عرفناك يا رعديد .. بعد ما تتأكد ان ناس الامن واقفين وراك وقدامك تتعنتر علينا وتقول انك البطل, وتتحدي وتقول الراجل يطلع الشارع. بالله بس قول لينا اين كنت في الاسبوع الاخير من شهر يونيو 1989؟ هل تزكر؟؟ كيف كانت اعصابك في تلك الايام؟ الجماعة اللي حارسنك يحكوا عنك الكتير وبخوفك ورجفانك ورفضك للاكل والنرفزه والجرسه وخافوا عليك من الانهيار العصبي. علامات الشجاعة ما كانت ظاهرة عليك وقتها. قال اطلعوا كمان! اتحداك تورينا وين اختفيت اثناء فوران ثورة سبتمبر 2014. خليت الحاجتين براهن في كوبر وشردت يا بطل ..مش؟ هل تنكر؟ طيب يا بطلنا المهاب .. ناس لاهاي قالو ليك تعال.. وليهم سنين راجنك, فليه ما تمشي وتقول انا برئ؟ ابو قردة مشي وتطلع براءة. يعني ارجل منك؟. خايف من السجن؟ انت قلت كتلت بس 50,000 شخص في دارفور. بس امشي واقنع لينا المحكمة بانو قتلك للآلاف ديل تم نتيجة لمؤامرة صهيونية امبرالية.! الجماعة الحولك قالوا بترجف كلما سمعت كلمة اي سي سي. ICC وين كنت لما اسرائيل تضرب عربات في مطار بورتسودان وبالقرب من مواقع الدفاع الجوي والقاعدة العسكرية؟ وتعبد وتغرق مراكب السماكة قرب بورستودان؟ وين كنت لما كسرت الصورايخ مصنع الادوية حته حته ببحري ومش بعيد من مسكنك؟. بدون شك بللت اللباس وشكرت ربك علي سلامتك. مش؟! ولما زنقوك في اجواء السعودية وانت تحاول العبور بدون اذن زي الحرامي وقالو ترجع ارسلت تعليماتك للطيار بتغيير المسار والرجوع من حيث تسللت. ليه ما واجهت السعودية؟ وليه رضيت بالاهانة يا جبان.. يا متسلل .. قال بطل كمان! في جنوب افريقيا ادسيت ولا ما ادسيت؟ الناس قالت كنت بترجف وبتول وراقد تحت مقاعد الطيارة وتتوسل انو الطيارة لازم تقوم في الحال. حتي الاجراءات البسيطة لاقلاع الطيارة ما قدرت تنتظرا. انت علي مدار الاربعة والعشرين ساعة حقت اليوم ما تقدر تتحرك والا تكون محاط بعشرات من عربات الامن. قال ما يخاف ويتحدي. لو راجل انزل الشارع لوحدك, بس براك ولو مرة في العمر, لنتبادل نظرة مني ونظرة منك. رئيس وزراء سابق في السويد اعتاد ركوب البسكليت في مشاوريه ويختلط مع شعبو في الاماكن العامة. اوباما رئيس اكبردولة رأسمالية ينزل من عربيتو امام ماكدونالد ليتناول الهوت دوق ويتكلم مع الناس. ميركيل رئيسة بتاعت المانيا و تيريزا ماي رئيسة بريطانيا العظمي يخشو السيوبر ماركت للتسوق ويقيفو في الصف زي الزباين واحد. النسوان ديل بيخشو السوق مع الناس, فليه خايف انت؟ جبان؟ قول الحقيقة. انت تقدر تجي السوق؟ انت قايل نفسك احسن من القامات ديل .. اوباما وميركل وتريزا وبالم بتاع السويد.. بس الفرق انو ديل ما عندهم حقد ضد الشعب. ما بيسرقو وما بيقتلو وما بيفسدو زيك. ولو في مظاهرات يقابلوها بصدر رحب. علشان كدا ما بخافو الشعب زيك. الاسد الرعديد قال يقابلوه في الشارع. طيب نحن في سبتمبر 2014 مرقنا الشارع في مظاهرات سلمية.. وقلنا ما دايرنك. .ولم نحمل سلاح غير الاصرار علي اسقاطك. فمازا فعلت بنا؟ ارسلت الميات من العربات العسكرية المجنزرة والمدرعات وعساكر بالخوذات وماسكين الاسلحة التقيلة – الكلاش وما شابه - وبس تقول ديل خاشين حرب عالمية جديدة - .. قمت وامرتهم بالضرب في المليان .. وقتلوا مننا المئات. والتاريخ دون هذه الفعلة الشنيعة. انت عايز تعيد نفس السناريو؟ لا .. دي تلقاها عند الغافل! المرة دي عصيانا داخل البيوت. فهل تأمر بضربنا داخل البيوت؟ نحن شميناك وعرفناك .. ومرقنا ..مرقنا .. وخلينا البلد .. ولو انت فعلا اسد فتعال لينا برة.