اني ... كمن يقيف وسط البلد ويهتف ...دكين هذه بعض الآمي مثل الآلم المسيح ...واظن الامر كمن يخبر سرا وهو يحمل مكبر صوت ...
مالي وللبوح ...بل مالي واليك ...ولكن اتدري اظنها مراتب الترقي
ويوما ما اظنك ستبلغ اسفل سافلين ..وانت تسعي الي مرحلة ما قبل الانسان ... وانت ترزح طالع اعالي الفوق تحت...
اتدري فلسفة انسان (جاوا) وحق (فوكوياما ) (وماقبل الانسان) واظنه قردا عند داروين اعجبتني حقا ولكنها كانت ترمي في شراكهم دوما مما ترزخ الارض من عقاربها وحياتها وافاعيها ... وبعض احيان حمائمها
الغزلان عمرها ما قربت كهفا او غارا ...
انها في الوادي تهيم ...
مالها وللجحور ..؟
الان انا اضمن لك ان جلوسك في كهفك وتحديقك في بيداء نجد ...سيجلب لك لسع افاعي وقرص عقارب ان لم ينسج عنكبوتا خيوطه وانت تحدق ...باسطا زراعيك بالوصيد
ــــــــــــــــــــــــــــــــــ
الم اقل لك ان الغزلان في كل واد تهيم ...ولان الماسنجر لدي في العمل نوع من الترف الذي لا اقصده الا مضطرا غير باغ ولا عاد ..
ولاني لم احسب انك من الذين يتبرعون اصالة ... فانا اشكر لك قيامك بتلك الخدمة المتوهمة ... وطرق ابوابا لم نقصدك فيها او حتي نشير
سوي ان كمال شانتير له بعض احيان خدمات هي اصالة منه ونيابه عنه
وللبيوت ابواب امامية صنعت ليطرقها امثالي ...
حين حسدتك فيما لا تملك ... كنت اشكر لله ما املك وكنت اظنه تسبيحا بحمده ... وشكره علي بديع صنعه
ولكنها افضال الضال التي يقدمها ... فيشكر عليها او لا يشكر.. وتظل خدمة اصيلة في طبعه ... وان لم يبديها يوما
ــــــــــــ
اظن ان رائعة المطر اتت اؤكلها وهذا ما طرحته ... حبا من اخرين
وتيمننا بها نسمي عليها مولودتنا
ــــــــــــــــ
التيجان ليست هي التي تجعلنا ديوكا.. بل جيوبنا التواقة للنقد
او كما قال شتات
|
Post: #31
Title: Re: دكين -- دي كفك ولا حيطة
Author: Tabaldina
Date: 06-02-2004, 03:34 PM
Parent: #1
..
.
اساسى دا برق ولا موية؟؟
شايف برطعتك محدودة ..
تحياتى
|
Post: #32
Title: Re: دكين -- دي كفك ولا حيطة
Author: جورج بنيوتي
Date: 06-02-2004, 04:16 PM
Parent: #31
أساسي :
وسجم البعد!!!!
هذه الحلويات مدخلا مباغتاللأصل فينا...
وليس ثمة حراريات ولا سكريات ..
غشيتو حوشك كم مره..
أمتعتني .. والحق يقال.
وكان دكين معك..
لكمامعزة هذا الفرح ..
|
Post: #33
Title: Re: دكين -- دي كفك ولا حيطة
Author: HOPEFUL
Date: 06-02-2004, 09:06 PM
Parent: #32
اساسي
كنا نمر بحيطان اسواق السودان الشعبيه
ونقرأ "ممنوع البول هنا يا حمار"
مكتوبه بالبويه والفحم وبعض الأحايين ببول من سبقك للمكان
ولا نمتثل لامر الكاتب بل نحزف كلمة "ممنوع" من أصل الجمله لنستبيح ما حرمه الكاتب
واراك اليوم يا اساسي قد حذفت "ممنوع" كفه
واستغللت "زنقته"
واستبحته
عليه الرحمه
دا بوستك ولا زيطه؟
|
Post: #34
Title: Re: دكين -- دي كفك ولا حيطة
Author: اساسي
Date: 06-03-2004, 10:20 AM
Parent: #33
مزاجي رايق الليلة ما بخربو بي بوست دكين ناسف لعدم توافر مود الكتابة اليوم ونواصل بعد كم فاصل
ــــــــــــــ
اساسي مزاجه غريب شوية
|
Post: #37
Title: Re: دكين -- دي كفك ولا حيطة
Author: اساسي
Date: 06-07-2004, 05:44 PM
Parent: #32
تبلدينا .. جورج
فارسين ..
فرسين ..
والخيم معقود بنواصي الخور..
رسنين .. كلمة وسوط..
والخطوة شبيح بالليل..
في الساعة خمسة وعشرين ..
دعاشكم راح.. سخن ليالي الصيف ..
لامس قدود الخيمة..
داعب جضوم الضيف..
وانتو جنكم كلام .. كلمة وفاء للزول الشين..
همبريـبو سموم..
يتهادى في زقاقات الحلة..
ويتقسم .. يمين يرمي اشارة ..
وشمال يفحط عديل..
يدوَّر على الولد الوهم..
حادي السخلة.. فارس السخيل..
يتلاقوا فوق للسماء .. "دكين" معاهو "سخيل" ..
نجزع نحن ننادي العشا يااا..
أماني عليك يا الصحراء.. قطعة حشاك وولدك الموهوم..
تدعي عليهم..
تجدعي في نعليهم..
يصحو وينومو جعانين ..
اساسي/ الفات
Re: جورج -- دى كفك ولا غيمه
|
Post: #35
Title: Re: دكين -- دي كفك ولا حيطة
Author: falcon
Date: 06-03-2004, 11:39 AM
Parent: #1
اساسي يا رايق
حتي الروقان عندك غير
لك التحية
|
Post: #36
Title: Re: دكين -- دي كفك ولا حيطة
Author: Ali Alhalawi
Date: 06-03-2004, 12:27 PM
Parent: #35
أساسى يا رايـق
روقة المحريب و الشب
ليها تتشابا
أديها ترطيبة و تعال
قِـدْ الغلابا
عليّها مداميك ود دكين
خليها غابة
تسـتر العين الزايغة
تهتك شرف
تحمى طابوق القريرة
من جور السحابة
|
Post: #38
Title: Re: دكين -- دي كفك ولا حيطة
Author: تولوس
Date: 06-07-2004, 05:58 PM
Parent: #36
اساسي
ترمي وتنم... ما تقاسي
تجدع بعيد ..
فوق المعاني
تواسي
|
Post: #40
Title: Re: دكين -- دي كفك ولا حيطة
Author: اساسي
Date: 06-07-2004, 06:13 PM
Parent: #38
تولوز اللزيز
حروفك جيت اكحلها عميتها
أحداق البط
بى بهتة اللون الفضل
اللحظة تدفر فينا
ماليها حق
ليلك يكون
طعم البصل
بياضه محلوب من كفتيرة
وسواده زى لون الفطيرة
والزفة شلال من نبق
إسمك معانى الفتة
يرسم وشيش الملاح
والحب الهرب
تطلع قروش الشيك
تدفع حساباتنا القديمة
وليلك يكون
باقي الشغل
خم و صر
زغرودة للكرش الكبيره
جرتق خنق
عريس ووزيره
Re: جورج -- دى كفك ولا غيمه
|
Post: #39
Title: Re: دكين -- دي كفك ولا حيطة
Author: اساسي
Date: 06-07-2004, 06:04 PM
Parent: #36
الراجعين
فالكون
الحلاوي
هوبلس
ما كل هذة الرجعة!!
شتتي شتتي
لعل الله يفتحها عليناهذا المساء
لعلني اتنشل في الباص
تلك الحافلات الرائعة
مرارا لحقناها
كانها تبعث بدخانها لي..
كانه يتزاكم الان في انفي
شتتي شتتي
هلا انت مملحة مثلي؟؟
شتتي مثلما يشتت النشال
على جيوبنا كي يكتسي بالشرتيت
اريد المسيد
اريد ان اعيد من بعيد
خطونا السريع في البرندات
وشكل ست التسالي تلك
تاتيني الان تحاسبني
شتتي
شتتي
Re: جورج -- دى كفك ولا غيمه
مع الاعتذار يابت يا نيل علي خرمجة الكلمات
|
Post: #41
Title: Re: دكين -- دي كفك ولا حيطة
Author: اساسي
Date: 06-28-2004, 12:35 PM
Parent: #39
كيف لم تنتبه رقشاتي لكل هذا الطريق؟
تعافيتم هنا كقطيع من الامجاد السريع يؤسس لانزلاقه في هذا الظلط.
شكراً لهكذا هروب
و يبدو ان سأتسلل خلسة و وانزوي كلما تحاومت في شوارع بانت هذه .
فقط اسمحوا لي ان اجلس في اللساتك المدفونة اصفّق علي طريقتي التي احب و استمتع .
و
وين مشي دكين دا ياخي
سائلين منك
Re: جورج -- دى كفك ولا غيمه
|
Post: #42
Title: Re: دكين -- دي كفك ولا حيطة
Author: tabaldy
Date: 06-30-2004, 06:20 AM
Parent: #1
Quote:
خبرته بفلسفة الانسان السعيد الذي يكون مضافا إلى المضاف اليه...
وأخبرته ايضا كيف إن الامور تتعقد حين يأتي الرجل منا بضهر الدرب الوراني..
|
وين في واو قلت لي ؟
تأتون الدروب من ضهرها ومن بطون أمهاتهن وكأن سيول المطر لم تغشى تلك الدروب وتغرقكم بفيوض الشوق بعد ما تكسر كل حواجز قوم هجروا الماسنجر لإكمال نصف الدين ولم تكملوا لا نصفه ولا حتى الدين الآخر .
لذا سترفض يا شفيعهم كل شفاعاتك ولن يكون لك بد سوى سكنى الكهوف , تاملاً في تطورات تكيّف جاوا وسوزوكي وغيرهم مع حرفة الصيد الغزلانية تلك , وكأنك لم تضل الدرب في تلك الدروب السراب التي تشبعك دفء من ضوء شاشة أل جي 17 بوصة كما أذكر حين عرضت بضع بضاعتك بما تنوء من سِحرٍ وسَحَر .
Quote: ما كنت سعيدا مثلك ابدا بسماع اخبارك هذه ... لم اظن يوما انك ممن يفعلون هذا اصالة عن انفسهم ونيابة عن ...اخرون لديهم ضمائر غائبة ...واخري هائمة علي وجهها...
|
Quote:
وانا اخبرك كنت اعلم اني ... كمن يقيف وسط البلد ويهتف ...دكين هذه بعض الآمي مثل الآلم المسيح ...واظن الامر كمن يخبر سرا وهو يحمل مكبر صوت ... |
Quote: اتدري فلسفة انسان (جاوا) وحق (فوكوياما ) (وماقبل الانسان) واظنه قردا عند داروين اعجبتني حقا ولكنها كانت ترمي في شراكهم دوما مما ترزخ الارض من عقاربها وحياتها وافاعيها ... وبعض احيان حمائمها
الغزلان عمرها ما قربت كهفا او غارا ...
انها في الوادي تهيم ...
مالها وللجحور ..؟ |
ناديهو أساسي من حفلة وداع تبلدينا وخليهو يقراك تاني , وأكيد حيجي , ولو علي عجل حديد زي ما أخبرتني ذات مرة .
بس تاني سرّك أبلعو في بطنك ولو ما كانت غميسة أربطو سوار في معصمك كإحاطة هذا الدكين بها .
هو وين ؟ مشتاقين ليهو
أبنوسي
|
Post: #43
Title: Re: دكين -- دي كفك ولا حيطة
Author: garjah
Date: 09-23-2004, 01:34 PM
Parent: #42
من امتع ما كتب اساسي ودكين
|
Post: #44
Title: Re: دكين -- دي كفك ولا حيطة
Author: توما
Date: 09-23-2004, 06:09 PM
Parent: #1
هسا هم مشو جد جد يعني؟
واصبحو نسيا منسيا
اساسي ودكين معقوله بس
ولمن تركتم هذه الحيط والكفوف البترصع دي
والهموم والمشاكل البتبرطع
انتو الزول كان كتب سااي بالقدر البخصو ويريحو ويمتعو والاخرين
وجدع الباقي في بلاعه ناس عم قاسم باقي غريقه لانو وقعت فيها علويه شمارات قبل كده
اها وقام الزول بقا قاعد وقت بقدر ويمشي لما يزهج ويجي تاني لما يجيهو مزاج
ويطنش لما الحاجات ما تعجبو ويترفع تماما عن كل ذي كلام بجيب وجع الرئه
ويمشي و يجي كده يمشي ويجي زي المغتربين المقرشين ديل
ما اخير من يمشي تاني ما يجي زي الاغتراب السجن ده
ويكون لا جا ولا شاف الناس ولا الناس شافوهو ولا عنب الشام
ولا عسل السودان ذاتو
غايتو
غابن تناسير الشفلعه وتنكر المرح التناب
|
Post: #45
Title: Re: دكين -- دي كفك ولا حيطة
Author: اساسي
Date: 12-12-2004, 01:03 AM
Parent: #44
يا توما انا جيت
منظر دكين يطل علينا
بالجد الزول الوهم دا فرق معانا شديد
من يومه ما فيهو بركة وراسه زي الحجر
يا دكين وحاتك ليك وحشة بس ما قدر كدا
لكن الحركة ما عندك
طلعت عندك زمة مع اني كنت براهن علي انه من يومك ما عندك كلمة
ولا مبدا ...انت تعال لقيت مبادئي مفروشة وين اخدت منها....؟
|
Post: #46
Title: Re: دكين -- دي كفك ولا حيطة
Author: ايهاب
Date: 12-12-2004, 01:17 AM
Parent: #45
اساسي عودا حميدا
اناشد معك العزيز دكين بالعوده
و زي ما قلتا الشوق ليهو كميات
لدكين نكهه خاصه جدالا تشبهها ايا من النكهات
و كلامو ما بيشبهو كلام
براهو كدا دكين دا
حتى شتراتو براها
الذ مافي ديكين انو احيانا بيقول كلام لا يفهمه كل من يقراه البوست
يجب ان تقراه بعين دكين لتفهمه
كل التحايا
|
Post: #47
Title: Re: دكين -- دي كفك ولا حيطة
Author: اساسي
Date: 12-12-2004, 01:24 AM
الحبيب ايهاب
الشوق بحر
الظاهر عليهو دا يوم شكر دكين هاهاهاهاها
يا دكين الحق قبل ما تواري الثري وطل علينا
يا دكين وريني منو البعرفك غيري وبسال عليك
والله قام يتعزز البرسيم عشان بالغنا في مويته
ايهاب انت الحصل شنو الناس دي مالها بقت جافية كدا
|
Post: #48
Title: Re: دكين -- دي كفك ولا حيطة
Author: Sidig Rahama Elnour
Date: 12-12-2004, 03:01 AM
Parent: #47
دكين الزول الوعدنا في العيد وما جاء ، مع أنو كان في جدة
بالله بأن وعليك الأمان
اساسي أرجو مراسلتي على [email protected]
أو الإتصال على هاتفي 0508871945
مع خالص الود
|
Post: #49
Title: Re: دكين -- دي كفك ولا حيطة
Author: برهان تاج الدين
Date: 12-12-2004, 07:47 AM
Parent: #1
دكين كان شاف الدفعة دى و ما جا
ياهو تانى الما جايى ..
|
|