نهاية نظام في رمية بقلم عائشة حسين شريف

10:47 PM February, 15 2018

سودانيز اون لاين
عائشة حسين شريف-
مكتبتى
رابط مختصر

يا النظام تعال النقولك
شيل الشيلة
من شعب معلم
شعب غاضب
تاريخو نضال وكفاح
ضاق الويل
وركب السيل
وناس بتعشق تراب الوطن الغالي
بتتمنى لغيمة تظلو
تهب تشيلو من قاع الضياع
وتطفي نار النظام الحراقة
موجة غضب عارم
دخلت كل البيوت
في الحضر والقرى والمدن
وناس بتعاني
تجيب القوت
وناس مظلومة
في زنازينك
ناس زى الطيور مهاجرة
بس عشان دايرين يغيروا الحال المايل
لأحسن حال
وفي الحقوق عندهم سؤال
صلاح قوشك ما بيحلك
ولا بيحرس ليك قرقوشك
لا عذاب لا سلاسل ولا بيوت الأشباح
ما بنساوم
تمشي من غضب الله وين
قاهر الناس سنين وسنين
مقتولين
ميتمين
مسجونين
مظلومين
يا مشردين
مقهورين منك يا نظام
وانت عارف مصير السلطان الجائر
نظام تآكل من جوة وبقى يتلفت وحائر
ما بتسمع لحكم الرشاد
منبوذ سياسياً
وفاشل اقتصادياً
وملاحق دولياً
فالح بس في تغيير الكراسي
وإعادة النصخات القديمة
القصة ما بس مقاعد
كترة عندكم المفاسد
ودولة عادمنها المليم
هى حكاية مبادئ وترميم
وين الصحة والتعليم
بس تحمي روحك يا لئيم
الناس زهجت وراجية الخلاص
مستنياك بس تودع
أرحل يا بشير وغادر
مستنينك بس تودع
أرحل يا بشير وغادر
خلينا نبني بلدنا من الدمار
خلينا نبني بلدنا
ونبدا نحلم من جديد


عائشة حسين شريف
الخميس 15 فبراير 2018