الكتاحة... نص في عامية اهل السودان بقلم الحاج خليفة جودة

03:43 PM September, 12 2018

سودانيز اون لاين
الحاج خليفة جودة -
مكتبتى
رابط مختصر

*كتاحة*
الصيف
وكتين يكتح
تراب الحلة علي العينين
ما كان غلطان
والسيف
شن فايدتو
متعلق فوق الحيطة المايلة
متشبث غمدو كتيف الضل
مشدود بي مسمار الخوف
صورة
واصل الصورة فراغ
صوت طيفا زاير
والدنيا مطر
الضيف الجاكم
حافي وعريان
مرهق وعطشان
غرقان في الدين
الشرد اهلو
ملعون إبليس
في وادي الغفلة
اتلبس نخلة
اوقد دخان الفرقة النار
الدم السال
ما كان خاتينا
اتلبد فينا
فروع الشدر الماتت واقفة
شاهدة عليكم
الناس السايمة ضمير الشارع
زيف ووعود
الناس النايمة
متوسدة ضهر الفقرا وسايد
الناس اللامة
في الدنيا الفانية وخامة
والناس الحايمة
شبعانة حليب أطفالنا وقود
ناسين الموت
ناكرين الحكمة
اول صوت للمطرة سحاب
اول ضو في الفكرة سراب
اول خيط في الثورة رهاب
والكتاحة
التكتح فينا
يوم ما تدور عجلاتها عليكم
هاتكشف عمق الخوف الفيكم
وتنسف وجه الزيف العشعش في ماضيكم
ها توريكم
الخطوة الاولي في تكنيك
لحس الكوع
والدرس التاني
قبر الزول الاكلو الجوع
الحصة التالتة كيف تتحول من مخلوع
لي مخلوع
والكتاحة
يا الكترابة!
يا دابها ها تبدأ!
الحاج خليفة جودة - امدرمان - ابو سعد