بين معتمد باسندة وتوم كروز بقلم د.أمل الكردفاني

06:16 PM December, 09 2018

سودانيز اون لاين
أمل الكردفاني-القاهرة-مصر
مكتبتى
رابط مختصر

جاء بباج نيوز الآتي:
(
القلابات: باج نيوز
توفي والي القضارف، ميرغني صالح صباح اليوم (الأحد) إثر إنفجار طائرة كانت تقله ووزير الزراعة الولائي، ومدير مكتبه ومدير الاستخبارات العسكرية ومدير الشرطة وعدد آخر من أعضاء حكومته، في زيارة لهم إلى منطقة القلابات المتاخمة للحدود السودانية الإثيوبية.
ولم تصدر حكومة القضارف بعد بيان بالحادثة إلا أن شهود عيان نقلوا لـ(باج نيوز) أن الطائرة تعرضت لانفجار أثناء هبوطها وهي طائرة مروحية، كانت تقل 11 راكباً.
وقالت مصادر إن معتمد باسندة اللواء ود الشواك وبمعية اثنين آخرين تمكنوا من القفز من الطائرة قبل هبوطها وانفجارها).

هناك افلام تنفق عليها هوليوود ملايين الدولارات فقط ليتمكن المخرج من تصوير مشهد كمشهد معتمد باسندا والخفاشين الآخرين.
المهمة المستحيلة Mission Impossible ، الفيلم ذو الاجزاء المتعددة والذي نال شهرة واسعة جراء تصويره الدقيق ومشاهده البارعة ، في أحد المشاهد يهرب المجرم عبر طائرته الخاصة ليفاجأ بأن توم كروز قد تعلق بأحد عجلاتها ثم دخل عبر فوهة مخرج المرحاض (كيف لا أدري) المهم أن صراعا عنيفا بين البطل توم كروز والشرير دار داخل الطائرة ، تبادل الرجلان اللكمات والرصاص والتهويشات إلا أن رصاصة اخترقت جدار الطائرة وهكذا (انشفط الهواء من الداخل) وبدأت تترنح... توم كروز وهو رجل خارق يسدد لكمات قوية جدا بآخر قوة يملكها ، ثم يلقي قنبلة في شكل قلب ينبض ثم يقفز مع حبيبته الشقراء ، من ارتفاع مائة متر تقريبا (المهم إن المباني في الأرض كانت صغيرة احسبها انت بقا).. تتشبث الحبيبة الشقراء بتوم كروز الذي أثناء هبوطه يرتدي نظارته السوداء (حقت المارينز) ثم يطقطق بابهامه وسبابته فتنفجر القنبلة القلبية...
لكن المخرج الشهير (جون وو) قطع اللقطة في هذه اللحظة ، اعتقد أنه بعد هذا المشهد الدراماتيكي قد صاح: (stop) ، ثم جلس على كرسيه المعلق برافعة اتوماتيكية صغيرة وأخذ يدخن ساهما يفكر في حل لهذه المعضلة...
توم كروز شعر بالكرب الذي يعاني منه جون وو فحاول التخفيف عنه وسأله:
- مالك يا زول الحاصل عليك شنو (طبعا بالانجليزي).
اجابه وو بضجر:
- والله يا حبيبنا المشهد دة طلع جميل الا وقعتكم من السماء دي بتدورلها علاج مقنع...
الممثلة الشقراء (حبيبة توم) تتدخل قائلة بامتعاض:
- المهم الحل ما يأثر على الميكاب.. بالله ابعدونا من حكاية يقعوا في بحر دي..
جون وو:
- الوقعة في البحر بقت مستهلكة يا بتي.. عايزين طلس جديد يكون كاااارب...
توم كروز شنق سفة ورفع رأسه وقال:
- الا نسأل بلة الغايب البعمل العجايب...
اندهش وو وسأله:
- بلة الغايب دة منو كمان..؟؟!!
واضاف غاضبا:
- دة مخرج احسن مني ولا قصدك شنو يا توم كمان..جابت ليها إساءات.
ارتبك توم وقال منكرا التهمة:
- لا لا والله يا حبيب... بلة دة لا مخرج لا حاجة.. بلا دة زول بتاع جن وشياطين وبعرف الغيب..مكشوف عنو الحجاب يعني..
- يا زول... لمنا في الزول دة..
- جدا...
يخرج توم الهاتف المحمول نوكيا تلاتين عشرة (الزمن داك طبعا) ويجري اتصالا بالشيخ الفكي بلة الغايب:
يأتيه صوت بلة:
- جاني الخبر انك حتتصل علي ومعاك كبيركم عايزين استشارة...
توم:
- والله يا شيخنا عمنا جون وو دة عندو استشارة وداير يسألك سؤال.
-أديني ليهو الكافر ود الكب دة...
يتناول جون وو الهاتف بلهفة ويصيح:
- الحقني يا شيخ بلة... فاضل لي مشهد واحد وواقف لي زي شوكة الحوت...
يأتيه صوت بلة واثقا وصارما:
- ابشر تب...
يعض بلسانه واسنانه على كلمة (تب)... جوابك عندي وحلك في ايدي...انا عارف سؤالك إلا بدور اسمعه من خشمك ويسمع القرين والجن القاعد جنبي دة..
- باختصار يا شيخنا.. توم نط من الطيارة ومعاهو حبيبتو..
-نط من وين قلت لي؟
- من الطيارة.. من الطيارة..
-الطيارة طايرة ولا واقفة في الأرض..
-طايرة طايرة..
- ولابسلو برشوت ولا ما لابسلو برشوت...
- ما لابسلو برشوت والله..
-لا حول الله..وتحتيهو بحر ولا ما تحتيهو بحر..
-ما تحتيهو بحر والله..
- ود ام زقدة.. وبتدورو ينزل الارض سليم؟
- اي يا شيخ بلة... كدي اسأل الجن المعاك دة يدينا حل..
يصمت شيخ بلة لبرهة ، يعدل من نظارته السوداء ويتلفت يمنة ويسرة ، ثم يقول بصوت خفيض:
- شوف آلأخو...
- أها..
-هلا هلا على الجد والجد شنو؟
- هلا هلا عليهو..
-عفارم عليك.. يلا انت طلبك دة ما عندي...
-أها عند منو يا شيخ بلة ..نورنا ياخ؟
-طلبك دة عند الجماعة اولاد ابليس... ديل محترفين مشاهد زي دي من ايام اراب تونج والزبير وجون قرنق وغيرو... ديل بيزبطولك مشهد خطير..
يصيح جون وو بفرح:
-يعني حيقنع المشاهدين..
يأتي صوت شيخ بلة خافتا:
- هو ما بقنع زول الا بقنعم هم .. انت خليك زيهم..ما تهتم بي زول وارمي كروز بتاعك دة محل ما تدور...الشغال بالاقناع منو يا عمنا... حسي شفتلك حاجة في عالمنا دة مقنعة..
-كلامك عين العقل والله...
- اي يا خي.. هو الناس زاااتو كان اقتنعوا ببخسو شغلك... كان ما كجرتو وبخرتو ودنكلتو وسويتلو قعايد وارياح الناس ما بتشتغلبو الشغلة.. أها الاخو... نوصلك باولاد ابليس ولا عندك فهم تاني؟
- وصلني بيهم طوالي..
- المهم طلع ليهم حقهم برا .. الناس دي ما عندها حاجة مجاني..
-أفوووو ... ابشر ..
-أها سلام..
-يديك العافية آشيخنا...
المهم عمنا توم استطاع الوصول الى الارض الصلبة مع حبيبته بدون كسور ولا خدوش وانتهت المهمة المستحيلة بقبلة طويلة بين الحبيبين...