الضباب !! بقلم صلاح الدين عووضة

03:50 PM December, 29 2018

سودانيز اون لاين
صلاح الدين عووضة-الخرطوم-السودان
مكتبتى
رابط مختصر

*أول من رأى الظاهرة حاجة سعيدة..

*استيقظت فجرأ لتجهيز الشاي...فابنها مسافر إلى الخرطوم..

*وأثناء حلبها المعزة تنتبه لشيء غريب في السماء..

*لم تكن هي سماء كل يوم...بل بدت وكأنها تغطت بثوب (زراق)..

*وينكشح منها اللبن على الأرض...من شدة الخوف..

*ثم يتبعها في رصد الظاهرة عبد المجيد...صاحب الدكان..

*ويحكي لزبائنه بهلع كيف إنه رأى لحظة زحف (الدخان) على سماء البلدة..

*وبعد أن (فجَّت الدنيا) تأكد من أنه ليس سحاباً...كما توهم بدءاً..

*ولم يبع في يومه ذلك شيئاً.....ولم يكترث..

*ثم كان ثالث المنتبهين سليم العريبي...ريس المركب..

*قال إنه حين هبط المشرع لم يميز- أول الأمر - بين (البحر) والسماء..

*وعزا ذلكم الخلط - في البداية - إلى تأثير (دكِّاي) الليل..

*فعاد إلى (كرِّقته) لرشف مزيد من القهوة...ثم عاود الهبوط تلقاء النهر..

*ولكنه فوجئ بأن السماء ما زالت في لون النيل..

*ولون النيل هو لون مياهه العكرة.....في أوان (التساب)..

*وتوالت بعد ذلك - عند شروق الشمس - قصص مشاهدة الضباب..

*وتوالت - أيضاً - قصص الظواهر الغريبة...وحكاياتها..

*وأشهرها جفاف الزرع ...والضرع ........والدمع..

*فحتى الدموع بخلت بها المآقي حين احتاجها البعض...خوفاً وطمعاً..

*وهُرع الناس إلى المسجد علهم يجدون تفسيراً....وطمأنينة..

*حتى ستات العرقي - والبهجة - نونة...وحنونة...وزيتونة ؛ هُرعن إلى هناك..

*ويضوع منهن ما بقي من آثار الليل....مثل (دكَّاي) سليم العريبي..

*وكان أكثر الناس هلعاً...وخوفاً...ورعباً...كبير البلدة..

*ولكن شيخ فتحي - إمام الجامع - كان هو نفسه ينتظر تفسيراً...وطمأنةً..

*ولما حان وقت صلاة الظهر لم يؤذن حاج صالح كعادته..

*كان الجميع مشغولين بالنظر إلى تغيُّرات بدأت تطرأ على الضباب..

*فقد طفق يتشكل بعضه...في بعضه...من بعضه ؛ رويداً رويداً..

*وأقسم نفر إنه كان يتشكل على هيئة وجوه أناس من البلدة يعرفونهم جيداً..

*وجميعهم تحت الثرى ؛ ظلماً...وغدراً...وغيلة..

*ولكن الأستاذ (بتاع) الكتب - كما كان يُسمَّى - نفى هذا الزعم ..

*وأرجع - مجاهد - الأمر إلى محض توهم من منطلق التمني..

*وهو نفسه كان أسير تلكم الأماني التي ظلت حبيسة الصدور سنين عددا..

*أمنيات مصوبة - كما السهام - نحو الظالم...وأتباعه..

*بيد أن السماء لا تمطر تغييراً يقول مجاهد...وما نيل المطالب بالتمني..

*واستغلها سانحةً لدفع الناس نحو تغيير يأتي من الأرض..

*فانصرفوا عنه أكثر من ذي قبل....يؤثرون - كعادتهم - السلامة..

*وعند بزوغ شمس اليوم التالي اختفى الضباب..

*واختفت بهائم...وعيوش...وتمور...وبضائع....وبقايا ابتسامات..

*واختفى ما كان في نفوس الناس...بين عشية وضحاها..

*وشهدت البلدة ضباباً على الأرض !!.




assayha

الله الله عليك يا أنيس منصور السودان..شوف الضباب والكتابة الرمزية العميقة دي؟ ولد ده

عناوين مقترحة للمرات الجاية كان حيينا
سڤن اب
الرماد
الخلية
الضوضاء
مازا
،

اهو نساعد

براحة عليهو الوهم دا بيصدق خاصة هو بيموت في المصريين ياخي اقسم بالله اجبن مخلوق شوفتو في حياتي عووضة واكتر منافق اشوفو مشى كويس بعد الرمزية المبالغ فيها نتيجة الخوف رجع وقف قصاد الانقاذ وبخس الثورة عووضة انت والطيب مصطفى نفس الكفةر

يا جماعة الخير ما تستعجلوا ساكت
كدي اول بالتبادي النشكر الأستاذ/ صلاح عووضة على العنوان، "الضباب" وده طبعا مسلسل مصري شهير يمكن معظمكم ما حضروه لأنكم صغار نسبيا، وانا وعووو...وضه ده يظهر علينا كبرنا شديد لدرجة انو بنشوف وسخ نضاراتنا وامخاخنا زي الضباب من وجهة نظرنا..
بعدين نجي نشوف عووو..وضه ده عاوز يقول شنو؟
1-

Quote: *لم تكن هي سماء كل يوم...بل بدت وكأنها تغطت بثوب (زراق)..

هنا عوو..وضه عاوز يقول لينا انو سماء السودان الحالية متوشحة بالدم، كيف؟
توب الزراق ده يخوانا كان الرسمي والشعبي للتعبير عن (الحد) او الحداد بلقة ابان حلاقيم غليدي ودقون حلفا، يعني اخا العرب عاوز يوقل

Quote: حاجة سعيدة..

اتشاءمت، وخلو بالكم لي الحاجة سعيده دي.. لأنو لمن نجي لأختيار الأسم زاتو من قبل "المؤلب" الفوق ده، بنلقاه عاوز يقول لينا انو اسمها ده قبل الضباب كان بينطبق على واقعها، اي كانت سعيده بالحال قبل ايه؟ قبل الضباب. وعلى فكرة عوو..وضه ده غويط خلاص الأسماء الجايبها دي كلها ملاينة معاني مقصوده..

Quote: ثم يتبعها في رصد الظاهرة عبد المجيد...صاحب الدكان.. *ويحكي لزبائنه بهلع كيف إنه رأى لحظة زحف (الدخان) على سماء البلدة..

عب المقيد ده هو الطيب مصطفي بذات نفسو، كدي شوفوا الطيب مصطفى كورك في ناسو الايام الفاتت دي قدر كيف، وقارنوها بعبارات عب المقيد الفوق دي.

Quote: ثم كان ثالث المنتبهين سليم العريبي...ريس المركب.. *قال إنه حين هبط المشرع لم يميز- أول الأمر - بين (البحر) والسماء..

ده بقى الريس بذات نفسو( وَيُحَذِّرُكُمُ اللَّهُ نَفْسَهُ ۗ وَاللَّهُ رَءُوفٌ بِالْعِبَادِ (30) فمن وجهة "المؤلب" انو القائد البطل "سليم" مية مية، انتو شوفوا مصيركم حيكون كيف؟
والله يا عوو..ضه حيرتنا بي سؤالك ده، الا كدي النسعلك، انت شايف مصيرك برضو "ضباب" "ضباب" ولا سما زرقا صافية..خليك صريح.
نشكرك سيدي ان نقلت لنا وجهة نظر (سعاد الفاتح) و (الطيب مصطفى) و (الريس سليم)..
كمان كمل جميلك وانقل وجهة نظر سكان الحلة للريس بتاع المركب سليم، وقول ليهو يا ريس البنطون وقفوه، والراكب شرقن، الحكايي بقت كباري وجسور، ومياه كتيرة جرت تحت الجسور، وبقت سيل عرمرم، والسيل قيل عنو انو (بكنس الزبالة) مش ورد في الأثر: (بَلْ أَنْتُمْ يَوْمَئِذٍ كَثِيرٌ وَلَكِنَّكُمْ غُثَاءٌ كَغُثَاءِ السَّيْلِ وَلَيَنْزَعَنَّ اللَّهُ مِنْ صُدُورِ عَدُوِّكُمُ الْمَهَابَةَ مِنْكُمْ وَلَيَقْذِفَنَّ اللَّهُ فِي قُلُوبِكُمُ الْوَهْنَ، فَقَالَ قَائِلٌ: يَا رَسُولَ اللَّهِ وَمَا الْوَهْنُ؟ قَالَ: حُبُّ الدُّنْيَا وَكَرَاهِيَةُ الْمَوْتِ» [سنن أبي داود/ 4297، مسند أحمد/ 21890، مسند أبي داود الطيالسي/ 1085]
ولا كمان نزيدك من الشعر بيتين:
مكر مفر مقبل مدبر معا**** كجلمود صخر حطه السيل من عل
دي افعال السيل يا عوو..وضه، زي ما شايف، كان بعر بتطفح، وكان حجر بيجيبك من فوق لأسفل سافلين،،
كدي عليك الله يا عوو..ضه وف امرؤ القيس ده ما كان نبي عديل كدي؟
ياخ، مكر مفر، ومقبل مدبر معا، دي كأنو بشوف حال المظاهرات اليوم(كر وفر)
اقرأ كتيييير يا عوو..ضه عشان تكتب صاح
ابو كرتونة

يا ابو كرتونة . موفق في تحليلك للضباب بس الريس العريبي هو قاصد بيهو (بكري*) اب سيجارة
ولو ما قال الدكاي كان كشفو طبعاًً عوووضة وبكري * جيران في الحلة بالرغم من ذلك أهو بيخاف
ويكتب بالرمزية يعني ما بيثق فيهو

Quote: ولو ما قال الدكاي كان كشفو طبعاًً عوووضة وبكري

يا ود الشريف
كيف انك؟

لالا اخونا عوو..وضه ده النسخة السودانية من "انيس منصور" الريس سليم وقعدة الدكاي دي براها رمزية زيها وزي "كاليلة ودمنة" طبعا الريس بكون ريس القعدة، وكليلة ودمنة واحد عوو..وضه والتاني "بقري" بعدين منو القاليك الريس ما قاعد يشرب الدكاي، كدي عليك الله الرقيص بتاع الريس ده القوة والنطيط ديل جايبهم منين؟
كان ما عارف اعرف، دي بقولو عليها الطاقة النظيفة، ايثانول ساكت "فتريتةو بلح" عاوز انضف من كده ايه؟
بعدين "بقري" الناس عارفاه ما زول دكاي ده "الفيل" البقولو عليهو (راكب فيل) اها القعدة دي الناس اختلفوا في عددها ناس قالوا اثنين وثالثهم "كلبهم" ، وناس قالوا ثلاثه ورابعهم"كلبهم"
ولا نقول الا بقول رب العالمين " رَّبِّي أَعْلَمُ بِعِدَّتِهِم مَّا يَعْلَمُهُمْ إِلَّا قَلِيلٌ ۗ".
ابو كرتونة

الصحفي الرخيص..
الصحفي الذي يباع ويشترى..
تلفون العملة ..
بئس الرجال أنت يا صلاح عووضة.....
قبحك الله .. وقبح ما جئت به أيها الرخيص..