Post: #1
Title: آخر النكات القوية (رمضان احلى في السودان)!! بقلم فيصل الدابي/المحامي
Author: فيصل الدابي المحامي
Date: 06-16-2016, 04:06 PM
03:06 PM June, 16 2016 سودانيز اون لاين فيصل الدابي المحامي-الدوحة-قطر مكتبتى رابط مختصر أرسل لنا المحامي المشاغب توتو نكتة ظريفة فقمنا بإدخالها في ورشة ود الدابي لسمكرة النكات فطلعت بالشكل الآتي: جنوبي قبل الإنفصال سأل شرطي شمالي في الخرطوم في نهار رمضان : يا اكوي وين مطعم بتاع جنوبيين الما صايمين رمضان بتاع شماليين دا؟؟! الشرطي اشر بي ايدو لي مطعم في نص السوق العربي بالخرطوم مدلية من بابو ستارة لزوم السترة وكده وقال للجنوبي: ياهو داك المطعم بتاع الجنوبيين الما صايمين رمضان بتاع الشماليين! الجنوبي دخل المطعم واتخلع خلعة شديدة لمن لقى شلة من الشماليين فاطرين وبضربو ضرب شديد في الفول (يكونو اصحاب اعذار والله اعلم) الجنوبي قام كورك في الشماليين الفاطرين: يا اكوانا يا شماليين دا سنو دا؟! ياكي انتو مجانين ولا سنو؟! انتو اسان سنو بياكل حق جنوبيين في رمضان؟!!! وأرسل لنا المحامي المشاغب زيكو نكتة ظريفة فقمنا بإدخالها في ورشة ود الدابي لسمكرة النكات فطلعت بالشكل الآتي: واحد سوداني صايم في السودان بحكي لي صاحبو قال ليهو: ياخي والله العظيم ما قادرين نفهم أي حاجة في رمضان دا ، ياخي كل عصرية في رمضان بنشوف حلقة مكررة من المسلسل السوداني الآتي: ناس بيتنا يرسلو لى جيرانا البي الحيطة الشمال عصيدة بى ملاح روب!! جيرانا البي الحيطة الشمال يرسلو لينا قراصة بى ويكة !! نرسل لي جيرانا البي الحيطة الجنوب القراصة حقت جيرانا البي الحيطة الشمال!! جيرانا البي الحيطة الجنوب يرجعو لينا عصيدتنا ذااااتا الرسلناها لى جيرانا البي الحيطة الشمال!! ياخ ما معقول دا فطور ولا غسيل اموال؟!!! فيصل الدابي/المحامي
أحدث المقالات (أوع تكتلو.. دا ما عمل ليك حاجة)!! بقلم عثمان ميرغنيمفوضية ضبط الدرجات العلمية..!! بقلم عبد الباقى الظافرحديث مع حنين بقلم أسحاق احمد فضل اللهشاهد على العصر بقلم الطيب مصطفىالكيان الصهيوني صانع الإرهاب محاربٌ له بقلم د. مصطفى يوسف اللداويلعناية.. قوات الشعب المسلحة السودانية ووزير الدفاع!! بقلم عبد الغفار المهدى
|
|