غيروا قيادات الحريه والتغيير بقلم محمد الحسن محمد عثمان

09:32 PM July, 09 2019

سودانيز اون لاين
محمد الحسن محمد عثمان-الخرطوم
مكتبتى
رابط مختصر

اعتقد انه آن الاوان لتغيير قيادات الحريه والتغيير وسنة الحياه والديمقراطيه تقتضى التغيير فطبيعى ان ينهك المسير البعض خاصه فى صراع ضد مجموعه بلا اخلاق ولا قيم وتستخدم كل الوسائل للوصول لهدفها ومنها إنهاك الطرف الاخر بالمماطلة حتى يفتر وينهك وتضعف قوة المقاومه عنده ويبدأ التراجع والتخلى رويدا رويدا عن اهدافه ويقبل بالقليل وقد افلح هذا التكتيك فالثوره لم تنجز أهدافها وتوقفت عند اسقاط المجموعه القياديه فى النظام من السلطه فقط وليس اسقاط النظام نفسه ولم نصل حتى لمرحلة المحاكمات !!!!!

واعتقد ان المرحله التى نعيشها هى مرحلة (اللولوه )من المجلس العسكرى مثلا الاتفاقيه التى تمت بين المجلس العسكرى وقوى الحريه والتغيير فى مرحلة الصياغه واظن اختاروا قانونى من طرف المجلس وقانونى من التغيير واستهلكت الصياغه فقط مايقرب من اسبوع ؟ ! هذه الاتفاقيه ممكن فى ظرف يوم واحد تنجز دا مصير بلد واقف بلا حتى حكومه منتظر الاتفاقيه لماذا لم يتم اختيار قانونيين بعدد مواد الاتفاقيه (هل هناك قلة فى القانونيين) كل ٤ قانونيين (اثنين من التغيير واثنين من المجلس ) اديهم ماده واحده ينجزوها فى ظرف يوم تكون كل المواد جاهزه فى نفس اليوم ؟ نحن نكاد نكمل الاسبوع ومازلنا نسمع اليوم حتتم الصياغه ويتم التأجيل للغد ثم بعد الغد دى مش اللولوه ذاته ؟ وهم مسيطرين على كل شيء وأيام الصياغه دى واحدين يهربوا فى أموالهم قالوا قوش باع أملاكه واتخارج و عبد الرحمن الخضر فى طريقه لتركيا والإعلام اعلامهم شغال لهدم الروح المعنويه للثوار قبل يومين محاضره للصافى جعفر بتاع سندس يمكن ساعه ومن حضورها الزبير احمد حسن امين الحركه الاسلاميه والكاميرا مركزه عليه فى استفزاز شديد ومباشر لكل الشهداء تخيلوا والدة شهيد تشاهد فى تلفزيون الثوره التى ضحى ابنها من اجلها وتشاهد فى القتله اللصوص ديل وبتكلموا عن الله والرسول قال .... ... الاعلام كله بصحفه وتلفزيونه وإذاعته كله مازال فى جيب الانقاذ وكان الثوره لم تقم !

بعدين البرهان الايام دى رتبوا ليه مقابلات رسمت لإحباط الشعب السودانى وهى ليست عبثا سمعته قال القرارات بتعيين رئيس الوزراء او الوزراء تعرض بدايه وقبل التعيين لاجازتها من المجلس السيادى سمعته باذنى وكما يجب ان يجاز المرشح لاى منصب قيادى من ناحيه أمنيه يعنى حمدوك المرشح دا اذا قيل لقوى التغيير لم يجاز من ناحيه أمنيه قوى التغيير حتقول شنو ؟ ومن حق المجلس العسكرى الا يكشف عن الاسباب الامنيه !!! ومع احترامى لحمدوك الشعب السودانى بكل نضالاته ونضال مثقفيه الذين دخل بعضهم السجون لم يجدوا من اصحاب هذه المواقف النضالية المحترمه والتضحيات لمدة ٣٠ سنه وخريجين بيوت الاشباح من يتبوأ منصب رئيس وزراء حكومة الثوره فاختاروا رجل كل مواقفه ان البشير اختاره كوزير ماليه واعتذر ولم يسال احد نفسه لماذا اختاره البشير ؟ هذا تبخيس لأدوار من ناضلوا ودخلوا بيوت الاشباح من بروفيسورات ودكاتره وعلماء وكيف تاتمنوا على الثوره من كان كل دوره خلال الثوره انه رفض منصب وزير ماليه عندما عرض عليه !اليس هذا عيبا فى حق هذه الثوره ان تسلم لمن لم يدفع مهرها الغالى وان تزوجوها له زواج ( كوره )

بعدين الامن الى الان فى يد ناس الانقاذ الشغل دا كله شغل ملولو نحن حندور فى حلقه مفرغه كل الفتره الانتقاليه وماحنقدر نحاكم انقاذى واحد ولما ينتهى عصر اللولوه الجماعه يكونوا فى كندا واستراليا ومصر وامريكا وقد طمست كل البينات ضدهم والان هرب منهم اثنين لكندا حسن دكين (اخو اللواء دكين الذى يهاجم الثوره فى القنوات )وصالح ديسه قياديين فى المؤتمر الوطنى قدموا للجوء فى كندا واحمد بلال فى طريقه لبريطانيا سبقوا وغدا نسمع بحسين خوجلى قدم للجوء فى السويد !!!

ياخوانا نحن اسبوع فى صياغه يعنى التغيير فى جهاز الامن والقضائيه والإعلام حياخد كم ؟ وتغيير القوانيين وصياغته حتاخد كم ؟ اما المحاكمات دى خليها ساكت وخاصه سماع شهود وتقديم المرافعات مع الوضع فى الاعتبار ان الامنجيه فى السلطه القضائيه قاعدين قضاة مازالوا ضباط فى الامن ويقبضوا من الجهاز ومن القضائيه وبتاعين الدفاع الشعبى الحاكموا اولادنا المتظاهرين مازالوا يرتدون روب العداله ويمسكون بالميزان الذين طففوا به وفيهم قاضى حاكم احد الطلاب بخمسه سنه سجن لانه هتف حريه سلام وعداله والثوره خيار الشعب تخيلوا دا لسه قاضى لم يسأله احد مجرد سؤال لماذا فعل ذلك ومازال يحاكم كمان !! وقد تكون القضيه المتهم فيها البشير بتقويض الدستور من نصيبه !!! وبرضه القاضى الذى حاكم الاستاذ بتاع القضارف المعوق جعفر خضر بالسجن ٦ شهور لانه هتف وهو قاعد فى كرسى الإعاقة حريه سلام وعداله تصوروا القاضى دا مازال يجلس فى منصة العداله وليس هناك مايمنع من انه يحاكم قياداته فى المؤتمر الوطنى زى على عثمان واحمد هرون وديل نحن لحدى الآن محتارين مالقينا اى ماده نحاكمهم تحتها !! وهم متحفظ عليهم فقط ياخوانا على عثمان بتاع shoot to kill واحمد هرون بتاع اكسح امسح ماتجيبو حى ( عشان مايكلف الدوله أكله وشرابه ) ماقادرين نوجه ليهم اى اتهام خليك من نحاكمهم ياخوانا دى مش مهازل ؟ واكثر من مهازل ذاته يعنى هم حاكموا جعفر خضر ب٦ شهور سجن لانه قال حريه سلام وعداله وهو مقعد فى كرسى يعنى حتى ماهتف وهو واقف !! وعلى عثمان واحمد هرون خليك من محاكمه مجرد توجيه اتهام ماقادرين نوجهه ليهم والله حرام عليكم ياناس الحريه والتغيير دماء اولادنا ديل تروح ساكت بالله مش عيب مانقدر نقتص لهؤلاء الشباب الذين فقدناهم شاب مثل عباس فرح (ود ابو عشر ) الذى بعد ماضربوا رصاص ودمه سائل وهو ماشى لحدى ماوصل رفاقه فى الترس وقال ليهم ياخوانا ترسوا بى ووقع ميتا !! مش حرام ياقوى التغيير انه قاتل عباس حتى الان لم يقبض عليه !!

بعدين بكل اسى اوردت الصحف السودانيه انه بدا صرف حقوق مابعد الخدمه لرؤساء اللجان فى المجلس الوطنى ورئيسه ابراهيم احمد عمر وطبعا حيحصلوا على المليارات من اموال الشعب السودانى بعد ان نهبوا مانهبوا !! تخيلوا الثوره تكافىء اللص والقاتل قبل ان تكافىء الشهيد !!! لم نعطى امال مصطفى ام الشهيد على التاج ٢٢ سنه طالب الطب بالرازى مليما واحداً تعويضا فى ابنها الذى تم ضربه وتعذيبه حتى مات ولم نرسل ام شهيد واحد حتى للعمره ولم نعالج حتى مصابين المظاهرات وبعضهم فى مصر حرد حتى العلاج للمرمطه التى تعرض لها



محمد الحسن محمد عثمان

omdurman13@ msn.com