ما بنلومك بقلم الفاضل إحيمر

09:44 PM May, 30 2018

سودانيز اون لاين
الفاضل إحيمر-أوتاوا- كندا
مكتبتى
رابط مختصر

- أوتاوا

ما بنلومك
لو لي كومنا صغَّرت
وكبَّرت كومك.
ما بنلومك
لو لوعتنا وجوعتنا
انطفقت جضومنا
واتنفخت كضومك.
ما بنلومك
لو عريتنا وبالعار كسينا
وضرعاتك والوراكين
فتقت هدومك.
ما بنلومك
لو لزمتنا آخر حدودنا
رغم إنك مانا عارفين
إنت اصلاً إيه لزومك.
ما بنلومك
أو جدادك أو بلومك
لو عمَّرت دارك
وخرابه بيك صبَّحت ديارنا
مسكونه بي
غربانك وبومك.
ما بنلومك لو في كل محفل
إتمايلت واتراهزت
ونفضت فينا
نحسك وشومك.
ما بنلومك لو اتفرعنت
ودايرنا نبقى
تحت قدميك قومك
تكتل رجالنا وتسجن نساءنا
وما من موسى فينا
زي ما سمتنا سوء العذاب
في يوم يسومك.
ما بنلومك
لو للمال كنزت
وهريتنا بي مجحف رسومك
لو سهدتنا وسهرتنا
وإنت تنعم بالوداد
سادر في غيك
وغرقان في نومك.
ما بنلومك
لو بي عوه فاضيه قصدت تستر
خسرانك وخيبتك
وبنفخه فارغه ظنيت بتحجب
عن الناس خمومك
لو تخمتك ماشه زايده
ويا "حامي الحمى"
ماشه كاشه
كل يوم تخومك.
ما بنلومك لو بقيت
مصدر همنا وكل غمنا
وما بقينا
حتى في آخر همومك
***************
بنلومنا نحنا
الأخدنا على القرف
القبلنا بالسفالة وبالرذالة
وبكلِّ اشكال السخف
الصبرنا على الذل والمهانه
على ضيق المعايش والشظف
حياتنا صارت شحده
سرقه، رشوه أو بالسلف.
بنلومنا إحنا
الفينا انعدم الضمير
ومات كل إحساس بالشرف
حتى دينا، طلعته دينه
عملته لي ذاتك مطيه
"صرفته بركاوي"
وختيته رف.
بنلومنا نحنا
فينا يرتع بؤسنا
وإنت ترتع في الترف،
شفطت ثرواتنا ونفطنا
وكل الدهب
سفيته سف
مليت بيوتنا بالدِما والدمار
ومليت قصورك بالدُمي والنجف.
بنلومنا احنا البيك رضينا
رغم أنك بهدلتنا ومرمضتنا
تغدينا لطمه
وتعشينا كف
دقستنا وتيستنا وختيت في راسنا
كل من ضلَّ، ذل أو انحرف
وشردت كل من ترفع عن الدنيه
وبي نفساً عزيزه
اتسامى وعف.
بنلومنا نحنا
بينا يوم تلف شمال
ويوم يمين تقوم تدور
لا رؤية ولا دراية
ولا هدف
تطبق فينا شرعك المشبوه
مزاجك المعتوه
وكل ما ليك عنَّ وهف
مرات دجل، مرات هبل، مرات خبل
مرات جهل ومرات خرف
كسرتنا بي بعضنا
زي قوارير من خذف
لا أنَّبك في يوم ضمير
ولا قلبك المسدود عطف.
بنلومنا نحنا
قبال تجينا، كنا زينه
كنا تاج وكنا شامه
أهل عزه وكرامه
من غير تكبر أو صلف
ملطشه للناس صيرتنا
ومضحكه للعالمين
وكل هايف بينا استخف
ومن "خير أمةٍ أخرجت للناس"
"أخرجتنا للنار"
وفيها فتحت لي شعبك ملف.
بنلومنا إحنا
تشتمنا يوم
تهددنا يوم
ودايرنا ديمه وراك صف
زي البهائم
ويا ريت في مره
من مزارعك
جبت للأنعام علف.
بنلومنا نحنا
لا بنفكر لا بنخطط
وكل شيء عندنا
يا "زول" صدف
عندنا التاريخ جمد
والزمان "دت" وقف
عزه عِقرت
وضرعها المدرار
إتيبس و جف
اما سودانا الفحل الولود
صبح عقيم عِدم الخلف.
بنلومنا نحنا
صرنا في آخر الورا
نظرنا كله لي ورا
الناس حولنا بقى حاله حال
ريشه قام
وجناحه رف
كل أمورهم عال في عال
وحالنا بيك
صابه التلف
كلامنا كله كان وكان
مردوفه بي آخٍ وأُف.
بنلومنا نحنا
حياتنا صارت
حسره وأسف
كفاحنا صار طق حنك
ونضالنا صار
ضرِب كف بكف
والعجب؟؟؟
من أجل الخلاص...
رغم الدروس
من كلِّ التروس
اخترنا خلف
ومن أجل الخلاص
مع الاعتذار والاحترام
راجين أناتك
وحارسين تحف
وقافلين على معجزه
تصحينا يوم
تقول يا ناس
يا ناس خلاس
البلا انجلى
غار وانصرف.
وما بنلومك