شعر/ علي تولي

00:59 AM February, 28 2019

سودانيز اون لاين
علي تولي-USA
مكتبتى
رابط مختصر

شعر- علي تولي- أريزونا 28 فبراير 2019

يا واقعَ المَطَب عُقُبَ الحَلَلْ كيفْنُّو
ودَّار الذِّمَمْ شَايلَ الدِّمُوم فِي شَنُّو
شِعَار الثورة في كُلَّ الوَطَن رَافعِنُّوا
كُل يوم الشَّبَاب بِوْرِيك عَمَايْلُو وُفَنُّو
****** ****************
شِنْ مَعنى الطَّوَارِي الشَّعبِ قَال سِلميَّة
غيرْ إنَّك عميل وإنَّك خَسِيسَ النيَّة
دَيَّاشِي الطَّرحَة مِتْبَلِّم تَقُول هُوْ بْنَيَّة
إنْ شِلْنَا السِّلاح تَبْ ما قَعَدْتْ زِنْدِنيَّة
**********************
كتايبك يا بشير في بُرِّى فزَّت فرَّتْ
والدنيا الوسِيعة الفيها بيك انذَرَّتْ
أسُود الحَارَّة وَاقِفينا وجوهن صرَّتْ
بُوَرُّوا التاتشرَ الجَاييها لعبَةْ حَرَّتْ
***** *****
حِقدَك يا الفِوِير خَلَّاكَ مَخَنُوقْ عَبْرَة
رَايح عَقْلَكَ السَّجْمَان عَدِيمَ الدِّبْرَة
كَتَايْباً ليكَ صِبْحَتْ في البَلَد مِنْحَقْرَةْ
وُينْ بِتطير جَزَمْ اصْبَحتَ ليهُمْ عِبْرَةْ
*********************
يا المُو نَافِعَ القُتْ لينا ألْحَس كُوعَكْ
يا قَاصِدَنا مَا فَلَتَ اللِّسَانْ عنْ طُوعَك
فِي حسَابَ الجَرَائِم ارتَفَع مَجْمُوعَكْ
مَقطُوع طَارِي اللهَ لا أعَاد مِن نوعَك
*********************
للرَّافِع رِوِيْسُو بْهُوقِي زَيَّ الضَّبْ
يْتحَنْتَفْ يِقُول نَقْطَعْ رُقَابَ الشَّعبْ
وُينَ العُمْلَة يَا الوَرّيتْنَا رَبْ رَبْ رَبْ
جَاتَكْ تَارَّة َأعرِفْ لِلمَساكِين رَبْ
*****************